MATIUS 6

Hal Ennog

1“Ingatloh, agokloh beh bahneh agame ku ngar mai jengoi supaye bineng ya mai. Amen engkebeh begei ajeh, doh pek engkekep benalas bor ju Menek engkek de mong ku serga.

2Kerana ajeh, bile engkeog ma-ma nu mai hajap, agok perneng bahneh engkek ajeh nu mai kilek begei de bibeh ya mai de naibepure-pure ku kateh deg sembahyang ru ku nong timbok. Naibeh pekare ajeh supaye bipateh ya mai kilek. Cerngailoh abor, enai ya naikep benalas bor kerana bahneh enai ajeh. 3Tapi bile engkeog ennog nu mai hajap, behloh hal ajeh serakngek supaye kawat engkek pen pek kipanei. 4Biarloh hal ajeh pek bipanei ya bok-bok pen. Menek engkek de nengneng bahneh engkek de cenem ajeh doh Kibalas bor bahneh engkek ajeh.”

Hal Doa

(Luk 11:2-4)

5“Bile engkebedoa, agokloh bedoa begei mai de naibepure-pure. Enai gemar naijinjeg ru naibedoa ku deg sembahyang ru ku centag nong supaye bineng ya mai. Cerngailoh abor, enai ya naikep benalas bor kerana bahneh enai ajeh. 6Tapi bile engkebedoa, mujloh nu kateh bilek ru tutoploh pintu lalu bedoaloh nu Menek de pek engkebakek ajeh. Menek engkek de Kipanei bahneh engkek de cenem ajeh doh Kibalas bor bahneh engkek ajeh.

7Bile engkebedoa, agok bedoa cereg-cereg guna perkataan de pek mong ma-ma imaksod begei de bibeh ya mai de pek naikenal ha Jenang. Naisangka Jenang doh Kicerngai semmanj enai kerana doa enai cereg. 8Agokloh beh begei ha enai kerana pekseg engkek semanj, Menek engkek ya Kipanei ma de engkeperlu.

9Jadi, bedoaloh begei adeh:

‘Menek jik de mong ku serga,

semoge Jen bihormat.

10Semoge Jen memerintah sebegei Raja,

semoge heknod Jen tejadi ku bumi begei ku serga.

11Ogloh jik caknak ku arik adeh.

12Amponloh ha senalah jik

begei jik jiampon ha mai de besalah nu jik.

13Pernyakloh jik ju cenuba,

ru terlasloh jik ju Ibles.

[Enjenloh de memerintah sebegei Raja de bekuasa ru de mulie lei ditehjeh. Amin.]’#6:13 Bahagian adeh pek mong ku kateh memerip salinan Alkitab manah.

14Amen engkeampon mai bahbeh salah nu engkek, Menek engkek de mong ku serga pen Kiampon dosa engkek. 15Tapi amen engkek pek engkeampon senalah mai kilek, Menek engkek de mong ku serga doh pek Kiampon dosa engkek juga.”

Hal Puase

16“Bile engkebepuase, wes agok beh renes engkek seselei begei mai de naibepure-pure. Renes enai hineng begei naitesiksa, lei dikdij mai naipanei enai tengah naibepuase. Cerngailoh abor! Enai ya naikep benalas bor kerana bahneh enai ajeh. 17Bile engkebepuase, laploh renes engkek ru geploh minyak sog 18supaye mai pek naipanei engkek tengah engkebepuase. Biarloh had Menek engkek de pek engkebakek ajeh de bepanei. Menek engkek de Kineng bahneh engkek de cenem ajeh doh Kibalas bor bahneh engkek ajeh.”

Harta ku Serga

(Luk 12:33-34)

19“Agok kumpol harta ha diri lihik ku dunia kerana ku pajeh bubok ru karat kiperusak harta ajeh, ru mai siksij kihol kaha-sij harta ajeh. 20Kumpolloh harta engkek ku serga kerana ku pajeh bubok ru karat pek dapat kiperusak harta ajeh, ru mai siksij pek dapat kihol kaha-sij harta ajeh. 21Kerana, ku belok harta engkek mong, ku pajehloh juga sengik engkek mong.”

Cahaya ha Sinui

(Luk 11:34-36)

22“Mat engkek ajeh pelite berog engkek. Amen lau mat engkek, lauloh berog engkek juga. 23Tapi amen mat engkek guer, guerloh dikdij berog engkek juga. Amen cahaya ku berog engkek kijadi guer, ihad kelap gengwer ajeh!”

Jenang atao Kenaya

(Luk 12:22-31; 16:13)

24“Pek mong mai de dapat kijadi hambe nu nar tuan. Kek doh kigetek ilei de numom ru kihok ilei de kilek. Atao kek doh setie nu ilei de numom ru kihina ha ilei de kilek. Begei ajehloh juga nu engkek. Engkek pek dapat engkejadi hambe nu Jenang, juga nu duet.

25Kerana ajeh, cerngailoh. Agokloh risau ma engkeha-cak ru engkeha-ngut untok engkeha-sui atao ma engke-ha log untok engketutop berog engkek. Sinui lebeh penteng daripade caknak, ru berog lebeh penteng daripade leknog. 26Nengloh cep-cep ku langit de pek naisepag mat beneh ru pek naikikkej ru de pek naikumpol hasel ku kateh deg gudang, tapi Menek engkek de ku serga Kiog caknak nu enai! Gandakloh engkek nij, engkek lebeh beharga daripade cep-cep ajeh! 27Pek mong numom pen ju engkap engkek de dapat kipecereg iumur hamapen nek gek ya inerisau sinui.

28Agok risau ha pek cukop leknog. Peratikloh ha cengwai bunga-bunga ku padag. Bunga-bunga ajeh pek naikerakjak ru pek naitintaj. 29Tapi, cerngailoh, Raja Salomo de ihad kaya ajeh pen pek kilog lebeh bor daripade bunga-bunga ajeh! 30Jenang Kihias rumpot ku padag, hamapen rumpot ajeh mong ku arik adeh ru huper bipej nu kateh os. Amen Jenang Kibeh begei ajeh nu rumpot, gandakloh nij nu engkek. Tentu Jenang doh Kiog leknog nu engkek. Engkek mimang sengoi-sengoi de kurang pecaya nu Jenang! 31Jadi, agokloh risau ma de engkeha-cak, ma de engkeha-ngut, ru ma de engkeha-log. 32Dikdij hal ajeh sentiase birisau ya mai de pek naikenal ha Jenang. Tapi Menek engkek de mong ku serga ya Kipanei keperluan engkek ajeh. 33Tapi adehloh hal de hod engkeutamekan: Ogloh diri engkek supaye biperintah ya Jenang sebegei Raja ru behloh Iheknod supaye engkejadi benar ku mat Ilei. Amen engkebeh begei ajeh, dikdij keperluan engkek ajeh doh biog nu engkek. 34Jadi, agokloh risau ha huper kerana huper mong isenusah ha huper. Agokloh tambah nerisau engkek ajeh nu senusah ku arik adeh kerana senusah arik adeh ya cukop ha arik adeh.”

Currently Selected:

MATIUS 6: AEH

Highlight

Copy

Compare