MATIUS 13

Perumpamaan tentang Mai Besepag Mat Beneh

(Mrk 4:1-9; Luk 8:4-8)

1Ku arik de sama Yesus Kihol ju deg ajeh lalu Kiet nu beg tasek. Kek Kigei ku pajeh ru Kibeajar. 2Ihad jeoi sengoi naibekumpol ku sekelileg Kek. Kerana ajeh, Kihuj nu nanek perahu ru Kigei ku pajeh sambel mai jengoi ajeh naijinjeg ku beg tasek.

3Yesus Kiajar enai jeoi hal Kiguna perumpamaan. Kek Kiurok, “Mong numom mai de beselai kiet kaha-sepag beneh. 4Mase kek kisepag beneh, mong mat beneh de yog ku nong, lalu hol cep ru naicak dij mat beneh ajeh. 5Mong juga mat beneh de yog ku tik bebatu de itik gek. Mat beneh ajeh deras kicuai kerana itik nekgek. 6Tapi bile iarik kibeked, cengwai ajeh kiselei lalu kisod kerana ireis pek jerek. 7Mong juga mat beneh de yog ku engkap semak de bejerlak. Semak bejerlak ajeh kigu-hit lalu kiperip cengwai beneh ajeh. 8Mong juga mat beneh de yog ku tik de bor lalu kibepelek. Ikennem mong lei 100 kali gande, mong de 60 kali gande, mong de 30 kali gande.”

9Lalu Yesus Kiurok, “Amen engkek beentag, cerngailoh!”

Sebab Yesus Kiguna Perumpamaan

(Mrk 4:10-12; Luk 8:9-10)

10Telas ajeh pengikot-pengikot Yesus naihol ru naitanya nu Kek, “Yama Jenguna perumpamaan bile Jenbelwal nu mai jengoi?”

11Yesus Kiberlag, “Nu engkek ya biog panei rahsie tentang begeiharok Jenang Kimemerintah sebegei Raja, tapi nu mai kilek pek biog panei. 12Bok taleh de naiserngik ru naireti ha neajar Eng, Jenang doh Kibeh naireti gulebeh jeoi nij. Tapi bok taleh de pek naiserngik ha neajar Eng, enai doh naisip juga pekara-pekara de ya naipanei. 13Adehloh isebab Ngguna perumpamaan mase Ngbelwal nu enai:

Supaye nainengneng

tapi pek naibakek,

ru naiceringai

tapi pek naireti.

14Keadaan enai ajeh kitejadi begei ma de Jenang Kiurok melalui nubuat Nabi Yesaya,

‘Naicerngai

tapi pek naireti ma de naicerngai.

Nainengneng

tapi pek naireti ma de naineng

15kerana sengik enai ya ihad keras.

Entag enai tuli, ru mat enai perekbet.

Amen enai pek begei ajeh, tentu mat enai doh kinengneng,

entag enai doh kiceringai, ru sengik enai buleh kireti,

lei naijog nij nu Eng,

ru Eng doh Ngperbor enai.’#Yes 6:9-10

16Tapi engkek biberkat kerana mat engkek kibakek ru entag engkek kicerngai! 17Cerngailoh abor! Jeoi nabi ru mai de benar ku mat Jenang naiha-neng ma de engkeneng hunen tapi pek kep naineng, ru naiha-cerngai ma de engkecerngai hunen tapi pek kep naicerngai.”

Yesus Kipeterang Perumpamaan Mai Besepag Mat Beneh

(Mrk 4:13-20; Luk 8:11-15)

18“Kerana ajeh, cerngailoh ma ireti perumpamaan mai besepag mat beneh. 19Mat beneh de yog ku nong ajeh begei ha sengoi de biajar tentang begeiharok Jenang Kimemerintah sebegei Raja tapi pek naireti. Ibles kihol lalu kikot ma de ya bisepag ku kateh sengik enai. 20Mat beneh de yog ku tik bebatu ajeh begei ha sengoi de naicerngai engrok ajeh lalu deras naiterima ya sengik de suka. 21Tapi engrok ajeh pek kibereis ku kateh sengik enai ru pek kibetahan liu. Bile senusah kitiba ru enai bisiksa kerana naipecaya nu engrok ajeh, enai deras pek naipecaya nij. 22Mat beneh de yog ku engkap-engkap semak bejerlak ajeh begei ha sengoi de naicerngai engrok ajeh tapi nerisau ha sinui ru heknod ha kenaya kipebantot engrok ajeh lei pek kibepelek. 23Mat beneh de yog ku tik de bor ajeh begei ha sengoi de naicerngai engrok ajeh ru naireti, naijadi begei beneh de kiperhol pelek-pelek ru hasel de jeoi. Mong de kibehasel 100 kali gande, mong de 60 kali gande, ru mong juga 30 kali gande.”

