1 Timoteghusi 5
5
Mashingero ghoghudithi
1Mukuru mbadi wa kona kumuhongaghura momuyi, ene mu shinge yira wiho. Shinge hangaghu yira haminoye. 2Hakurukadhi yira hanyoko. Nawashengeteya yira han̂amba dhoye, mudikuto dyodihe.
Hadidhi
3Mu kunge hadidhi awa ha mwagherera pithawo shemwa. 4Ene ngeshi mudidhi ha kara nawana ngambi hekurwendi, gha wa honge pakutanga no kuwaneghedha yikutekera yokwawapa wo. No ha huthe yoyihunga kwawakerekandongo wawo. Yoyishi, eyi ne ghuhunga no yarogha kumahimeno ghaNyambi.
5Namudidhi yu gha kara mughuthighana no mbadiko yu ghana kumukorera, makurupero ghendi tha tanarere paNyambi, no gha dhidhimeke mukukuhema mumandapero mutenya noghuthiku. 6Ene ngeshi mudidhi ha para murungu, kare ghafa, ngambi kenge di ghadi nomoyo. 7Dhundeke karo yinu yi eshi, ngo wahe ha pire murandu. 8Ngeshi ghumweya ha dhiri kutokomena diko dyendi, oyo ne gha hamura matawero ghendi. Thikuma pakuthigha didhiko dyendi no ghuyi wendi wa piterera wawa ha dhira kutawa.
9Mudidhi gha kona kukarera mumbapira dhawadidhi, ngeshi ku ghadi nomyaka makumi kwoko nodyofotji, noyu gha karire no katughuru yofotji. 10Aye gha kone kumudimukera payitenda yendi yoyihunga. Yira kukorera hanendi thiwana, kuyarera hagenda, noyu gha yoghire mapadhi ghawatawi, noyu gha ghamwenine hakakunyanda no kutenda ghuhunga popangcamu dhendi.
11Hadidhighana, mwa wa tambura. Yoyishi, yirumbera yawo yoyirama, kukona kuwathighitha Kristusi no kuhaka po ruyeko. 12Munyima hana kuwana murandu eshi, ha tjorire maturekero ghawo ghokuKwendi pakutanga. 13Karo wo hana kuhonga no kupetha ruvedhe rwawo, pakuyendaghura tunda dighumbo yenda dighumbo. Awo karo mbadi ha kara no ghuva pithagho. Ene ha kupambeka karo dishawana no yighamba yoghunya‐nyami wawo. Karo ha ghambanga kuyinu yokudhira kukona kughamba munu. 14Yoyishi ame na haka eshi, hadidhighana ha yeke karo. Hereke hana, ha raghure thiwana mayugho ghawo no maghana sha wane yihonga yoyimango yokukwetu. 15Padi hamweya awa ha panguka kare kwaShatani.
16Ngeshi ha kara mukamadi ghomutawi nawadidhi padidhiko dyendi, gha kona kuwakorera. Aye mbadi gha kona kukambeka maghukukutu pawambunga eshi, mbunga dhi kone kughamwena hadidhi awa ha thigha pithawo mughuthighana.
Haghamweni hongirishe
17Haghamweni hongirishe awa ha tapa yiyendithitha mwene, ha kona kuwana fuma. Thikuma ne awa ha rughana nongcamu muyiyaghura no muyihonga. 18Yoyishi Yitjanga ya ninga eshi: “Wa paka kashasha kukanwa kopuru yu ghana kurughana.” No karo eshi: “Murughani gha fumanene kudjambi dhendi.”
19Mbadi mwa kona kutawa kumurandu ghu hana pa mughamweni ghongirishe. Shimengwa pana kara hatunonga hawadi ngambi hahatu. 20Awa hana kushinya, wa kona kuwahumbitha thitunumeho. Kemo sho ha kone kuyapa hamweya.
Yirughana yimweya
21Ame kurawera na kukurawera kughutho waNyambi no kughutho waKristus Jesusi, no kwawaengeli hohatorori eshi, koneke muragho ghu mukupira difurumeko ghumweya, kughutho ghoyinu no thighe dinyonga.
22Mbadi wa kona kutambukitha kukambeka moko paghumweya, no wa kwingeneka mumurandu waghumweya. Ene we, ghu kone kukukongora eshi ghukushuke ndani.
23Mwa nwa meyu pithagho. Ne mu yereke vinyu karo kamanana, kudira dyoyikorwa yokehe pano.
24Hanu hamweya ha haruranga, kate kuwa piterera maharwero ghawo kughutho ghondhango. Maharwero ghawamweya ne gha hokokanga munyima. 25Kemo karo ya kara yirughana yoyihunga. Eshi wahe ha kone kuyimona. No yokudhira kumona nayo mbo yina hokoka.
Currently Selected:
1 Timoteghusi 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
