MATIUS 11

Sengoi-sengoi de Bingeng ya Yohanes Pembaptis

(Luk 7:18-35)

1Ya telas Yesus Kiog ernor nu 12 urag Ipengikot ajeh, Kek Kidek tempat ajeh lalu Kiet Kaha-ajar ru Kaha-perlei engrok Jenang ku jap-jap pekan de rek.

2Bile Yohanes Pembaptis de bijel kicerngai hal-hal de bibeh ya Kristus, kek kingeng memerip urag ipengikot nu Yesus 3supaye naitanya, “Enjenka Peselamat de bijanji ya Jenang? Atao hodka jipoj ha mai kilek nij?”

4Yesus Kiberlag, “Jogloh pasal nu Yohanes Pembaptis ma de engkecerngai ru engkeneng: 5Mai buta ya nainengneng, mai lumpoh ya naicekcip, mai nyik kuste ya naibor, mai pekak ya naiceringai, mai dat ya bipersui, ru mai hajap ya biperlei Gah Bor.#Yes 35:5-6 6Jenang Kiberkat mai de pek naijadi ragu-ragu kerana Eng.”

7Bile pengikot-pengikot Yohanes Pembaptis naiet ju kenjeh, Yesus mula Kipasal nu mai jengoi tentang Yohanes Pembaptis, “Yama engkeet nu padag guron ru ma de engkeha-neng? Engkeha-neng lalag de bipoi ya pinoika? 8Amen pek begei ajeh, engkeet nu majeh engkeha-neng ma? Engkeha-neng mai de beleknog borka? Mai de beleknog bor naigei ku istane! 9Amen pek begei ajeh, engkeet nu majeh engkeha-neng ma? Engkeha-neng numom nabika? Hooh, cerngailoh abor, ilei ajeh lebeh ju numom nabi! 10Ya mong bicot ku kateh Alkitab tentang kek begei adeh:

‘Eng doh Ngngeng sengoi ernor Eng lebeh canuk daripade Hek.

Kek doh kisedia nong ha Hek.’#Mal 3:1

11Cerngailoh abor! Ku engkap dikdij sengoi de biperyos ku dunia adeh, pek mong numom pen de lebeh entoi daripade Yohanes Pembaptis. Tapi, sengoi de paleng macot ikedudukan ku engkap sengoi-sengoi de biperintah ya Jenang sebegei Raja, ilei ajeh lebeh entoi daripade Yohanes Pembaptis. 12Sejak ju helnol Yohanes Pembaptis leiloh ku mase adeh, sengoi-sengoi de biperintah ya Jenang sebegei Raja biserag ru bianiaye ya sengoi-sengoi de ganas. 13Dikdij nabi-nabi ru Hukom Taurat Musa mong naipasal nubuat-nubuat leiloh helnol Yohanes Pembaptis. 14Amen engkesanggop engkeha-terima, pecayaloh engrok adeh: Yohanes Pembaptis ajehloh ilei Nabi Elia de ihelnol ya binubuat entemjeh. 15Amen engkek beentag, cerngailoh!

16Begei ha ma Ngha-pesama sengoi-sengoi ku jaman adeh? Enai ajeh begei sesanget de naimuman. Nanek kumpulan naiurok nu kumpulan de kilek:

17‘Jimain lagu runggen ha engkek

tapi pek engkeberunggen.

Jimain lagu sedeh pen

pek engkejinjap!’

18Iretijeh begei adeh: Engkek engkenyek ha kerjak Jenang, pek kira hang-harok pen ikerjak ajeh. Kerana, bile Yohanes Pembaptis kihol, kek selalo kibepuase ru pek kingut teu wain. Engkeurok kek bisangrog ya nyanik. 19Tapi bile Kenon Manusia Kihol, Kek selalo Kicakcak ru Kingekngut. Engkeurok, ‘Neng, Kek nekcaknak ru nekngeknut. Kek kibekawat ru mai bekutep cukei ru mai bedosa!’ Tapi mai de naijoi cerendeg Jenang naisedar tentang hal adeh: Bahneh Jar Yohanes Pembaptis iasal ju Jenang.”

Yesus Kisumpah ha Mai Yahudi

(Luk 10:13-15)

20Lalu Yesus mula Kisumpah ha pekan-pekan ku belok Kibeh jeoi ajaib. Yesus Kisumpah ha pekan-pekan ajeh kerana sengoi ku pajeh pek naiha-betobat ju dosa enai. 21Kiurok, “Celakaloh engkek mai Yahudi ku pekan Korazin ru pekan Betsaida! Amen ku kote Tirus ru kote Sidon mong Ngbeh ajaib-ajaib de ya Ngbeh ku engkek, tentu ya liu nailog abat guni ru naidol habu ku kui liknai sebegei bukti naibetobat. 22Tapi, cerngailoh! Ku arik Jenang Kipeadel dikdij mai, nehukom Jenang nu sengoi ku kote Tirus ru kote Sidon doh lebeh hayok daripade nehukom nu engkek. 23Engkek mai Yahudi ku pekan Kapernaum, engkepiker engkek doh bipetinggi lei engkekep nehormat de entoi ku serga? Tok, engkek doh bipej nu kateh os nyeng. Amen ajaib-ajaib de bibeh ku engkap engkek ajeh bibeh ku kote Sodom, ya tentu Sodom lekat mong lei hunen! 24Cerngailoh, ku arik Jenang Kipeadel dikdij mai, nehukom Jenang nu sengoi ku kote Sodom doh lebeh hayok daripade nehukom nu engkek!”

Neajak Yesus

(Luk 10:21-22)

25Ku mase ajeh, Yesus Kiurok, “Menek de memerintah langit ru bumi, Eng Ngpateh Jen kerana dikdij hal adeh Jenbercep ju mai cerdeg ru mai panei. Tapi Jenpasal nu mai de sengik enai begei ha sengik sesanget de sedia naiha-pecaya neajar de benar. 26Hooh Menek, ajehloh heknod Jen.”

27Yesus Kiurok nij, “Dikdij hal ya biserah nu Eng ya Menek Eng. Pek numom pen kikenal Kenon tapi had Menek taleh de Kikenal Kenon. Juga, pek numom pen kikenal Menek tapi had Kenon ru mai de biog panei ya IKenon taleh de naikenal ha Menek.

28Beiloh nu Eng dikdij engkek de kalei ru genulap engkek ajeh nyeh. Eng doh Ngpelega engkek ju nyahneh ajeh. 29Joiloh ernor ru neajar Eng kerana Eng lemah-lembot ru rendah sengik. Engkek doh engkerasa lega. 30Ernor de Ngog senang engkeha-joi, ru genulap de Ngog senang engkeha-gulap.”

Currently Selected:

MATIUS 11: AEH

Highlight

Copy

Compare