MATIUS 12

Tenanya tentang Arik Sabat

(Mrk 2:23-28; Luk 6:1-5)

1Ku nanek arik Sabat Yesus ru Ipengikot-pengikot nailintas selai gandom. Ipengikot-pengikot mula naileh ru naicak mat gandom kerana naicuag. 2Bile mai Farisi naibakek hal ajeh, naiurok nu Yesus, “Nengloh, pengikot-pengikot Hek naibeh pekare de biget ku arik Sabat!”

3Yesus Kiberlag, “Pek pernah engkebacaka ma de bibeh ya Raja Daud mase kek ru ianak buah naicuag?#1 Sam 21:1-6 4Kek kimuj nu Kemah Jenang lalu kicak ruti de bipesembah nu Jenang. Kek ru ianak buah naicak ruti ajeh hamapen ma de naibeh ajeh kilanggar Hukom Taurat. Amen hijoi Hukom Taurat, ruti ajeh had buleh bicak ya imam agame Yahudi taleh. 5Atao, pek pernah engkebacaka hal adeh ku kateh Hukom Taurat? Mai imam agame Yahudi nailanggar hukom Sabat bile naibeh tugas liknai ku Deg Jenang ku jap-jap arik Sabat,#Bil 28:9-10 tapi enai langsong pek bipesalah. 6Cerngailoh! Ku padeh mong hal de lebeh penteng daripade Deg Jenang. 7Ku kateh Alkitab ya bicot, Jenang Kiurok, ‘Eng nghod engkeperneng neyayak, apeka engkeog pesembahan korban binatag.’#Hos 6:6 Amen betol-betol engkereti ayat ajeh, tentu engkek pek engkepesalah mai de pek besalah 8kerana Eng Kenon Manusia adehloh Tuhan de bekuasa Ngha-petentu ma de buleh bibeh ya manusia ku arik Sabat.”

Yesus Kiperbor Numom de Lumpoh ku Arik Sabat

(Mrk 3:1-6; Luk 6:6-11)

9Yesus Kidek tempat ajeh lalu Kiet nu deg sembahyang. 10Ku pajeh mong numom de iteg englag lumpoh. Mong juga memerip urag mai de mimang naiha-kek senalah Yesus supaye dapat naitudoh Kek. Naitanya nu Yesus, “Amen hiperbor mai ku arik Sabat, hal ajeh kilanggar Hukom Tauratka?”

11Yesus Kiurok, “Amen numom ju engkek mong idombe yog nu kateh lubang ku arik Sabat, ya tentu kek kiperhol idombe ajeh ju lubang. 12Manusia lebeh beharga daripade dombe! Kerana ajeh, bahbeh bor ku arik Sabat pek kilanggar hukom.” 13Telas ajeh Yesus Kiurok nu sengoi de iteg englag lumpoh, “Ulurloh teg hek.” Sengoi ajeh pen kiulur iteg lalu iteg ajeh pen bor begei ha iteg englag.

14Mai Farisi naidek ju tempat ajeh lalu naibepakat naiha-perdat Yesus.

Hambe de Bipileh ya Jenang

15Bile Yesus Kipanei penakat jehat enai ajeh, Kek Kiet ju kenjeh ru jeoi mai jengoi naijoi Kek. Kek Kiperbor dikdij mai de nyik 16ru Kiget naipasal nu mai kilek Ilei ajeh bok. 17Kek Kibeh begei ajeh supaye tejadi begei de biurok ya Jenang melalui Nabi Yesaya,

18“Adeh Hambe Eng de ya Ngpileh,

Sengoi de Nghok ru Kipesenang sengik Eng.

Doh Ngog Kelog Eng nu Kek

ru doh neadel Eng biperlei ya Kek nu dikdij bangse.

19Kek doh pek Kibekelahi atao Kihinhanj

ataopen Kibual ya suara kuat ku nong-nong timbok.

20Lalag de selei doh pek Kibergot

ru sumbu de ya kaha-let doh pek Kiperlet.

Kek Kibejuang lei mong neadel,

21ru dikdij bangse doh naibeharap nu Kek.”#Yes 42:1-4

Yesus ru Beelzebul

(Mrk 3:20-30; Luk 11:14-23)

22Telas ajeh numom de buta ru bisu kerana bisangrog ya nyanik bien nu Yesus. Yesus Kiperbor sengoi ajeh lei dapat kibelwal ru kinengneng. 23Mai jengoi ku pajeh cengang empag enai naineng hal ajeh, lalu naiurok Yesus ajeh enggamak Kenon-cenok Raja Daud de bijanji ya Jenang.

24Tapi bile mai Farisi naicerngai tentang hal ajeh, naiurok, “Kek Kiperet nyanik-nyanik ya kuasa Beelzebul raknak dikdij nyanik.”

25Yesus ya Kipanei ma de mai Farisi ajeh naiserngik, lalu Kek Kiurok nu enai, “Jap-jap kerajaan de isengoi naibelawan ratak liknai doh kitateh. Ru jap-jap kote atao peringak de naibelawan ratak liknai doh kihancor. 26Begei ajehloh juga, amen nyanik-nyanik ku kateh kerajaan Ibles nailawan ratak liknai, kerajaan ajeh doh kiceraklah ru pek dapat kitahan. 27Amen Ngperet nyanik-nyanik ya kuasa Beelzebul, ya kuasa bok pengikot-pengikot engkek naiperet nyanik-nyanik? Jadi, pengikot-pengikot liengkek naipebukti peniker engkek ajeh sek! 28Eng Ngperet nyanik-nyanik ya Kelog Jenang. Hal ajeh kiperneng Jenang ya mula Kimemerintah sebegei Raja ku engkap engkek.

