MARKUS 2

Yesus Kiperbor Numom Sengoi Lumpoh

(Mat 9:1-8; Luk 5:17-26)

1Memerip arik ju kenjeh, bile Yesus Kilos nij nu pekan Kapernaum, mai naicerngai gah tentang Yesus ya mong ku padeg. 2Ihad jeoi mai naibekumpol ku pajeh lei walah pek betempat. Ku pintu pen tebeg ya mai. Yesus Kiperlei engrok Jenang nu enai. 3Ku mase Yesus Kibelwal, hol empat urag keral de naien numom keral lumpoh. 4Tapi enai pek dapat naien kek nu Yesus kerana ya jeoi sengoi. Kerana ajeh, naiterloh engleg pelog deg ku kemil Yesus. Telas ajeh naicerleh sengoi de lumpoh de biperdak ku kemil ceruk. 5Bile Yesus Kineng iman enai ihad entoi, Kek Kiurok nu sengoi lumpoh ajeh, “Bei, dosa hek ya biampon.”

6Tapi memerip urag guru Hukom Taurat de naigei ku pajeh naiserakngik, 7“Ihad berani Sengoi adeh Kibual begei ajeh. Kek Kihina ha Jenang! Pek mong numom pen de buleh kiampon dosa. Had Jenang taleh de buleh!”

8Ku sarik jijeh juga Yesus Kipanei ma de naiserngik lalu Kek pen Kiurok nu enai, “Yama engkeserngik begei ajeh? 9Eng buleh Ngurok nu sengoi adeh: ‘Dosa hek ya biampon.’ Eng juga buleh Ngurok nu kek, ‘Kosloh ru ciploh.’ Kek belok nanek antare nar bengwal ajeh de engkerasa senang Ngurok? 10Tapi Nghod engkepanei hal adeh: Eng Kenon Manusia bekuasa Ngampon dosa ku bumi adeh.” 11Lalu Yesus pen Kiurok nu sengoi de lumpoh ajeh, “Kosloh, kot ceruk hek ru jogloh!”

12Ku sarik jijeh juga sengoi de lumpoh ajeh pen kikos, kikot iceruk, ru kihol ju ngar dikdij enai. Dikdij mai ku pajeh de naineng hal ajeh cengang empag enai lalu naipateh ha Jenang. Naiurok, “Pek pernah jineng hal de begei adeh!”

Yesus Kicereg Lewi

(Mat 9:9-13; Luk 5:27-32)

13Telas ajeh Yesus Kilos nij nu beg Tasek Galilea. Ihad jeoi mai naihol nu Kek ru Kek pen Kiajar ha enai. 14Telas ju kenjeh Yesus Kicekcip ku pajeh ru Kibakek pengutep cukei imuh Lewi#2:14 Lewi: Sengoi adeh mungken kirujok nu Matius pengikot Yesus. kenon Alfeus. Lewi ajeh tengah kigigei ku tempat kenutep cukei. Yesus Kiurok nu kek, “Beiloh joi Eng.” Lewi pen teros kikos ru kijoi Yesus.

15Mase Yesus tengah Kicakcak ku deg Lewi, hol jeoi pengutep cukei de kilek ru mai bedosa kerana jeoi mai de begei ajeh de naijoi Yesus. Enai naicakcak besama Yesus ru Ipengikot-pengikot. 16Ku pajeh, mong memerip urag guru Hukom Taurat ju mai Farisi#2:16 Mai Farisi: Adeh kirujok nu kumpulan pemimpen-pemimpen agame Yahudi de naitentang ha neajar Yesus kerana lebeh naiutamekan ha Hukom Taurat ru adat-adat jenang rak enai. naineng Yesus Kicakcak besama ru pengutep-pengutep cukei ru mai bedosa. Lalu naiurok nu pengikot-pengikot Yesus, “Yama Kek Kicak besama ru pengutep-pengutep cukei ru mai bedosa?”

17Yesus Kicerngai engrok enai ajeh lalu Kiberlag, “Sengoi sihat pek kiperlu ha dokte, had sengoi de nyik taleh. Eng Nghol pek Ngha-cereg ha sengoi de naianggap diri liknai ajeh mai de benar tapi Ngha-cereg ha sengoi de naiaku liknai ajeh mai bedosa.”

Tenanya tentang Hal Puase

(Mat 9:14-17; Luk 5:33-39)

18Mong nukali, bile pengikot-pengikot Yohanes Pembaptis ru mai Farisi tengah naibepuase, memerip urag naihol nu Yesus ru naitanya, “Yama pengikot-pengikot Yohanes Pembaptis ru mai Farisi naibepuase tapi pengikot-pengikot Jen tok?”

19Yesus Kiberlag ya perumpamaan adeh: “Bulehka tengloh naibepuase ku arik jekneg selagi penganten keral lekat mong besama ru enai? Tentuloh tok! Selagi penganten keral mong besama ru enai, enai pek dapat naibepuase. 20Tapi doh lei imase penganten keral ajeh birampas ju enai. Ku mase ajehloh doh naibepuase.

21Tenateg de mong ku abat manah pek buleh hitampal ru abat pai kerana amen hibeh begei ajeh tenampal pai ajeh doh kikecot ru kiteg abat de manah lalu itenateg ajeh kigu-entoi. 22Begei ajeh juga, teu wain pai pek buleh bikoh nu kateh bekas getek manah. Amen hibeh begei ajeh, bekas getek ajeh doh kitateg lei teu wain ajeh kisaruk ru bekas ajeh kirusak. Teu wain pai hodloh bikoh nu kateh bekas getek de pai!”

Tenanya tentang Arik Sabat

(Mat 12:1-8; Luk 6:1-5)

23Ku nanek arik Sabat Yesus ru Ipengikot-pengikot nailintas selai gandom. Ku kateh ceknip ajeh, Ipengikot-pengikot mula naileh mat gandom.#Ul 23:25 24Ku mase ajeh, mong memerip urag mai Farisi naibakek hal ajeh ru naiurok nu Yesus, “Yama naibeh pekare de biget ku arik Sabat?”

25Yesus Kiberlag, “Pek pernah engkebacaka ma de bibeh ya Raja Daud mase kek ru ianak buah naicuag? 26Kek kimuj nu Kemah Jenang lalu kicak ruti de ya bipesembah nu Jenang. Amen hijoi ha Hukom Taurat, ruti ajeh had buleh bicak ya imam agame Yahudi taleh. Tapi Raja Daud kicak ru kiog juga nu ianak-buah. Hal ajeh belaku semase Abiatar kijadi Imam Agong agame Yahudi.”#Im 24:9; 1 Sam 21:1-6

27Yesus Kiurok nij, “Jenang Kibeh arik Sabat Kaha-tulog manusia, pek Kaha-beh sinui manusia kijadi hambe nu arik Sabat. 28Jadi, Eng Kenon Manusia adehloh Tuhan de bekuasa Ngha-petentu ma de buleh bibeh ya manusia ku arik Sabat.”

Currently Selected:

MARKUS 2: AEH

Highlight

Copy

Compare