Matayɔ 27
27
Ɓɔsɔ nɔ Yeso apɛɨ ɔ ngama Pilato
(Mlk 15:1; Luk 23:1-2; Yɔa 18:28-32)
1Tɨa nekuɓa yɔngɔ nɔ igbandindi, ɓakumukumu ɓaɓomu, ɨhɔ nɔ ɓatataɓasie ɓɔ Ɓayuda, ɓa꞉wolio ubua akio mʉkɔmbʉ ngʉwɔ nɨwa Yeso. 2Ɨyɛ ndʉ ɓa꞉mʉsanga, ɓɔ꞉sa nayɔ aninjo atɨ Pilato, ngama ɔ ihoi yɔ Yudɛa, Mʉlɔma wɔngɔ.
Yuda ɔnjenjono
(Mlk 1:18-19)
3Angbinga ngɨa Yuda, ngɨa a꞉mʉgaba, ɛ꞉na-ɔɔ ɓɔ, ɓɔkio mʉkɔmbʉ tɨa kioni ɓɔ ɓɨwa Yeso, ɔ꞉pʉnga nɨdya ikoko nɔgbɛ amʉtɨma. Ɔ꞉sɨka ɓagyɛgyɛ ɓatɛkɛɓɛ ɓaatʉ ngʉɓɔnanɨ, nɔ, ɔ꞉sa naɓɔ atosio ɓakumukumu, nɔ, ɓatataɓasie ɓɔ Ɓayuda. 4Ga ɨyɔ naɓɔ ɓɔ: «Na꞉kɨa pɛ ɓʉɓɨɓɨ akɔgaba mombi ngɨa ɔkɨamʉ ɨkyɛmʉ.»
Yakamɛngana, ɨɓɔ ɓɔ꞉mutosio ɓɔ: «Hoo, ɨyɛnɛnɨ yangɔmʉ ɓata yaka nga yeso. Yɔnakanga tɨta ʉwɛ!»
5Kʉdɔ, Yuda a꞉ngbengo ɓagyɛgyɛ ngʉɓɔnanɨ, inani amati ɔ ɨkáá yɔ Asɔɓɨɨ, nɔ, ɔ꞉sa anjenjono ga dɔɔ.
6Ɓakumukumu, ɓɔ꞉ɓʉgwakyoko, ga ɨɓɔ ɓɔ: «Mapanʉ ngʉkeso ka꞉tɨgbɛmɨa gbɛmɨanɨ amaya ɨkananja yɔ ɓagyɛgyɛ ngʉɓa, amati ɔ ikpoko yɔ ɨkáá yɔ Asɔɓɨɨ. Dɔ, ya ɓagyɛgyɛ ngʉɓa ɓɔnjwakiso naɓɔ menike.»
7Kʉdɔ, ɓɔ꞉mɔmanakɨa, nɔ ɓɔwolio ubua, nɔ, ɓɔ꞉tɔkaya nɔ ɓagyɛgyɛ ɓɔngɔ tɨa ʉmʉwa wɔ hʉna ɓɛɛka. Ʉmʉwa ngʉwɔnanɨ, wa꞉ɓio kʉbaa wɔ mombi mʉngana, ngɨa a꞉tɨmeyo lɨkɔchɔ. 8Kwananɨ, ʉmʉa ngʉwɔnanɨ, wa-ɔɔ anɨsokonio ɓɔ «Kʉbaa ɔ Menike», akɔɓɔya kʉndʉ ɓʉɓʉnʉ.
9Yaka ngɨyɛnɛnɨ, ya꞉kyananakɨa akpatanakɨa nɔ yaka ngɨyɛ ɨgbɛ Yɛlɛmɨa, a꞉sugo jɛnɛ ɓɔ: «Ɓa꞉sɨka ɓagyɛgyɛ ɓatɛkɛɓɛ ɓaatʉ, ya ɨgabʉ ngɨyɛ Ɓaɨsalaɛlɛ ɓa꞉mʉgabiso nayɔ. 10Ɓɔ꞉kaya naɓɔ kʉbaa wɔ mombi mʉngana, ngɨa a꞉tɨmeyoko lɨkɔchɔ, ngbanga ndʉ aka MAKWƆƁƗƗ a꞉nasigio jɛnɛ-ɔɔ.»#popoko Jak 11:12-13; Yel 19:1-13; 32:6-9
Ɓɔsɔ nɔ Yeso apɛɨ ɔ mʉkɔmbʉ atɨ Pilato
(Mlk 15:2-15; Luk 23:2-3,18-25; Yɔa 18:29—19:16)
11Kʉdɔ, ɓa꞉sa nɔ Yeso apɛɨ ɔ ngama Pilato, ɨyɔ ngama ɔ꞉muɓokuo ɓɔ: «Ʉwɛ wa ndɨ ngama ɔ Ɓayuda?»