Perumpamaan tentang Lalag ku Engkap Gandom

24Yesus Kicerite nanek perumpamaan de kilek nij nu enai. Kek Kiurok, “Begei perumpamaan adehloh icare Jenang Kimemerintah sebegei Raja: Mong numom kisepag mat beneh de bor ku iselai. 25Ku nanek kenglem, mase dikdij sengoi tengah naibukbet, hol musoh tuan selai ajeh lalu kicet lalag ku engkap mat gandom ajeh, telas ajeh kiet. 26Bile cengwai mat gandom mula kihol ru ceknet ajeh ya kientoi, ku pajeh juga mong cengwai lalag. 27Pekerjak selai ajeh naiet nu tuan enai ru naiurok, ‘Tuan, jencet mat beneh de bor ku selai adeh. Ju belok nij kitiba lalag-lalag ajeh?’ 28Tuan selai ajeh kiberlag, ‘Musoh eng de bahbeh hal ajeh.’ Ipekerjak ajeh naitanya nij, ‘Jenhodka jiroj lalag-lalag ajeh?’ 29Ituan kiberlag, ‘Wes, kerana mase engkeroj lalag, enggamak gandom kiraroj juga. 30Biarloh lalag ajeh kicuai besama ru gandom lei tiba imase hiha-kej gandom. Eng doh ngor mai kikkej nairoj lalag canuk, naibeg nuberkas-nuberkas ru naitod. Telas ajeh baruloh naicatuk gandom ku tempat daknek eng.’ ”

Perumpamaan tentang Mat Sawi

(Mrk 4:30-32; Luk 13:18-19)

31Yesus Kicerite nanek perumpamaan de kilek nij nu enai. Kek Kiurok, “Ijengoi sengoi-sengoi de biperintah ya Jenang sebegei Raja doh gumaken jeoi begei ha perumpamaan adeh: Mong numom kikot nanek mat sawi#13:31 Sawi: Sawi de bimaksod padeh keneng de kicuai ihad tinggi, enyuk apeka sayo. lalu kicet ku iselai. 32Mat sawi ajeh mat beneh de paleng macot ku engkap dikdij jenis mat beneh. Tapi bile ya kicuai, kijadi jehuk de lebeh entoi daripade ceknet de kilek lei cep buleh naibeh deg ku icag.”

Perumpamaan tentang Ragi

(Luk 13:20-21)

33Yesus Kicerite nanek perumpamaan de kilek nij. Kek Kiurok, “Sengoi-sengoi de biperintah ya Jenang sebegei Raja doh naipengaroh ha sengoi-sengoi dunia begei ha perumpamaan adeh: Numom kerdor kikot ragi lalu kigaol ru 40 liter tepong lei dikdij genaol ajeh kihuj.”

Tujuan Yesus Kiguna Perumpamaan

(Mrk 4:33-34)

34Begei ajehloh Yesus Kiajar dikdij hal ajeh nu mai jengoi Kiguna perumpamaan. Walah nanek neajar pen de pek Kiguna perumpamaan. 35Kek Kibeh begei ajeh supaye tejadi ma de biurok ya Jenang melalui Inabi,

“Eng doh Ngguna perumpamaan bile Ngbelwal nu enai.

Eng doh Ngpasal nu enai hal-hal de cenem sejak dunia adeh bibeh.”#Mzm 78:2

Yesus Kipasal Erti Perumpamaan tentang Lalag ku Engkap Gandom

36Telas ajeh Yesus Kidek mai jengoi lalu Kijog nu madeg. Ipengikot-pengikot naihol nu Kek ru naiurok, “Pasalloh nu jik, ma maksod perumpamaan lalag ku engkap gandom ajeh.”

