Matayɔ 22
22
Yeso enjo isisenio akʉʉ ɔ ʉmbɔ wɔ mʉsɨkana
(Luk 14:15-24)
1Yeso e꞉njo ɓata ambaja ɔ ɓombi ngɨananɨ lisisenio ngalɛmɔ akɔsugo ɓɔ: 2«Ɓʉngama ngʉɓɔ akʉʉ ɔ ɓisi, ɓa ngbanga ndʉ ngama mʉngana, ɨya, a꞉tambanakɨa mwana angɔ ʉmbɔ wɔ mʉsɨkana. 3Ɨyɔ ngama ngɨananɨ, ɔ꞉tʉma ɓombi ɓɔ tɛa ngʉɓangɔ atɨ ɓabika ngʉɓa, ɓa꞉ɓisokoko anɨka akɔ ʉmbɔ wɔ mʉsɨkana. Yakamɛngana, ɨɓɔ ɓabika ɓɔ꞉yaa nɨka ta yaa.»
4Kʉdɔ, ɔ꞉tʉma ɓata ɓombi ɓɔ tɛa ngaɓɔmɔ, ɔ꞉ɓusigio ɓɔ: «Ɓɨakɨeni ɓombi ngʉɓa tɔɓisokoko, ɓɔ: ‹Yaka iɓomu yɔsio atambanaka sioni. Nɔ꞉sɛndiso pɛngɛ tɨa kʉ nɔ ɓangɔmbɛ, ɨhɔ nɔ ɓanama ngʉɓɔsɛmɨ ɓɔta ngbʉlʉngbʉlʉ. Ikeni akɔ idyo yɔ mʉsɨkana!›
5Yakamɛngana, sɔkɔmʉ yaka ngɨyɛnɛnɨ yɔ꞉ɓuduiso mʉtɨma pɔ bele. Ɓɔ꞉nanjana ta alɨngbaa lɔ ɓatɛa leɓo ɓɔ ngbii. Mʉngana ɔ꞉sa akʉbaa, nɔ ɨyɔmo, ɔ꞉sa yangɔ agabanaka. 6Ɓiga ga ngaɓɔmɔ, ɓɔ꞉feyo ɓombi ɓɔ tɛa ngʉɓɔnanɨ ɓangɔ, nɔ, ɓɔ꞉ɓuko nɔ ɓɛnda ga sɛkɛ sɛkɛ, nɔ, ɓɔ꞉ɓʉmaa ta maa.
7Ɨyɔ, ngama, ɔ꞉kwa ʉnganga, nɔ, ɔ꞉tʉma ɓasʉda ngʉɓangɔ, anɨsa adʉka ɓakwa ngʉɓɔnanɨ, nɔ, nʉya gʉlʉ ngɨyeɓo ta nʉya.
8Mbise ɔngɔ, ga ngama nɔ ɓombi ɓɔ tɛa ngʉɓangɔ ɓɔ: ‹Ʉmbɔ wɔ mʉsɨkana, wɔsio pɛngɛ atambanaka sioni. Yakamɛngana, ɓabika ngʉɓa tɔ꞉ɓisoko ɓɔkɔsisekiomʉ. 9Kʉɓanɨ, seni tɨta amagbondo yɔ mɨgyɛndɔ, nɔ nesoko ɓombi ɓaɓomu ngʉɓa, na꞊ɓʉgbʉka inani, anɨka akɔ idyo yɔ mʉsɨkana.›
10Ɨɓɔ, ɓombi ɓɔ tɛa ɓɔ꞉sa amɨgyɛndɔ ta ɓanɨ. Ɓɔ꞉mɔma ɓombi ɓaɓomu ngʉɓa ɓa꞉ɓio naɓɔ agbʉka inani, ʉɓa ɓɔta ɓɨɓɨ, kʉndʉ ʉɓa ɓɔta iɗo. Ɓɛ꞉ka naɓɔ, ga ɨkáá yɔ ʉmbɔ wɔ mʉsɨkana ɓɔ kyɛɛ.
