RUT 4
4
Rut Kijadi Kenah Boas
1Telas ajeh Boas kiet nu pintu gerbang tempat bengwal ru kigei ku pajeh. Aleh-aleh hol sedara ilei de rek ajeh kilalu.
Boas kicereg, “Sedara, bei madeh, bei gei besama ru eng.” Jadi, sedara ajeh pen kihol kigei besama. 2-4Telas ajeh Boas kipakat 10 urag raknak-raknak ku pekan ajeh gei besama ru kek. Lalu kiurok nu sedara ajeh, “Sedara, eng ngha-pasal hal adeh nu hek: Naomi ya kijog ju Moab ru kek kipasal kaha-jual tik Elimelekh sedara har. Amen hek hahod, beliloh ku ngar mai jengoi ru ngar mai raknak adeh. Amen tok og panei nu eng, ngha-panei. Kerana, sengoi de berhak hek canuk, telas ajeh baruloh eng.”
Kibalas ya sedara ajeh, “Eng nghod.”
5Ju kenjeh nij Boas kisambong ibengwal, “Amen hahod, hek kenaloh pek taleh habeli tik tapi hakot juga Rut sengoi Moab balu Mahlon kijadi kenah hek supaye tik ajeh tetap kijadi engleg wares mai de ya dat.”
6Bile kicerngai bengwal ajeh, kek pen kinyek. “Eng pek ngha-kot kerana kenon eng doh pek naijadi wares harta saka ajeh. Lebeh bor tik ajeh bibeli ya hek.”
7Ku jaman manah entem adat mai Israel begei adeh: Amen enai naiha-sahkan jenanji ku jengwal atao ku tenukar arap, sengoi ilei de jelwal ajeh hodloh kiteg ikasot englag ru kiog nu ilei de bakli.
8Kipasal nu Boas, “Beliloh ya hek.” Kek pen kiteg englag ikasot ru kiog nu Boas.
9-10Lalu Boas kipasal nu mai jengoi ru juga nu raknak-raknak ku pekan ajeh, “Sesedara, ku arik adeh engkek ya engkejadi saksi tentang hal adeh: Eng ngbeli ju teg Naomi dikdij hak Elimelekh ru juga hak Kilyon ru Mahlon ikekenon ajeh. Eng ngkot juga Rut sengoi Moab balu Mahlon jadi kenah eng supaye tik ajeh mong iwares. Supaye Mahlon juga mong ikenon-cenok ru imuh pek bisip ya isesedara ru sengoi ku pekan adeh. Sesedara, engkekloh saksi ku yah adeh.”
11Raknak-raknak ru mai jengoi ku pajeh naiurok nu Boas, “Hooh, jikloh saksi tentang hal adeh. Semoge Yahweh Kiberkat kenah hek Rut sama begei de Kiberkat Rahel ru Lea de ya baibekenon jeoi ha Yakub. Semoge Yahweh Kiberkat hek hajadi kaya ku engkap mai Efrata ru tekenal ku Betlehem. 12Semoge Yahweh Kiberkat hek ya kenon de jeoi ju kerdor de nyengnyam ajeh, begei ha jenang rak hik Peres kenon Yehuda ju Tamar.”
Boas ru Ikenon-cenok
13Jadi, Boas kikot Rut sebegei ikenah. Yahweh Kiberkat Rut ru kek kiperyos numom kenon keral. 14-15Kerana hal ajeh, mai kekerdor naibual nu Naomi, “Patehloh Yahweh! Ku arik adeh, Kek Kiog numom cenok ha hek. Kekloh penebos hek. Sanget adehloh neharap hek hunen ru kijaga hek ku mase haraknak ku ngar doh. Semoge kek doh bikenal ya dikdij mai Israel. Kenon adehloh de biog ya mengsau hek de kihok ha lihek ru lebeh beharga daripade tujoh urag kenon keral.”
16Naomi kikot sanget ajeh ru kicedup. Naomi kibela icenok ajeh begei kenon ilei sendiri. 17Mai kekerdor de rek beg deg Naomi naibecerite ratak liknai “Naomi ya mong numom kenon keral!” Naiog muh sanget ajeh Obed.
Obed ajehloh apak Isai, ru Isai ajeh apak Raja Daud.
18-22Adehloh muh-muh kenon-cenok ju Peres lei Raja Daud:
kenon keral Peres ajeh Hezron,
kenon keral Hezron ajeh Ram,
kenon keral Ram ajeh Aminadab,
kenon keral Aminadab ajeh Nahason,
kenon keral Nahason ajeh Salmon,
kenon keral Salmon ajeh Boas,
kenon keral Boas ajeh Obed,
kenon keral Obed ajeh Isai,
kenon keral Isai ajeh Raja Daud.
Currently Selected:
RUT 4: AEH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.