Yeso ɔ꞉mutosio ɓɔ: «Ʉwɛ, wɔsugo sugoni!»
12Ananɨ, ɨɓɔ ɓakumukumu, nɔ ɓatataɓasie ɓɔ Ɓayuda, ɓɔ꞉pʉnga anapɨa Yeso nɔ mʉkɔmbʉ. Yakamɛngana, sɔkɔmʉ ɨɓutosio yaka. 13Ga Pilato nayɔ ɓɔ: «Wangɔ ndɨ, ʉwɛ anʉka mʉkɔmbʉ ngʉwa ɓanɔwɛ anapɨa nawɔ ʉpɛ ɓɔ?» 14Yakamɛngana, sɔkɔmʉ Yeso ɨmutosio yaka pɔ mɛngana. Yɔ꞉mʉkyaka ɓata ɨyɔ ngama Pilato, tɨa kʉ nɔgbɛ.
15Akɔ ɓisi ɓuɓomu ngʉɓɔ Ʉmbɔ wɔ chwɛa aɓubaya, ya꞉ɓio gbali ɔ ngama ɔ ihoi, aɓoo mombi ɔ boloko mʉngana, ɨya, ambaja ɔ ɓombi a꞉tɨmʉbaya ɓɔ ɓɨmuɓoo. 16Nɔ, akɔ angbinga ngɨananɨ, ya꞉ɓio nɔ mombi ɔ boloko mʉngana ino ɓɔ Balaba, ɨya, a꞉tɨmbɨanɨa nɔgbɛ.
17Pilato ɔ꞉ɓokuo ɓombi ngʉɓa ɓa꞉mɔmanɨa ananɨ ɓɔ: «Nɔ́bayɔ ɓɔ nɨnɨɓoio anɨ, ati ɔ ɓombi ngʉɓaɓɛ? Ga Yeso Balaba, ga pɔ Yeso ngɨa ɓamisoko kʉ ɓɔ Klisito?» 18Dɔ, a꞉ɓio anɨmbɨa iɗo ɓɔ, ɓa꞉gaba Yeso ta akɔ yaka yɔ imi.
19Angbinga ngɨa Pilato a꞉ɓio-ɔɔ ɓawele akɔ ɓuwolo ngʉɓangɔ ɓɔ kio mʉkɔmbʉ, moi angɔ ɔ꞉mʉtʉmakɨa iso, ɓɔ: «Ʉwɛ, watɨkumoniomʉ amati ɔ ayaka yɔ mombi ata ngbingbii ngɨananɨ, angɔmʉ nɔ mʉkɔmbʉ! Dɔ, naɓutu, nɔ꞉kwaamʉ tɔɔ maɗo pɔ bele, ɨmɨ anʉtakanaka lɨwɔtɔ akʉʉ angɔ!»
20Ɓakumukumu, nɔ ɓatataɓasie ɓɔ Ɓayuda, ɓa꞉pɔpɨa ambaja ɔ ɓombi, ɓɔ ɓɨta Pilato aɓoo ta Balaba, nɔ, nɨwa Yeso ta asini.
21Ngama Pilato, ɔ꞉tɔɓuɓokuo ɓata ɓɔ: «Ati eɓo ɓapɨnɨ, anɨ ɨya nákʉnda ɓɔ nɨnɨɓoio ɨyɔ?» Ɓɔ꞉mutosio ɓɔ: «Balaba!»
22Pilato ɔ꞉ɓuɓokuo ɓata ɓɔ: «Andɔ Yeso ngɨa ɓamisoko kʉ ɓɔ Klisito, nɨmʉkɨa tanɨ?» Ɨɓɔ, ɓaɓomu, ɓɔ꞉mutosio ɓɔ: «Ɓɨmʉɓakaka akʉʉ ɔ mʉsalaba!»
