MARKUS 4

Perumpamaan tentang Mai Besepag Mat Beneh

(Mat 13:1-9; Luk 8:4-8)

1Yesus mula Kibeajar nij ku beg Tasek Galilea. Ihad jeoi sengoi naibekumpol ku kelileg Kek. Kerana ajeh, Kek Kihuj nu nanek perahu ku tasek ajeh ru Kigei ku pajeh sambel mai jengoi ajeh naijinjeg ku beg tasek. 2Yesus Kiajar jeoi pekare nu enai Kiguna perumpamaan. Ku kateh Ineajar ajeh Kek Kiurok,

3“Cerngailoh! Mong numom mai de beselai kiet kaha-sepag beneh. 4Mase kek kisepag beneh, mong mat beneh de yog ku nong lalu hol cep ru naicak dij mat beneh ajeh. 5Mong juga mat beneh de yog ku tik bebatu de itik gek. Mat beneh ajeh deras kicuai kerana itik nekgek. 6Tapi bile iarik kibeked, cengwai ajeh kiselei lalu kisod kerana ireis pek jerek. 7Mong juga mat beneh de yog ku engkap semak de bejerlak. Semak bejerlak ajeh kigu-hit lalu kiperip cengwai beneh ajeh lei pek kibepelek. 8Mong juga engleg ju mat beneh ajeh yog ku tik de bor. Beneh ajeh kicuai, kihit, lalu kibepelek. Ikennem mong de 30 kali gande, mong de 60 kali gande, ru mong de 100 kali gande.”

9Lalu Yesus Kiurok, “Amen engkek beentag, cerngailoh!”

Sebab Yesus Kiguna Perumpamaan

(Mat 13:10-17; Luk 8:9-10)

10Telas mai jengoi naijog, 12 urag pengikot Yesus ru mai kilek de ya naicerngai Ineajar naitanya imaksod perumpamaan ajeh. 11Yesus Kiberlag, “Nu engkek ya biog panei rahsie tentang begeiharok Jenang Kimemerintah sebegei Raja. Tapi nu mai kilek de pek naijoi Eng, doh dikdij ajeh biperlei biguna perumpamaan 12supaye,

‘Nainengneng

tapi pek naireti ma de naineng,

ru naiceringai

tapi pek naireti ma de naicerngai.

Amen enai pek begei ajeh,

tentu buleh naijog nij nu Eng

ru Eng doh Ngampon enai.’ ”#Yes 6:9-10

Yesus Kipeterang Perumpamaan Mai Besepag Mat Beneh

(Mat 13:18-23; Luk 8:11-15)

13Telas ajeh Yesus Kiurok nu enai, “Amen engkek pek engkereti perumpamaan ajeh nek, tentu pek engkereti perumpamaan de kilek. 14Mai beselai de kisepag mat beneh ajeh begei ha sengoi de kiperlei engrok Jenang. 15Mat beneh de yog ku nong begei ha sengoi de naicerngai engrok Jenang ajeh tapi ku sarik jijeh Ibles kihol ru kibeh enai sip ha ma de ya naicerngai. 16-17Mat beneh de yog ku tik bebatu ajeh begei ha sengoi de naicerngai engrok ajeh lalu deras naiterima ya sengik de suka tapi engrok ajeh pek kibereis ku kateh sengik enai ru pek kibetahan liu. Bile senusah kitiba ru enai bisiksa kerana naipecaya nu engrok ajeh, enai deras pek naipecaya nij. 18Mat beneh de yog ku engkap semak bejerlak ajeh begei ha sengoi de naicerngai engrok ajeh 19tapi nerisau tentang sinui, heknod tentang kenaya, ru bebegei heknod kilek de naiha-perwas sengik liknai kipebantot engrok ajeh lei pek kibepelek. 20Mat beneh de yog tik de bor ajeh begei ha sengoi de naicerngai ru naiterima engrok ajeh ru naijadi begei beneh de kiperhol pelek-pelek ru hasel de jeoi. Mong de kibehasel 30 kali gande, mong de 60 kali gande, ru mong juga 100 kali gande.”

