Matayɔ 6
6
Yeso aninjo ʉpanʉ akʉʉ ɔ salɨa ɓajanga
1Kpɔ, kpɔ, kpɔ, nátɨkɨenimʉ yaka yɛta ngbingbii aɓʉmba, dɔ, ɓombi ɓɨnɨbɨba. Dɔ, nɔ́kɨeni ɓanɨ, nangɛnɨanɨamʉ nɔ mʉkaya anɨngwa atɨ Atɔ eno ngɨa akʉʉ ɔ ɓisi.
2Ya ngbanga kʉndʉ, wɔɓieni asalɨa ajanga, watɨɓɛndamʉ atangba, ɓɔ dɔ ɓombi ɓɨnɛna. Ɨyɛnɛnɨ, ya mʉkyananakɨa ngʉwɔ ɓombi ɓɔ pɛtanaka, ɓakyɔkɨa amati ɔ lɨkáá lɔ nɨta, kʉndʉ nɔ mʉgyɛndɔ ɓɔ ɗɛngɛ, dɔ ɓombi ɓɨɓʉbɨba. Ta ingono, nanenu asigio ɓɔ, ɨɓɔ ɓombi ngʉɓɔnanɨ, mʉkaya nga weɓo tɨta ʉwɔnanɨ.
3Yakamɛngana, angbinga ngɨa ʉwɛ, waɓio-ɔɔ asalɨa ajanga, kɨa nɔ angu ɓɔ ɨkɔndɔ yɔ aɗeku, yatɨmbɨamʉ ɨkyɛmʉ ngɨyɛ ɨkɔndɔ yɔ guɔngɔ yakɔkɨa. 4Kɨa yaka ngɨyɛnɛnɨ, ta ɨngbaa akɔ ɓaɗi. Kʉɓanɨ, ɨyɔ Atɔ eno, ngɨa, ɛna yaka iɓomu ngɨyɛ, yakyananakɨa akɔ ɓaɗi, a꞊natosio mʉkaya wɔngɔ tosioni.
Yeso akɔpanɨa anɨta Asɔɓɨɨ
(Luk 11:2-4)
5Angbinga ngɨa náɓio-ɔɔ anɨta Asɔɓɨɨ, nátɨɓiomʉ ndʉ ɓombi ɓɔ pɛtanaka. Dɔ ɨɓɔ, ɓakʉnda nɨta Asɔɓɨɨ ɓɛmaɛ ɓɔ pata, amati ɔ lɨkáá lɔ nɨta, nɔ aɓanambamba ɓɔ lɨngbaa, ɓɔ dɔ ɓɨɓɨna. Ta ingono, nanenu asigio ɓɔ, akɨa ɓanɨ, mʉkaya nga weɓo tɨta ʉwɔnanɨ.
6Yakamɛngana, angbinga ngɨa, ʉwɛ, waɓio-ɔɔ anɨta Asɔɓɨɨ, kumonio ambɛnɨ ngɨyɔ pɛɨ. Wɔkuto umongu, nɔ, wɔpʉnga nɨta Atɔ, ngɨa akɔ ɨda yɔ ɓaɗi. Kʉɓanɨ, Atɔ ngɨa ɛna aɓaɗi akɛ, a꞊nenjo mʉkaya wɔngɔ.
7Nɔ, ɓata, amati ɔ nɨta Asɔɓɨɨ, nátɨtɔyɔmʉ yaka mɛngana yɛta ɓʉtʉʉ ɓɔ ndɨɨ, ngbanga ndʉ ɓombi ngʉɓa ɓangɛmbɨa Asɔɓɨɨ, ɓakɨa. Dɔ, akɨa ɓanɨ, ɨɓɔ, ɓayongo ga, Asɔɓɨɨ akwanana nʉka nɨta ngɨyeɓo. 8Inu, nátɨɓiomʉ ngbanga ndʉ ɨɓɔ. Dɔ, pɛɨ ngɨa nɛ́ta-ɔɔ ɨkyɛmʉ, Atɔ eno akɨa tɨta ɓɔ ɨmbɨɛni mʉsasa ngʉweno ɨmbɨanɨ. 9Inu, nɔkwananɔ anɨta Asɔɓɨɨ ɓɔ:
‹Aba ngɨyeso a akʉʉ ɔ ɓisi!
Ino ngɨyɛsɔɔ ya tu, yɨbɨbanɨa bɨbanɨanɨ.
10Nɔ, Ɓʉngama ngʉɓɔsɔɔ, ɓɨka ɨkanɨ.
Ɓʉkʉnda ngʉɓɔsɔɔ, ɓɨkɨanɨa,
akɔ dɔdɔ, kʉndʉ akʉʉ ɔ ɓisi.
