Matayɔ 5
5
Yeso aninjo ʉpanʉ akʉʉ ɔ ɨkpangba
(Luk 6:20-23)
1Ndʉ Yeso ɛ꞉na ɓambaja ɓɔ ɓombi, kʉdɔ, a꞉ɗeto akʉʉ ɔ ɨkpangba. Ɔ꞉sɨka ɔwolo ga jikomu, ga ɓakpata ɓɔ hɨtɔɔ anɔ ambamba angɔ. 2Kʉdɔ, a꞉pʉnga naɓɔ aninjo ʉpanʉ akɔsugo ɓɔ:
3«Ɨgyagya, akɔ ɓombi ngʉɓa ɓanɨmbɨana ɓɔ, ɓa ɓajanga amʉtɨma!
Dɔ, Ɓʉngama ngʉɓɔ akʉʉ ɔ ɓisi, ɓa akɔ ɨɓɔ.
4Ɨgyagya, akɔ ɓiga ngʉɓa ɓanɨdya ikoko!
Dɔ, Asɔɓɨɨ a꞊ɓusungo mʉtɨma sungoni.
5Ɨgyagya akɔ ɓiga ngʉɓa ɓanɔ mʉtɨma wɔ majɨɔ!
Dɔ ɨɓɔ akɛ, ɓa꞊dya maɓɨɨ ngʉwa Asɔɓɨɨ, a꞉panaka akɔ dɔdɔ ngɨa.
6Ɨgyagya akɔ ɓiga ngʉɓa ɓanɔ taa, nɔ mʉsasa wɔ kɨa yaka aɓungbingbii, apɛɨ ɔ Asɔɓɨɨ!
Dɔ ɨɓɔ, ɓa꞊mɔta mɔtanɨ.
7Ɨgyagya akɔ ɓiga ngʉɓa ɓanɔ ikoko akʉʉ ɔ ɓangɛ!
Dɔ, ɓa꞊ɓɨnɨa ɨɓɔ ikoko kʉɓanɨ.
8Ɨgyagya akɔ ɓiga ngʉɓa ɓa꞉huo nɔ mʉtɨma wɔta uɗo!
Dɔ ɨɓɔ akɛ, ɓɛ꞊na Asɔɓɨɨ nɔ mesu.
9Ɨgyagya akɔ ɓiga ngʉɓa, ɓenjiso majɨɔ!
Dɔ, Asɔɓɨɨ a꞊ɓisoko sina ɓɔ ɓana ɓangɔ.
10Ɨgyagya akɔ, ɓiga ngʉɓa ɓanaɓɔ akyananaka, dɔ, ɓakɔkɨa yaka yɛta ngbingbii apɛɨ ɔ Asɔɓɨɨ!
Dɔ, Ɓʉngama ngʉɓɔ akʉʉ ɔ ɓisi ɓa amʉtʉ weɓo.
11Ɨgyagya akɔ inu, angbinga ngɨa ɓombi ɓa-ɔɔ nenu asɛaka, nɔ kyananaka, nɔ singekio mʉjɛɛ alɨngbaa lɔ yaka di di di, akɔ yaka yɛsɛmɨ! 12Kweni ɨgyagya, nɔ jananakɨeni nɔgbɛ! Dɔ, nɛ́꞊nɨanɨa nɔ apɛpɛ ata mʉja akʉʉ ɔ ɓisi. Dɔ, ɓombi ɓa꞉kyananaka jɛnɛ magbɛ kɔ Asɔɓɨɨ ngʉkɔ pɛɨ kʉɓanɨ.
Yeso enjo isisenio akʉʉ ɔ mukwe nɔ ʉwanga
(Mlk 9:50; Luk 14:34-35)
13Inu, ná ndʉ mukwe amati dɔdɔ. Yakamɛngana, mukwe kɔyapakeni tɨa yapakanɨ, nɔ sɔkɔmʉ ɓata kiɓio tɨpɨ, kasalɨa ɓata aɨkyɛmʉ nga yeno tɨa tanɨ? Sɨ ɓakʉngbengo tɨta aɓei, nɔ ɓombi ɓɔkʉyechoo.
14Inu ná ndʉ ʉwanga amati dɔdɔ ngɨa. Gʉlʉ ngɨa ɓamutuɓoko akʉʉ ɔ ɨkpangba, angɔnayananɨamʉ pɔ bele. 15Dɔ, ɓangɔyamʉ ʉwanga nawɔ akuto nɔ itumo. Yakamɛngana, ɓaʉnapɨa ta akʉʉ ɔ mʉbɨnga wɔngɔ, dɔ, wɨpɔya ɓombi ɓaɓomu ngʉɓa ɓaɓio inani ambɛnɨ. 16Kʉɓanɨ inu, jɛyeni apɛɨ ɔ ɓombi, ngbanga ndʉ ʉwanga, iɗo ambɔ ɓombi ɓɨna mʉkyananakɨa wɔta uɗo ngʉweno, nɔ, ɓɔbibiso Atɔ eno ngɨa akʉʉ ɔ ɓisi.