37Yesus Kiurok, “Sengoi de kisepag mat beneh de bor ajeh Eng Kenon Manusia. 38Selai ajeh dunia adeh ru mat beneh de bor ajeh sengoi-sengoi de biperintah ya Jenang sebegei Raja. Lalag ajeh sengoi de naijoi Ibles. 39Musoh de kisepag mat lalag ajeh Ibles. Mase kiknej ajeh arik kiamat ru mai kikkej ajeh malikat-malikat. 40Lalag de bikumpol ru bitod ajeh begei ihal ku arik kiamat doh. 41Eng Kenon Manusia doh Ngor malikat-malikat nairoj dikdij punca dosa ru dikdij mai jehat de mong ku engkap sengoi-sengoi de biperintah ya Jenang sebegei Raja. 42Mai jehat ajeh doh bipej nu tempat jeknop. Ku pajeh enai doh naijap ru ihad naitesiksa. 43Ku mase ajeh, mai de benar ku mat Jenang doh naibecahaya begei ha mat arik, ku serga de biperintah ya Jenang sebegei Raja, Menek enai. Amen engkek beentag, cerngailoh!”

Perumpamaan tentang Harta de Bibercep

44“Sengoi de kiburuk icare untok kijadi sengoi de biperintah ya Jenang sebegei Raja, sama begei ha sengoi de kiburuk harta de bibercep ku kateh tik. Telas kiburuk harta ajeh, kek kibercep balek harta ajeh ku kateh tik, lalu ru ihad senang sengik kiet kijual dij iharta de kipunya ru kibeli tik ajeh nek.”

Perumpamaan tentang Mutiare de Ihad Bor

45“Sengoi de kikek icare untok kijadi sengoi de biperintah ya Jenang sebegei Raja, sama begei ha peniage de kikek mutiare de bor untok kaha-beli. 46Bile ya kiburuk numeknat mutiare de ihad bor, kek kijual dij iharta lalu kibeli mutiare ajeh.”

Perumpamaan tentang Jala

47“Ku engkap sengoi-sengoi de biperintah ya Jenang sebegei Raja, hal begei perumpamaan adeh doh kitejadi: Mong jala de bijala ku tasek lalu kep bemacam jenis kak. 48Bile jala ajeh ya tebeg, mai bejala ajeh naitarek jala nu darat. Lalu naigei ru naicerlah kak-kak ajeh. Kak de bor bidek ku kateh bekas tapi kak de niknej bipej. 49Begei ajehloh ihal ku arik ipenyudah. Malikat-malikat doh naihol naiha-kumpol ru naiha-cerlah mai jehat ju mai de benar ku mat Jenang. 50Lalu mai jehat ajeh doh bipej nu kateh tempat jeknop. Ku pajeh enai doh naijap ru ihad naitesiksa.”

Neajar Pai ru Neajar Manah

51Yesus Kitanya nu Ipengikot-pengikot, “Engkeretika dikdij hal ajeh?”

Ipengikot-pengikot naiberlag, “Jireti.”

52Yesus Kiurok nij, “Kerana engkeurok engkereti, engkek begei ha guru-guru Hukom Taurat de ya jadi sengoi-sengoi de biperintah ya Jenang sebegei Raja. Engkek begei ha tuan deg de kiperhol arap pai ru arap manah ju ibilek daknek arap. Imaksodjeh, engkek doh engkeajar neajar manah de ya engkepanei, ru engkeajar juga neajar pai de engketerima ju Eng.”

Yesus Pek Biterima ku Pekan Nazaret

(Mrk 6:1-6; Luk 4:16-30)

53Telas ya dij Yesus Kicerite dikdij perumpamaan ajeh, Kek Kidek ju tempat ajeh 54lalu Kijog nu Ikampug. Ku pajeh Kek Kibeajar ku deg sembahyang, ru mai de naiceringai ha Ineajar ajeh cengang empag enai. Naiurok ratak liknai, “Ju belok Kiberkep cerendeg begei ajeh? Ju belok Kiberkep kuasa Kibeh ajaib? 55Hipanei Kek ajeh kenon tukang jehuk. Maria ajeh Iamek. Ru Yakobus, Yusuf, Simon, ru Yudas ajeh Imemenang. 56Imemenang kerdor juga mong naigei ku padeh. Jadi, ju belokka Kiberkep dikdij cerendeg ru kuasa ajeh?” 57Kerana ajeh, mai ku pajeh nainyek ha Kek.

Yesus Kiurok nu enai, “Numom nabi bihormat ku belok-belok taleh tapi kek pek bihormat ku kampug ilei sendiri ru ya iperingak.” 58Yesus pek Kibeh jeoi ajaib ku pajeh kerana enai pek naipecaya nu Kek.

Currently Selected:

MATIUS 13: AEH

Highlight

Copy

Compare