11Atɨnjo ɓʉɓʉnʉ idyo ngɨyeso, yɔ masi maɓomu.
12Atɨpaakɨa ɓʉɓɨɓɨ ngʉɓeso,
kʉndʉ isu, takɛpaakɨa ɓiga ngʉɓa ɓakyɔtɨkɨa ɓʉɓɨɓɨ.
13Watɨtɨsɨamʉ akumonio amati ikanio,
yakamɛngana, atɨɓwanakiso akɔ lɨkɔndɔ lɔ Mʉnamasa.
[Dɔ, ɓʉngama, angu nɔ ʉbɨba, wɔsɔɔ, amati ɔ mago nɔ mago!
Ya ɓanɨ!]›
14Ga Yeso ɓata naɓɔ ɓɔ: ‹Ndʉ nɛ́paakɨa ɓangɛ ɓʉɓɨɓɨ ngʉɓeɓo, Atɔ eno ngɨa akʉʉ ɔ ɓisi, anɨpaakɨa inu, kʉɓanɨ.
15Yakamɛngana, ndʉ inu, nángɛpaakɨamʉ ɓangɛ, Atɔ eno ngɨa akʉʉ ɔ ɓisi, angɔnɨpaakɨamʉ inu, kʉɓanɨ.›
Yeso enjo ʉpanʉ akʉʉ ɔ taa idyo akɔ angbinga
16Nɔ́ɓieni ataa idyo akɔ angbinga, nátɨfamʉ mesu, ngbanga ndʉ ɓombi ɓɔ pɛtanaka. Dɔ, ɨɓɔ ɓafa mesu ngʉkeɓo, akɔpananiso ɓɔ, ɓa amati ɔ taa idyo. Ta ingono, nanenu asigio ɓɔ, mʉkaya nga weɓo tɨta ʉwɔnanɨ.
17Yakamɛngana, ʉwɛ, akɔ angbinga ɔ taa idyo, wɔsisekio gyaɓana mesu, nɔ, kasana ndii ngɨyɛsɔɔ. 18Iɗo ambɔ, ɓombi ɓatɨmbɨamʉ ɓɔ, wa akɔ angbinga ɔ taa idyo. Yakamɛngana, ta Atɔ eno ngɨa, akɔ ɨda yɔ ɓaɗɨ, ɨmbɨa nangana. Kʉɓanɨ, ɨyɔ Atɔ ngɨa ɛna aɓaɗi, a꞊nenjo mʉkaya wɔngɔ injoni.
Yeso aninjo ʉpanʉ akʉʉ gbucho ikesi
(Luk 12:33-34; 11:34-36; 16:13)
19Amati ɔ dɔdɔ ngɨa, nátɨwomʉ angu agbucho ikesi ɓɔ kyɔ, kyɔ, kyɔ. Ɨsɨ yɔngɔ ɓɔ yakwa itu, nɔ ɓatoto ɓɔɨyanakiso. Nɔ ɓombi ɓɔ ndiɓo, ɓɔɓundo umongu, nayɔ aniɓo.
20Yakamɛngana, nɔ́kwananɔ agbucho ikesi akʉʉ ɔ ɓisi. Dɔ inani, itu, ga pɔ mutoto ngɨa akwanana ayanakiso ikesi, angɔmʉ. Nɔ, mombi ɔ ndiɓo ngɨa akwanana aɓundo umongu, nɔ niɓo ɨkyɛmʉ, angɔmʉ kʉɓanɨ. 21Dɔ, aki ikesi ngɨyɛsɔɔ ya-ɛɛ, mʉtɨma ngʉwɔsɔɔ wa꞊ɓio kʉ inani.
22Mesu kandʉ ʉwanga wɔ ndʉtʉ. Kʉɓanɨ, mesu ngʉkɔsɔɔ kɔɓieni maɗo, ndʉtʉ ngɨyɛsɔɔ iɓomu yɛnɨanɨa nɔ ʉwanga.
23Yakamɛngana, ndʉ mesu ngʉkɔsɔɔ kaduana, kʉɓanɨ, ndʉtʉ ngɨyɛsɔɔ iɓomu, ya꞊kumonio ta amati ɔ umomo. Ndʉ ʉwanga ngʉwa amati asɔɔ wɛbonio, umomo wɔngɔ wa꞊beluo tɨta beluo!