Yeso ɔpanɨɔ akʉʉ ɔ mapanʉ kɔ magbɛ
17Nátɨtunguomʉ ɓɔ ɨmɨ, nɛ꞉ka akɔnɨwa mapanʉ, ga pɔ mapanʉ ngʉka magbɛ ka꞉sɨa. Ɨmɨ, nɛ꞉kɔmʉ nakɔ anɨwa, yakamɛngana, nɛ꞉ka nakɔ akyananakɨa. 18Ta ingono, ɨmɨ nanenu asigio ɓɔ, angbinga ngɨa mupipio wɔ dɔdɔ nɔ ɓisi, wangɛkamʉ-ɔɔ, ɓangɔkwananamʉ anunguso gʉtʉ pɔ mwana ɔ ɨkyɛmʉ pɔ mɛngana amati ɔ mabii, pɔ gʉtʉ pɔ mʉtɨndɨ wɔ balʉa, pɔ ɨdyakʉ yɔngɔ, akɔɓɔya ta aka yaka iɓomu, yabɨkyananakɨa sina-ɔɔ.
19Amati ɔ mapanʉ ngʉkɔnanɨ maɓomu, mombi ngɨa aɓundo, gʉtʉ ta ʉwa wɔta bele wɔngɔ, nɔ, ɔkwisiso kʉ nɔ ɓombi ngaɓɔmɔ, ɨyɔ ingainga, aɓio mombi ata bele nɔgbɛ amati ɔ Ɓʉngama ngʉɓɔ akʉʉ ɔ ɓisi. Yakamɛngana, mombi ngɨa akyananakɨa mapanʉ ngʉkɔnanɨ maɓomu nɔ ɔpanɨa ɓangɛ nakɔ kʉ akyanakɨa, ɨyɔ akɛ, a꞊ɓio mombi ata mʉja amati ɔ Ɓʉngama ngʉɓa akʉʉ ɔ ɓisi. 20Ɨmɨ, nanenu asigio ɓɔ, ndʉ mʉkyananakɨa wɔta ngbingbii ngʉweno, wangɔnagaakamʉ ʉwɔ Ɓafalisayɔ, nɔ ɓapananakɨa ɓɔ mapanʉ, inu, nángɔkumonio sina amati ɔ Ɓʉngama ngʉɓa akʉʉ ɔ ɓisi pɔ kumonio.
Yeso enjo ʉpanʉ akʉʉ ɔ nɨkwa ʉnganga
(Luk 12:57-59)
21Inu, ná꞉nɨmbɨa ɓɔ, ɓe꞉njo jɛnɛ ɓombi ngʉɓɔ pɛɨ ʉpanʉ ɓɔ: ‹Watɨwamʉ.#popoko Chw 20:13 Nɔ, mombi ɔweni mangɛ, ɓa꞊kio mʉkɔmbʉ ngʉwangɔ kioni.› 22Yakamɛngana ɨmɨ, nanenu asigio ɓɔ, mombi ɔkweni ʉnganga akʉʉ ɔ mangɛ, ɓa꞊kio mʉkɔmbʉ ngʉwangɔ kioni. Nɔ, kʉndʉ mombi ɔsigieni manye ɓɔ: ‹Wa ijangi!› Yɔsisekio ɓɔ ubua ngʉwa wɔ ɨkʉʉ, wikio mʉkɔmbʉ ngʉwangɔ. Nɔ, mombi ɔsɛakeni mangɛ ɓɔ: ‹Wanɔ ɓamu› Yɔsisekio ɓɔ, ɓʉmʉmaya ta amati dyaa ngɨyɛ mago nɔ mago!
23Kʉndʉ, wɔɓieni anɨsa aninjo apɛpɛ ngɨasɔɔ akɔ gbɔ́gbɔ ɔ mutebii, nɔ, wɔtunguo ɓɔ nduku asɔɔ anɔ yaka nɔwɛ, 24sɨa-sɨ apɛpɛ ngɨasɔɔ ta ananɨ apɛɨ ɔ gbɔ́gbɔ, nɔ, wɔsa ahata anʉkana inu nayɔ. Mbise ɔngɔ, wɛ꞊ka dɔ tɨa aninjo apɛpɛ ngɨasɔɔ.
