Matayɔ 21
21
Yeso ɔkumonio anɔ Yelusalɛma
(Mlk 11:1-11; Luk 19:28-40; Yɔa 12:12-19)
1Ndʉ, atɨ Yeso ɓa꞉ɓio tɨa tinetine akumonio anɔ Yelusalɛma, ɨbɔ tɨa tinene nɔ Bɛtɛfagɛ, nɔ anɔ ambamba ɔ ɨkpangba yɔ Mijeituni, kʉdɔ, ɔ꞉tʉma ɓakpata ngʉɓangɔ ɓapɨnɨ apɛɨ. 2Nɔ, ɔ꞉ɓusigio ɓɔ: «Seni akɔ ɨkʉmbʉ ngɨyɛ ya apɛɨ eno ayɛ. Inani, nabigbʉka punda, ɨhɔ nɔ mwana ɔngɔ, ɓɔngakɛ. Ɓʉɓookeni, nɔ, nɔ́꞊nɛkɨa naɓɔ iyani. 3Ndʉ mombi aniɓokuo yaka, musigieni ɓɔ: ‹Makwɔɓɨɨ anɔ taa yɔngɔ.› Ta gagaa ngɨananɨ, aninjo eɓo ta ninjo.»
4Ya꞉kyananakɨa ɓanɨ, akɔkpatanakɨa nɔ yaka ngɨyɛ ɨgbɛ Isaya, a꞉sugo jɛnɛ ɓɔ:
5«Sigieni ɓombi ɓɔ ɨkʉmbʉ ngɨyɔ Sayuni ɓɔ:
‹Kanganɨeni! Ngama ngɨyeno anɨka andɛnɔ!
Ɔhuo nɔ majɨɔ, nɔ, anɨka akʉʉ ɔ punda.
Ɓawele akʉʉ ɔ mʉgbɔndɔ ɔ punda, mwana ɔ punda.›»#popoko Jak 9:9
6Kʉdɔ, ɓakpata ngʉɓɔnanɨ ɓa꞉sa, nɔ, ɓɔ꞉kɨa ngbanga ta ndʉ aka Yeso a꞉ɓusigio-ɔɔ ɓɔ ɓɨkɨa. 7Ɓɛ꞉ka nɔ punda ɨhɔ nɔ mwana ɔngɔ kʉtaa. Ɓɔ꞉napioko lɨpʉkʉ ngɨleɓo akʉʉ ɔngɔ, ga Yeso ɓɔ jikomu ananɨ akʉʉ angɔ. 8Ɓombi ɓaja ati ɔ ambaja ngɨananɨ, ɓɔ꞉pʉnga anawaka lɨpʉkʉ ngɨleɓo anɔ ɨngbaa ga wɛnjɛ wɛnjɛ. Nɔ, ɓombi nga ɓɔmɔ akɔkio mɨtapʉ yɔ matɨ, nɔ, nawa kʉ ananɨ anɔ ɨngbaa. 9Ambaja ɔ ɓombi ngʉɓa ɓa꞉ɓio apɛɨ ɔ Yeso, kʉndʉ ʉɓaɓɛ ɓa꞉ɓio ambise, ɓɔ꞉pʉnga nachokoo akɔsugo ɓɔ:
«Hɔjana, Mwana ɔ ngama Dawidi!
Asɔɓɨɨ ukiokio mombi ngɨa anɨka akɔ ino yɔ Makwɔɓɨɨ!
Ʉbɨba akɔ Asɔɓɨɨ akɔ ʉmʉa ngʉwa akʉʉ nɔgbɛ!»
10Ɨyɛ ta Yeso a꞉yɛta mʉtɨndɨ anɔ Yelusalɛma ɓɔ, ga ɓombi ɓaɓomu ɓɔ njataa. Nɔ, ɓɔ꞉pʉnga ɓokuono ɓɔ: «Mombi ngɨa a-sɨ anɨ?»
