2 Hakorinte 2
2
1Yo na shwenenine nothinda kwiya kukwenu eshi, na ni mu dhingure karo muyitokota. 2Yoyishi ngeshi ha ni mu tokotitha, yidye ne keho yu sho gha ni shambererithe. Shimengwa yoyu na tokotitha me? 3Yo na yi mu tjangerire ne. Eshi na ha ni tokotithe hanu wa ha himine kunishambereritha. Yoyi na dimuka shemwa eshi, mwahe ne mwafiyaghuka. Ngeshi ku name na fiyaghuka. 4Kemo, na mu tjangerire yi muyikudhekera yoyikuru, no muwoma ghomutjima, no mudihodhi dyodikuru. Eyi ne ya kumudimukitha eshi, na mu haka me.
Mathigherero ghokwathiharuri
5Ene ngeshi ghumweya ha tendi yokuharuritha, mbadi yame ghana tokotitha. Yamwe mwaheya. Ene kadi mandunda, hasha hamweya homumwenu. 6Kwamunu ghokenge yo ndhango dhendi ne dhikukutu kwawengi. 7Ghuhunga kwamunu ghokenge yo ne, mu muthigherere no mu mutjokedhe. Yoyishi, maghana sho gha tokoterere no kutovoha. 8Po na kumukumbera eshi: Mu neghedhe ruhakitho kukwendi. 9Apa na mu tjangerire, ya karire mughuhunga eshi mu dimukerere mwe eshi, ngwa mwa ni kurupera, no mwa kara ghutawedhi muyoyihe yokukwange.
10Ngeshi ha mu mu thigherera thinu, name na kuthimuthigherera. Yoyishi ngeshi ha ni thigherera thinu me, kumahimeno ghenu na kuthitenda. Po gha karera Kristusi munongononi wange. 11Shatani ne mbadi gha kona kutuwitha. Yoyishi twa dimuka yiyedhaghura yendi yoyihe thiwana.
Mawineno ghombudhi dhodhiwa
12Apa na kumine muToroghasi ni yuvithe mbudhi dhaKristusi, Fumu gha ni yandhwererire yero. 13Ene mbadi na hedhumukire mutjima wange. Yoyishi, mbadi na ka wanine ko muyendhange Titusi. Yo na wa thigherire hange ni kayende kuMasedoniya.
14Keho ne matumero kwaNyambi! Oyu ghana kutuyenditha roruhe mundhira dhendi, yoyishi twe ne pofotji naKristusi. Papetu po gha tapathanitha yidimuka yaKristusi, yira thiwe thothiwa. 15Atwe ne yatwe twaghungongorwa, oghu gha tumekire Nyambi paKristusi. Thiwe ne tha tambire koyu ghana kupwa kughamwena noyu ghana kuyongara. 16Koyu gha yongara thiwe thothifu ethi tha reta kufa. Koyu hana kughamwena, thiwe thothiyumi, ethi tha reta moyo. Ene kwadye keho ya rikanyena yinu yi: 17Yoyishi atwe ne, kadi yira wingi wawamweya wa ha ghuritha n̂ando dhaNyambi. Atwe ne twa yuvitha n̂ando mughuhunga. No mughundambo naKristusi, no mumahimeno ghaNyambi no mukukarera po Nyambi.
Currently Selected:
2 Hakorinte 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
