Matayɔ 7
7
Yeso enjo ʉpanʉ akʉʉ ɔ kio mʉkɔmbʉ
(Luk 6:37-38,41-42)
1Nátɨkiomʉ mʉkɔmbʉ ngʉwɔ ɓangɛ, dɔ, Asɔɓɨɨ atɨkiomʉ ʉweno kʉɓanɨ. 2Dɔ, ngbanga kʉndʉ inu, nákɔkio mʉkɔmbʉ ngʉwɔ ɓangɛ, Asɔɓɨɨ a꞊kio sina ʉweno kʉɓanɨ. Yaka ngɨyɛ inu, nákɔkɨa ɓangɛ, Asɔɓɨɨ a꞊nɨkɨa sina inu, kʉɓanɨ.
3Ʉwɛ, wanɨna ta unjele ngʉwa amati ɔ isó ngɨyɔ mangɛ, sɔkɔmʉ pɛpɛ-sɨ wɛna igbiti yɔ mʉkakaʉ ta iti, ɨyɛ ʉwɛ, wanayɔ amati ɔ isó ngɨyɛsɔɔ, dɔtanɨ? 4Ʉwɛ, wamusigio ndɨ mangɛ sigioni ɓɔ: ‹Ika nɨnachweiso unjele ngʉwa amati ɔ isó ngɨyɛsɔɔ›, ati ngɨa ʉwɛ, pɛpɛ ingainga, wanɔ igbiti yɔ mʉkakaʉ ta iti, amati ɔ isó ngɨyɛsɔɔ? 5Wa mombi ɔ pɛtanaka! Chwɛiso-sɨ igbiti yɔ mʉkakaʉ ngɨyɛ ya amati ɔ isó ngɨyɛsɔɔ ingono, ambɔ ɨyɛ waɓio-ɔɔ achweiso unjele ngʉwa wa amati ɔ isó ngɨyɔ mangɛ ɓio anɨna tɨa kʉ iɗo!
6Nátɨgisienimʉ ɓɛmva ɨkyɛmʉ ngɨyɛ nɔ́injo Asɔɓɨɨ. Dɔ, nɔ́kɨeni ɓanɨ, ɓɛmva ɓanɨnatanɨa, nɔ, ɓɔnikechoo. Ɓayaka ɓɔ ɨndambʉ ɓɛgabʉ ngʉɓeno, nátɨɓugisiomʉ ɓanɛmbʉ. Dɔ, nɔ́ɓugisieni ɨɓɔ, ɓanɛmbʉ ɓaɓuyechoo nɔ mɨtɨndɨ ta yechoo.
Yeso enjo ʉpanʉ akʉʉ ɔ nɨta
(Luk 11:9-13)
7Ɨteni, kʉdɔ, ɓa꞊ninjo injoni. Nɔ, hateni, kʉdɔ, né꞊jeyo jeyoni. Ɓendeni umongu, kʉdɔ, ɓa꞊nɨganɨa ganɨanɨ. 8Dɔ, mombi ngɨa ɛta, ɓaminjo injoni. Nɔ, mombi ngɨa ahata, ɛnɨanɨa nɔ ɨkyɛmʉ ɨnɨanɨanɨ. Nɔ, mombi ngɨa aɓɛnda ʉmongu, ɓamʉganɨa ganɨanɨ.
9Ati eno aka, anɨ-sɨ ɨyakɛ ɓɔ mwana angɔ, ɔmɨteni ɨɓʉgʉ, ɔminjo tɨa ikopi? 10Pɔ ɓɔ ɔmɨteni musipe, ɔminjo tɨa yakpoku? 11Yɔɓieni ɓanɨ ɓɔ inu, ɓombi ɓɔta ɓɨɓɨ, nɛ́mbɨa aninjo ɓana ɓeno lɨkyɛmʉ lɛta manjanja, Atɔ eno ngɨa akʉʉ ɔ ɓisi, enjo mombi muɓomu ngɨa anɨta, tɨa lɨkyɛmʉ lɛta manjanja nɔgbɛ anagaaka!
12Yaka iɓomu ngɨyɛ, nábaya ɓɔ ɓangɛ ɓɨnɨkɨa inu, inu, kɨeni pɨ ɓangɛ kʉɓanɨ. Yaka iɓomu ngɨyɛ, ya amati ɔ mapanʉ ngʉkɔ Musa, nɔ amati ɔ Mabii ngʉkɔ magbɛ, ɨyɔ ɨyɛnɛnɨ.
Yeso enjo ʉpanʉ akʉʉ ɔ umongu wɔta bele
(Luk 13:24)
13Kumonieni akɔ umongu ngʉwa wɔta bele. Dɔ, umongu ngʉwa watito mombi aɓʉɓɨɓɨ wa bamu, nɔ ɨngbaa yɔngɔ kʉ ho. Ɨnadɔ, ɓʉja ɓɔ ɓombi ɓakpata ta umongu ngʉwɔnanɨ.
14Yakamɛngana, umongu ngʉwa wɔkumonio akɔ ɓʉhɛa, wa bele. Nɔ, ɨngbaa ngɨyɛ yaɓɔiso inani, ya kʉ nɔ ɓʉkaɓʉkaɨ. Kʉɓanɨ, ta ɓombi bele aɓɛ ɓaɨkpata.
