1 Timoteghusi 3
3
Hayendithi hombunga
1N̂andodhino ne dhaghushemwa: ngeshi ha himi ghumweya kukara muyendithi ghombunga, gha kona kutokomena thirughana thothiwa.
2Muyendithi gha kona kukara mundondoro. Aye gha kare nomukamadi yofotji keho, gha kuruke, gha kare nomaghano, gha shongomene, gha kare mugendandambo no gha dimuke kuhonga. 3Aye mbadi gha kona kufarera muyinwa, endi muyirwa. Ene gha kare muhunga, mukathiraro no gha kara ghumu nomanyinga. 4Gha kone kukoneka thiwana didhiko dyendi no gha kare nongcamu dhomuhingo ghoghuhunga, muyinu yoyihe kwawanendi. 5Karo ngeshi ghumweya mbadi gha dimuka kutokomena didhiko dyendi, ngepi di sho gha kone kuyenditha mbunga dhaNyambi? 6Aye mbadi gha kona kukara munu yu nga wana matawero pawangu‐wangu. Munu ghokenge yo, gha kona kukara dihuna no ndhango dhendi mbo dhina kara pofotji nondhango dhaShatani. 7No karo kwawanu wa ha dhira kukara mumbunga, gha kunegha yira munu ghombunga. Yoyishi maghana sha mu yodhingane no maghana sho ghawe mukashaka kaShatani.
Haghamweni hombunga
8Karo kemo eshi haghamweni hombunga, ha kare noyipara shemwa. Awo, mbadi ha kona kupiraghura yighamba yawo no ha kara hayidakwi, endi didovo dyokughushwi. 9Awo ha kone kukwata mughuhunga kuyihokora yoghushemwa ghomatawero. 10Pakutanga, awo ne ha kona kuwarondonona thiwana, thiwana koyi yawafumanena, no ngeshi mbadiko ghumweya yu ghadi nothinu kukwawo, ha kona kukara haghamweni.
11No kemo dyo sho ha kare hakamadi noyikara yoyiwa. Ha thighe ghuhothi, ha turumuke no ha wa kurupere muyoyihe.
12Mudiyakoni, gha kone kukurupera, mwamukamadi wendi no gha raghure mughuhunga hanendi no hendi. 13Yoyishi awa hokukarera thiwana yira hadiyakoni, ha kuyandja hathinda mudyango dyokuyara dyomumbunga, nomatjimapero ghomakuru mwaKristusi.
Mahokokero ghoghushemwa ghomatawero ghetu
14Ame kutjanga na kukutjangera yinu yino, ngambi kenge na kukurupera eshi, kukoye na kwiya. 15Ngambi kemo ngeshi ngo ni rangape kwiya, wa kona kuyidimuka eshi ngepi di gha kara munu mughundambo naNyambi. Awa ne wo hambunga waNyambi ghomuyumi. Hambunga ne wo hashimbi no ha kungi hoghushemwa. 16No ya kara po eshi, n̂ando dhodhihe dhokuyihokoka yokughushemwa ghokuthishongero thetu ne dhikuru thikuma.
Aye gheyire thika munu mukaye,
paMupepo ghapwire kuhungeka,
kwawaengeli gha kuhokorire Ye,
Aye ha mu yuvithire kwawahayidena,
mukaye kokaheya ha mu tawire,
no ghapwire kudhineka muthishe.
Currently Selected:
1 Timoteghusi 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
