MARKUS 3

Sengoi de Iteg Englag Lumpoh

(Mat 12:9-14; Luk 6:6-11)

1Telas ajeh Yesus Kimuj nij nu deg sembahyang. Ku pajeh mong numom de iteg englag lumpoh. 2Ku pajeh juga mong memerip urag mai Farisi de mimang naiha-kek ha senalah Yesus supaye dapat naitudoh Kek. Kerana ajeh, naiperatik Kek Kiperbor mai nyikka tok ku arik Sabat. 3Yesus Kiurok nu mai de iteg lumpoh ajeh, “Bei, jinjegloh ku ngar adeh.” 4Lalu Kek Kiurok nu mai Farisi, “Amen hijoi ha Hukom Taurat, ilei belokka de buleh hibeh ku arik Sabat? Hiha-beh bor atao hiha-beh nej? Hiha-peselamat mai atao hiha-pecelaka mai?” Tapi naikerakdik serakngek.

5Yesus beked Isengik Kineng nu mai ku pajeh ru Kek juga Kisedeh kerana enai ihad degel. Lalu Yesus Kiurok nu mai de iteg lumpoh ajeh, “Ulurloh teg hek.” Sengoi ajeh pen kiulur iteg lalu iteg ajeh pen bor. 6Lalu mai Farisi naiet ju deg sembahyang ajeh ru naibepakat ru memerip urag mai Yahudi de naisukong Raja Herodes Antipas. Nairancang naiha-perdat Yesus.

Mai Jengoi ku Beg Tasek

7Telas ajeh Yesus ru Ipengikot-pengikot naiet nu Tasek Galilea. Ihad jeoi mai ju lengrik Galilea naijoi Kek. Mong juga de naihol ju lengrik Yudea, 8kote Yerusalem, lengrik Idumea, kawasan-kawasan ku englag timur Batag arik Jordan, ru kawasan-kawasan kote Tirus ru kote Sidon. Mai jengoi naihol nu Yesus kerana naicerngai hal-hal de ya Kibeh. 9Sengoi ihad jeoi lei Yesus Kior Ipengikot-pengikot naisedia perahu ha Kek supaye Kek pek bipeit. 10Kek ya Kiperbor jeoi sengoi. Kerana ajeh, mai nyik naibelawat naiha-pep Kek. 11Bile mai de bisangrog ya nyanik naibakek Kek, naisujod ku Ingar ru naiurok ya suara de kuat, “Hekloh Kenon Jenang!”

12Tapi Yesus Kiget naipasal nu mai kilek Ilei ajeh bok.

Yesus Kipileh 12 Urag Ipengikot

(Mat 10:1-4; Luk 6:12-16)

13Telas ajeh Yesus Kihuj nu kemil lod. Kek Kicereg dikdij sengoi de Kibekenan ru enai pen naihol nu Kek. 14Lalu Yesus Kipileh 12 urag ju engkap enai ajeh supaye enai mong besama ru Kek, ru supaye Kingeng enai ha perlei Gah Bor, 15ru supaye enai mong kuasa ha peret nyanik.

16Adehloh 12 urag de bipileh ya Yesus: Simon (de Kisebot juga sebegei Petrus), 17Yakobus ru imenang Yohanes (ubai ajeh kekenon Zebedeus, ru Yesus Kiog muh ‘Boanerges’ nu ubai ajeh de imaksod kekenon engkuk),#3:17 Kekenon engkuk: Imaksod, nekbengal. 18Andreas, Filipus, Bartolomeus, Matius, Tomas, Yakobus kenon Alfeus, Tadeus, Simon (de bigelar juga Patriot de pernah kijoi mai Israel kilek naiha-lawan penjajah Rom), 19ru Yudas Iskariot de doh kikianat Yesus.

Yesus ru Beelzebul

(Mat 12:22-32; Luk 11:14-23–12:10)

20Bile Yesus Kijog nu madeg, mai jengoi naibekumpol nij ku pajeh lei Yesus ru Ipengikot-pengikot pek sempat naiha-cakcak. 21Bile peringak Yesus naicerngai hal ajeh, enai pen naiet naiha-nyong Kek kerana naicerngai mong mai naiurok Kek ya gila.

22Memerip urag guru Hukom Taurat de naihol ju kote Yerusalem naiurok, “Kek ya bisangrog ya Beelzebul! Kek Kiperet nyanik-nyanik ya kuasa raknak nyanik-nyanik.”#Mat 9:34

23Kerana ajeh, Yesus Kicereg mai jengoi ajeh lalu kicerite memerip perumpamaan nu enai. Kek Kiurok, “Begeiharok Ibles buleh kiperet Ibles? 24Jap-jap kerajaan de isengoi naibelawan ratak liknai doh kitateh. 25Ru jap-jap peringak de naibelawan ratak liknai doh kihancor. 26Begei ajehloh juga ku hal kerajaan Ibles. Amen nyanik-nyanik ku kateh kerajaan Ibles naibelawan ratak liknai, kerajaan ajeh pek kitahan liu ru doh pasti kisarep.

27Pek numom pen de dapat kimuj nu deg sengoi de kuat. Tapi, telas ya kibeg sengoi de kuat ajeh baruloh dapat kikot iharta.

28Cerngailoh abor! Dikdij dosa ru engrok niknej manusia buleh biampon. 29Tapi bok imai de kihina Kelog Santen doh pek biampon kerana kek ya kibeh dosa de lei ditehjeh.”

30Yesus Kiurok begei ajeh kerana mong mai de beurok, “Kek bisangrog ya nyanik.”

Amek ru Memenang Yesus

(Mat 12:46-50; Luk 8:19-21)

31Telas ajeh amek ru memenang Yesus naihol ru naipoj ku luar. Naingeng mai untok naicereg Yesus. 32Mai jengoi de gigei ku kelileg Yesus naiurok nu Kek, “Jen, amek ru memenang Jen mong ku luar naiha-bakek Jen.”

33Yesus Kiberlag, “Bok amek Eng? Bok tenek-menang Eng?” 34Lalu Kek Kineng nu mai jengoi de gigei ku Ikelileg ru Kiurok, “Nengloh, adehloh amek ru tenek-menang Eng! 35Bok imai de kibeh heknod Jenang, sengoi ajehloh tenek-menang Eng ru amek Eng.”

Currently Selected:

MARKUS 3: AEH

Highlight

Copy

Compare