23Pilato ɔ꞉tɔɓuɓokuo ɓata ɓɔ: «Ɔ꞉kɨɔ dɔ-sɨ ɓʉɓɨɓɨ nga ɓeno tanɨ?» Yakamɛngana, ɓɛ꞉sɨnganaka atʉɓɨa tɨa ɓʉmʉ ɓɔ: «Ɓɨmʉɓakaka akʉʉ ɔ mʉsalaba!»
24Angbinga ngɨa Pilato ɛ꞉na-ɔɔ ɓɔ, angɔmʉ ɓata adaa ngɨa akɨa-ɔɔ ɨkyɛmʉ, nɔ, ɓombi ɓa tɨa asɨkanakɨa, ɔ꞉to mipo. Kʉdɔ, ɔ꞉gyaɓana lɨkɔndɔ ananɨ apɛɨ ɔ ɓombi. Ga ɨyɔ ɓɔ: «Yaka yɔ menike kɔ mombi ngɨakɛ, yɔnakangamʉ ɓata ɨmɨ. Yɔnɨkanga tɨta inu!»
25Ɓombi ɓaɓomu ɓɔ꞉tosio ɓɔ: «Yakɨa dɔ ɨma, mʉkɔmbʉ wɔ menike ngʉkangɔ, wiɓio akʉʉ eso, nɔ ɓana ɓeso kʉtaa!»
26Kʉdɔ, Pilato ɔ꞉ɓuɓoio Balaba, nɔ, ɔ꞉ɓɛndiso Yeso pimbo. Ɔ꞉tɔɓinjo ɨyɔ ga, ɓɨmʉɓakaka akʉʉ ɔ mʉsalaba.
Ɓasʉda ɓɔyapakiso Yeso
(Mlk 15:16-20; Yɔa 19:2-3)
27Ɓasʉda ngʉɓɔ ngama Pilato, ɓɔ꞉sa tɨa nɔ Yeso amati ɔ ɨkáá ngɨyeɓo yɛta ɨja. Nɔ ɨɓɔ ɓaɓomu, ɓɔ꞉mukunguo ga kuu. 28Ɓɔ꞉muɗuo lɨpʉkʉ ngɨlangɔ, ɓɔ꞉mupeniso tɨa kanjʉ ata ngbʉ. 29Kʉdɔ, ɓa꞉guɓo apeɓu ɔ maɓʉ ngɨa ɓa꞉mʉbangana amʉtʉ, ndʉ ɨgaɨ yɔ ɓʉngama. Nɔ, ɓɔ꞉muɓotiso mutupo aɨkɔndɔ yɔ guɔngɔ. Ɓɔ꞉pʉnga gbʉkʉmakɨa apɛɨ angɔ, ɓɔɓieni nayɔ ayapakiso ɓɔ: «Tɔnaɓokuo! Ʉwɛ, ngama ɔ Ɓayuda!» 30Ɓɔ꞉mutokoko nɔ maɗaʉ, nɔ, ɓɔ꞉sɨka mutupo ngʉwɔnanɨ, ɓɔ꞉mʉɓɛnda nawɔ amʉtʉ ɓɔ mba, mba.
31Ɨyɛ ndʉ ɓa꞉pipo nayɔ ayapakiso ɓanɨ, ɓɔ꞉muɗuo kanjʉ ngɨananɨ, nɔ, ɓɔ꞉mutosio lɨpʉkʉ ngɨlangɔ. Kʉdɔ, ɓɔ꞉sa nayɔ tɨa aɓakaka akʉʉ ɔ mʉsalaba.
Ɓɔɓakɔ Yeso akʉʉ ɔ mʉsalaba
(Mlk 15:21-32; Luk 23:26-43; Yɔa 19:17-27)
32Angbinga ngɨa ɨɓɔ ɓasʉda, ɓa꞉chwɛa-ɔɔ ananɨ, ɓɔ꞉jonokio nɔ atɨ Simoni, mombi mʉngana wɔ ɨkʉmbʉ yɔ Kɨlɛnɛ. Ɓɔ꞉mutumbiso mʉsalaba ngʉwɔ Yeso nɔ ɓʉkaɓʉkaɨ ga ti.
