KEJADIAN 40

Yusuf Kitapser Empok Ketue Penguros Ngeknut ha Raja ru Ketue Mai Bahbeh Ruti ha Raja

1Memerip iluniu ju kenjeh, ketue penguros ngeknut ha raja ru ketue mai bahbeh ruti ha raja baibeh salah nu raja Mesir. 2Raja ihad kiberiknos nu ubai. 3Jadi, kek kipermuj ubai nu kateh jel ku deg ketue pengawal istane, ku tempat Yusuf biterhan. 4Ketue pengawal istane kiog tugas nu Yusuf kilayan ubai. Ubai gei memerip iluniu ku kateh jel ajeh.

5Ku nanek kelem, mase ubai lekat ku kateh jel, ketue penguros ngeknut ru ketue mai bahbeh ruti ajeh maseg-maseg baiberakpok. Tapi erti empok ubai ajeh pek sama.

6Bile Yusuf kihol nu ubai ku ipegelap huper, kek kineng renes ubai sedeh. 7Kerana ajeh, Yusuf kitanya, “Yama jerkesedeh arik adeh?”

8Ubai baiberlag, “Kelem jihnek jarberakpok, tapi pek mong numom pen de panei ma reti empok jar ajeh.”

Yusuf kiurok, “Had Jenang taleh de Kipebuleh sengoi kitapser empok. Cuba cerite empok jerkek ajeh nu eng.”

9Lalu ketue penguros ngeknut ajeh kiurok, “Ku kateh empok eng ajeh, eng ngbakek keneng anggor ku ngar eng. 10Keneng anggor ajeh mong nik icag. Bile icag ya kibeselak, ibunga pen kikembang lalu ipelek pen nep. 11Ku mase ajeh, eng tengah ngcap cawan ngeknut raja. Jadi, eng ngkot pelek anggor ajeh ru ngrit iteu nu kateh cawan raja lalu ngjamu nu raja.”

12Yusuf kiurok, “Adehloh ireti. Nik cag ajeh ireti nik arik. 13Kateh nik arik adeh, jen doh biterlas ya raja ru jen doh biperjog nu tugas jen de manah. Jen doh jenjamu ngeknut nu raja, sama begei jen jadi ketue penguros ngeknut canukjeh. 14Tapi ingatloh ha eng bile sinui jen ya bor. Tulog perlei masalah eng nu raja supaye eng biterlas ju jel adeh. 15Eng bien paksa ju tik mai Ibrani. Ku lengrik Mesir adeh pen, eng pek pernah ngbeh ma-ma jenghat lei bipermuj nu kateh jel adeh.”

16Bile ketue mai bahbeh ruti ajeh kineng Yusuf kiog maksod empok de bor, kek pen kiurok nu Yusuf, “Eng juga ngberakpok. Ku kateh empok eng ajeh, ngjunjog nik kebek bakol ruti. 17Ku kateh bakol de paleng kemil mong bemacam jenis ruti ha raja tapi cep naihol naicak ruti-ruti ajeh.”

18Yusuf kiberlag, “Adehloh ireti empok jen ajeh. Nik kebek bakol ireti nik arik. 19Kateh nik arik adeh, raja doh kior mai supaye naipancog kui jen lalu berog jen bigantong ku cenol ru sej jen doh bicak ya cep.”

20Nik arik ju kenjeh, ku arik yisnos raja, kek kibeh caknak entoi ha dikdij ipegawei. Kek kior supaye ketue penguros ngeknut ru ketue mai bahbeh ruti ajeh biperhol ju jel ru bien nu ngar dikdij pegawei. 21Lalu raja kiperjog ketue penguros ngeknut ajeh nu ikerenjak manah 22tapi kek kior mai supaye ketue mai bahbeh ruti ajeh bigantong. Dikdij hal ajeh betol-betol belaku begei ma de ya biurok ya Yusuf.

23Tapi ketue penguros ngeknut ajeh pek kiingat ha Yusuf. Kek teros kisip ha Yusuf.

Currently Selected:

KEJADIAN 40: AEH

Highlight

Copy

Compare