Yeso enjo ʉpanʉ akʉʉ ɔ lɨkyɛmʉ lɔ dɔdɔ
(Luk 12:22-31)
24Mombi ɔ tɛa pɔ mʉngana, angɔkwananamʉ akyananakɨa ɓangama ɓapɨnɨ. Dɔ, sɔkɔmʉ ɓanɨ, akʉnda ngama mʉngana, nɔ, ɔ꞉yaa gwa ngɨyɔmɔ. Pɔ ɓɔ, abaya kyananakɨa ngama mʉngana, nɔ, ɔɓio anɨna gwa ngɨa kɔmɔ tɨa ɓʉtʉʉ. Inu, nángɔkwananamʉ akyananakɨa Asɔɓɨɨ, nɔ mata akyananakɨa kʉ nɔ ɓagyɛgyɛ!
25Ya akʉʉ ɔ yaka ngɨyɛnɛnɨ, ɨyɛ ɨmɨ, na-ɔɔ nenu asigio ɓɔ nátɨkwenimʉ ɓatumo akʉʉ ɔ uɓei ngʉweno, ɓɔ ná꞊dya ɨmanɨ, ga pɔ ná꞊mwa ɨmanɨ, ga pɔ ɓɔ nápɛnɨa ɨmanɨ. Uɓei ngʉweno, wangɔ ndɨ nɔ ɨjangɨa anagaaka idyo? Nɔ, ndʉtʉ ngɨyeno, kʉ nɔ ɨjangɨa anagaaka lɨpʉkʉ?
26Kangeni-sɨ ɓanoi! Ɨɓɔ, ɓangɔhʉnanakamʉ. Nɔ, ɓangɔbuoko masɔɔ kʉɓanɨ. Nɔ ɓata, ɨɓɔ ɓangɔɓosomʉ akoti kʉɓanɨ. Gʉtʉ ɓanɨ, Atɔ eno ngɨa akʉʉ ɔ ɓisi, aɓʉdyakakiso ta dyakakisoni. Inu ingainga, nángɔmʉ ndɨ-sɨ nɔ ɨjangɨa anagaaka ɓanoi ngʉɓɔnanɨ?
27Anɨ ati eno ɨyakɛ, amati ɔ ɓatumo ngʉɓangɔ, akwanana anisinganiso uɓei ngʉwangɔ bele, gʉtʉ ta ndʉ aʉngʉsʉ aka?
28Nákɔnɨkwa ɓatumo akɔ yaka yɔ lɨpʉkʉ, dɔtanɨ? Kangeni-sɨ ɓɔ ɨʉa ngɨyɛ iju yaɓaa tanɨ. Wɔkanganɨa kʉ ɓɔ ɨʉa, yangɔkɨa tɛa. Nɔ, yangɔfeyekiomʉ lɨpʉkʉ kʉɓanɨ.
29Yakamɛngana, ɨmɨ nanenu asigio ɓɔ, gʉtʉ ta ngama Sɔlɔmɔnɔ amati ʉbɨba ngʉwangɔ uɓomu, a꞉pɛnɨamʉ jɛnɛ lɨpʉkʉ lɛta manjanja ngbanga ndʉ mʉngana wɔ maʉa ngʉkɔnanɨ!
30Asɔɓɨɨ ɔpɛnyiseni-sɨ lanja lɔ iju ɓanɨ, ɨlɛ la ɓʉɓʉnʉ ananɨ, nɔ nekuɓa ɓɔligiso amati ɔ dyaa. Tɨa anɨ akɛ ɛna pɛpɛ aka anɨpenyiso-ɔɔ inu? Henawe-e, ambɔ ɓombi ɓanɔ báya yɛta bele-e!
31Kʉɓanɨ, nátɨmbambanienimʉ ɓɔ nádya ɨmanɨ, ga pɔ ɓɔ námwa ɨmanɨ, ga pɔ ɓɔ nápɛnɨa ɨmanɨ. 32Ɨyɛnɛnɨ iɓomu, ya ɓombi ngʉɓa ɓangɛmbɨamʉ Asɔɓɨɨ, ɓahatanaka ɓanɨ. Dɔ, Atɔ eno ngɨa akʉʉ ɔ ɓisi, anɨmbɨa ɓɔ nánɔ taa yɔngɔ.
33Inu, hateni-sɨ Ɓʉngama ngʉɓɔ Asɔɓɨɨ, nɔ kɨa ɓʉngbingbii ngʉɓangɔ. Kʉdɔ, ɨyɛnɛnɨ yɛmɔ iɓomu, a꞊nɨmatɨa tɨa ananɨ akʉʉ ɔngɔ.
34Kʉɓanɨ, nátɨmbambanienimʉ ɓɔ, suo nekuɓa takɨa tanɨ. Dɔ, yaka ngɨyɛ, ya suo nekuɓa, ya꞊ɓio kʉ di. Dɔ, ɓisi nɔ ɓisi, ɓanɔ ɓukpukukpuku ngaɓangɔ.
Currently Selected:
Matayɔ 6: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
