KEJADIAN 41
41
Yusuf Kitapser Empok Raja Mesir
1Telas nar tahut ju kenjeh, raja Mesir kiberakpok. Ku kateh iempok, kek tengah kijinjeg ku beg Batag arik Nil. 2Aleh-aleh tujoh ikor lembu ikenan de bakcok ru igetek selej naihol ju Batag arik Nil lalu naicak rumpot ku beg batag arik ajeh. 3Telas ajeh tujoh ikor lembu ikenan de kilek naihol ju Batag arik Nil. Lembu-lembu ajeh ihad sor ru punjet. Lembu-lembu de sor ajeh naijinjeg englag lembu-lembu de bakcok ku beg batag arik. 4Lalu lembu-lembu de sor ru punjet ajeh naicak tujoh ikor lembu de bakcok ru igetek selej ajeh. Telas ju kenjeh raja kitejaga ju ibuknet.
5Telas ajeh raja kibet nij lalu kiberakpok nij. Ku kateh iempok ajeh nij, kibakek tujoh meknat gandom de beisi ru bor cuai ku nanek jog. 6Lalu ju jog de sama, mong cuai nij tujoh meknat gandom kilek de niknej ru selei kerana bipoi ya pinoi guron. 7Tujoh meknat gandom de niknej ajeh nailip dikdij tujoh meknat gandom de beisi. Telas ju kenjeh raja kikos ru kisedar kek kiberakpok.
8Ku ipegelap huper raja kirisau. Kerana ajeh, kek kipangel dikdij mai halak ru sengoi de panei ku lengrik Mesir. Lalu raja kicerite ha iempok nu enai tapi pek mong numom pen de dapat naitapser ha iempok ajeh.
9Ku mase ajeh, ketue mai bahbeh ngeknut kiurok nu raja, “Enjen, ku arik adeh ngteingat ha senalah eng. 10Entem, jenberiknos nu eng ru ketue mai bahbeh ruti lalu jenpermuj jar nu kateh jel ku deg ketue pengawal istane. 11Ku nanek kelem, jarberakpok. Tapi empok jar ajeh pek sama ierti. 12Ku pajeh mong numom keral mai Ibrani. Kek ajeh pekerjak ha ketue pengawal istane. Jar jarcerite nu kek lalu kek kitapser empok jar ajeh. 13Ma de tejadi nu jar betol begei de kiurok. Jen ya jenperjog eng nu kerjak lieng tapi ketue mai bahbeh ruti ajeh jenhukom dat.”
14Kerana ajeh, raja kior supaye Yusuf bien nu ingar, lalu Yusuf pen segera biperhol ju jel. Telas Yusuf kilikloj ru kiganti ipenakei, kek kiet ru kiterbuk nu raja.
15Raja kiurok nu kek, “Eng ya ngberakpok tapi pek mong numom pen de dapat kipejelas ha erti empok eng ajeh. Lalu eng biog panei hek dapat hatapser empok.”
16Yusuf kiberlag nu raja, “Jen, eng pek dapat. Had Jenang taleh de dapat Kitapser ha jen.”
17Lalu Raja kicerite iempok nu Yusuf, “Eng ngberakpok tengah ngjinjeg ku beg Batag arik Nil. 18Aleh-aleh tujoh ikor lembu de bakcok ru igetek selej naihol ju batag arik ajeh, ru mulaloh naicak rumpot ku beg batag arik ajeh. 19Telas ajeh hol nij tujoh ikor lembu ikenan kilek de sor ru punjet. Eng pek pernah ngbakek lembu de ihad punjet begei ajeh ku seluroh lengrik Mesir. 20Lembu-lembu de sor ru punjet ajeh naicak rimdij tujoh ikor lembu de bakcok ajeh. 21Hamapen begei ajeh, gek pen walah itanda lembu-lembu ajeh ya bicak. Lembu-lembu de sor ru punjet ajeh lekat sor ru punjet. Lalu eng ngtejaga ju buknet eng.
22Telas ajeh ngbet nij ru ngberakpok nij. Eng ngbakek tujoh meknat gandom de beisi ru bor cuai ku nanek jog. 23Telas ajeh ju jog de sama, mong cuai nij tujoh meknat gandom de niknej ru selei kerana bipoi ya pinoi guron. 24Tujoh meknat gandom de niknej ajeh nailip meknat de beisi. Eng ya ngcerite rimnar empok eng ajeh nu mai halak tapi pek mong numom pen de dapat naitapser empok eng ajeh.”
25Lalu Yusuf kiurok nu raja, “Rimnar empok ajeh mong ireti de sama. Jenang ya Kipasal nu jen ma de Kaha-beh ya Ilei doh. 26Tujoh ikor lembu de bakcok ajeh ireti tujoh tahut. Tujoh meknat gandom de beisi ajeh ireti tujoh tahut juga. Rimnar empok ajeh mong ireti sama. 27Tujoh ikor lembu de sor ru punjet de naihol telas ajeh ireti tujoh tahut. Tujoh meknat gandom de niknej ru selei kerana bipoi ya pinoi guron ajeh juga ireti tujoh tahut. Dikdij ajeh imaksod cengwag selame tujoh tahut.
