2 Hakorinte 1
1
Mbapira Dhoghuwadi Kwawakakorinte
1Paghulusi mupostoli waJesus Kristusi, pamahimeno ghaNyambi namuyendhendi Timoteghusi.
Kwawambunga dhaNyambi homuKorinte, no kwawahe wa ha kara haNyambi homuAgaye yomuhe. 2Thin̂eke nothiraro thaNyambi ghoWihetu, naFumu Jesus Kristusi!
Matumero ghomunyima dhomaghukukutu
3Difumanekero, di yende kwaNyambi ghoWiha Hekekudyetu Jesus Kristusi! Aye yoNyambi yu gha mu fera n̂eke, no yoNyambi gha hengaghura mu kehe maghukukutu ghomahe. 4Aye gha tu hengaghura mumaghukukutu ghetu. Yodigho, twa kona kuhengaghura hamweya awa ha di mumaghukukutu. Awo tu wa hengaghure nomahengawero, agha gha tu hengaghurithire Nyambi. 5Yoyishi thika di kwavura kunyanda kwaKristusi mumwetu, kemo dyo gha vura karo mahengawero ghetu karo paKristusi. 6Ngeshi ha tu yereka wo, ghomahengawero ghenu no maghamweno ghenu. Ngeshi ha tu hengaghura twe, yamwe hana kuhengaghura no kumutanaritha eshi, mu kare noghudhughutjima muyinyanda yi twa nyandire twe. 7Kukwenu mwe tuna kumukurupera shemwa. Tuna dimuka eshi thika di mu di netu mukunyanda, dyomudi karo mumahengawero.
8Mwayendhetu, tuna haka kumudimukitha maghukukutu ghetu, ghomuthiko thaAsiya, agha twa ka wanine twe. Ghukukutu ghu twa ka wanine mo, wa pitererire mangcamu ghetu. Kate twa tovohire eshi, mbadi mbo tu para karo. 9Karo twa wanine mumwetu matungwero ghokufa. Ene mbadi twa kukuruperire twathinda. Makurupero ne paNyambi mukakutumuna hafu no kuwapa moyo. 10Aye yo gha tu shwaghithire mumaghukukutu ghomakuru gha no mbo ghana tu ghamwena karo. Papendi po gha tanarera makurupero ghetu. Naye mbo ghana tu ghamwena. 11Popo po muna kuturaperera namwe. Kemo dyo mbo dhi kara ndapero dhawahe, kukuturetera fiyaghudhi dhaNyambi. Ndani po mbo ha mu tumera hengi papetu.
Mapirawero ghodighano dyoruyendo rwaPaghulusi
12Pothidi thofotji thi thina kutunyamunitha twe. Muyidimuka yetu yokukwenu mwahe, twa yimanenine nomutjima ghoghuhe noghushemwa ghokwaNyambi. Yodigho mbadi ya tu hongaghurire yikara yawanu. Ene pathin̂eke thaNyambi. 13Yoyishi mumambapira ghetu, mbadi twa mu tjangera eyi mwa dhira kutoya ngambi kutjwathana. Gho na kukurupera eshi, mudiyuwa dimweya mbo muna yi tjwathanena yoyihe. 14Kate pano mwa tu tjwathana kamanana. Ene mudiyuwa di mbo gheya Fumu Jesusi, mbo muna shamberera thika di tuna kushamberera twe. 15Apa no yapwa kudimukitha eshi, ame ne ngo kare‐kare neya na ni mu dhingure. Eshi mbo na mu wane n̂eke paruwadi. 16Ame na hakire kumupita muruyendo rwange rokuMasedoniya, no pakahuka kuMasedoniya, ndani nomaghamweno ghenu ni tware ruyendo rwange kughutho kate kuJudeya.
17Ngwa na tambukithire apa na tendire dighano dino? Endi na karanga muyiyudhaghura yothighunu, apa na tawanga kumunu ghumweya eshi: “kemo” endi “kadi kemo?” 18Shemwa ngeshi Nyambi ne mukaghuhunga, n̂ando dhetu ne ngo mbadi dha kupitura ku “kemo” endi “kadi kemo?” 19Yoyishi Jesus Kristusi ghoMwana Nyambi yu twa mu yuvithire, name naSilvanusi naTimoteghusi. Mbadi ya kurikanyine ku kemo endi kadi kemo. Aye ne yokemo waNyambi. 20Aye ne yomaturekero: “ghoshemwa” ghaNyambi kuyoyihe. Yodigho papendi tuna kuninga kudifumanekero dyaNyambi eshi: “Amen.” 21Nyambi thinda yo gha tu nungitha pofotji nenu, pamuve ghoshemwa ghuno: eshi paKristusi. Nyambi thinda gha tu pongwera kukwendi. 22Gha tu tarekire tu kare yira ghugavo wendi. No gha tapire Mupepo ghoKupongoka mumitjima dhetu, yira thiturekera thi mbo tu tambura.
23Na kwitha Nyambi ghomunongononi wange, omu wa kurupera moyo wange. Eyi ne kuninga eshi, mbadi na mu thighire pakudhira kwiya kuKorinte. 24Mbadi tuna haka kumutendera muragho, yira haraghuri eshi mu tawe. Amwe ne mwa tanara roruhe mumatawero. Ene tuna haka kurughana pofotji nenu, mukurundurura fiyaghudhi dhenu.
Currently Selected:
2 Hakorinte 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
