MATIUS 8

Yesus Kiperbor Numom Kinyik Kuste

(Mrk 1:40-45; Luk 5:12-16)

1Mase Yesus Kiceleh ju lod ajeh, jeoi mai jengoi naijoi ha Kek. 2Lalu numom mai de kinyik kuste kiterbuk ru kibelutot ku ngar Yesus. Kek kiurok, “Jen, amen Jenhod, Jen dapat Jenperbor eng.”

3Yesus Kiulur Iteg lalu Kipep kek ru Kiurok, “Eng Nghod. Aborloh hek!” Ku sarik jijeh juga inyaknik kuste pen bor. 4Lalu Yesus Kiurok nu kek, “Cerngailoh, agok pasal nu bok-bok pen tentang hal adeh, tapi etloh nu imam agame Yahudi ru semanjloh supaye kisahkan nyaknik hek ya bor. Telas ajeh ogloh korban begei de bior ya Nabi Musa sebegei bukti nu mai kilek hek ya habor.”

Yesus Kiperbor Numom Hambe Raknak Aska Rom

(Luk 7:1-10)

5Bile Yesus Kimuj nu pekan Kapernaum, numom raknak aska Rom kiterbuk nu Yesus kaha-semanj tulog. 6Kek kiurok, “Jen, hambe eng kinyik ku padeg, kek kidakdak ku katel ru kilumpoh. Kek ihad kitesiksa.”

7Yesus Kiurok nu kek, “Eng doh Nget ru Ngperbor kek.”

8Tapi raknak aska ajeh kiberlag, “Tuan, pek payahloh Jenhol nu madeg eng. Eng pek layak ngha-terima Jen nu kateh deg eng. Amen Jenurok taleh, tentu hambe eng doh kibor. 9Eng pen ngkerjak ku kerop ernor mai. Ku kerop eng pen mong juga aska-aska kilek. Bile ngor nu numom aska, ‘Et,’ kek pen kiet. Bile ngurok nu numom aska de kilek, ‘Bei,’ kek pen kiderleh! Bile ngurok nu hambe eng, ‘Kerjak adeh,’ kek pen kibeh.”

10Cengang empag Yesus bile Kicerngai ma de biurok ya raknak aska Rom ajeh, lalu Kiurok nu mai jengoi de naijoi ha Kek, “Cerngailoh abor, pek pernah Ngburuk bok-bok pen ku engkap mai Israel de mong iiman entoi begei ha kek. 11Cerngailoh! Jeoi mai doh naihol ju timur ru barat untok naiha-cakcak besama ru Abraham, Ishak, ru Yakub ku caknak de bibeh ku serga de biperintah ya Jenang sebegei Raja. 12Tapi jeoi mai Israel de patot naimuj nu majeh doh bipej nu luar, nu tempat de ihad guer. Ku pajeh doh naijap ru ihad naitesiksa.”

13Lalu Yesus Kiurok nu raknak aska ajeh, “Jogloh! Ma de hapecaya ajeh doh kitejadi.” Ku sarik jijeh juga hambe raknak aska ajeh pen kibor.

Yesus Kiperbor Jeoi Mai

(Mrk 1:29-34; Luk 4:38-41)

14Yesus Kiet nu deg Petrus. Ku pajeh Kek Kineng jenak Petrus tengah kidakdak ku tempat buknet kerana kinyik bengket. 15Yesus Kipep teg jenak Petrus lalu inyaknik pen kibor. Kek pen kikos lalu mula kilayan ha Yesus.

16Bile iarik ya dui, mai jengoi naien jeoi mai de bisangrog ya nyanik nu Yesus. Yesus Kiperet nyanik-nyanik ajeh ya nanek engrok taleh. Kek juga Kiperbor dikdij mai de nyik. 17Yesus Kibeh dikdij ajeh supaye tejadi ma de biurok ya Nabi Yesaya,

“Kek Kitanggong seniksa hik

ru Kiperbor nyaknik hik.”#Yes 53:4

Sengoi de Kaha-jadi Pengikot Yesus

(Luk 9:57-62)

18Bile Yesus Kineng mai jengoi ku Isekelileg, Kek Kior Ipengikot-pengikot naisekyap naiha-et nu englag tasek ateh. 19Lalu numom guru Hukom Taurat kiterbuk nu Yesus ru kiurok, “Guru, eng ya ngbesedia ngha-joi Jen nu belok taleh Jenha-et!”

20Yesus Kiberlag, “Cok lig mong ilubang ru cep mong iengsop tapi Eng Kenon Manusia pek mong tempat Ngha-dakdak.”

21Numom pengikot Yesus de kilek kiurok, “Guru, ogloh ngjog nok ngha-cop danan apak eng.”

22Tapi Yesus Kiberlag, “Joiloh Eng. Biarloh mai dat ajeh naicop sengoi de dat.”

Yesus Kipekerakdik Pes

(Mrk 4:35-41; Luk 8:22-25)

23Lalu Yesus Kitebot nanek perahu ru Ipengikot-pengikot pen naijoi Kek. 24Ku kateh ceknip enai ajeh, aleh-aleh pinoi kiberikpes lei teu tasek kibeumbak lalu kiterbeg perahu enai ajeh. Ku mase ajeh, Yesus tengah Kibukbet. 25Ipengikot-pengikot naiberyol Kek. Naiurok, “Guru, peselamatloh jik! Hik merek hiha-dat!”

26Yesus Kiberlag, “Yama engkesengoh? Yama engkek kurang pecaya nu Eng?” Lalu Yesus Kikos ru Kitengking pinoi pes ru umbak ajeh. Ku sarik jijeh juga tasek ajeh kijadi ihad tenang.

27Cengang empag Ipengikot-pengikot ru naiurok, “Sengoi adeh ihad bekuasa! Pinoi ru umbak pen baijoi Iernor!”

Yesus Kiperbor Nar Urag Sengoi de Bisangrog ya Nyanik

(Mrk 5:1-20; Luk 8:26-39)

28Bile Yesus Kilei nu englag tasek, nu daerah Gadara, hol ju hug penep nar mom sengoi de bisangrog ya nyanik-nyanik nu Yesus. Ubai ajeh ihad besengngoh lei pek mong mai de berani naiha-joi ha nong de baigei ajeh. 29Bile ubai ajeh baineng ha Yesus, ubai baihai, “Ma Haha-beh nu jar, Kenon Jenang? Haha-siksa jar sebelom mase de bipetetap ya Jenangka?”

30Pek nyak ju kenjeh mong nukenawat lek de tengah naicakcak. 31Nyanik-nyanik ajeh naimerayu nu Yesus, “Amen Hahod jik jihol, orloh jimuj nu kateh lek-lek ajeh.”

32Engrok Yesus, “Etloh.” Ku sarik jijeh juga, nyanik-nyanik ajeh pen naihol ju ubai ajeh lalu naimuj nu kateh lek-lek ajeh. Dikdij lek ajeh naijar nu terap de jerek ru naitau nu kateh tasek lalu naicelog.

33Mai de bejaga lek ajeh naijar nu pekan lalu naipasal dikdij hal de tejadi ajeh, temasok juga hal de tejadi nu nar mom sengoi de bisangrog ya nyanik-nyanik ajeh. 34Dikdij mai ku pekan ajeh naiet naiha-terbuk Yesus. Bile ya naiterbuk Kek, naisemanj Kidek ju daerah ajeh.

Currently Selected:

MATIUS 8: AEH

Highlight

Copy

Compare