11Ɓombi ngʉɓa ɓa꞉ɓio amati ɔ ɓambaja, ɓɔ꞉ɓutosio ɓɔ: «Yeso ɨyananɨ, ɨyɔ, a ɨgbɛ ngɨyɛ ɔngwɔ anɔ Najalɛtɨ, amati ɔ ɨkʉmbʉ yɔ Galilaya.»
Yeso ɔkponyo ɓombi ɓɔ magabʉ amati ɔ ɨkáá yɔ Asɔɓɨɨ
(Mlk 11:15-19; Luk 19:45-48; Yɔa 2:13-22)
12Ɨyɛ Yeso a꞉kumonio amati ɔ ɨkáá yɔ Asɔɓɨɨ, inani amati, ɔ꞉kponyo ɓombi ɓaɓomu ngʉɓa ɓa꞉ɓio agabanaka, nɔ ʉɓa, ɓa꞉ɓio akayanakɨa. Ɔ꞉titoko ɓamɛja ngʉɓɔ ɓombi ngʉɓa ɓa꞉ɓio anachoko ɓagyɛgyɛ. Ɔ꞉tɔtitoko kʉ nɔ mawolo ngʉkɔ ɓiga ngʉɓa ɓa꞉ɓio agaba ɓanjua. 13Ga ɨyɔ naɓɔ ɓɔ: «Ya꞉tɛndanakɨa ɓɔ: ‹Ɨkáá ngɨyɛsɛmɨ, ya꞊ɓio ɨkáá yɔ nɨta.› Yakamɛngana, inu, nɔ́ɨnatakanakiso tɨa ɨda yɔ jonokio yɔ ɓombi ɓɔ ndiɓo!»#popoko Isa 56:7; Yel 7:11
14Inani amati ɔ ɨkáá yɔ Asɔɓɨɨ, ɓombi ɓɔ mamɔmɔ, nɔ ɓombi ɓɔ majangi, ɓɔ꞉mɨsɨnganɨa Yeso, nɔ, ɔ꞉ɓuheiso ta heiso. 15Anɨna yaka yɛta ɨmbangɛ ngɨyɛ Yeso a꞉kɨa, nɔ yaka ngɨyɛ ɓana ɓa꞉ɓio anachokoo amati ɔ ɨkáá yɔ Asɔɓɨɨ ɓɔ: «Hɔjana, Mwana ɔ ngama Dawidi!»
Yakamɛngana, yaka ngɨyɛnɛnɨ yɔ꞉jo Ɓakumukumu, ɨhɔ nɔ ɓapananakɨa ɓɔ mapanʉ, amʉtɨma ɓɔ kpe. 16Kʉdɔ, ɓɔ꞉muɓokuo Yeso ɓɔ: «Wangɔ ndɨ anʉka yaka ngɨyɛnɛnɨ ɓana ɓasugo?» Yeso ɔ꞉ɓutosio ɓɔ: «Iii, nanʉka kʉtaa! Inu, nángɔpopoko ndɨ sina Mabii ɓɔ:
‹Amati ɔ monu kɔ ɓana ngʉɓa ɓɔta bele bele, nɔ ɓana ɓɔta kpalakpala,
ʉwɛ, wa꞉chwɛiso ʉbɨba ngʉwɔsɔɔ.›#popoko Mmb 8:3»
17Mbise ɔngɔ, Yeso ɔ꞉ɓʉsɨa, nɔ, ɔ꞉sa yangɔ akwala anɔ Bɛtania.
