2 Hakorinte 4
4
Hapostoli hana kuyuvitha Jesus Kristusi ghoFumu
1Nyambi gha tu fererire n̂eke papendi, no kutupa ghukareri ghuno. Yo tuna kudhira kutovoha. 2Po tuna kuthighera yikara yon̂anyi‐n̂anyi, eyi ya shwena thishe, eyi yina kutufitha honyi. Mbadi tuna kurughana nombango. No mbadi tuna kupemukitha n̂ando dhaNyambi. Ene ngambi kemo, atwe ne kuna kuhokora ghushemwa kuthitunumeho. No yo tuna kukutapera twathinda kwakehe yu gha dimuka Nyambi. 3Ngeshi mbudhi dhi tuna kuyuvitha ne dhapwa kufika nothihina, shimengwa dhapwa kufika kwawa ha yongara. 4Awo ne hakakudhira kutawa, awa ha yandherire maghano ghawo, kwawanyambi hokaye kano. Eshi ha dhire kumona munyenge, ghombudhi dhino. Edhi ne mbudhi dhodhiwa dhaKristusi, ghothishwi thaNyambi. 5Mbadi tuna kukuyuvitha twathinda. Ene Jesus Kristusi ghoFumu thinda. Twathinda ne twakareri wenu, muDina dyaJesusi. 6Nyambi yo gha ghambire eshi: “Kukene”. Yo gha pakire karo thishe mumitjima dhetu. Thi tu munekithe noyidimuka yoyiwa yaNyambi, eyi ya shwaghire mwaJesus Kristusi.
Ghushwi ghomutundimbe
7Atwe twa kara noghushwi ghuno mumwetu, twa kara yira tundimbe to kuyondaghuka wangu. Yoyishi ngcamu dhokupiterera ne dha shwagha kwaNyambi, kadi kukwetu.
8Muyoyiheya, hana kutunyandeka,
ene mbadi tuna kukasherera,
twafa honyi,
ene mbadi twa tovoha.
9Hana kutukutha‐kutha,
Nyambi ne mbadi ghana kutumwagha,
kutuwithera pamuve,
ene mbadi hana kutudhongonona.
10Yifa yaJesusi,
muyirama yetu tuna kuyishimba‐shimbera roruhe,
kemo dyo sho ghu kare moyo waJesusi
thishwaghameho muyirama yetu.
11Yoyi roruhe ha tu tapa mukufa, atwe twakamoyo mwaJesusi. Eshi ghu hokoke moyo waJesusi muyirama yetu yokufa.
12Eyi kuninga eshi, dyo gha rughana kufa mumwetu. Mumwenu ne moyo. 13Muyitjanga yemana ngeno: “Na tawire, yo na ghamberire.” Atwe, twa kara noMupepo yofotji oyu gha pindutha matawero. Yo twa tawera, no yo tuna kughamberanga karo. 14Twa yidimuka eshi, Nyambi yu gha tumunine Jesusi mwawafu, mbo ghana tu tumuna pofotji naJesusi no kutuhungumeka nenu kughutho ghodipuna dyendi. 15Yoyiheya yi ne muDina dyenu tuna kuyitendera. Eshi n̂eke dhaNyambi, dhivure kwawengi. Po sho gha vure karo matumero, naNyambi gha wane fuma.
Kupara pamatawero
16Pathinu thino, po tuna kudhira kutovohera. Ngambi kenge yina kwan̂a yirama yetu. Mwimi dhetu ne ghupya kehe diyuwa. 17Yinyanda yetu yomumoyo ghuno ne yipu no yina kupwa. Ene yo yina kuturetera ghuwa ghokupiterera yoyihe, no mbo ghuna karerera po. 18Meho ghetu, mbadi ghana kukambekedha yothishwaghameho, ene yokudhira kumona. Yoyishi yokumona ne yakapupi kamanana, yokudhira kumona ne ya thitungedhi.
Currently Selected:
2 Hakorinte 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
