1 Timoteghusi 4
4
Mapemukero ghomunako dhohura
1Ene Mupepo ghuna kudhemenena eshi, mumanako ghohura hamweya mbana yongara mumatawero. No mbana thunena kumipepo dhokwirwitha no kukakatera kuyihongaphura yaShatani. 2Hapemuki wa ne hakadifurumeko dyombango, awa hondeka yighayara yawo. 3Awo ha shinga hanu kuyeka, no ha rawera hanu kukudya yidya yimweya. Ene Nyambi gha tendire yidya eshi, mukakutawa no kudimuka ghushemwa, gha yidye nomatumero. 4Yoyihe yi gha tendire Nyambi ne yarogha roruhe. Mbadiko thokutambura nomatumero ethi sha mwagherere. 5Yoyishi, yapwa kupongokitha pandapero no pan̂ando dhaNyambi.
Mukareri ghomuhunga waKristus Jesusi
6Ngeshi ho yuvitha yinu yino kwawayendhetu, mbo ghuna kara ghomukareri ghomuhunga waKristus Jesusi. Oku we ghothinda pakukukorera noman̂ando ghomatawero no yihonga yoyihunga, omu wa kununga we. 7Ene kuyinu yokudhira kukushuka, no kuyithimwetwedha yombango, wa kona kushwagha ko we. Ene kutwayerithe ghothinda mukupara muyipara yoghukriste. 8Yoyishi yitwayeritha yoyirama, mudyo wayo ne ghupu. Ene thishongero, tha kara muyoyihe nomudyo ghoghukuru. Kuninga eshi, mo mwakara maturekero ghomoyo ghopan̂anyi‐n̂anyi no ghokughutho. 9N̂ando dhino ne dhamakurupero no dhafumana kudhitambura thiwana. 10No thitambo thi, tuna kutokomena twahe nongcamu dhetu dhodhihe no tuna kurwa thikuma. Yoyishi makurupero ghetu ne, mwaNyambi ghomuyumi gha kara. Aye yoMushuturi wawanu wahe. Thikuma po ne wa ha tawa.
11Yinu yi wa kona kuyiwarawera hanu no kuyiwahonga. 12Mbadi ha kona kukwina yoyishi ghomwanuke. Ene kare thitamenedhi thawatawi, muman̂ando no muyikara yoye, muruhakitho mumatawero no mughukushuki. 13Kon̂otwedhe kenge yo mukutoya Yitjanga. Mukuyaghura no mukuhonga kate pa mbo niyera. 14Wa petha thitapa thothin̂eke ethi wa wana. Ethi ne wa thi wanine muyiyaghura yopan̂ando dhawapumbi, no pakukambeka hakungi hongirishe moko ghawo papoye. 15Dhemenene payinu yi. No pare mumwayo kate ha kone kumona wahe eshi, eyi ne yirughana yoye. 16Ku koneke ghothinda muyipara yoye no kuyihonga yoye. Ho kare ghudhughutjima mumwayo. Yoyishi, ngeshi ho tendi yinu yi, ghuna kukughamwena ghothinda, nawa hana kukutegherera.
Currently Selected:
1 Timoteghusi 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