Yeso ɔgbangɔ ɓʉtɨ ngʉɓa ɓajanga lipumo
(Mlk 11:12-14,20-24)
18Tɨa nekuɓa ngɨyɛnɛnɨ, ɨyɛ ndʉ Yeso a꞉ɓio tɨa atɔwa anɔ Yelusalɛma, ɔ꞉pʉnga tɨa nʉkana taá. 19Ɔ꞉tɛna ɓʉtɨ mʉngana anɔ ambamba ɔ ɨngbaa ɓɔ, nɔ, ɛ꞉sɨngana tinene naɓɔ. Yakamɛngana, sɔkɔmʉ ɨ꞉gbʉka ipumo akʉʉ ɔngɔ pɔ mɛngana, ta manɨ ɓɔ kyɛɛ. Ga ɨyɔ nɔ ɓʉtɨ ngʉɓɔnanɨ ɓɔ: «Gbɔnga! Ndʉ ipumo ya꞊mo sina ɓata akʉʉ asɔɔ, maɓu!» Gbɛgbɛ ta ananɨ, ɓʉtɨ ngʉɓɔnanɨ, ɓɔ꞉maka ta nʉmaka ga waa.
20Angbinga ngɨa ɓakpata ngʉɓɔ Yeso, ɓɛ꞉nɔ-ɔɔ yaka ngɨyɛnɛnɨ, yɔ꞉ɓʉmbangɨa nɔgbɛ. Ɓɔ꞉muɓokuo ɓɔ: «Nɔ ɨngbaa nga yino tanɨ, ɨyɛ ɓʉtɨ ngʉɓa ɓɔ꞉makɔ-ɔɔ ta gagaa ɓanɨ?»
21Yeso ɔ꞉ɓutosio ɓɔ: «Ta ingono, nanenu asigio ɓɔ, ndʉ náɓio nɔ báya, nɔ sɔkɔmʉ nɔ ɓajatuoko amati ɔngɔ, nákwanana akɨa yaka achana ɨyɛ ɨmɨ, nɔ꞉kɨɔ akʉʉ ɔ ɓʉtɨ ngʉɓa. Gʉtʉ pɛngɛ ta ɨkpangba ngɨyɛ, nákwanana nayɔ asigio ɓɔ: ‹Ɗuwonio, nɔ, wɔsa anɨkwa amati ɔ ipuu ɓɔ kyoo!› Nɔ, yɔkyananakɨa ta ɓanɨ. 22Ɨkyɛmʉ iɓomu ngɨyɛ, nɛ́꞊ta Asɔɓɨɨ akʉʉ ɔngɔ nɔ báya, aninjo ɨyɔ injoni.»
Angu ngɨyɔ Yeso anɨka gbanɨ
(Mlk 11:27-33; Luk 20:1-8)
23Yeso ɔ꞉tɔkumonio ɓata amati ɔ ɨkáá yɔ Asɔɓɨɨ. Tɨa angbinga ngɨa a꞉ɓio-ɔɔ apanɨa ɓombi, ɓangama ɓɔ ɓakumukumu, ɨhɔ nɔ ɓatataɓasie ɓɔ Ɓayuda, ɓɛ꞉ka nayɔ aɓokuo ɓɔ: «Yaka iɓomu ngɨyɛ wakɨa ɨpɛ ɓɔ, ya akɔ ʉpanʉ ngʉwɔkanɨ? Nɔ, anɨ akɛ anenjo ɨwɔ?»
24Yeso ɔ꞉ɓutosio ɓɔ: «Ɨmɨ, nanenu aɓokuo kʉ yaka. Nɔ, ndʉ nánatosio, ɨmɨ, nɔnisigio dɔ tɨa ɓɔ nakɔkɨa yaka ngɨyɛnɛnɨ akɔ ʉpanʉ wɔ anɨ. 25Uɓatiso ngʉwɔ Yɔanɨ, wa꞉ngwa-sɨ ɨwɔ gbanɨ? Akʉʉ ɔ ɓisi, ga pɔ ɓɔ wa꞉ngwa atɨ ɓombi?»
