KEJADIAN 47

Yakub Kiterbuk nu Raja Mesir

1Telas ajeh Yusuf kidek Gosyen ru kiterbuk nu raja. Yusuf kiurok, “Apak ru tenek-menang eng ya nailei besama ru kenawat kambeg, dombe, lembu, ru dikdij harta enai ju tik Kanaan. Hunen enai mong ku tik Gosyen.” 2Lalu kek kipekenal lima urag itetenek de ya kien nu raja.

3Raja kitanya nu enai, “Engkekerjak ma?”

Naiberlag, “Jik gembale-gembale binatag begei jenang rak lijik. 4Jik jihol nu madeh jiha-gei ku lengrik adeh kerana cengwag ku tik Kanaan ihad terok lei walah pek berumpot ha binatag. Ogloh jik jigei ku tik Gosyen.”

5Lalu raja kiurok nu Yusuf, “Hunen apak ru tenek-menang hek ya mong ku padeh. 6Behloh lengrik Mesir adeh begei lengrik liengkek. Biarloh naigei ku tik Gosyen, ku kawasan de paleng bor ku lengrik adeh. Amen mong sengoi de panei bahbeh kerjak ku engkap enai, ogloh naijaga binatag daknek eng.”

7Telas ajeh Yusuf kien iapak terbuk nu raja. Yakub pen kiberkat raja. 8Lalu raja kitanya nu Yakub, “Merip umur hek?”

9Yakub kiberlag, “Eng ya ngsui 130 tahut sebegei pengembare. Sinui eng ihad patik ru jeoi senusah, pek begei cengrek umur jenang rak eng de naisui sebegei pengembare.” 10Telas Yakub kiberkat raja nij, kek pen kiet ju kenjeh.

11Yusuf kisedia tempat ginei ha iapak ru itenek-menang ku lengrik Mesir. Kek kiog tik Rameses sebegei hak enai begei de bior ya raja. Tik ajeh tik de paleng bor ku lengrik Mesir. 12Yusuf juga kiog caknak de cukop ha iapak, itenek-menang, ru dikdij peringak iapak. Ijengoi caknak de kiog nu enai kijoi ijengoi kekenon enai.

Ma de Kibeh ya Yusuf Mase Cengwag

13Ku mase ajeh, cengwag ihad terok lei pek mong nij caknak ku belok-belok pen. Mai de gigei ku lengrik Mesir ru tik Kanaan naiselei kerana naicuag. 14Yusuf kikumpol dikdij duet de mong ku lengrik Mesir ru Kanaan de bibayar ha gandom lalu kidek ku istane raja. 15Bile duet ku lengrik Mesir ru tik Kanaan ya dij, dikdij mai Mesir naihol nu Yusuf ru naiurok, “Ogloh jik caknak! Agok biar jidat. Duet jik ya dij.”

16Yusuf kiberlag, “Amen duet engkek ya dij, ogloh binatag daknek engkek nu eng. Eng doh ngog caknak nu engkek sebegei genanti binatag daknek ajeh.” 17Jadi, enai pen naiog binatag daknek enai nu Yusuf ru Yusuf kiog caknak sebegei genanti kuda, dombe, kambeg, lembu, ru keldei. Begei ajehloh Yusuf kiog caknak nu mai Mesir ku tahut ajeh.

18Telas tahut ajeh ya dij, mai Mesir naihol nij nu Yusuf ru naiurok, “Jik pek jibercep ma-ma pen ju jen. Duet jik ya dij ru binatag daknek jik pen ya kijadi hak jen. Jik pek mong ma-ma nij jiha-og nu jen, had de mong diri lijik ru tik jik taleh. 19Agok biar jidat ku ngar jen! Ru agok biar selai jik kijadi sod! Beliloh diri jik ru tik lijik sebegei genanti ha caknak. Jik ru tik jik doh kijadi hak raja. Ogloh beneh supaye jisui ru pek jidat, ru tik jik pek kijadi sod!”

20Jadi, Yusuf kibeli dikdij tik ku lengrik Mesir ha raja. Dikdij mai ku lengrik Mesir tepaksa naijual tik enai kerana cengwag ku pajeh ihad terok. Begei ajehloh dikdij tik ku lengrik Mesir kijadi hak raja. 21Lagipen, dikdij mai ku lengrik Mesir juga bipejadi hambe ya Yusuf. 22Had tik mai imam taleh de pek bibeli ya Yusuf. Enai pek payah naijual tik liknai kerana raja kiog gaji tetap ha sinui enai, jadi enai mong cukop caknak.

23Lalu Yusuf kiurok nu mai Mesir, “Nengloh! Hunen eng ya ngbeli tik engkek ru liengkek sekali ha raja. Kotloh beneh adeh ha engkek ru cetloh ku selai-selai ajeh. 24Ku mase kiknej doh, engkek mesti engkeog 20 peratos ju kennem engkek nu raja. 80 peratos buleh engkeguna sebegei beneh ru caknak ha engkek ru peringak liengkek.”

25Naiberlag, “Jen ya jenpeselamat jik. Kerana ya bernor jen, jik sanggop jijadi hambe raja.”

26Telas ajeh Yusuf kipejadi hal ajeh nanek peratoran ku lengrik Mesir, jap-jap 20 peratos ju dikdij hasel kennem kijadi hak raja. Peratoran ajeh lekat bipakei lei hunen. Had tik mai imam taleh de pek kijadi hak raja.

Semmanj Yakub de Ipenyudah

27Begei ajehloh mai Israel naigei ku tik Gosyen ku lengrik Mesir. Ku pajeh naikep harta ru naibekenon-cenok jeoi.

28Yakub kigei ku lengrik Mesir selame 17 tahut lei iumur 147 tahut. 29Bile lei imase kaha-dat, kek kicereg ikenon Yusuf lalu kiurok, “Amen hek habekenan nu eng, dekloh teg hek ku kerop lempak eng ru besumpahloh hek doh haperneng haknok ru kesetiean hek nu eng. Ngsemanj wes agok cop eng ku lengrik Mesir. 30Bile ngdat, eng nghod bicop ku tempat jenang rak eng. Enloh mayat eng hol ju lengrik Mesir ru coploh eng ku penep jenang rak eng.”

Yusuf kiberlag, “Eng doh ngbeh ma de jenurok ajeh.”

31Yakub kiurok, “Besumpahloh hek doh habeh ma de nghod.” Jadi, Yusuf pen kibesumpah lalu Yakub kisembah ha Jenang ku itempat buknet.

Currently Selected:

KEJADIAN 47: AEH

Highlight

Copy

Compare