33Ambise ɔngɔ, ɓɔ꞉tɔɓɔya tɨa aɨda ngɨyɛ ɓaɨsoko ɓɔ Gɔlɔgɔta, ɨsɨ yɔngɔ ɓɔ «Ɨda yɔ Ikpokoo.» 34Tɨa inani, ɓɔ꞉minjo Yeso ʉkyɛpʉ ngʉwɔ ɓa꞉mataka nɔ angila. Yakamɛngana, angbinga ngɨa a꞉kana-ɔɔ, sɔkɔmʉ ɨmwa pɔ nɨmwa.
35Mbise ɔngɔ, ɓɔ꞉mʉɓakaka Yeso akʉʉ ɔ mʉsalaba. Nɔ, ɓasʉda ɓɔ꞉pakana lɨpʉkʉ ngɨlangɔ ingbaa nalɔ anʉya agbanda.#popoko Mmb 22:19 36Kʉdɔ, ɓa꞉woloko ta ananɨ, nayɔ akɔpɛmakɨa.
37Ɓa꞉tɛndakɨa yaka ngɨyɛ ɓa꞉mʉnapɨa-ɔɔ nɔ mʉkɔmbʉ, nɔ ɓɔ꞉ɨɓaka nɔ ɨkʉʉ yɔ mʉtʉ ngʉwangɔ, asugo ɓɔ: «Yeso ɨyakɛ, ngama ɔ Ɓayuda.»
38Ya꞉ɓio kʉ nɔ ɓombi ɓɔ ndiɓo ɓapɨnɨ, ngʉɓa ɓa꞉ɓʉɓakaka amʉsalaba, ɨhɔ nɔ atɨ Yeso. Mʉngana a꞉ɓio nɔ ʉgbaa ngʉwɔ guɔngɔ, ɨyɔmɔ nɔ ʉgbaa ngʉwɔ aɗeku. 39Ɓombi ngʉɓa ɓa꞉ɓio achana ananɨ, ɓɔ꞉pʉnga nayɔ asɛaka, nɔ, kpʉkʉma mɨtʉ ngɨyeɓo. 40Ga ɨɓɔ nayɔ ɓɔ: «Ɓɛ, ʉwɛ ngɨa wapanja ɨkáá yɔ Asɔɓɨɨ, nɔ, wɔɨtuɓoko ɓata ambise ɔ makwaa kaatʉ, heisono-sɨ tɨa ʉwɛ makwɔngɔ! Nɔ, wɔɓieni Mwana wɔ Asɔɓɨɨ, ujo amʉsalaba!»
41Ɓakumukumu nɔ ɓapananakɨa ɓɔ mapanʉ nɔ ɓatataɓasie ɓɔ Ɓayuda, ɓɔ꞉mʉyapakiso kʉ yapakisoni. Ga ɨɓɔ ɓɔ: 42«A꞉heiso pɔngɔ ta ɓangɛ, yakamɛngana, angɔmʉ ɓata aheisono ɨyɔ makwɔngɔ! Ɓɛ, sɔkɔmʉ-sɨ ɨyɔ akɛ a ngama wɔ Ɓaɨsalaɛlɛ? Ɛɛ! Ujo gɔ-sɨ ɓʉnʉ tɨa akʉʉ ɔ mʉsalaba, tɨa kʉɓanɨ, isu tɔ꞊mʉbaya! 43Dɔ, a꞉mʉnakambanɨa Asɔɓɨɨ, nɔ, a꞉sugo kʉ ɓɔ a Mwana angɔ. Ɛɛ! Yɔɓieni ɓɔ Asɔɓɨɨ ɔngɔ, amʉkʉnda, ɨmʉheiso tɨa!» 44Ɓombi ɓɔ ndiɓo ngʉɓa, ɓa꞉ɓʉɓakaka ɨhɔ nɔ atɨ Yeso, ɓɔ꞉mʉsɛaka kʉ ngbanga.
