1 Johannesi 2
2
Jesusi ne mughambwereri wetu kwaWihe
1Eyi ne yo na kumutjangera amwe, mwanange homwahakwa eshi, mbadi mwa kona kuharura. Ene ngeshi ha harura yofotji ghopapetu, — atwe ne twa kara naJesus Kristusi ghomuhunga no mughambwerire wetu kwaWihe. 2Aye yomashemwithanitho ghomaharwero ghetu. Keho ne, kadi ghetu pithagho no ghawanu waheya. 3Ngeshi ha tu kara ghutawedhi kumiragho dhaNyambi, twa kona kuyidimuka eshi twa mu dimuka Naye. 4Oyu ghokuninga eshi: “Ame ne na mu dimuka,” no mbadi ghana kukara ghutawedhi kumiragho dhendi, aye ne mukambango yo. No ghushemwa ne mbadimo mumwendi. 5Oyu ghokutawerera kun̂ando dhendi — ruhakitho rwaNyambi ne mumwendi rwa kara, no ghana kumenena kuthighayara thendi thokuyara. 6Noyu ghana kughayara eshi aye ne muMwendi gha kara, naye gha pare ndani thika di gha parire Jesusi.
Muragho ghoghupya
7Mwahakwa, oghu ne mbadi muragho ghoghupya, oghu na kumutjangera. Ene muragho ghoghukurukuru, oghu mwa kara nagho kutunda kumatangero. Muragho ghopakare‐kare, dhombudhi edhi mwa yuvire. 8Yashemwa, karo oghu ne ghomuragho ghoghupya oghu na mu tjangera. Eshi thika di ya kara mughushemwa, ya kunegha mwaJesusi no mumwenu karo. Yoyishi, makokore kupwa ghana kupwa, no thishe thoshemwa thina munekera kare. 9Ngeshi ghumweya ha ghayara eshi, aye ne muthishe gha kara, ene ye gha dhimba muyendhendi, oyo shime gha karera mumakokore. 10Oyu gha haka muyendhendi, muthishe gha kara no mbadiko thinu thokukona kumuwitha. 11Ene oyu ghokudhimba muyendhendi, yo gha kara mumakokore no mbadi ghana kudimuka eshi kupi sho gha shwaghere. Yoshi makokore ne gha mu ngambwera.
Mbadi mwa kona kuhaka kaye
12Ame, kutjangera na kumutjangera,
mwanange homwahakwa,
yoyishi, maharwero ghenu ghapwa kuthigherera
muDina dyaJesusi.
13Ame kutjangera na kumutjangera, amwe mwawiha,
yoyishi mwa mu dimuka Jesusi
oyu gha kara po kutunda kumatangero.
14Ame na mu tjangerire, mwanange,
yoyishi mwa dimuka Wihe.
Ame na mu tjangerire, amwe mwawiha,
yoyishi mwa dimuka Jesusi
oyu gha kara po kutunda kumatangero.
Ame ne na mu tjangerire, amwe mwamuregheya,
yoyishi, mwa kara nongcamu
no n̂ando dhaNyambi mumwenu dha kara
no mwa witha Ghuyi.
15Mbadi mwa kona kuhaka kaye koyiharura, no yinu yi ka haka kaye. Ngeshi ha haka ghumweya kaye, mbadimo mumwendi ruhakitho rwaWihetu. 16Yinu yopakaye — no yoyiheya yi gha rumbera munu ghothiharuri, eyi ne yoyi ghana kumona nomeho ghendi no kuyirumbera, ghushwi wendi ghoghuhe — mbadi wa tunda kwaWihetu, ene yapakaye. 17Ene kaye noyirumbera yako, yoyihe, mbo yina pu. Ene yu ghana kutenda mahimeno ghaNyambi, mbo ghana para kuroruheya.
Hakakudhimba hakriste
18Hanange, edhi no ne dhonako dhoghuhura. Amwe ne mwa yuvire eshi mbo ha neya hanyathi wawakriste. Pano ne wowa hana yara. Po sho tu dimukere eshi, nako dhoghuhura dhi neya. 19Awo ne mukatji ketu ha tundire. Ene noyofotji temba ghopapawo yu gha karire wetu. Yoyishi, shemwa ngo hetu ha karire, ngo kukwetu ha karire. Eyi ne kuninga yina kuninga eshi, noyofotji temba gha karire wetu.
20Amwe ne mwapwa shemwa kuwetha paKristusi naMupepo ghoKupongoka. No mwahe mwa dimuka ghushemwa. 21Ame ne mbadi na kumutjangera eshi amwe ne mu dimuke ghushemwa. Ene yoyi mwa dimuka eshi ghushemwa ne mbadimo mbango mumwagho.
22Yidye ne mukambango, ameshi yoyu gha hamura eshi Jesusi ne kadi yoKristusi. Aye ne mukan̂ore dhaKristusi. Yoyu gha dhira kudimuka Wihe naMwana temba. 23Oyu gha dhira kudimuka Mwana, mbadi gha dimuka Wihe. Noyu gha dimuka Mwana, naWihe naye gha mu dimuka. 24Ethi sho mu kwate po ne thino. Eshi mbudhi edhi mwa yuvire kutunda pamatangero, dha kona kukara mumwenu. Ngeshi ha yikara mumwenu yi mwa yuvire pakutanga, mbo muna kara namwe karo mwaMwana no mwaWihe. 25Eyi ne yo gha tu toyedhera Mwana eshi: Moyo ghororuheya.
26Eyi na yitjangerire kukwenu yi, kwawanu wa hana kushana kumupemukitha. 27Thikuma kukwenu ne Mupepo ghu mwa wanine kuKwendi, mu mwenu wa kara. No mbadi mwa nyanda karo ghumweya ghokumuhonga. Mupepo wendi, wa kona kumuhonga yoyihe. No eyi ghana kumuhonga Ye yaghushemwa, kadi ya mbango. Ghuhunga thika di gha mu hongire Ye mwa kona kukara mwaMwana.
Hana Nyambi
28Pan̂anyi‐n̂anyi amwe mwanange homwahakwa, mwa kona kukara muMwendi eshi, mbo tu dhire kuyapa twahe thinu apa mbo gheya karo, no mbo tu dhire kufa honyi pakwimana kughutho Wendi. 29Ngeshi mwa dimuka eshi, Aye ne muhunga, mu yidimuke karo eshi, kehe yu ghana kupara mughuhunga ne mwana Nyambi.
Currently Selected:
1 Johannesi 2: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
