KEJADIAN 45

Yusuf Kipekenal Idiri nu Itenek-menang

1Bile Yusuf kicerngai engrok ajeh, kek pek dapat kiterhan isengik nij ku ngar dikdij sengoi de naijinjeg beg kek. Kerana ajeh, kek kior enai hol ju bilek ajeh supaye pek mong mai kilek bile kipekenal idiri nu itenek-menang. 2Lalu Yusuf kipanjap lei bicerngai ya mai Mesir. Gah tentang Yusuf kijinjap ajeh biperlei nu istane raja.

3Yusuf kiurok nu itenek-menang, “Eng adehloh Yusuf. Lekat suika apak eng?” Tapi itenek-menang naikerog lei pek dapat naiberlag itenanya ajeh.

4Jadi, Yusuf kiurok nu enai, “Beiloh madeh.” Enai naiperek nu Yusuf, lalu kek kiurok nij, “Eng adeh Yusuf menang engkek de ya engkejual nu lengrik Mesir. 5Agok susah sengik ru agok pesalah ha diri liengkek kerana ya engkejual eng. Jenangloh de ngengngeng eng lebeh canuk daripade engkek nu madeh Kaha-peselamat sinui mai jengoi. 6Hunen, ya lalu nar tahut musem cengwag ku lengrik adeh tapi mong lima tahut nij doh mai pek naibeselai ru naikikkej. 7Jenang Kingeng eng lebeh canuk daripade engkek Kaha-peselamat engkek kiguna care de pek hisangka supaye engkek selamat ru kenon-cenok engkek pen pek nyep. 8Jadi, Jenangloh de ngengngeng eng nu madeh, enyuk pek engkek. Jenang Kipejadi eng pegawei entoi raja Mesir. Kek Kiog nu eng kuasa ku seluroh istane raja ru seluroh lengrik Mesir.”

9Yusuf kiurok nij, “Jogloh deras nu apak eng ru pasalloh nu kek begei adeh: ‘Adehloh engrok Yusuf kenon jen, “Jenang ya Kipejadi eng penguasa ku seluroh lengrik Mesir. Deras hol nu eng. 10Jen buleh jengei ku tik Gosyen rek beg eng besama ru kenon-cenok, dombe, kambeg, lembu, ru dikdij hak jen. 11Amen jen mong ku Gosyen, eng buleh ngjaga jen kerana musem cengwag mong lagi lima tahut. Eng doh ngog caknak de cukop nu jen, nu peringak jen, ru nu binatag daknek jen supaye pek mong kurang ma-ma pen.” ’ ”

12Yusuf kiurok nij, “Hunen, temasok hek juga Benjamin, dikdij liengkek engkeneng eng adeh betol-betol Yusuf. 13Kuasa eng ihad entoi ku lengrik Mesir. Pasalloh hal ajeh nu apak hik. Pasalloh ma de ya engkeburuk ru enloh kek deras nu madeh!”

14Telas ajeh Yusuf kikawal Benjamin imenang ru kijap. Benjamin pen kijap sambel kikawal itenek. 15Lalu sambel kijinjap, Yusuf kikawal dikdij itetenek ru kinyui enai. Telas ju kenjeh, enai pen mula naibelwal ru kek.

16Bile gah tentang helnol tenek-menang Yusuf ajeh lei nu istane raja, raja ru dikdij ipegawei naiterima gah ajeh ru senang sengik. 17Lalu raja kiurok nu Yusuf, “Orloh tenek-menang hek naimerwat keldei enai ru gandom, ru naijog nu tik Kanaan. 18Pakatloh apak ru peringak hek jeg nu madeh. Eng doh ngog tik de paleng bor ha enai ku lengrik Mesir ru enai doh naikep hasel de paleng bor ju tik ajeh. 19Orloh tenek-menang hek naien memerip kebek pedati ju kendeh ha kekenah ru kekenon enai de sanget. Nyongloh apak engkek juga nu madeh. 20Pek payahloh naipiker ha arap de naiwes ajeh kerana ma de bor ku seluroh lengrik Mesir doh jadi hak enai.”

21Jadi, kekenon Yakub naibeh ma de bior ya raja ajeh. Yusuf kiog memerip kebek pedati kijoi ernor raja, ru kiog juga bekal caknak ha ceknip enai. 22Yusuf kiog nupasag penakei pai nu jap-jap itetenek tapi kiog 300 kepeg duet perak ru lima pasag penakei pai nu Benjamin. 23Ha iapak nij, Yusuf kikirep 10 ikor keldei ibek de bimerwat ya arap de bor ju lengrik Mesir. Yusuf juga kikirep 10 ikor keldei ikenan de bimerwat gandom, ruti ru caknak de kilek nu iapak ha iceknip doh nu lengrik Mesir. 24Telas ajeh Yusuf kingeng itenek-menang sambel kiurok, “Agok bekelahi ku kateh ceknip engkek.”

25Begei ajehloh naiet ju lengrik Mesir ru naijog nu Yakub apak enai ku tik Kanaan. 26Naiurok nu kek, “Yusuf lekat sui! Kek penguasa ku lengrik Mesir!” Yakub ihad kikekjet. Kek pek kipecaya ha engrok enai ajeh.

27Tapi, telas naipasal ma de biurok ya Yusuf, ru Yakub kiburuk ha pedati-pedati de ya bingeng ya Yusuf ha ennen ilei nu lengrik Mesir, Yakub pen teros kibesemangat. 28Lalu kek kiurok, “Ma de engkeurok ajeh ngpecaya! Kenon eng Yusuf lekat sui! Eng ngha-cip ngha-buruk kek sebelom ngdat!”

Currently Selected:

KEJADIAN 45: AEH

Highlight

Copy

Compare