11Kʉdɔ, ɨyɔ ngama, a꞉kumonio inani amati ɔ ɨkáá ga ngbuu, dɔ, ɨna ɓabika. Ɔ꞉tɛna tɨa mombi mʉngana, ɨya a꞉pɛnɨɔmʉ ɨyɔ, lɨpʉkʉ lɔ ʉmbɔ. 12Ɔ꞉muɓokuo ɓɔ: ‹Ha awai-e! Wɔkumonio iyani, sɔkɔmʉ wɨpɛnɨa lɨpʉkʉ lɔ ʉmbɔ, nɔ ɨngbaa nga yeno tanɨ?› Yakamɛngana, sɔkɔmʉ ɨyɔ, mombi ngɨananɨ ɨmutosio yaka.
13Ga ɨyɔ ngama nɔ ɓombi ɓɔ tɛa ngʉɓangɔ ɓɔ: ‹Mʉsangeni mombi ngɨakɛ mɨtɨndɨ nɔ lɨkɨndɔ, nɔ, nɔmugiso inani aɓei, amati ɔ umomo! Inani, ya꞊ɓio ɨda yɔ dyana menu nɔ ndɨa.› 14Yeso ɔ꞉tɔpipio sugo tɨa ɓɔ: Ɓombi ngʉɓa ɓa꞉ɓisoko ɓa ɓaja, yakamɛngana, ʉɓaɓɛ ɓa꞉ɓʉchwa ɓa bele.»
Ɓafalisayɔ ɓɔɓokuo Yeso akʉʉ ɔ lipa manjanja
(Mlk 12:13-17; Luk 20:20-26)
15Kʉdɔ, Ɓafalisayɔ, ɓa꞉sa asingekio Yeso idimi, ɓɔ dɔ ɨfana aipindi, ta ɨngbaa akɔ yaka ngɨyɛ a꞉chweiso amonu kangɔ ingainga. 16Kʉdɔ, ɓɔ꞉mʉtʉmɨa mikpekpe yɔ ɓakpata ngʉɓeɓo, ɨhɔ nɔ mikpekpe yɔ ɓombi ngʉɓa, ɓa꞉ɓio amati ɔ ɨtandɛ ngɨyɔ Hɛlɔdɛ. Ga ɨɓɔ nayɔ ɓɔ: «Ha Mʉpananakɨa-e! Tanɨmbɨa ɓɔ, wakyɔkio yaka ta ingono. Wakɔpanɨa ɨngbaa yɔ Asɔɓɨɨ nɔ ɓungbingbii ta ndʉ yanɨtanɨa. Nɔ, wangɔmʉ ʉwɛ nɔ ʉɓá wɔ mombi. Dɔ ʉwɛ, wɛna ɓombi ɓaɓomu ta ngbanga. 17Ɛɛ, atɨɓɨa-sɨ ɓɔ wanɨna tanɨ. Tɔsisekio ndɨ kʉɔ alipa manjanja, kɔ ngama ata mʉja ngɨyɔ Ɓalɔma, ga pɔ ɓɔ ii, ga pɔ ɓɔ haa?»
18Yakamɛngana, Yeso ɛmbɨa itungwiɔ ngɨyeɓo yɛta ɓɨɓɨ ta pɛɨ. Ga ɨyɔ naɓɔ ɓɔ: «Inu ɓombi ɓɔ pɛtanaka! Nɛkɔ nɛmɨ apendekio ɓanɨ, dɔtanɨ? 19Anapaneni-sɨ ɓagyɛgyɛ ngʉɓa nálipaka naɓɔ manjanja.» Kʉdɔ, ɓɔ꞉minjo agyɛgyɛ ga ja. 20Yeso ɔ꞉ɓuɓokuo ɓɔ: «Muyendu wɔ mesu kanɨ, nɔ ino yanɨ ɨyɛkɛ?» Ɓɔ꞉mutosio ɓɔ: 21«Kɔ ngama ata mʉja ngɨyɔ Ɓalɔma.» Yeso ɔ꞉ɓusigio ɓɔ: «Ɛɛ! Lɨkyɛmʉ ngɨlɔ ngama ɔ Ɓalɔma, minjeni kʉ ngama ɔ Ɓalɔma, nɔ lɨkyɛmʉ ngɨlɔ Asɔɓɨɨ, nɔ́minjo kʉ Asɔɓɨɨ.»