25Nɔ, kʉndʉ mombi ɔɓieni anɨsa nɔwɛ apɛɨ ɔ mʉkɔmbʉ, hata nayɔ akʉnganakɨa ta gagaa ngɨananɨ ɓɔ kpalaa, apɛɨ ngɨa angɔɓɔyamʉ-ɔɔ nɔwɛ a mʉkɔmbʉ. Dɔ, sɔkɔmʉ ɓanɨ, ɓajuji ɓa꞊nenjo akɔ lɨkɔndɔ lɔ ɓapolisi, nɔ ɨɓɔ, ɓɔ꞊nɔnga tɨa aboloko. 26Ɨmɨ nanɔwɛ asigio ta ingono, wangɔchwɛamʉ aboloko, pɛɨ ʉwɛ aninjo lɨkyɛmʉ ngɨlɛ ɓanakio ta liɓomu!
Yeso enjo ʉpanʉ akʉʉ ɔ ɓuso
27Ná꞉nɨmbɨa ɓɔ ʉpanʉ wa꞉sugo jɛnɛ ɓɔ: ‹Watiɓiomʉ nɔ ɓuso.›#popoko Chw 20:14 28Yakamɛngana, ɨmɨ, nanenu asigio ɓɔ, ndʉ mombi akanga moi, nɔ, ɔkwa mʉsasa wɔ ndʉtʉ, amati mʉtɨma ngʉwangɔ, mombi ngɨananɨ, ɔkyɛndɔ nayɔ tɨta kyɛndanɨ. 29Kʉndʉ, isó ngɨyɛsɔɔ yɔ guɔngɔ, yɔnatʉmeni aɓʉɓɨɓɨ, wɔsisekio nayɔ aɗuo, nɔ wɔɨgiso ta giso. Ya gʉtʉ pɔ iɗo ɓɔ ʉgbaa wɔ ndʉtʉ mʉngana wɨyangaa, sɔkɔmʉ pɛpɛ ɓɔ ʉwɛ muɓomu wabi tɨa adyaa yɔ mago nɔ mago.
30Kʉndʉ ɨkɔndɔ ngɨyɛsɔɔ yɔ guɔngɔ, yɔnatʉmeni aɓʉɓɨɓɨ, ikio pɨ takio, nɔ, wɔigiso ɗu nɔgbɛ. Dɔ, ya iɗo nɔgbɛ ɓɔ, ʉgbaa mʉngana wɔ ndʉtʉ gʉtʉ wɨyangaa, sɔkɔmʉ pɛpɛ ɓɔ ndʉtʉ ngɨyɛsɔɔ iɓomu yabi amati ɔ dyaa.
Yeso enjo ʉpanʉ akʉʉ ɔ toso moi
(Mat 19:9; Mlk 10:11-12; Luk 16:18)
31Ɓa꞉matɨa jɛnɛ ɓata kʉ ɓɔ: ‹Mombi ɔtoseni moi angɔ, iminjo ʉbalʉa ngʉwɔ ɔmutoso nawɔ.›#popoko Tngw 24:1 32Yakamɛngana ɨmɨ, nanenu asigio ɓɔ: ‹Gue muɓomu ngɨa atoso moi angɔ, ɔkɨenimʉ ta ɓuso, ɨyɔ gue akɛ, ɔmʉmayɔ amati ɔ ɓuso. Nɔ, kʉndʉ, gue ngɨa asɨka moi ngɨa swaɨ ɔmʉtoso, gue ɔngɔ, ɔkɨɔ kʉ ɓuso.›
Yeso enjo ʉpanʉ akʉʉ ɔ simio
33Ná꞉nɨmbɨa ʉpanʉ ngʉwa ɓe꞉njo jɛnɛ ɓombi ngʉɓɔ pɛɨ ɓɔ: ‹Watɨkiomʉ silika wɔ mʉjɛɛ. Yakamɛngana, kyananakɨa pɨ silika ngɨasɔɔ apɛɨ ɔ Makwɔɓɨɨ ta kyananakɨanɨ.›
34Yakamɛngana, ɨmɨ nanenu asigio ɓɔ, nátɨkiomʉ silika pɔ kio. Gʉtʉ pɔ akɔ ino yɔ ɓisi, dɔ ɓisi, ɓa ndʉ ɨda yɔ ɓuwolo yɔ ɓʉngama ngʉɓɔ Asɔɓɨɨ. 35Pɔ gʉtʉ akɔ ino yɔ dɔdɔ, dɔ, dɔdɔ a ndʉ igbogboi ngɨyɛ Asɔɓɨɨ ayomo-ɔɔ mɨtɨndɨ ngɨangɔ. Pɔ gʉtʉ akɔ ino yɔ Yelusalɛma, dɔ, ya ɨkʉmbʉ yɔ Asɔɓɨɨ, Ngama ata Mʉja. 36Nɔ, nátɨkiomʉ silika akɔ mɨtʉ ngɨyeno pɔ bele. Dɔ, inu, nángɔkwananamʉ anataniso undii gʉtʉ pɔ mʉngana aɓio invi, ga pɔ nawɔ awiso ɓɔ nji.
