2 Hakorinte 10
10
Paghulusi ghana kughamwena ngcamu dhoghupostoli wendi
1Yame Paghulusi nothinda na kumutongwera eshi, ame ne na rughanine noghudhughutjima, apa na karire nenu kate twa kuyakunukire. Mu Dina dyaKristusi ghomukakukufupi‐pitha no ghomunongo na kumukanderera. 2Mwa ni thineneka ni kare ghukenya, ngeshi neya kukwenu. Shemwa na kumutongwera me, na kona kukara nonyinya koyu ghana kuturundera eshi twe ne, kuna kurughana pamahimeno ghothighunu wetu. 3Kutongwera na kumutongwera eshi, ngambi kenge twa para muyirama yothighunu, mbadi tuna kutenda yita noyirwitha yoyirama. 4Yirwitha yoyita yetu ne kadi yirwitha yamunu. Ene yirwitha yaNyambi eyi ya kara nongcamu, yokukona kuyungununa matungo ghondhika. Oyo ne yo tuna dhimitheranga yighayara, 5no kehe meman̂anyeno ghodihuna dyokughudimuka waNyambi. Atwe, tuna kwatanga kehe dighano dyenu eshi, di kare ghutawedhi kwaKristusi. 6Natwe tuna kuroghithera karo mukurwitha, kehe thino tha pira ghutawedhi, ngeshi ku wa rikanya ghutawedhi wenu mwathinda.
7Amwe muna kumona mutara ghothinu ghofotji keho. Ngeshi ha nongonona ghumweya shemwa eshi, kwaKristusi gha hatera. Gha dimuke eshi natwe karo twa hatera kwaKristusi thika ye. 8Ngwa ngambi kenge na yukire kamanana, payitenda yange yi gha ni pire Hekudyange. Mbadi mbo ni fa honyi. Hekudyetu gha tu pire ngcamu, dhokumushokeka mwe. Kadi dhokumuyungununa. 9Yo na kudhira kumuthunda eshi mbadi na dhirire kumuyapitha nomambapira ghange.
10Ha yininga eshi: “Mambapira ghendi ne gha ghushemwa no makukutu thikuma. Ene ngeshi netu ghadi thinda, muturumuthi no man̂ando ghendi ne gha pira mudyo.” 11Munu ghokughamba kemo, gha kone kudimuka eshi, mbadiko makutjakero pakatji koyi twa tjanga mumambapira, apa twa mu yakunukire, no yi tuna kutenda apa tudi nenu. 12Atwe mbadi tuna kuyiyereka shemwa eshi, mu tu pakerere pofotji endi mu tu rikanyithe kwawanu hamweya awa ha dhira kudimuka yighayara yawo. Awo ne hathuta: No ha kuyedhekeritha hathinda nothiyedhekeritho thawo, no ha kurikanyitha hathinda. 13Ene kenge no tudi, mbadi mbo tu thigha fuma dhetu. Atwe mbo tuna kara muthirughana thaNyambi, ethi gha tu rikanyithire. Namwe karo mo mwa kara. 14Yodigho, atwe mbadi twa reghire mururwani wetu apa tweyire kukwenu. Kare tweyire kukwenu na tu mu yuvithe mbudhi dhaKristusi. 15Pamurandu wenu, po tuna kudhirera kuthigha thirughana thetu. Yoyishi kadi thawamweya thi thina tupa fuma. Tuna kurupera vene eshi matawero ghenu ne, mbo ghana vuru, ho mbo tu kare roruheya nenu mufuma, no muthirughana thetu thofotji. 16Ndani po mbo tu ka yuvitha karo mbudhi mumikunda dhothambodiya, pathirughana thetu ethi tha tenda hamweya.
17Yitjanga ne ya ninga ngeno: “Oyu ghana kufumana, gha fumanene mwaFumu.” 18Munu ghokudhidhimeka yoyihe, mbadi ghana kukukugha thinda, oyo ne Fumu Nyambi thinda gha mu kugha.
Currently Selected:
2 Hakorinte 10: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
