2 Johannesi 1
1
Mbapira Dhoghuwadi dhaJohannesi
1Mbapira dhino kukwange me mukuru dhina kutunda.
Ho na kudhitjangera kwamukamadi yu, ghapwa kutorora nawanendi. Ame na mu haka shemwa, ene mbadi pithange. Nawaheya wa ha dimuka ghushemwa. 2Yoyishi ghushemwa ne mumwetu wa kara, no mbo ghuna kara netu roruheya.
3N̂eke nothin̂eke eyi ya tunda kwaNyambi ghoWihe no kwaJesus Kristusi, ghoMwana Wihe, mbo yina kara netu nothiraro mumwetu twe twa kara mughushemwa nomuruhakitho.
Ghushemwa noruhakitho
4Ame ne na shambererire thikuma, apa na kuhanganine nawanoye awa ha kununga no ha para mughushemwa, thika di wa ghamba muragho, oghu twa tambura kwaWihetu. 5Pan̂anyi‐n̂anyi, kukoye we mukamadi ghodikuto na kukanderera. Ethi no ne kadi thinu thothipya na kumutjangera. Oghu ne ghomuragho ghu twa kara nagho pakare: Eshi tu kuhake. 6Ruhakitho, kuninga eshi tu pare thika di dha ghamba miragho dhaNyambi. Kenge di mwa yi yuvire pakutanga.
7Yoyishi hengi hapemukithi wa, heya mukaye. Awo ne mbadi ha dimuka eshi Jesusi ne yoKristusi, oyu gha pirukire munu. Ethi ne thothitambo thange, thawapemukithi. 8Amwe ne mbadi mwa kona kuyongaritha, ndjambi dhi twa mu rughanenine pakutanga. Ene mbo mu wane ndjambi dhokuyarerera. 9Kehe yu gha hambuka kuyihonga yaKristusi, mbadi gha kara naNyambi. Ene yu gha kara muyihonga yaKristusi, oyo ne gha kara naWihe naMwana.
10Ngeshi heya ghumweya kukwenu oyu ghana kumuhonga yayo‐nayo, mbadi mwa kona kumutambura mumayugho ghenu no kumurumeritha temba. 11Yoyishi, oyu ghana kumurumeritha, naye yomurandu kughuyi ghu ghana kutenda.
Mahurithero
12Poyidi shime yinu yoyingi yokumutongwera. Ene mbadi na haka kuyitenda muyitjanga. Na kurupera eshi, mbo neya kukwenu nothinda, twa kuna kuyuve pofotji, eshi mbo yi‐rikanyenene mo yishamberera yetu.
13Hana mukuroye yu ghapwa kutorora, hana kutu mena dirumeritho.
Currently Selected:
2 Johannesi 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
