2 Hakorinte 3
3
Hakareri hoghundambo ghoghupya
1Tu tangeo karo kukukugha twathinda ndi? Endi tu mu rawere pakumutjangera mbapira, yira hamweya ngambi yi mwa haka mwe? 2Amwe ne yamwe mwathinda mwambapira dhomarawero ghetu, edhi dhapwa kutjanga mumitjima dhetu. Edhi sho ha toye wahe no kudhitjwathana. 3Eyi ne kuyimonenena vene eshi, yamwe mwambapira dhaKristusi, edhi dhapwa kutjanga payikarera yetu. Kadi noingi, ene noMupepo waNyambi ghomuyumi. Kadi payikwere yomawe, ene mumitjima dhawanu. 4Eyi tuna kuyighambera yino, yoyishi paKristusi twa wana makurupero ghokuyara kwaNyambi. 5Kukwetu twathinda ne, mbadi twa kona kukughayarera eshi, n̂anyi kushwaghe thinu. Eyi ya tu fumanena ne, kwaNyambi ya tunda. 6Oyu gha tu tenderire yi ya tu fumanena, tu kare twakareri hoghundambo ghoghupya. Kadi pathitjanga, ene paMupepo. Thitjanga ne kupagha, Mupepo ne kuparitha.
7Muragho ghu ha tjangire payikwere yomawe, wa hokokire muyishamberera. Yishamberera yi ya shanine kutunda po wangu, ya rwedhimine thikuma murupara rwaMosesi. Kate ha dhirire Haisraghelite kukona kumukenga. Ngeshi ghukareri oghu wa tambire kuyifa, weyire rwingi mughuwa, 8ngepi di mbo ghudhira kupiterera ghukareri ghokutunda muMupepo? 9Ghukareri ghu ha teterire ndhango hanu, weyire mughushemwa. Ene ghukareri ghu ha thighererire hanu wa yakunukire thikuma kughushemwa. 10Twa kona kuninga eshi, ghuwa ghopakare‐kare, mbadi twa kona kughurikanyitha kughuwa ghu ghuna kupiterera pashadyarero. 11Ngeshi wa dhongonoka ghuwa ghuya wa rwedhimine, mbo ghuna rwedhima shime kupiterera pakutanga.
12Yoyishi oku shime twa kuruperera, tuna kutjinaghana po noghutjimapa ghoghukuru. 13Atwe ne kadi thika Mosesi yu gha kufikererire thihina kumeho ghendi. Eyi gha yi tenderire yi, eshi maghana sho di mone diko dyaIsragheli, edi sho thi dhongonoke thishe. 14Yighayara yawo ne, ya yandherire. No pashadyarero shime ya yandherera yighayara yawo, nothihina pakutoya ghundambo ghoghukuru‐kuru. Ene thihina thiya kuthifikura Kristusi, kwamunu yu ghana kutawa mumwendi. 15Ngambi pashadyarero karo, ngeshi ku hana kutoya miragho dhaMosesi, shime tha wa fikerera thihina kumaghano ghawo. 16Muragho waMosesi ne wa ninga ngeno: “Roruhe ngeshi yu ghana kupiruka kwaFumu, hana kumufikura thihina.” 17“Fumu” yu hana kuninga pano ne “Mupepo” no oku wa kara Mupepo waFumu ne, horo kwakara. 18Yodigho twahe, twa dimuka ghuhunga waFumu. Yoyi hana tu fikura thihina kurupara. Twaheya gha hima kutupituritha thikuma kuthishwi thaKristusi. Ghuwa ghu wa tu rwedhimenine, shime ha ghu runduruka kughutho. Eyi yo ghana kutenda Fumu ghoMupepo.
Currently Selected:
2 Hakorinte 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
