1 Johannesi 5
5
Ruhakitho no matawero
1Kehe yu gha tawa eshi, Jesusi ne yoKristusi, ghoMwana Nyambi no kehe yu gha haka Wihe, gha haka karo hanendi. 2Po sho tu dimukere natwe eshi, twa haka hana Nyambi, pakuhaka Nyambi no pakukumitha mo miragho dhendi. 3Ruhakitho rokwaNyambi, rwa kara ghutawedhi kumiragho dhendi. Karo miragho mbadi dha kara ghukukutu mukudhi kumitha mo. 4Yoyishi, kehe yu gha kara mwana Nyambi, gha kona kuwitha kaye aka ka kara mudiharwero. 5Nane ngo dye ghokukona kuwitha kaye. Kadi yu gha tawa eshi, Jesusi ne Mwana Nyambi ndi?
Ghunongononi ghokwaJesus Kristusi
6Yofotji keho yu gha thikera pameyu ghodiyoghero nomanyinga ghoyifa ne, Jesus Kristusi. Ene mbadi gheyire nomeyu pithagho, nomeyu nomanyinga gheyire. Mupepo ne yomunongononi wayo. Yoyishi Mupepo ne ghushemwa. 7Pohadi hahatu awa ha yinongonona, 8Mupepo nomeyu nomanyinga, no ghushupi wa‐wa hashahatu ne wa rikanyenena. 9Atwe ne twa tambura ghushupi wa wanu hahatu wa. Yoyishi ghushupi waNyambi ne wa piterera. Kuninga eshi Nyambi thinda ghana kuyinongonona, nomanongweneno gha ghokwaMwanendi. 10Oyu gha tawa mwaNyambi gha kara noghunongononi, mumutjima wendi. Ene yu gha dhira kutawa mwaNyambi, Aye ne gha mu tenda gha kare mukambango. Yoyi mbadi gha tawa ghunongononi ghu gha tapa Nyambi ghokwaMwanendi. 11Ghunongononi ne ghuno eshi: Nyambi ne gha tu pa moyo ghororuheya. Moyo ghororuheya ghu ne mwaMwanendi wa kara. 12Oyu gha kara naMwana, gha wana moyo. Oyu gha dhira kukara naMwana Nyambi, mbadi gha wana moyo.
Thitambo thombapira dhino
13Ame kutjangera na kumutjangera mbapira dhino eshi, mu kone kudimuka amwe mwa wana moyo ghororuheya, namwe mwa tawa mwaMwana Nyambi.
Yikumbera
14Pan̂anyi‐n̂anyi twa kona kuhenya kwaNyambi noghutjimapa. Yoyishi Aye, gha tu yuverera ndapero dhetu, ngesni ha tu tendi kehe thinu pamahimeno ghendi. 15No ngeshi twa dimuka eshi, kuyuverera ghana kutuyuvereranga mandapero ghetu, oku tuna kumukumbera yinu, twa kona kudimuka eshi tuna kuwana kehe thi tuna kukumbera kuKwendi.
16Ngeshi ghumweya ha mono muyendhendi ghana kuharura yokudhira kutwara kukufa, gha raperere, naNyambi mbo ghana tapa moyoghororuhe, kwamuyendhendi. Eyi ne yawa ha tenda maharwero, awa ha dhira kutamba kukufa. Poghadi maharwero ghokukona kureta yifa. Yo na kuninga me eshi, gha kona ndani kuraperera. 17Ghuyi ghoghuhe ne maharwero. Ene poghadi maharwero ghamweya agha gha dhira kutwara kukufa.
Atwe ne twa dimuka Nyambi ghoshemwa
18Atwe twa dimuka eshi, oyu gha kara mwana Nyambi mbadi gha kona kuharura. Yoyishi, gha mu ghama Mwana Nyambi nashadipinyi mbadi wa kumukona. 19Karo twa yidimuka eshi kwaNyambi twa kundamena, noghuyi ghoghuhe ghokaye mungcamu dhashadipinyi wa kara. 20Twa dimuka eshi Mwana Nyambi gheyire no gha tu pire maghano eshi ngepi di sho tu dimuke Nyambi ghoshemwa. Ene twe, mwaNyambi ghoshemwa tudi paMwanendi Jesus Kristusi. Aye ne yoNyambi ghoshemwa no ghomoyo ghororuheya. 21Mwanange homwahakwa, mu yakunuke ne keho kwawanyambi hombango.
Currently Selected:
1 Johannesi 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