Ingwo ngɨyɔ Yeso
(Mlk 15:33-41; Luk 23:44-49; Yɔa 19:28-30)
45Anɨngwa ɨpá amusoti, ga umomo ta ɓɔ ɗɨɛ, akɔ ɨkʉmbʉ iɓomu, aɓɔya ta akɔ angbinga ngɨa ɔ ɨsaɓɔkʉ wɔ ɨpasɨ. 46Ɨyɛ ndʉ, ya꞉ɓio tɨa tinetine ndʉ saa ɔ ɨsaɓɔkʉ, Yeso ɔ꞉natɨa nɔ iso yɛta ɓʉmʉ, ɓɔ: «Eli! Eli! Lama sabakitani?» Ɨsɨ yɔngɔ ɓɔ: «Hii Asɔɓɨɨ ngɨasɛmɨ! Hii Asɔɓɨɨ ngɨasɛmɨ! Wɔ꞉nasɨɔ ɓanɨ, dɔtanɨ?»#popoko Mmb 22:2
47Ngana ngana ɔ ɓombi ngʉɓa ɓa꞉ɓio ananɨ, nɔ, nʉka yaka ngɨyɛnɛnɨ, ɓɔ꞉sugo ɓɔ: «Ʉkeni, aki-ɛɛ anisoko Ɛlɨa!» 48Ta gagaa ngɨananɨ, mʉngana ati eɓo ɔ꞉sa bangʉ asɨka ɨkyɛmʉ mɛngana yɛta foufou. Ɔ꞉ɨno amati ɔ ʉkyɛpʉ wɔta ʉkagbɛ, nɔ, ɔ꞉ɨbangana amʉtʉ wɔ ʉmbamba. Kʉdɔ, ɔ꞉munjenjio Yeso ɓɔ ɨmwa. 49Yakamɛngana, ɓangɛ ɓɔ꞉sugo ɓɔ: «Mʉsɨa-sɨ, tɨna-sɨ adiga Ɛlɨa ɛka nayɔ aheiso ta ɨkanɨ!»
50Kʉdɔ, Yeso a꞉tɔnatɨa tɨa ɓata nɔ iso yɛta ɓʉmʉ, nɔ, ɔ꞉kio mʉtɨma.
51Ta gagaa ngɨananɨ, ɨpʉkʉ yɛta ɨja ngɨyɛ ɓa꞉njenjo amati ɔ ɨkáá yɔ Asɔɓɨɨ, yɔ꞉natʉanɨa akɔ magbaa kapɨnɨ ga hua, anɨngwa akʉʉ aɓɔya ta aɨsɨ. Ɨkʉmbʉ yɔ꞉gʉgʉma, nɔ, makopi kɔ꞉natʉanɨa. 52Manjaʉ kɔ꞉gananakɨa, nɔ mɨnda yɔ ɓombi ɓɔ Asɔɓɨɨ ɨja, yɔ꞉jʉkanaka. 53Kʉdɔ, ɓa꞉chwɛa amanjaʉ, nɔ mbise ɔ Yeso a꞉jʉkana akɔ ingwo, ɓɔ꞉kumonio anɔ Yelusalɛma ɨkʉmbʉ yɛta tu. Inani, ɓombi ɓaja ɓɔ꞉ɓɨna ta ɨnanɨ.
54Ngama ɔ ɓasʉda ɔ Ɓalɔma, ɨhɔ nɔ ɓombi ngʉɓa ɓa꞉ɓio naɓɔ aɓɛtaka Yeso, angbinga ngɨa ɓɛ꞉na-ɔɔ akpʉkʉma ngɨa, a꞉chana akɔ ɨkʉmbʉ ɓanɨ, nɔ iɓomu ngɨyɛ ya꞉kyananakɨa, ɓɔ꞉kwa ʉɓá nɔgbɛ. Ga ɨɓɔ ɓɔ: «Ta ingono, mombi ngɨa akɛ, a꞉ɓio pɛ ta Mwana ɔ Asɔɓɨɨ!»
55Ɓoi ɓaja ɓa꞉ɓio ɓɛmaakɛ ɓɔ kɛlɛ, anɨna yaka ngɨyɛnɛnɨ ya꞉ɓio akyananakɨa. Ɓoi ngʉɓɔnanɨ, ɓa꞉pʉnga jɛnɛ akpatanaka Yeso, nɔ nayɔ akyananakɨa, anɨngwa ta anɔ Galilaya. 56Ati eɓo, ya꞉ɓio Malɨa ɔ Magadala, nɔ Malɨa ngɨa inye ɔ Yakɔɓɔ nɔ Yɛjɛfʉ, nɔ inye ɔ ɓana ɓɔ Jɛbɛdayɔ.