29Pek numom pen de dapat kimuj ru kikot harta ku deg sengoi de kuat. Tapi, telas ya kibeg sengoi de kuat ajeh baruloh dapat kikot iharta.

30Bok imai de pek kisukong Eng, kek kilawan Eng. Ru bok imai de pek kikumpol pengikot-pengikot besama ru Eng, kek kibeh enai ajeh naiceraklah! 31Kerana ajeh, cerngailoh. Bok imai de kibeh dosa atao kiurok engrok niknej doh biampon. Tapi bok imai de kihina Kelog Santen doh pek biampon! 32Bok imai de kilawan ha Eng Kenon Manusia kiguna bengwal nej doh biampon. Tapi bok imai de kihina Kelog Santen doh pek biampon, ku mase hunen ataopen pigoi doh!”

Keneng Jehuk ru Ipelek

(Luk 6:43-45)

33“Amen keneng jehuk ajeh bor, ipelek juga mesti bor. Amen keneng jehuk ajeh niknej, ipelek juga mesti niknej. Kerana, bor atao nej keneng jehuk ajeh buleh hipanei ju ipelek. 34Engkek cecenok tijik selik, engkek pek dapat engkebual hal de bor kerana liengkek mai jehat. Kerana, ma de bibual ya empag kihol ju kateh sengik. 35Sengoi de bor kiperhol hal-hal de bor kerana isengik tebeg ya bernor. Sengoi de jehat kiperhol hal-hal de niknej kerana isengik tebeg ya jenghat.

36Cerngailoh, ku arik Jenang Kipeadel dikdij mai, jap sengoi doh naibetanggongjawab nu jap-jap engrok de pek patot naibual. 37Kerana, ya bengwal lihek ajehloh hek doh bihukom salahka tok.”

Yesus Kinyek Perneng Tanda Ajaib

(Mrk 8:11-12; Luk 11:29-32)

38Telas ajeh memerip urag guru Hukom Taurat ru mai Farisi naiurok nu Yesus, “Guru, jiha-neng Jenbeh tanda ajaib.”

39Tapi Yesus Kiberlag, “Mai ku jaman adeh ihad jehat ru pek setie! Engkesemanj Ngperneng tanda ajaib. Tapi had nanek taleh tanda ajaib de Ngperneng nu engkek doh. Tanda ajeh tanda ajaib Nabi Yunus. 40Sama begei Nabi Yunus de kigei nik arik ru nik kenglem ku kateh ked kak entoi, begei ajeh juga Eng Kenon Manusia doh Nggei nik arik ru nik kenglem ku kateh penep.#Yun 1:17 41Ku arik Jenang Kipeadel dikdij mai, mai de gigei ku kote Niniwe entem doh naikos besama ru engkek mai jaman adeh lalu naitudoh ha engkek kerana ya naibetobat ju dosa liknai bile naicerngai gah de biperlei ya Nabi Yunus. Cerngailoh, hunen ku padeh mong Ilei de lebeh entoi daripade Nabi Yunus! 42Ku arik Jenang Kipeadel dikdij mai, ratu ju lengrik Syeba doh kikos besama ru engkek mai jaman adeh lalu kitudoh ha engkek kerana ratu ajeh kihol ju mol bumi kaha-cerngai neajar Raja Salomo de cerdeg ajeh. Cerngailoh, ku padeh hunen mong Ilei de lebeh entoi daripade Raja Salomo!”#1 Raj 10:1-10; 2 Taw 9:1-12

Nyanik Kilos Nij

(Luk 11:24-26)

43“Bile nyanik kihol ju numom sengoi, nyanik ajeh kikakkek tempat sod kaha-berihat. Tapi, bile pek kikep tempat sod, 44nyanik ajeh kiurok kaha-jog nij nu deg de ya kihol. Nyanik ajeh pen kijog ru kineng deg de kidek entem kusong, berseh, ru besemiak. 45Jadi, kiajak tujoh nyanik kilek de lebeh jehat daripade kek. Dikdij liknai naimuj nu sengoi ajeh ru naigei ku pajeh. Ipenyudah, keadaan sengoi ajeh kijadi lebeh terok daripade canuk. Begei ajehloh de doh belaku nu engkek mai jaman adeh de jehat.”

Amek ru Memenang Yesus

(Mrk 3:31-35; Luk 8:19-21)

46Tengah Yesus Kibelwal nu mai jengoi ajeh, Iamek ru Imemenang naihol. Naijinjeg ku luar naiha-belwal nu Yesus. 47Numom ju mai jengoi de mong ku pajeh kiurok nu Yesus, “Jen, amek ru memenang Jen naijinjeg ku luar naiha-belwal nu Jen.”

48Tapi Yesus Kiberlag, “Bok amek Eng? Bok tenek-menang Eng?” 49Lalu Kek Kiternyol nu Ipengikot-pengikot ru Kiurok, “Neng, adehloh amek ru tenek-menang Eng. 50Bok imai de kibeh heknod Menek Eng de ku serga, sengoi ajehloh tenek-menang Eng ru amek Eng.”

Currently Selected:

MATIUS 12: AEH

Highlight

Copy

Compare