28Begei de ya ngurok nu jen, Jenang ya Kiperneng nu jen ma de Kaha-beh ya Ilei doh. 29Seluroh lengrik Mesir doh ihad tebeg ya hasel ceknet selame tujoh tahut. 30-31Telas ajeh cengwag doh kibelaku selame tujoh tahut. Ku mase ajeh, mai doh betol-betol naisip ha tujoh tahut mase hasel ceknet ihad jeoi kerana cengwag ajeh ihad itengrok lei lengrik adeh kijadi sod. 32Jen ya jenberakpok nar kali. Hal ajeh ireti begei adeh: Ma de doh belaku ya bipetetap ya Jenang, ru Kek doh Kibeh deras.
33Kerana ajeh, borloh jenpileh numom de cerdeg ru panei, lalu jenog kek kuasa kaha-uros lengrik adeh. 34Jen juga hod jenlantek pegawei-pegawei kilek. Mase hasel ceknet ihad jeoi selame tujoh tahut musem berkat, jen hod jenog nu enai kuasa naiha-kutep 20 peratos ju dikdij hasel ceknet ajeh. 35Dikdij hasel de bikutep selame tujoh tahut de bor ajeh hodloh bidek ku kote-kote nu kateh kuasa raja supaye mong cukop caknak. 36Hasel ajeh doh bidek ha caknak ha mase cengwag selame tujoh tahut ku lengrik Mesir doh. Begei ajehloh icare mai Mesir doh pek naidat cengwag.”
Yusuf Bilantek Sebegei Penguasa ku Lengrik Mesir
37Raja ru dikdij ipegawei naisetuju ha cenadang Yusuf ajeh. 38Jadi, raja kiurok nu enai, “Pek mungken hikep sengoi kilek de lebeh bor daripade Yusuf kerana kek bipimpen ya Kelog Jenang.”
39Lalu raja kiurok nu Yusuf, “Jenang ya Kipasal dikdij hal adeh nu hek jadi ya jelasloh hek lebeh cerdeg ru panei daripade bok-bok pen. 40Eng doh nglantek hek sebegei penguasa, ru dikdij mai Mesir doh naitaat nu ernor hek. Had eng taleh de lebeh bekuasa daripade hek.”
41Lalu raja kiurok nu Yusuf, “Hunen, eng nglantek hek sebegei penguasa ku seluroh lengrik Mesir.” 42Telas ajeh raja kiteg icincet de becurak meterai kerajaan ju ijari ru kiperlog cincet ajeh nu jari Yusuf. Kek juga kiperlog nuhenglei jubah linen halos nu Yusuf ru kiperlog nanek rantei mas ku itangen. 43Lalu raja kiog kerite kuda ru kiterbot Yusuf nu kerite kuda ajeh de ha sengoi de ipangkat kedue tetinggi ku lengrik ajeh, ru pengawal tehormat raja naicip ku ngar kerite kuda ajeh sambel naihai, “Belutotloh!” Begei ajehloh Yusuf bilantek sebegei penguasa ku seluroh lengrik Mesir.
44Raja kiurok nu Yusuf nij, “Engloh raja. Tapi amen mai Mesir pek naikep kebenaran ju hek, enai pek buleh naibeh ma-ma pen.” 45Zafnat-Paneah ajehloh muh de biog ya raja nu Yusuf ku lengrik Mesir. Raja juga kiog numom kenah ha Yusuf. Muh ikenah ajeh Asnat kenon Potifera. Potifera ajeh imam ku kote Heliopolis.
46Umur Yusuf 30 tahut mase kek mula kikerakjak ha raja Mesir. Yusuf kidek istane raja ru kiet nu jap-jap tempat ku lengrik ajeh.
47Selame tujoh tahut penoh ru berkat, tik kiperhol hasel ceknet de jeoi. 48Yusuf kikumpol hasel ceknet ku lengrik Mesir ajeh ru kidek ku kote-kote. Ku jap-jap kote, kek kidek hasel ceknet ju selai-selai ku kelileg kote ajeh. 49Hasel ceknet de bikumpol ajeh ihad jeoi begei paser ku pantei lei Yusuf pen pek lalu kisukat.
50Sebelom musem cengwag kihol, Asnat kenon Potifera kiperyos nar mom kenon keral ha igengsir Yusuf. 51Yusuf kiurok, “Jenang ya Kibeh eng ngsip dikdij senusah eng ru ngsip peringak apak eng.” Kerana ajeh, kek kisebot muh ikenon sulog ajeh Manasye.#41:51 Manasye: Muh adeh imaksod, kipersip. 52Kek kiurok nij, “Jenang kibeh eng ngbehasel ku lengrik de ngtempeh senusah.” Kerana ajeh, kek kisebot muh ikenon kedue ajeh Efraim.#41:52 Efraim: Muh adeh imaksod, kibehasel.
53Ipenyudah, tujoh tahut musem berkat ku lengrik Mesir ya dij. 54Tibaloh tujoh tahut nij musem cengwag, kena begei de biurok ya Yusuf. Ku jap lengrik kilek mong cengwag, tapi ku seluroh lengrik Mesir mong caknak. 55Ku mase mai Mesir naihidap cengwag, enai semanj caknak ju raja. Raja kior, “Etloh nu Yusuf ru taatloh dikdij iernor.”
56Bile cengwag ya ihad terok ku seluroh lengrik Mesir, Yusuf kibuka ideg daknek hasel ceknet ru kijual nu mai Mesir. 57Sengoi ju seluroh dunia naihol nu lengrik Mesir naiha-beli caknak ju Yusuf kerana cengwag ku seluroh dunia ihad terok.
Currently Selected:
KEJADIAN 41: AEH
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.