KEJADIAN 42

Tetenek Yusuf Naiet nu Lengrik Mesir Naiha-beli Gandom

1Bile Yakub kicerngai mong gandom ku lengrik Mesir, kek kiurok nu ikekenon keral, “Yama pek engkebeh ma-ma? 2Eng ngcerngai mong gandom ku lengrik Mesir. Etloh nu diteh beli gandom supaye pek hidat cengwag.”

3Jadi, 10 urag tetenek Yusuf naiet nu lengrik Mesir naiha-beli gandom. 4Tapi Yakub kiget Benjamin menang Yusuf joi nu ceknip ajeh kerana kisengoh doh tejadi hal de niknej nu ikenon ajeh.

5Jadi, kekenon Yakub naiet nu lengrik Mesir ju tik Kanaan besama ru mai kilek de naiha-beli gandom kerana mong cengwag ku tik Kanaan.

6Ku mase ajeh, Yusuf ajeh penguasa ku lengrik Mesir de beuros jengwal gandom nu dikdij mai ku lengrik ajeh. Jadi, mase itetenek nailei nu majeh, enai naisujod ku ingar. 7Bile Yusuf kibakek itetenek, kek kikenal ha enai tapi kibepure-pure pek kikenal ha enai. Ru kasar kitanya, “Ju belok engkek adeh?”

Naiberlag, “Jik ju tik Kanaan. Jihol jiha-beli caknak.”

8Hamapen Yusuf kikenal ha enai, tapi itetenek pek naikenal ha kek. 9Lalu kek kiingat nar iempok manah tentang enai. Kek pen kiurok, “Engkek adeh pengintep! Engkehol nu madeh engkeha-kek ku belok kelemahan lengrik adeh.”

10Naiberlag, “Tok jen! Jik hambe jen jihol jiha-beli caknak. 11Jik adeh kenon ju nanek apak. Jik adeh mai jujor, pek pengintep.”

12Tapi Yusuf kiurok nu enai, “Bedeah! Engkehol nu madeh engkeha-kek ku belok kelemahan lengrik adeh.”

13Lalu naiberlag, “Jen, jik adeh 12 urag tenek-menang, kekenon ju nanek apak ku tik Kanaan. Nuurag ya dat ru de iloj hunen mong besama ru apak jik.”

14Tapi Yusuf kiberlag, “Begei de ya ngurok, engkek adeh pengintep. 15Eng ngha-uji engkek. Eng ngbesumpah ku muh raja begei adeh: Engkek doh pek engkehol ju lengrik adeh amen menang engkek de iloj ajeh pek kihol nu madeh. 16Numom ju engkek hod kijog ru kinyong kek nu madeh. Mai kilek doh biterhan lei engrok engkek tebukti. Amen tok, eng ngbesumpah ku muh raja, engkek adeh pengintep!” 17Telas ajeh Yusuf kipermuj enai nu kateh jel iluniu nik arik.

18Ku arik de ketige enai bijel, Yusuf kiurok nu enai, “Eng sengoi de ngsengoh ha Jenang. Behloh ma de ngurok adeh supaye engkek doh lekat engkesui. 19Amen engkek mimang mai jujor, biarloh numom ju engkek biterhan ku kateh jel ru mai kilek naijog ru naien gandom ha peringak engkek de naicuag. 20Telas ajeh hodloh engkeen menang iloj engkek nu eng. Begei ajehloh icare engkepebukti engrok engkek ajeh betol ru eng doh pek nghukom engkek dat.” Enai pen naibeh begei ma de bior ya penguasa ajeh.

21Lalu naibelwal ratak liknai, “Ajehloh, hik bihukom ya senalah lihik nu menang hik entem. Kek kisemanj tulog tapi hik hibeh pek panei nu kek hamapen hineng kek ihad kisusah. Nengloh, hunen hirasa iseniksa.”

22Ruben pen kiurok, “Entemjeh, eng ya ngget engkepernyik sanget ajeh tapi pek engkecerngai. Hunen hiterima ibalasan ju idanan.” 23Enai pek naipanei Yusuf kireti engrok enai ajeh kerana selame adeh naibelwal ru Yusuf naiguna numom jurubahase.

24Bile Yusuf kicerngai bengwal enai ajeh, kek pen kiperakdek ju kenjeh lalu kijinjap. Telas ajeh kek kilos nij ru kibelwal nu enai. Lalu Yusuf kipileh Simeon ru kior sengoi supaye naibeg kek ku ngar liknai.

Tetenek Yusuf Naijog nu Kanaan

25Telas ajeh Yusuf kior supaye guni-guni de bien ya itetenek bipermuj ya gandom ru duet perak enai biperjog ku kateh guni liknai memaseg. Yusuf juga kior supaye enai biog caknak ha ceknip enai. Iernor ajeh pen bibeh. 26Telas ajeh enai pen naidek guni gandom liknai ku kemil keldei lalu naijog.

27Ku tempat buknet enai, numom ju enai ajeh kibuka iguni gandom kaha-og caknak nu ikeldei lalu kibakek duet bidek ku kemil gandom. 28Kek kipasal nu itenek-menang, “Duet eng ya biperjog! Neng, duet eng mong ku kateh guni!”

Nos enai beriklaj ru naibetanya ratak liknai, “Ma de Jenang Kibeh nu hik?”

29Bile nailei nu apak enai Yakub ku tik Kanaan, naipasal nu kek dikdij hal de tejadi. 30Naiurok, “Penguasa Mesir kibual kasar ru kitudoh jik jiintep lengrik kek. 31Tapi jiberlag, ‘Jik mai jujor, pek pengintep. 32Jik 12 urag tenek-menang ju nanek apak. Nuurag ya dat ru de iloj besama ru apak jik ku Kanaan.’

33Tapi penguasa ajeh kiurok, ‘Eng ngha-uji engkek ngha-panei engkek adeh mai jujorka tok. Numom ju engkek hod kigei ku padeh, tapi mai kilek buleh naien jog gandom nu peringak liengkek de tengah naicuag ajeh. 34Bile engkehol nu madeh nij, enloh menang engkek de iloj. Begei ajehloh eng doh ngpanei engkek pek pengintep tapi mai jujor. Sengoi de ngterhan ajeh doh ngperjog nu engkek. Engkek juga buleh engkegei ku lengrik adeh ru bebas engkejelwal.’ ”

35Mase enai pekusong guni enai, naiburukloh jaben duet liknai memaseg. Ku mase enai ru apak enai naibakek jaben duet ajeh, enai ihad naisengoh. 36Lalu Yakub apak enai kiurok, “Kerana engkekloh kekenon eng dij nyep! Yusuf ya pek mong nij ru Simeon ya walah. Hunen engkeha-kot Benjamin! Engloh de tesiksa kerana dikdij hal de tejadi ajeh!”

37Lalu Ruben kiurok nu iapak, “Ogloh Benjamin ngjaga ya eng. Eng doh ngen kek jog nij. Amen tok, jen buleh jenperdat rimnar kenon keral eng.”

38Tapi Yakub kiurok, “Engkek pek buleh engkekot Benjamin! Itenek ya dat ru hunen had kek taleh de mong. Eng ya engrak. Amen kek kikep celaka ku iceknip, engkek doh engkebeh eng ngsedeh lei ngdat.”

Currently Selected:

KEJADIAN 42: AEH

Highlight

Copy

Compare