Matayɔ 28
28
Yeso ɔjʉkana akɔ ingwo
(Mlk 16:1-10; Luk 24:1-12; Yɔa 20:1-10)
1Ɓisi ngʉɓɔnanɨ ɓɔ Homuo ɓa꞉chana. Akɔ igbandindi yɔ ɓisi ɓɔ mʉkpanganɨa wɔ pɔsʉ, Malɨa Magadala, ɨɓɔ nɔ ayoo angɔ Malɨa, ɓɔ꞉sa akanga ɓʉnjaʉ.
2Ta gagaa ngɨananɨ, akpʉkʉma ata mʉja ɔ꞉chana amati ɔ ɨkʉmbʉ ngɨyɛnɛnɨ. Malaika wɔ Makwɔɓɨɨ, ɔ꞉jo anɨngwa akʉʉ ɔ ɓisi, ɛ꞉ka akeliso ikopi amonu kɔ ɓʉnjaʉ, nɔ, ɔ꞉wolo akʉʉ ɔngɔ ga jikomu. 3Malaika ngɨananɨ, a꞉ɓio ajɛa nɔgbɛ, ndʉ ɨyɛ ʉgbaa wangɛnana-ɔɔ. Nɔ, lɨpʉkʉ ngɨlangɔ, la꞉ɓio tu nɔgbɛ.
4Anɨna ɓanɨ, ɓasʉda ngʉɓa ɓa꞉ɓio apɛmakɨa ɓʉnjaʉ, ɓɔ꞉kwa ʉɓá, nɔ, ɓɔ꞉pʉnga gʉgʉma, nɔ, ɓɛ꞉ka ngbanga ndʉ mɨnda.
5Yakamɛngana, malaika wɔ Asɔɓɨɨ wɔ꞉ɓusigio ɨɓɔ ɓoi ngʉɓɔnanɨ ɓɔ: «Natɨkumomʉ! Nanɨmbɨa ɓɔ, nɛ́꞉kɔ ahata Yeso, ɨya ɓa꞉mʉɓakaka pɛ akɔ mʉsalaba. 6Angɔmʉ ɓata ɨyɔ aka! Ɔ꞉jʉkanɔ akɔ ingwo jʉkananɨ, ngbanga kʉndʉ a꞉sugo jɛnɛ. Ikeni anɨna ɨda ngɨyɛ, ɓa꞉mukwaiso pɛ-ɔɔ. 7Seni gagaa atɨ ɓakpata ngʉɓangɔ, nɔɓusigio ɓɔ, ɔ꞉jʉkanɔ akɔ ingwo jʉkananɨ, ati ɔ mɨnda. Nɔ, ɨtakɨtakɨ ngɨyɛ, anɨsa nenu aɓɛtaka anɔ Galilaya, nɔ, nábimɨna tɨa kʉ inani. Ɨsaʉ ngɨyɛ nɔ꞉ɓio akʉnda nenu anʉngɨa, ɨyɛnɛnɨ.»
8Ɓoi ɓa꞉ngwa ananɨ aɓʉnjaʉ tɨta gagaa, ɨbɔ, tɨa kʉ nɔ ʉɓá, ɨhɔ tɨa kʉ nɔ ɨgyagya. Ɓɔ꞉sa bangʉ anʉngakɨa ɓakpata ɨsaʉ ngɨyɛnɛnɨ.
9Pɔ gbalakɨa, ga Yeso ananɨ apɛɨ ɔ ɓoi ngʉɓɔnanɨ ɓɔ wɛɛ, ga ɨyɔ ɓɔ: «Nɛ́kɔ kʉ inani!» Kʉdɔ, ɓɔ꞉mɨsɨnganɨa, ɓɔ꞉gbʉkʉmakɨa nɔ mau, nayɔ apoto mɨtɨndɨ. 10Yeso ɔ꞉ɓusigio ɓɔ: «Natɨkumenimʉ! Seni aɓɨakɨa ɓanduku ɓɔsɛmɨ ɓɔ ɓɨsa anɔ Galilaya. Ɓabinɛna inani.»