22Ɨyɛ ndʉ ɓɔ꞉ka yaka ngɨyɛnɛnɨ Yeso a꞉ɓutosio, yɔ꞉ɓʉmbangɨa nɔgbɛ. Ɓɔ꞉mʉsɨa ta sɨa, nɔ, ɓɔ꞉sa yeɓo.
Ɓasadukayɔ ɓɔɓokuo Yeso akʉʉ ɔ jʉkana akɔ ingwo
(Mlk 12:18-22; Luk 20:27-40)
23Ta nɔ ɓisi mʉngana ngʉɓɔnanɨ, mikpekpe yɔ Ɓasadukayɔ ɓɔ꞉mɨkɨa Yeso, (ɨɓɔ akɛ ɓasugo ga jʉkana akɔ ɨngwo yangɔmʉ) ga ɨɓɔ nayɔ ɓɔ: 24«Mʉpananakɨa! Musa a꞉tɨsigio jɛnɛ ɓɔ mombi ɔweni, nɔ, ɔsɨa moi angɔ sɔkʉmʉ ɨnɔta nayɔ, yɔsisekio ɓɔ manye ngɨa ata mwana, ɨmʉnasana, dɔ, ɨmʉnɔtɨa mʉtatamʉsie wangɔ ɓana.
25Ɨnadɔ, ya꞉ɓio ati eso nɔ ɓandambʉ mɛɗɨanɛka, ʉɓa ɓa꞉nɔtanɨa ta ɓʉa mʉnga. Tapio ɔ꞉sɨka moi, nɔ, ɔ꞉wo sɔkɔmʉ ɨnɔta nayɔ pɔ nɔta. Kʉdɔ, ɔ꞉mʉsɨa woko tɨa alɨkɔndɔ lɔ manye ngɨa amujo amʉkɔngʉ. 26Yɔ꞉kyananakɨa nɔ manye ta ngbanga. Ya꞉ɓio kʉ ɓanɨ nɔ gwa ngɨyɔ ɓeetu, nɔ, yɔ꞉sanaka ta ɓanɨ akɔɓɔya ta akɔ gwa ngɨa wɔ mɛɗɨanɛka. 27Ambise ɨɓɔ ɓaɓomu, ɨyɔ moi, ɔ꞉wo tɨa kʉ woni. 28Sina tɨa, akɔ ɓisi ɓɔ jʉkana akɔ ingwo, ɨyɔ moi ngɨananɨ, a꞊ɓio tɨa moi anɨ? Dɔ, ɨɓɔ ɓaɓomu mɛɗɨanɛka, ɓa꞉mʉsɨkaka sɨkakanɨ!»
29Yeso ɔ꞉tɔsio ɓɔ: «Inu, ná꞊sɨa ɨngbaa sɨanɨ, dɔ, nángɔmʉ apemiso Mabii kɔ Asɔɓɨɨ, gʉtʉ pɔ angu ngɨa angɔ. 30Dɔ, ɓisi ngʉɓa ɓombi ngʉɓa ɓa꞉sio ɓa꞉jʉkana sina-ɔɔ akɔ ingwo, sɨkana ati ɔ ɓoi nɔ ɓague, ya꞊ngɔɓio sina ɓata. Yakamɛngana, ɓombi ɓa꞊ɓio sina tɨa ndʉ ɓamalaika ngʉɓa akʉʉ ɔ ɓisi.
31Akʉʉ ɔ yaka ngɨyɛnɛnɨ yɔ jʉkana akɔ ingwo, inu, ná꞉ngɔpopokomʉ ndɨ sina Mabii kɔ Asɔɓɨɨ ɓɔ: 32‹Ɨmɨ akɛ na Asɔɓɨɨ ngɨa Abalaama, Asɔɓɨɨ ngɨa Isaka, nɔ Asɔɓɨɨ ngɨa ɔ Yakɔɓɔ.› Asɔɓɨɨ angɔmʉ Asɔɓɨɨ ɔ ɓombi ngʉɓa ɓa꞉sio, yakamɛngana, Asɔɓɨɨ ɔ ɓombi ngʉɓa ɓa-sɨ kʉɔ.» 33Ambaja ɔ ɓombi ngʉɓa ɓɔ꞉ka yaka ngɨyɛnɛnɨ, yɔ꞉ɓʉmbangɨa nɔgbɛ.