Ɓɛmbɨa ɓʉtɨ akɔ lipumo lɔngɔ
(Luk 6:43-44)
15Pɛmanɨeni nɔ magbɛ kɔ pɛtanaka. Dɔ, ɓɛka anɔ ambamba eno, ta ndʉ ɓakɔndɔlɔ. Yakamɛngana, amati ɔ mɨtɨma ngɨyeɓo, ɓa ɓakwei. 16Ɓombi ngʉɓɔnanɨ, náɓɨmbɨa ta ɨngbaa akɔ mʉkyananakɨa ngʉweɓo. Dɔ, ɓangɔɗʉkʉamʉ lipumo lɛta tɨpɨ, akʉʉ ɔ mambɔkya. Nɔ, ɓangɔɗʉkʉamʉ lipumo lɛta manjanja, akʉʉ ɔ machɛkɛlɛ. 17Ɓʉtɨ ɓɔta ɓuɗo, ɓakyɔmo ta lipumo lɛta liɗo. Nɔ, ɓʉtɨ ɓɔta ɓɨɓɨ, ɓɔmo ɨɓɔ kʉ lipumo lɛta ɓɨɓɨ. 18Ɓʉtɨ ɓɔta ɓuɗo, ɓangɛnjomʉ lipumo lɛta ɓɨɓɨ. Nɔ, ɓʉtɨ ɓɔta ɓɨɓɨ, ɓangɛnjomʉ lipumo lɨta liɗo.
19Ɓʉtɨ ɓuɓomu ngʉɓa ɓangɔmomʉ lipumo lɛta liɗo, ɓaɓʉkwaka, nɔ ɓɔɓugiso amati ɔ dyaa. 20Kʉdɔ, nɛ́꞊mbɨa magbɛ kɔ pɛtanaka ta ɨngbaa akɔ lipumo ngɨleɓo.
Yeso ɔpanɨɔ akʉʉ ɔ ɓisi ɓɔ mupipio
(Luk 13:25-27)
21Sɔkɔmʉ ɓombi ɓaɓomu ngʉɓa, ɓanɛmɨ anisoko ɓɔ: ‹Hii Makwɔɓɨɨ, hii Makwɔɓɨɨ!› Ʉɓa, ɓa꞊kumonio sina, amati ɔ Ɓʉngama ngʉɓɔ akʉʉ ɔ ɓisi. Yakamɛngana, mombi ngɨa akumonio, ta ɨyakɛ akyananakɨa, ɓʉkʉnda ngʉɓɔ Aba ngɨasɛmɨ, ɨyakɛ akʉʉ ɔ ɓisi.
22Nɔ, ɓisi ngʉɓɔnanɨ, ɓombi ɓaja ɓa꞊nasigio sina ɓɔ: ‹Hii Makwɔɓɨɨ, hii Makwɔɓɨɨ! Isu, ta꞉ɓɨakɨa jɛnɛ Ɨsaʉ ngɨyɛsɔɔ, akɔ ino yɛsɔɔ, nɔ, tɔ꞉chweiso mɨtɨma yɔ madu, nɔ, tɔ꞉kɨa ɓakɔkɔ ɓaja!›
23Kʉdɔ ɨmɨ, na꞊ɓʉtata sina ta aɓʉmba ɓɔ: ‹Ɨmɨ, nangɔnɨmbɨamʉ pɔ bele! Ʉngweni anambamba asɛmɨ, inu, ɓombi ɓɔta ɓɨɓɨ!›
Yeso enjo isisenio akʉʉ ɔ tuɓoko ɨkáá
(Luk 6:47-49)
24Mombi muɓomu ngɨa anʉka yaka ngɨyɛ, nɔ, ɔɨkyananakɨa, a꞊ɓio ndʉ mombi ɔ nɨmbɨmbɨanaka ngɨa, a꞉tuɓoko ɨkáá akʉʉ ɔ ikopi.
25Angbinga ngɨa ʉgbaa wa꞉neyo-ɔɔ nɔ muhingii wɔta ʉja ahingo, nɔ, mahuo kɔ꞉huo akʉʉ ɔ ɨkáá ngɨyɛnɛnɨ, yangɔkwamʉ aɨsɨ, dɔ, ya꞉tuɓonokio akʉʉ ɔ ikopi.
26Yakamɛngana, mombi ngɨa anʉka yaka ngɨyɛ, sɔkɔmʉ ɔɨkyananakɨa, ɨyɔ, a꞊ɓio ndʉ ijangi, ngɨyɛ akɔtuɓoko ɨkáá kʉ yayɛ akʉʉ ɔ sasaɨ.
27Angbinga ngɨa ʉgbaa wa꞉neyo-ɔɔ nɔ muhingii wɔta ʉja ahingo, nɔ, ɨbʉbʉ yɔ꞉huo akʉʉ ɔ ɨkáá ngɨyɛnɛnɨ, yɛ꞉teyo aɨsɨ ga gbruu. Mungito wɔngɔ, wa꞉ɓio ʉja kisoɓa.»
28Ɨyɛ ndʉ Yeso a꞉pipo anʉngakɨa ambaja ɔ ɓombi yaka ngɨyɛnɛnɨ, mapanʉ ngʉkangɔ kɔ꞉ɓʉmbangɨa ta mbangɨa. 29Dɔ, ka꞉ɓio nɔ angu, sɔkɔmʉ ngbanga nɔ ɓapananakɨa ɓɔ mapanʉ ngʉɓeɓo.
Currently Selected:
Matayɔ 7: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
