1 Timoteghusi 6
6
Hapika
1Hatawi awa ha kara kwishi dhodjoko, ha kona kufumaneka hahekudyawo roruhe. Yoyishi maghana sho gha shwahure ghumweya Dina dyaNyambi no yihonga yoGhukriste. 2Hapika wa ha kara nawahekudyawo hohatawi, mbadi ha kona kuwena pamurandu ghoghuyendha. Awo ha kone kuwarughanena thiwana. Yoyishi awo ne ha kara pofotji mumatawero no muruhakitho nawahekudyawo wa ha wa nongopa.
Yihonga yombango no ghutungi ghoshemwa
Yinu yino yo sho kone kuhonga kwawanu no kuyiyuvitha. 3Ngeshi koghadi yu ghana kuhonga yayo‐nayo, no kadi nomanando ghondjewandjewa gha Hekudyetu Jesus Kristusi noyihonga yothishongero thetu, 4aye ne mukadihuna no ghapira maghano. Yoyishi, gha kara noyikorwa yoghumu. No mepwero ghodikanyi noman̂anani ghokuman̂ando. Omu dha tunda nya, mvo, dishamu, yihimadhona, 5yita yishipu, yokuyongaritha maghano ghawanu no hedha ghushemwa wawo. Awo ha ghayara eshi, thishongero ne thinu thokutenditha manyinga ghoshosho? 6Thishongero ne tha kara shosho dhishokuru, ngeshi ha shamberera ghumweya noyi ghadi nayo. 7Yoyishi twe mbadiko thi twa reta muno mukaye, no mbadiko thi mbo tu shimba karo. 8Ene ngeshi ha tu kara noyidya noyivata, twa kona kuhedhumuka. 9Keho awa ha hima kukara hatungi, hana kuwa mumayerekero no mumighodhi noyirumbera yoyishavina no yoyimango eyi yina kuwitha hanu mughuyi no mumathimbameno. 10Ene didovo dyomanyinga ghombudhi, ghoghuyi ghoghuhe. Hamweya ha kutha‐kuthire manyinga no munyima kokupemuka kumatawero ghawo. Payinu yi yokenge yo, po ha wanine hathinda yinyanda yoyikuru.
Makoghawero ghomahunga ghomatawero
11Owe keho, ghokatughuru waNyambi, yakunuke kuyinu yino. Tambe kughuhungami, kare mbuyo dhaNyambi no shimbe matawero, ruhakitho dhidhimeke no kare no ghuturumuthi. 12Kondjere mun̂anani dhodhihunga nongcamu dhoye dhodhihe, mbo wane moyo ghororuheya. Eyi ne yo gha kwithera Nyambi, nowe wa nongonona manongweneno ghomawa kughutho wawatunonga hohengi. 13Eshi, kughutho waNyambi oyu gha tapa moyo kuyinu yoyihe no kughutho waKristusi, oyu gha tapire ghunongononi ghoghuhunga wendi kughutho waPontius Pilatusi, ho na kukurawera me yino: 14Kunge muragho mukupira nyata no yiyavingera temba, kate kumuhokokero waHekudyetu Jesus Kristusi. 15Mwiyero wendi, mbo ghuna kara panako dhokurikanya. Po ghana kuyiroghithera Nyambi ghomunongo noMuraghuri ghopithendi. Fumu wawafumu no Fumu wawaraghuri. 16Aye pithendi yo gha kara nomoyo ghokudhira kufa. No gha tunga muthishe thororuheya. Mbadiko munu yu gha mu mona, ngambi ghokukona kumumona. Kukwendi difumanekero nongcamu dhororuheya! Amen.
17Mu rawere hatungi homukaye eshi mbadi ha kona kuhuna dihuna. No karo eshi, ha kurupera kukunyingera ghutungi wawo ghushidimukera. Ene ha kurupere Nyambi oyu gha tupa ghutungi ghoghuhe no kutuvigharitha. 18Mu wa tjokedhe mukutenda ghuhunga, mukukara ghutungi muyitenda mwene, kukara ghutapi no mu mukuyerathana. 19Kemo sha kupungwere yimuna yokughutho eshi, mbo ha wane moyo ghoghushemwa.
20Timoteghusi, kunge thiwana ethi ha kukuruperitha. Ndhanye yighambaghura yoyimango no yokupira mudyo, no yikuyodhingana “yokudimuka” thika di ha yitoya eshi yaghuyero. 21Padi hanu wa ha tawa kudighano di. No kemo dyo ha yongaritha matawero ghawo.
Thin̂eke thi kare nenu!
Currently Selected:
1 Timoteghusi 6: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
