1 Johannesi 4
4
Haporofeta hombango
1Mwahakwa, mwa tawa kwakehe yu ghokumutongwera eshi, aye ne gha kara noMupepo waNyambi. Yoyishi pan̂anyi‐n̂anyi ne hengi haporofeta hombango ha di mukaye. Ene mu rondonone kehe yu eshi, mupepo wendi ne mwaNyambi wa tunda ndi? 2Pano po sho mu dimukere Mupepo waNyambi eshi: Kehe yu ghana kunongonona eshi, Jesusi ne shemwa yoKristusi yu gha pirukire munu. Ho gha kara noMupepo ghu wa tunda kwaNyambi. 3No kehe yu ghokudhira kunongonona yaJesusi, mbadi gha kara noMupepo ghu wa tunda kwaNyambi. Oyo ne gha kara nomupepo ghon̂ore dhokwaKristusi. Mupepo ghu mwa yuva eshi mbo ghu neya, ghoghu ghu di mukaye.
4Mwanange homwahakwa, amwe ne kwaNyambi mwa kundamena. No mwa witha kare haporofeta hombango, yoyishi mumwenu gha kara mukakupiterera oyu ne shadipinyi yu gha kara mukaye. 5Awo ne hakakaye no eyi hana kughamba yakaye no kaye, kukwawo kana kutegherera. 6Atwe ne twakaNyambi. Noyu gha dimuka Nyambi kukwetu ghana kuteghegherera. Noyu gha dhira kukara waNyambi mbadi ghana kutegherera kukwetu. Payinu yino, po twa kona kuyakunuthera mipepo.
Nyambi ne yoruhakitho
7Mwahakwa, tu kuhake. Yoyishi ruhakitho ne kwaNyambi rwa tunda. No kehe yu gha kara noruhakitho, yomwana Nyambi no gha dimuka Nyambi. 8Oyu gha pira ruhakitho, mbadi gha dimuka Nyambi. Yoyi Nyambi ne yoruhakitho. 9Muyinu yino mo gha tu hokwera Nyambi ruhakitho rwendi eshi: pakutuma Mwanendi ghopithendi mukaye tu kone kuwana moyo paPendi. 10Ruhakitho roshemwa ne runo: kadi ruhakitho rokwaNyambi. Ene ruhakitho ru gha tu neghedha pakututumena Mwanendi, yira mashemwithanitho ghomaharwero ghetu. 11Mwahakwa, thika di gha tu neghedha Nyambi ruhakitho, kemo sho tu kuhake natwe karo. 12Noyofotji temba yu gha mona Nyambi. Ene ngeshi ha tu kuhaka, ghana kukara Nyambi mumwetu no yihima yoruhakitho rwendi, yina kuyarera mumwetu.
13Yodigho tu dimuke eshi muMwendi tudi, Naye mumwetu. Yoyishi, Mupepo wendi gha tu tumena. 14Natwe twa yimona no twa yinongonona eshi Wihe gha tumine Mwana gha kare Mughamweni ghokaye. 15Oyu ghokunongonona eshi, Jesusi ne Mwana Nyambi — Nyambi gha kara mumwendi, naye mwaNyambi gha kara. 16Natwe twa dimuka ruhakitho rwaNyambi rokukwetu no twa ru tawa.
Nyambi ne ruhakitho, noyu gha kara muruhakitho mwaNyambi gha kara naNyambi mumwendi gha kara. 17Kemo dyo gha yerana mahimeno ghoruhakitho mumwetu. Atwe ne mbadi twa kona kuyapa kudiyuwa dyondhango. Yoyishi mukaye kano, kupara tuna kupara twe thika di gha parire Jesusi. 18Oku rwa kara ruhakitho, kwapira woma. Ene ruhakitho roshemwa, rwa taterera mahumbithero. Noyu ghana kuyapa shime, mbadi gha kara noruhakitho rokuyara. 19Atwe ne twa kara noruhakitho, yoyishi Nyambi ne yo gha tu hakire pakutanga. 20Ngeshi ghumweya ha ningi eshi: “Ame ne na haka Nyambi.” Ene ye gha dhimba muyendhendi, oyo ne mukambango. Yoyishi yomuhe ghokudhira kuhaka myendhendi yu ghana kumona, nokamanana temba mbadi gha kona kuhaka Nyambi yu ghana kudhira kumona. 21Muragho ghu ne kukwendi twa ghu wanine eshi: Kehe yu ghokuhaka Nyambi, gha kone karo kuhaka muyendhendi.
Currently Selected:
1 Johannesi 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