Ɓasʉda ɓenjo ɨsaʉ
11Angbinga ngɨa ɨɓɔ ɓoi ɓa꞉ɓio-ɔɔ anɨsɨnganaka nɔ kyɛnda, mukpekpe yɔ ɓapɛmakɨa ɓɔ꞉sa anɔ Yelusalɛma, anʉngakɨa ɓakumukumu yaka iɓomu, ngɨyɛ ya꞉kyananakɨa.
12Ɨɓɔ ɓakumukumu, ɨhɔ nɔ ɓatataɓasie, ɓɔ꞉mɔmanakɨa, nɔ, ɓɔwolio ubua. Mbise ɔngɔ, ɓɔ꞉kana aninjo ɓasʉda ɓagyɛgyɛ ɓaja nɔgbɛ. 13Ga ɨɓɔ ɓɔ: «Inu, sugeni ta ɓɔ: ‹Ɓakpata ngʉɓangɔ, ɓɛ꞉kɔ nayɔ aniɓo naɓutu, angbinga ngɨa tɔ꞉ɓio-ɔɔ isu atɔɔ.› 14Ngama ɔ ihoi ɔkeni ɨsaʉ ngɨyɛnɛnɨ, isu akɛ, tanɨsa ayakanaka nayɔ, nɔ, tɔkwananakiso yaka yɔngɔ. Inu, ɓieni mʉtɨma ta ɓɔ dɨɨ.»
15Kʉdɔ, ɓasʉda ɓa꞉sɨka ɨɓɔ tɨa kʉ ɓagyɛgyɛ. Nɔ, ɓɔ꞉kɨa ngbanga kʉndʉ ɓa꞉ɓusigio. Ɨsaʉ ngɨyɛnɛnɨ, ya꞉nanjana ati ɔ Ɓayuda, akɔɓɔya kʉndʉ ɓʉɓʉnʉ.
Yeso ɔchwɛanɨɔ ɓakpata ngʉɓangɔ
(Mlk 16:14-18; Luk 24:36-49; Yɔa 20:19-23; Mlk 1:6-8)
16Ɓakpata tɛkɛɓɛ nɔ mʉngana, ɓa꞉sa anɔ Galilaya, tɨa kʉ aɨkpangba, ngɨyɛ Yeso a꞉ɓʉpanaka. 17Ngbinga ngɨa ɓa꞉mɨna-ɔɔ, ɓɔ꞉gbʉkʉmakɨa nɔ mau apɛɨ angɔ. Yakamɛngana, ɓombi ngaɓɔmɔ ati eɓo, ɓa꞉ɓio ta nɔ ɓajatuoko.
18Yeso ɔ꞉ɓɨsɨnganɨa, ga ɨyɔ naɓɔ ɓɔ: «Ɓʉngama ɓuɓomu ngʉɓa akʉʉ ɔ ɓisi, nɔ ʉɓɔ dɔdɔ kʉtaa, Aba ngɨasɛmɨ a꞉nenjo pɔngɔ ɨɓɔ ɨmɨ tɨa injoni. 19Kʉɓanɨ, seni amati ɔ mababa kɔ ɓombi maɓomu, nɔ́ɓʉnecho anɨka ɓakpata ngʉɓɔsɛmɨ. Nɔ, nɔ́ɓʉɓatisa akɔ ino yɔ Aba, nɔ Mwana, nɔ Mʉtɨma wɔta Tu. 20Ɓʉpanɨeni akyananakɨa mapanʉ maɓomu ngʉka, na꞉ninjekio pɔngɔ. Ɨmbɨeni iɗo ɓɔ, ɨmɨ ingainga, na꞊ɓio ɨhɔ nenu masi ta maɓomu, akɔɓɔya ta amupipio wɔ dɔdɔ ɓɔ kpru.»
Currently Selected:
Matayɔ 28: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