Ɓɔnapɨɔ ndʉtʉ yɔ Yeso amati ɔ ɓʉnjaʉ
(Mlk 15:42-47; Luk 23:50-56; Yɔa 19:38-42)
57Ya꞉ɓio tɨa angbinga ɔ ɨpasɨ, mombi ɔ lɨkyɛmʉ mʉngana amati ɔ ɨkʉmbʉ yɔ Alɨmatɛa, ino ɓɔ Yɛjɛfʉ, ɛ꞉ka ga buu. Ɨyɔ, a꞉ɓio kʉ mʉngana ɔ ɓakpata ɓɔ Yeso. 58Ɨyɔ, Yɛjɛfʉ ɔ꞉sa atɨ ngama Pilato, nayɔ anɨta ndʉtʉ yɔ Yeso. Kʉdɔ, ngama Pilato ɔ꞉titio bɔ ɓiminjo ɨyɔ. 59Yɛjɛfʉ ɔ꞉sɨka ndʉtʉ yɔ Yeso, nɔ, ɔ꞉ɨpokoɓoko nɔ malɨkana. 60Nɔ, ɔ꞉ɨkwaiso amati ɔ ɓʉnjaʉ ɓangɔ ɓɔ ɨtakɨtakɨ, ʉɓa, a꞉ɓuchwiso amati ɔ ikopi. Ɔ꞉sɨka, ɔ꞉kuto ikopi yɛta ɨja ananɨ amonu kɔngɔ ga kagbu, nɔ, ɔ꞉sɨka ɔ꞉sa yangɔ. 61Malɨa wɔ Magadala, nɔ Malɨa ngɨɔmɔ, ɓa꞉ɓio ɨɓɔ ɓaweleke tɨta ananɨ apɛɨ ɔ ɓʉnjaʉ.
Ɓɔnapɨɔ ɓasʉda apɛmakɨa ɓʉnjaʉ ɓɔ Yeso
62Ambise ɔ ɓisi mʉngana, yasugo ɓɔ ɓisi ɓɔ nuhomuo, ɓakumukumu, nɔ Ɓafalisayɔ ɓɔ꞉jonokio atɨ Pilato. 63Ɓɔ꞉musigio ɓɔ: «Ha Makweso! Tɔtunguo yaka ngɨyɛ mombi ɔ mʉjɛɛ ngɨa a꞉sugo, ɨyɔ-sɨ ta uɓei, ɓɔ: ‹Ɓa꞊nawa suo, nɔ, ambise ɔ makwaa kaatʉ, nɔ꞊jʉkana akɔ ingwo.› 64Titio gɔ ɓɔ ɓɨpʉnga apɛmakɨa ɓʉnjaʉ aɓɔya ta aka makwaa kaatʉ ngʉkɔnanɨ kachana-ɔɔ. Dɔ, sɔkɔmʉ ɓanɨ, ɓakpata ngʉɓangɔ ɓɛ꞊ka nayɔ aniɓo, nɔ, ɓɔ꞉sa aɓɨakɨa ɓombi ɓɔ: ‹Ɔjʉkana akɔ ingwo jʉkananɨ, ati ɔ mɨnda.› Ɨkananja yɔ mʉjɛɛ ngʉwɔnanɨ, wa꞊nagaaka tɨa ʉwɔ pɛɨ nɔ ɓʉɓɨɓɨ tɨta nagaaka.»
65Pilato ɔ꞉tosio ɓɔ: «Sɨ nánɔ ɓasʉda, seni apɛmakɨa ɓʉnjaʉ, ndʉ aka yɔkwanana-ɔɔ.» 66Kʉdɔ, ɓɔ꞉sa a꞉dɨkpa ɓʉnjaʉ nɔ ikopi amonu kɔngɔ, nɔ, ɓɔ꞉sɨa ɓasʉda ananɨ naɓɔ apɛmakɨa.
Currently Selected:
Matayɔ 27: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