Pelite ku Kemil Parak

(Luk 8:16-18)

21Yesus Kiurok nu enai nij, “Pek mong numom pen de kitod pelite lalu kiserkop ya pasu atao kidek ku kerop katel, tapi kek doh kidek pelite ajeh ku kemil parak.#Mat 5:15; Luk 11:33 22Begei ajeh juga, dikdij ma de bicernem doh biperlau ru dikdij ma de bikerdik doh bipasal nu jap-jap mai.#Mat 10:26; Luk 12:2 23Amen engkek beentag, cerngailoh.”

24Lalu Yesus Kiurok nij nu enai, “Peratikloh ma de engkecerngai! Jeoi belok engkekerekwat engkeha-reti ha neajar Eng, jeoi ajehloh juga Jenang doh Kitambah nu pengham engkek. Malah, Kek doh Kitambah gulebeh jeoi nij nu pengham engkek ajeh. 25Bok taleh de naiserngik ru naireti ha neajar Eng, Jenang doh Kibeh naireti gulebeh jeoi nij. Tapi bok taleh de pek naiserngik ha neajar Eng, enai doh naisip juga pekara-pekara de ya naipanei.”#Mat 13:12; 25:29; Luk 19:26

Perumpamaan tentang Beneh de Cuai

26Yesus Kiurok nij, “Ijengoi sengoi-sengoi de biperintah ya Jenang sebegei Raja doh gumaken jeoi begei ha perumpamaan adeh: Mong sengoi de kisepag mat beneh ku iselai. 27Sengoi ajeh pek kipanei begeiharok beneh ajeh kientoi. Pek kira kek kibukbet atao kijaga, kelem yah beneh ajeh teros kicuai ru kientoi. 28Hamapen pek bijaga, tik kicerwai mat beneh ajeh lei kibepelek. Mula-mula cuai ipucok canuk, telas ajeh ibunga, ru ipenyudah nij imat. 29Bile imat ya nep, sengoi ajeh pen kikej kerana musem kiknej ya tiba.”#Yl 3:13

Perumpamaan tentang Mat Sawi

(Mat 13:31-32; Luk 13:18-19)

30Yesus Kiurok nij, “Ijengoi sengoi-sengoi de biperintah ya Jenang sebegei Raja doh gumaken jeoi begei ha perumpamaan adeh: 31Mong numeknat mat sawi de bicet ku tik. Mat sawi ajeh mat beneh de paleng macot ku engkap dikdij jenis mat beneh de mong ku bumi. 32Tapi bile bicet, beneh ajeh kicuai ru kijadi lebeh entoi daripade dikdij ceknet de kilek ru kiperhol cag-cag entoi lei cep buleh naibeh deg ru naibelindog ku pajeh.”

33Begei ajehloh Yesus Kiajar enai Kiguna jeoi perumpamaan Kijoi had belok de buleh naipaham. 34Walah nanek neajar pen de pek Kiguna perumpamaan. Tapi bile Kek besama ru Ipengikot-pengikot taleh, Kek Kipejelas dikdij ireti nu enai.

Yesus Kipekerakdik Pinoi Pes ru Umbak de Kuat

(Mat 8:23-27; Luk 8:22-25)

35Ku idui arik ajeh juga Yesus Kiurok nu Ipengikot-pengikot, “Beiloh hiet nu englag tasek ateh.” 36Ku mase ajeh, Yesus lekat mong ku kateh perahu. Jadi, Ipengikot-pengikot naidek mai jengoi ru teros naibelayar besama ru Kek. Mong juga perahu kilek de naijoi Kek. 37Ku mase ceknip enai ajeh, pinoi kiberikpes ru umbak kipet perahu enai lei perahu ajeh tebeg ya teu. 38Tapi Yesus tengah Kidak ku bantal ru Kibukbet ku bahagian belakang perahu ajeh. Ipengikot-pengikot naiberyol Kek ru naiurok, “Guru, pek Jenpedulika hik adeh merek hiha-dat?”

39Yesus Kikos ru Kitengking pinoi pes ru Kiurok nu umbak ajeh, “Kerakdik! Serakngek!” Pinoi pes ajeh pen kibehenti ru tasek kijadi ihad tenang. 40Lalu Yesus Kiurok nu Ipengikot-pengikot, “Yama engkesengoh? Pek engkepecaya nu Engka?”

41Enai ihad naisengoh ru naibelwal ratak liknai, “Sengoi adeh ihad bekuasa! Pinoi ru umbak pen baijoi Iernor!”

Currently Selected:

MARKUS 4: AEH

Highlight

Copy

Compare