KEJADIAN 46

Yakub ru Iperingak Naiet nu Lengrik Mesir

1Jadi, Yakub ru iperingak naisiap dikdij arap enai lalu naiet. Bile nailei ku Bersyeba, Yakub kibeh ennog korban nu Jenang de bisembah ya Ishak iapak. 2Ku ikenglem, ku kateh nanek nengneng, Jenang Kiurok nu kek, “Yakub, Yakub!”

Yakub kiberlag, “Ma, Jenang?”

3Jenang Kiurok, “Engloh Jenang, Jenang de bisembah ya apak hek. Agok sengoh haet nu lengrik Mesir kerana Eng doh Ngpejadi kenon-cenok hek bangse de entoi ku pajeh. 4Eng doh Ngbeserta ru hek nu lengrik Mesir ru Eng doh Ngen kenon-cenok hek jog nu tik Kanaan. Yusuf doh mong ku beg hek bile hadat.”

5Telas ajeh Yakub kiet ju Bersyeba. Kekenon Yakub naiperhuj apak, kekenah, ru kekenon enai nu kemil pedati-pedati de bikirep ya raja Mesir. 6Enai juga naien binatag daknek ru dikdij harta de naiberkep ku tik Kanaan ru naiet nu lengrik Mesir. 7Begei ajehloh Yakub kiet nu lengrik Mesir besama ru dikdij ikenon-cenok temasok ikekenon keral ru kerdor, ru icecenok keral ru kerdor.

8Adehloh peringak Yakub de naiet besama ru ilei nu lengrik Mesir:

9Ruben kenon sulog Yakub, ru ikekenon keral de muh enai ajeh

Henokh, Palu, Hezron, ru Karmi.

10Simeon ru ikekenon keral de muh enai ajeh

Yemuel, Yamin, Ohad, Yakhin, Zohar, ru Saul (amek Saul ajeh mai Kanaan).

11Lewi ru ikekenon keral de muh enai ajeh

Gerson, Kehat, ru Merari.

12Yehuda ru ikekenon keral de muh enai ajeh

Er, Onan, Syela, Peres, ru Zerah (tapi Er ru Onan ya dat ku tik Kanaan).

Peres ru ikekenon keral de muh enai ajeh

Hezron ru Hamul.

13Isakhar ru ikekenon keral de muh enai ajeh

Tola, Pua, Yasyud, ru Simron.

14Zebulon ru ikekenon keral de muh enai ajeh

Sered, Elon, ru Yahleel.

15Dikdij enai ajeh kekenon de biperyos ya Lea ha Yakub ku Mesopotamia ru mong juga ikenon kerdor imuh Dina. Kenon-cenok Yakub ju ikenah Lea ijengoi 33 urag.

16Gad ru ikekenon keral de muh enai ajeh

Zifyon, Hagi, Syuni, Ezbon, Eri, Arodi, ru Areli.

17Asyer ru ikekenon keral de muh enai ajeh

Yimna, Yiswa, Yiswi, Beria, ru Serah menang kerdor enai.

Beria ru ikekenon keral de muh enai ajeh

Heber ru Malkiel.

18Enam belas urag ajehloh kenon-cenok Yakub ru Zilpa. Zilpa ajeh hambe kerdor de biog ya Laban nu Lea ikenon kerdor.

19Rahel kenah Yakub mong nar mom ikenon keral:

Yusuf ru Benjamin. 20Ku lengrik Mesir, Yusuf ru ikenah Asnat mong nar mom ikenon keral: Manasye ru Efraim. Apak Asnat ajeh Potifera. Potifera ajeh imam ku Heliopolis.

21Benjamin ru ikekenon keral de muh enai ajeh

Bela, Bekher, Asybel, Gera, Naaman, Ehi, Ros, Mupim, Hupim, ru Ared.

22Empat belas urag ajehloh kenon-cenok Yakub ru ikenah Rahel.

23Dan ru ikenon keral de imuh

Husyim.

24Naftali ru ikekenon keral de muh enai ajeh

Yahzeel, Guni, Yezer, ru Syilem.

25Tujoh urag ajehloh kenon-cenok Yakub ru Bilha. Bilha ajeh hambe kerdor de kiog ya Laban nu Rahel ikenon kerdor.

26Kenon-cenok Yakub de naiet nu lengrik Mesir ijengoi 66 urag, pek temasok imemengsau kerdor. 27Yusuf mong nar mom ikenon keral de biperyos ku lengrik Mesir. Jadi, jengoi peringak Yakub ku lengrik Mesir ajeh 70 urag.

Yakub ru Iperingak ku Lengrik Mesir

28Yakub kior Yehuda cip canuk nu Yusuf ru kitanya inong nu tik Gosyen. Bile nailei nu tik Gosyen, 29Yusuf kitebot kerite kuda kaha-buruk iapak ku pajeh. Mase ubai bebakek, Yusuf kikawal iapak ru kijap ihad liu. 30Yakub kiurok nu Yusuf, “Hunen eng ya buleh ngdat telas ya ngbakek ru ngpanei hek lekat hasui.”

31Telas ajeh Yusuf kiurok nu itenek-menang ru peringak iapak, “Eng doh nget ngha-pasal nu raja, ‘Tenek-menang ru dikdij peringak eng ya naihol ju tik Kanaan. 32Enai ajeh gembale-gembale dombe ru lembu. Enai ya naien binatag daknek ru dikdij hak liknai.’ 33-34Amen raja kicereg ru kitanya ha kerjak engkek, engkek hodloh engkeurok nu kek, ‘Jik adeh gembale binatag sejak jisanget begei jenang rak lijik.’ Amen begei ajeh, raja doh kior engkegei ku tik Gosyen kerana mai Mesir nairasa hina bile naibecatuk ru gembale binatag.”

Currently Selected:

KEJADIAN 46: AEH

Highlight

Copy

Compare