2 Hakorinte 5
5
1Tuna dimuka eshi apa mbo ha dhingununa thishashara thetu thopano, mbo tuna kawana matungo ghoshemwa mudiwiru. Agha ne mbadi hanu ha gha tenda, ene Nyambi thinda. No gha kara po roruheya. 2Apa tuna kupara muthisha‐shara, kutothima tuna kutothima. Yoyishi twe ne twa rura eshi, mbo tuna kawana mangambwathano ghetu ghomudiwiru. 3Mbadi tuna haka eshi mu tu shutaghure, no twimane thiheha kughutho waNyambi. 4Atwe tudi shime muthisha‐shara, mukuhethangana tudi. No kumuhotho tuna kufa, yoyi mbadi tuna himi kuthigha kaye kano. Tuna haka yomudiwiru kupiterera yopamuve. Eshi moyo ne ghu kone kwan̂itha yokufa. 5Oyu gha tu roghithera kambenene kano ne Nyambi. Kumataterero ghetu, gha tu pire Mupepo wendi. 6Yo tuna kukarera roruhe nomatjimapero ghokuyara. Twa dimuka eshi, rure ru tuna kukara muyirama shime, mbadi twa tunga shime kwaFumu. 7Yoyishi moyo wetu ne mumatawero ghudi, kadi mukumona. 8Atwe ne mumatjimapero ghokuyara tudi, hasha tu thighe matungo ghoyirama, ho tu katunge kwaFumu. 9Ene ngambi ngo tu tunge muno, ngambi kuya. Twa kara vene nomakurupero ghofotji ghano. Eshi tu pare thika di gha yihaka Ye. 10Ghuhunga, twahe ngo tu kone kemana kughutho ghodipuna dyondhango dhaKristusi. Eyi gha kone kuwana yomuhe popayitenda yendi yopamuve. Eshi ya karire ghuwa ndi, endi ghuyi.
Yitenda yomakushemwethaneno
11Atwe ne twa dimuka eshi, nye yina kuninga kukarera Fumu. Po tuna kuyereka kutjwathanitha hanu yinu yino. Nyambi, gha dimuka yighayara yetu. Ene name na dimuka eshi, namwe mbo muna nongonona mahimeno ghetu. 12Atwe ne mbadi tuna kukukugha twathinda karo papenu. Ene kuna kumupa manyamweno ghoshemwa ghokukwetu. Eshi mu kone kuhutha mahuthero kwamukakunyamwena yothishwaghameho, ne kadi kwamukakudhira kuhokoka. 13Ngeshi ngo twa ghundumukera mwimi, eyi ne yaNyambi. Ene ngeshi ngo yamumaghano ghetu ne, namwe karo kemo. 14Ruhakitho rwaKristusi ne kuthunda runa kututhunda. Yoyi tuna dimuka eshi, yofotji gha fererire waheya. Eyi ne kuninga eshi waheya ha fire pofotji nendi. 15Aye gha fererire wahe eshi, awa hana kupara mbadi hana kupara hathinda. Ne papendi yu ghawafererire, no kuwatumuna mukufa. 16Yo tuna kuyiningera eshi, kutunda pano, mbadi twa kona kutetera ghumweya kughunu wendi. Ngambi kenge twa teterire Kristusi kughunu wendi. Pano ne mbadi twa kona kumutetera karo. 17Ngeshi ghumweya ha kara waKristusi, yomunu ghomupya. Yokare‐kare ne yapwa. Ghupya ne ghoghudi po. 18Yoyiheya yi ne yirughana yaNyambi. Aye gha kushemwethanine thinda netu paKristusi. No gha tu pire yikarera yomashemwethaneno. 19Mbudhi dhomakushemwethaneno dha kara eshi, Nyambi gha shemwithanithire kaye nendi paKristusi. No mbadi gha pakererire ko yiharura yawanu. Yo gha tu pererire mbudhi dhino dhomakushemwethaneno.
20Eyi tuna kuyitendera yi, yoyi twa kara twayitumi waKristusi. Nyambi yo gha tu torora eshi, tu yi mu tendere. Atwe tuna kumukanderera muDina dyaKristusi eshi: Mukushemwithane naNyambi! 21Kristusi ne gha pirire murandu. Nyambi ne gha mu tendire thiharuri mudyango dyetu, gha kone kututhigherera mumakupakerero ghetu naKristusi.
Currently Selected:
2 Hakorinte 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