Kʉdɔ, ɓa꞉yakanaka akɔsugo ɓɔ: «Ndʉ tasugo ɓɔ, wa꞉ngwa akʉʉ ɔ ɓisi, atɨɓokuo tɨa ɓɔ: ‹Ɛɛ! Dɔtanɨ, ná꞉mʉbayamʉ ɨyɔ?› 26Nɔ, tɔmutosieni ɓɔ, ‹Wa꞉ngwa atɨ ɓombi›, tɨpɛmanɨeni nɔ ambaja ɔ ɓombi ngɨa. Dɔ, itungwio ngɨyeɓɔ ɓaɓomu, ya ɓɔ Yɔanɨ a ɨgbɛ.»
27Kʉdɔ, ɓɔ꞉sa nayɔ atosio ɓɔ: «Tangɔmʉ anɨmbɨa.» Ga Yeso naɓɔ ɓɔ: «Gʉtʉ ɨmɨ, nangɔnisigiomʉ kʉɓanɨ ɓɔ, nakɔkɨa yaka ngɨyɛnɛnɨ nɔ ʉpanʉ wɔ anɨ.»
Yeso enjo isisenio akʉʉ ɔ ɓana ɓegue ɓapɨnɨ
28Yeso ɔ꞉tɔmatɨa ɓata asugo ɓɔ: «Itungwio ngɨyeno, ya tanɨ akʉʉ ɔ isisenio ngɨyɛ ɓɔ? Gue mʉngana, a꞉ɓio nɔ ɓana ɓegue ɓangɔ ɓapɨnɨ. Ɨyɔ gue ngɨananɨ, ɔ꞉musigio mwana ngɨyɔ pɛɨ ɓɔ: ‹Mwana asɛmɨ! Ɓʉɓʉnʉ, sa anɨsaaka akɨa tɛa amati ɔ kʉbaa ɔ mijabibo.› 29Kʉdɔ ɨyɔ, a꞉ɓio nɔ ɨsɛ ɓɔ: ‹Nangɔmʉ anɨsa!› Yakamɛngana, mbise ɔngɔ, ɔ꞉nacho itungwio ngɨangɔ, nɔ, ɔ꞉sa akɨa tɛa ta sanɨ.
30Mbise ɔngɔ, ɨyɔ gue ngɨananɨ, ɔ꞉musigio mwana ngɨyɔmɔ kʉɓanɨ. Ga ɨyɔ gwa ngɨananɨ nayɔ ɓɔ: ‹Iii aba, nabi bini!› Yakamɛngana, mbise ɔngɔ, sɔkɔmʉ ɨ꞉sa.
31Amati ɔ ɓana ɓapɨnɨ ngʉɓɔnanɨ, anɨ akɛ, a꞉kyananakɨa ɓʉkʉnda ngʉɓɔ ɨsɛ?» Ɓɔ꞉mutosio ɓɔ: «Mwana ngɨyɔ pɛɨ.»
Kʉdɔ, Yeso a꞉ɓusigio ɓɔ: «Ta ingono, nanenu asigio ɓɔ, ɓombi ɓɔ lipisa manjanja, ɨhɔ nɔ lɨjangwɛ, ɓa꞊nɨnagaaka sina akumonio amati ɔ Ɓʉngama ngʉɓɔ Asɔɓɨɨ. 32Dɔ, angbinga ngɨa Yɔanɨ ngɨa a꞉tɨɓatisa ɛ꞉ka-ɔɔ nenu apanɨa yaka ngɨyɛ yɔkwananɔ apɛɨ ɔ Asɔɓɨɨ, sɔkɔmʉ inu, nɔ́꞉mʉbaya. Yakamɛngana, tɨa ɓombi ɓɔ lipisa manjanja, ɨhɔ nɔ lɨjangwɛ, ɓa꞉mʉbaya. Gʉtʉ ndʉ inu nɛ́꞉na yaka ngɨyɛnɛnɨ nɔ mesu, sɔkɔmʉ nɔ́꞉necho mʉtɨma, nɔ sɔkɔmʉ nɔ́꞉baya pɔ kʉɓanɨ.»
