MATIUS 7

Hineng Nej ha Mai Kilek

(Luk 6:37-38, 41-42)

1“Agok neng nej ha mai kilek supaye Jenang pen pek Kineng nej ha engkek juga. 2Begeiharok engkeneng ha mai kilek, begei ajeh juga doh Jenang Kineng ha engkek. Care de engkeguna nu mai kilek doh biguna balek ya Jenang nu liengkek juga.

3Engkeperatik gengsej ku kateh mat mai kilek, tapi pek engkebakek dendog ku kateh mat liengkek sendiri! 4Engkek pek buleh engkeurok nu mai, ‘Bei madeh ngperhol gengsej ju mat hek,’ padehal mong dendog ku kateh mat liengkek sendiri. 5Engkek mai de bepure-pure! Perholloh canuk dendog ju mat liengkek. Telas ajeh doh baruloh dapat engkenengneng lebeh bik engkeha-perhol gengsej ku mat mai kilek.

6Agok og ma-ma de suci nu cok kerana cok doh kilos ru kijerop ha liengkek. Agok og mutiare nu lek kerana lek doh kijebat mutiare ajeh.”

Semanj, Kek, ru Gadok

(Luk 11:9-13)

7“Semanjloh, doh biog. Kekloh, doh engkeburuk. Gadokloh pintu, doh bibuka. 8Kerana, bok imai de kisemanj doh kikep. Bok imai de kikek doh kiburuk. Nu bok imai de kigadok pintu, doh bibuka.

9Pek mong menek ju engkap engkek de doh kiog batu amen ikenon kisemanj ruti. 10Atao doh kiog tijik amen ikenon kisemanj kak. 11Hamapen engkek jehat, engkepanei engog ma de bor nu kekenon engkek. Gandakloh nij Menek de ku serga! Kek doh Kiog ma de bor nu mai de sengmanj nu Kek. 12Begeiharok de engkehod mai naibeh nu engkek, begei ajeh juga de hod engkebeh nu enai. Kerana, ajehloh inti neajar Hukom Taurat Musa ru nabi-nabi.”

Pintu Gerbang de It

(Luk 13:24)

13“Mujloh nu pintu gerbang de it kerana pintu gerbang ru nong de kialak nu os nyeng ajeh entoi ru luas. Jeoi mai de naijoi nong ajeh. 14Tapi pintu gerbang ru nong de kialak nu sinui de lei ditehjeh ajeh it ru susah. Had nekgek mai de naiburuk nong ajeh.”

Jehuk ru Ipelek

(Luk 6:43-44)

15“Bejaga-jagaloh ha nabi-nabi palsu. Enai naihol nu engkek ru naimenyamar begei ha dombe, tapi sebenarnye enai ajeh cok lig de jehat. 16Doh engkek engkecam enai melalui ma de naibeh. Cengcog bejerlak pek kiperhol pelek anggor, ru semak bejerlak pek kiperhol pelek are. 17Tapi keneng jehuk de bor kiperhol pelek de bor, ru keneng jehuk de niknej kiperhol pelek de niknej. 18Keneng jehuk de bor pek dapat kiperhol pelek de niknej, ru keneng jehuk de niknej pek dapat kiperhol pelek de bor. 19Tiap keneng jehuk de pek kiperhol pelek de bor doh bigik ru bitod. 20Begei ajehloh doh engkecam nabi-nabi palsu melalui ma de naibeh.”

Apeka ya Bengwal, Tapi ya Bahneh

(Luk 13:25-27)

21“Pek dikdij mai de naicereg Eng, ‘Tuhan, Tuhan,’ doh naimuj nu serga de biperintah ya Jenang sebegei Raja. Tapi had mai de naibeh heknod Menek Eng de ku serga taleh de doh naijadi sengoi-sengoi de biperintah ya Jenang sebegei Raja. 22Ku arik Jenang Kipeadel dikdij mai, jeoi mai doh naiurok nu Eng, ‘Tuhan, Tuhan, jiperlei bengsat Jenang ku kateh muh Tuhan.#7:22 Jiperlei bengsat Jenang: Atao, benubuat. Jiperet nyanik-nyanik ru jibeh jeoi ajaib-ajaib ku kateh muh Tuhan.’ 23Tapi Eng doh Ngurok, ‘Eng pek Ngkenal engkek! Etloh ju kendeh, engkek de bahbeh jehat!’ ”

Mai de Panei Bahbeh Deg ru Mai de Budoh Bahbeh Deg

(Luk 6:47-49)

24“Jap mai de kicerngai engrok Eng ru kibeh engrok Eng ajeh, kek begei mai cerdeg de kibeh ideg ku kemil batu. 25Bile manik kiceleh ru beag kihol ru pes jear kipoi ideg ajeh, ideg ajeh pek kitateh kerana deg ajeh bibeh ku kemil batu. 26Tapi mai de kicerngai ru pek kibeh engrok Eng ajeh, kek begei mai budoh de kibeh ideg ku kemil paser. 27Ideg kitateh bile manik kiceleh, teu beag kihol, ru pes jear kipoi ideg ajeh. Itenateh deg ajeh ihad terok!”

Yesus Mong Kuasa ku Ineajar

28Telas Yesus dij Kiajar dikdij ajeh, mai jengoi ku pajeh cengang empag enai ha care Kek Kibeajar 29kerana Ineajar bekuasa pek sama begei ha neajar guru-guru Hukom Taurat liknai sendiri.

Currently Selected:

MATIUS 7: AEH

Highlight

Copy

Compare