Ʉpanʉ ngʉwa wɔta ʉja ʉwɔkanɨ?
(Mlk 12:28-34; Luk 10:25-28)
34Ɨyɛ Ɓafalisayɔ ɓɔ꞉ka ɓɔ Yeso ɔ꞉gbaiso Ɓasadukayɔ ta gbaiso, ɓɔ꞉mʉmɔmanakɨa ga mɔ mɔ mɔ. 35Mʉngana ati eɓo, ɨya a꞉ɓio bʉbʉma ɔ mapanʉ, ɔ꞉muɓokuo yaka nayɔ apendekio lipindi. 36Ga ɨyɔ nayɔ ɓɔ: «Mʉpananakɨa, ʉpanʉ ngʉwɔ pɛɨ amati ɔ mapanʉ maɓomu, wa ʉwɔkanɨ?»
37Ɔ꞉mutosio ɓɔ: «‹Wa꞊kʉnda Asɔɓɨɨ, Makwɔɓɨɨ ngɨasɔɔ nɔ ipumo yɔ mʉtɨma ngɨyɛsɔɔ iɓomu, nɔ mʉtɨma ngʉwɔsɔɔ uɓomu, nɔ nɨmbɨmbɨanaka ngɨyɛsɔɔ iɓomu. 38Ʉpanʉ ngʉwɔ pɛɨ, nɔ ʉwa wɔta ʉja, ʉwɔnanɨ.› 39Ʉwɔ ɓepini wa ngbanga kʉ nɔ ʉwɔnanɨ, wa ɓɔ: ‹Kʉnda mangɛ, kʉndʉ wakʉndana ʉwɛ, makwɔngɔ.› 40Mapanʉ ngʉka kɔ Musa, nɔ ʉka kɔ magbɛ, itindindi yɔngɔ ɓɔ kpɛ, ya ta mapanʉ kapɨnɨ ngʉkɔnanɨ.»
Klisito a mʉja anagaaka Dawidi
(Mlk 12:35-37; Luk 20:41-44)
41Ndʉ ɨɓɔ Ɓafalisayɔ ɓa꞉ɓio-sɨ ɓamɔmanɨɛ ta ananɨ, ga Yeso naɓɔ ɓɔ: 42«Inu natunguo-sɨ ɓɔ Masia anɨ? Ɓɔ, a꞉chwɛa akɔ ɨfananja ngɨa anɨ?» Kʉdɔ, ɓɔ꞉mutosio ɓɔ: «A꞉chwɛa akɔ ɨfananja ngɨyɔ ngama Dawidi.»
43Yeso ɔɓuɓokuo ɓata ɓɔ: «Yakwa dɔ tɨa tanɨ ɨyɛ Mʉtɨma wɔta Tu, wa꞉titio-ɔɔ Dawidi, asoko Masia ɓɔ Makwɔɓɨɨ, ngbinga ngɨa a꞉sugo-ɔɔ ɓɔ:
44‹Makwɔɓɨɨ a꞉sigio Makwasɛmɨ ɓɔ:
Uwolo akɔ ɨkɔndɔ yɔ guɔngɔ ngɨyɛsɛmɨ,
akɔɓɔya aka na꞊napɨa-ɔɔ ɓamʉyaa ngʉɓɔsɔɔ,
ɨda yɔ napɨa mɨtɨndɨ ngɨyɛsɔɔ.›#popoko Mmb 110:1
45Dawidi ɨyɔ makwɔngɔ anayɔ anisoko ɓɔ ‹Makwɔɓɨɨ›. Masia a dɔ-sɨ tɨa mwana angɔ, nɔ ɨngbaa nga yeno tanɨ?»
46Mombi pɔ mʉngana a꞉mutosiomʉ ɓata yaka. Anɨngwa nɔ ɓisi ngʉɓɔnanɨ, mombi mʉngana a꞉kanio tii ɓata nayɔ aɓokuo yaka.
Currently Selected:
Matayɔ 22: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
