2 Hakorinte 11
11
Paghulusi nawapostoli hombango
1N̂anyi‐n̂anyi, na haka eshi mu dhidhimeke kamanana kughuthuta wange. Shemwa mu ni dhidhimeke!
2Ame kukunga na kumukunga noghutoghoro ghu wa tunda kwaNyambi. Yoyi amwe mwa kara yira mushengeteya, oyu na tapire kwamurume gha kare mbandeke dhendi noyu na kumutwarera mundjewa‐ndjewa. Murume yu ne Kristusi. 3Ame ne na yapa, maghana ya kuyemburuka yighayara yenu, pamurandu ghokupira mayakunuthero no makutapero ghoshemwa ghokwaKristusi. Thika di wa mu hongaghurire Eva, ghuringi‐ringi ghothiyoka. 4Eyi na kuyighambera yinu yino kukwenu, maghana sho mu kashe wangu, apa mbo gheya ghumweya oyu mbo gha yuvitha Jesusi ghowayenaye, kadi yu twa yuvitha twe. Namwe kemo muna kutumbura wangu mupepo wagho, no mbudhi dhadhonadho kadi dhi mwa tamburire kukwetu. 5Ame ne na dimuka shemwa, mbadiko thi na mu dhinda thawapostoli hoshemwa. 6Ngwa ngambi kenge twa dhira kukara twayaghuri hoshemwa, mukudimuka mbadi twa kara munyima twe. Yino twa yi mu tongweranga kehe pano, no twa yi mu neghedha pamihingo dhodhingi.
7Ame na mu yuvithire mbudhi dhaNyambi, kupira nothiruwera. Na kumbirupithire, ni kone kumuyeyura. Ngwa nepithire thinu me? 8Pakumukarera mwe, na tamburire yiruwera yombunga dhimweya, ngeshi kemo ne kwidha nedhire me ndi? 9Apa na karire kukwenu, na pirire dinyinga. Ene mbadi na kenyaghukithire ghumweya. Yoyishi hayendhange wa ha tundire kuMasedoniya, hana monine kunyanda kwange. Na konekire no mbo na koneka shime kughutho, eshi mbadi mbo ni mu twamitha muthinu thothihe. 10Payinu yino po na kunyamwena thikuma. Gho na kumanitherera eshi, ngeshi ghushemwa waKristusi ne mumwange ghudi. Ngo mbadiko muAgaye yu sho gha ni piterere. 11Pashanye ne? Yoyishi mbadi na mu hakire ndi? Nyambi ne gha dimuka eshi na mu haka.
12Thika di na kutenda pano, dyo mbo ni rundurura yitenda yange. No yo mbo nitenda karo kwawa hana kushana kukufumaneka eshi, hapostoli yira yatwe. No kehe mayedhawero ghayo ne mbadiko. 13Hanu ho kenge yo ne, hapostoli hombango. Awo ne ha rughananga noyishewe, pakukunegha eshi hapostoli waKristusi. 14No mbadiko yu sho gha yi tetuke! Shatani naye ghana kukunegha thinda, yira muengeli ghothishe. 15Yodigho, kadi ghuyi eyi ha kuneghedha hakareri wendi, yira hakareri hoghuhunga. Paghuhura mbo hana wana ndjambi dhoyitenda yawo.
Yinyanda yaPaghulusi yoghupostoli wendi
16Shime ha ni hukuruka eshi: Mbadiko yu sho gha kone kughayara eshi nomuthuta me. Ngambi pamweya muna kunimona vene yira nomuthuta, ene mu ninge name ni ghambe thikuma kamanana. 17Yino na kughamba ne mbadi ya tunda kwaNyambi. Mbadi kemo, eyi na kughamba pano yira nomuthuta. Mukunongonona shemwa eshi na kara nodyango dyofuma dhange. 18Yoyishi padi hengi wa hana kughambitha kumuve wawo ghopathighunu thikuma. Name karo mbo na ghamba thikuma. 19Amwe mwa kara nomaghano ghokemo, mwa dhidhimeka popo vene mughuthuta. 20Mwa dhidhimeka, ngeshi kumutenda munu yira mwapika, ngeshi kumukungura, ngeshi kumwangera, ngeshi kumupetha thikuma, ngambi kumungcambura ghumweya murupara. 21Mu ninge name ni dimuke ghuyi wange, eshi twa kashire muyinu yokemo!
Pano na kughamba yira muthuta: Kehe thinu thi ghana kutokomena munu eshi, thi munyamunithe, name tho thina kuninyamunitha thotho. 22Awo ne Haheburayi ndi? Name karo. Awo ne Haisraghelite ndi? Name karo. Hanahoka waAbrahamu ndi? Name karo. 23Hakakukarera Kristusi ndi? N̂anyi‐n̂anyi pano me, kughamba na kughamba yira mukakupira maghano: Name karo ne! Na rughanine thikuma, na karire muman̂otwa rwingi, na wanangire kehe pano mapumu ghomengi, na karangire rwingi mumaghukukutu ghokufa no kupinduka, 24kwaWajuda na wana me parukwoko matjupa makumi mane, 25paruhatu na wanine mahumbithero ghopayirama norofotji ha ni vukumine nomawe. Paruhatu na rowerire nothikepa, no parofotji ne mudikuruviya mutenya noghuthiku.
26Rwingi na karire mumaruyendo no mumaghukukutu: maghukukutu ghomarware maghukukutu ghawakamukungu, maghukukutu ghohange no maghukukutu ghawahayidena, maghukukutu ghumumbara no maghukukutu ghomumuthitu, maghukukutu ghomumaviya no maghukukutu ghokwawayendhange hombango. 27Ethi, tha karire kukwange thirughana thothikukutu, no na wanine ghukukutu thikuma. Rwingi na karire muyinhwararo no na fire ndhara nodinota, noyidya temba, na pirire mondo ngambi makufiko ghokunighamwena kumepo. 28Kadi pithayo yoyi keho noyitokota yoyingi yokehe diyuwa, no yikudhekera yokwawambunga. 29Ngeshi ha hasha ghumweya, kukuyuva name eshi na kasha. Ngeshi ha harura ghumweya, na kukuyuva nothinda yira mumudiro nidi.
30Ngeshi ku hana kunyamuna ndani, name na kunyamuna, ene kughukashu wange. 31Nyambi ghoWiha Fumu Jesus Kristusi, ghana yidimuka eshi mbadi na kughamba mbango. Kukwendi makughero kuroruheya!
32Apa na karire muDamaskusi, gha kungire mbara mukadyango dyafumu Aretasi no ha shanine kunikwata. 33Ene pambadi dhondhugho, pa karire kambenene po ha ni tupekedherire muthikote, ho na parire mumoko ghendi.
Currently Selected:
2 Hakorinte 11: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
