2 Hakorinte 12
12
Yihokoka yoyimonameho
1Mu kukununeka ne mbadipo thinu. Ene oku shime ya karera kemo, dyo nidi name muyimonameho no muyihokora eyi gha tapa Fumu. 2Na dimuka murume yu gha kara waKristusi. Myaka dikumi nodhine dhina piti po, ha mu dhamunine no ka mu tura muParadishi. Murume yo, endi noyirama yendi ndi, endi mbadiko yirama, kadi ya dimuka me. Shimengwa Nyambi thinda keho. 3-4Na dimuka karo, murume yu ha mu dhamunine ha mu tware kuParadishi. Name temba endi noyirama yendi, endi mbadiko yirama kadi ya dimuka. Shimengwa Nyambi keho yo gha yi dimuka. Aye gha yuvire man̂ando ghokudhira kukona kughamba munu. 5Kwamurume ghokenge yo, na shamberera thikuma. Ene kadi yishamberera yokukwange nothinda, yokughukashu wange. 6Ngambi ngepi di sho ni shamberere, mbadi sho ni kare karo nomuthuta. Yoyishi ghushemwa na kughamba. Ene mbadi na haka kunirawera ghumweya, edi ghana kumona yitenda yange, no ngepi di ghana kuyuva yighamba yange. 7Ngambi kemo ne kadi pamurandu ghoghukuru ghoyihokoka. Yodigho mbadi sho ni kare nodihuna. Thofotji tha ni shingire, yoyu mukamushongwe waShatani pakunipumura nomakonye. 8Paruhatu na raperire kwaFumu eshi, gha yi ni tundithe yinyanda yi. 9Mahuthero ghendi ne eshi: “Thin̂eke thange ne tha kurikanya. Nongcamu dhange, dha rughana mumoye shemwa oku ghuna kasha.” Yo na kushambererera thikuma pakutanga kughukashu wange. Eshi ngcamu dhaKristusi, dhi kare maghamweno ghange. 10Po na kushambererera kughukashu, kudi shamu, mukunyanda, mumakuthakuthero no mumaghukukutu ghomahe, pamurandu waKristusi. Yoyi ngeshi ha ni kasha, ndani na kutanara keho.
Yikudhekera yaPaghulusi yokumbunga
11Pano na tjinaghana yira nomuthuta. Eyi ne yamwe mwa yi ni thinenekire. Ghuhunga ne ngo yamwe mwa ni ghamberire. Yoyi ngambi kenge nidi nothimango, mbadi thi na thighire kunyima dhawapostoli mwene. 12Yinu yokudimukitha ghupostoli ne, na yi tendire noghudhughutjima ghoghukuru kukwenu: Karo na tendire yitetukitho noyitenda yongcamu. 13Omu mo ha dhirire kumurughanitha thiwana, thika mambunga ghamweya. Shimengwa yame pithange na dhirire kumuretera kunyanda kokukuru ndi? Mu ni thigherere ghuyi wange ghuno!
14Agha no ne ghomakwindukero ghoghuhatu keho eshi, niye kukwenu. Ene mbadi na kuna munyeghenyitha: mbadi na kushana manyinga ghenu, ene yamwe vene. Yodigho, kadi hana keho hokukoneka hawihawo, nawawihawo karo kwawana. 15Ame na himi shemwa kumupa yoyihe yomoyo wenu. Shemwa ngambi yame nothinda karo. Ngeshi ha ni mu haka thikuma kupiterera di ha dhira kumuhaka hamweya. Po mwa karera noruhakitho rorupu kukwange ndi?
16Ghuhunga ne mbadi na mu ghowithire. Amwe ne mwa kona kughayara vene eshi, na nyanyamine no na yi mu shutwerire. 17Ngwa na kutungekire nothinda pamanyinga ghenu, apa na tumine ghumeya yofotji ghopawamweya ndi? 18Ame na kandererire Titusi eshi gheye kukwenu namuyendhendi ghumweya. Shemwa oyu Titusi ne nomanyinga ghenu gha kuparithire ndi? Mbadi twa rughana pofotji mumupepo yofotji ndi, no mbadi tudi mumuro ghofotji ndi?
19Shemwa muna yidimuka eshi, kare twa yekedha kumuvatera ndi? Kadi kemo. Eyi tuna kuyighambera yino, mukukarera Nyambi no mughundambo wetu ghomwaKristusi. Mwahakwa, yoyihe yi tuna kutenda, pamurandu ghomidhimu dhenu eshi dhi tanare. 20Ame ne na yapa eshi apa na kwiya, ngwa mbadi na kumuwana thika di na hima. Na yapa kuman̂anani, kughuva, kuhuka, munyima, kupira makukonekero, ghumu, maghupata, kashongo-shongo, dihuna nothivunganyi. 21Karo na yapa eshi, apa mbo niya kukwenu karo, Nyambi wange na kuna mbirupitha, no mbo na na tokota thikuma kumaruvedhe gha mwa harura. No kupira ghukushuki, mukudhira kutawa yihonga no kashongo‐shongo, kate mwa dhirire kupiruka nomakwerero ghokuyara.
Currently Selected:
2 Hakorinte 12: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