37Akɔ lɨngbaa lɔ yaka ta liɓomu ɓɔ sɛ, nɔ́bayeni yaka ɓɔ ‹iii›, bayeni ta nɔ ingono. Nɔ, ndʉ náyaa ɓɔ ‹haa›, yaeni kʉ nɔ ingono. Dɔ, yaka ngɨyɛ yɛta ɨmatakɨɛ akʉʉ ɔngɔ, yachwɛa nɔ mʉnamasa.
Yeso enjo ʉpanʉ akʉʉ ɔ tosio ikosi
(Luk 6:29-30)
38Ná꞉nɨmbɨa ʉpanʉ ngʉwa ɓe꞉njo jɛnɛ ɓombi ngʉɓɔ pɛɨ asugo ɓɔ: ‹Isó akɔ isó, nɔ iyenu akɔ iyenu.›#popoko Chw 21:24; Ɓlw 24:20; Tngw 19:21 39Yakamɛngana, ɨmɨ, nanenu asigio ɓɔ, nátɨtosiomʉ ikosi akɔ mombi ngɨa ɔnɨkɨɔ ɓʉɓɨɓɨ. Ndʉ mombi anaɓɛnda ɨkɔndɔ yɔ mesu akɔ ɨngʉngʉ ngɨyɔ guɔngɔ, mʉnachio tɨa kʉ nɔ ɨyɛ yɔ ɨkɔndɔ yɔ aɗeku. 40Mombi ɔsɛni nɔwɛ apɛɨ ɔ mʉkɔmbʉ, dɔ ɨsɨka simisi ngɨasɔɔ, mʉsɨa ɨsɨka kʉ nɔ koti. 41Nɔ, mombi ɔnatitieni nɔ ɓʉkaɓʉkaɨ ɓɔ mʉtʉmbɨa lɨkyɛmʉ, wɔmʉɓoisiyo ɨlɔ akɔ kilomɛtɛlɛ mʉngana, mʉɓoisio ɨlɔ tɨta akɔ ɓakilomɛtɛlɛ ɓapɨnɨ. 42Nɔ, mombi ɔneteni ɨkyɛmʉ, minjo ta injoni. Nɔ, mombi ɔbayeni ɓɔ minjo uɓu, watɨyaakɔmʉ.
Yeso enjo ʉpanʉ akʉʉ wɔ kʉnda ɓamʉyaa
(Luk 6:27-28; Luk 6:32-36)
43Ná꞉nɨmbɨa kʉtaa ɓɔ yakɔsugonio ɓɔ: ‹Kʉnda mangɛ,#popoko Ɓlw 19:18 nɔ yaa mʉyaa ngʉwɔsɔɔ.› 44Yakamɛngana, ɨmɨ, nanenu asigio ɓɔ, kʉndeni ɓamʉyaa ngʉɓeno. Nɔ, ɨtɨeni ɓombi ngʉɓa ɓanenu akyananaka. 45Kʉɓanɨ, inu, né꞊sokonio dɔ ɓɔ ná ɓana ɓɔ Asɔɓɨɨ, ngɨa akʉʉ ɔ ɓisi. Dɔ ɨyɔ, achweiso ɨpá akɔ ɓombi ɓɔta iɗo, kʉndʉ akɔ ʉɓa, ɓɔta ɓɨɓɨ. Nɔ ɓata ɨyɔ, aneiso ʉgbaá akɔ ɓombi ngʉɓa ɓa ngbingbii apɛɨ angɔ, kʉndʉ ʉɓa ɓangɔmʉ ngbingbii. 46Dɔ, ndɨ nákʉnda ta ɓiga ngʉɓa ɓanɨkʉnda inu, nɛ́nɨanɨa nɔ ɨjangɨa nga yeno tanɨ? Ɓombi ɓɔ lipisa manjanja ɓakɨa ɨɓɔ kʉ ɓanɨ! 47Nɔ, ɓata ndʉ nábaya ɓokuo ta ɓana ɓanʉ ɓeno, ambɔ nɔ́kɨɔ yaka yɛta ɨja nga yeno tanɨ? Dɔ, gʉtʉ ta ɓombi ngʉɓa ɓangɛmbɨa Asɔɓɨɨ, ɓakɨa ɨɓɔ kʉ ɓanɨ! 48Kʉɓanɨ, ɓieni ɓombi ngʉɓa ɓangɔmʉ nɔ ɨɗa, ngbanga kʉndʉ Atɔ eno ngɨa akʉʉ ɔ ɓisi.
Currently Selected:
Matayɔ 5: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