Yeso enjo isisenio akʉʉ ɔ ɓombi ɓɔ ɨhʉna
(Mlk 12:1-12; Luk 20:9-19)
33«Ʉkeni ɓata isisenio ngayɛmɔ: Mombi mʉngana a꞉hʉna kʉbaa ɔ mijabibo angɔ. Ɔ꞉kunguo kʉbaa ngɨananɨ nɔ aga, nɔ, ɔ꞉mba ʉpɨa wɔ namioko lipumo lɔ mijabibo. Ɔ꞉tuɓoko ɨkáá yɛta ikongo, ayaka yɔ pɛmakɨa kʉbaa. Mbise ɔngɔ, ɛ꞉njo kʉbaa ngɨananɨ alɨkɔndɔ lɔ ɓombi ngʉɓa ɓahʉna mijabibo, nɔ, ɔ꞉sa kyɛnda ga ngo.
34Ndʉ angbinga ɔ buoko masɔɔ a꞉ndana, ɔ꞉tʉma ɓabaya ɓangɔ atɨ ɓombi ɓɔ mahʉna ngʉɓɔnanɨ, asɨka masɔɔ ngʉkangɔ.
35Yakamɛngana, ɨɓɔ ɓombi ɓɔ mahʉna ngʉɓɔnanɨ, ɓɔ꞉fa ɓabaya ngʉɓɔnanɨ. Mʉngana, ɓɔ꞉mʉtio nɔ ɓɛnda ta ɓɔ sɛkɛ, sɛkɛ. Gwa ngɨyɔmɔ, ɓɔ꞉mʉwa ta nɨwa. Ɨyakɛ wɔmɔ ɓata, ɓɔ꞉mʉɓɛnda nɔ makopi. 36Mbise ɔngɔ, ɔ꞉tʉma ɓata ta ɓabaya ngaɓɔmɔ, tɨa ɓaja achana ʉɓa a꞉ɓʉtʉma pɛɨ. Yakamɛngana, ɓɔ꞉ɓʉkyananaka ɓata kʉndʉ ɓa꞉kɨa ʉɓɔ pɛɨ.
37Tɨa amupipio wɔngɔ, ɔ꞉tɔɓʉtʉmɨa tɨta mukpekpe wɔ mwana ata gue ngɨangɔ. Ga ɨyɔ aka ɓɔ: ‹Haya! Ɓa꞊kumo pɛpɛ ɓʉnʉ mwana ngɨasɛmɨ akɛ, ta kumoni.› 38Yakamɛngana, angbinga ngɨa ɨɓɔ ɓombi ɓɔ mahʉna ngʉɓɔnanɨ, ɓa꞉mɨna-ɔɔ mwana, ɓɔ꞉pʉnga yakanaka ɓɔ: ‹Oi, mombi ngɨa a꞊dya mʉgyɛndɔ wɔ maɓɨɨ wɔ lɨkyɛmʉ ngɨlɔ ɨsɛ ɨyananɨ anɨka, tɨmuweni, iɗo ambɔ tɨa isu akɛ, tɨʉdya.› 39Kʉdɔ, ɓa꞉mʉfa ga kwɨ, ɓɔ꞉mʉchwɛiso aɓei ɔ kʉbaa, nɔ, ɓɔ꞉sa nayɔ anɨwa.»
40Yeso a꞉tɔɓokuo tɨa ɓɔ: «Tɨa angbinga ngɨa makwɔ kʉbaa a꞊tɔa sina-ɔɔ kyɛnda ngɨangɔ, a꞊kɨa ɨkananja yɔ ɓombi ngʉɓɔnanɨ tanɨ?» 41Ga ɨɓɔ nɔ Yeso ɓɔ: «Ɓombi ɓɔta ɓɨɓɨ ngʉɓɔnanɨ, a꞊ɓʉmaa sina ta maa. Nɔ, ɔ꞊napɨa tɨa ɓombi ngaɓɔmɔ amati ɔ kʉbaa ngɨananɨ, ʉɓaɓɛ mbise ɔ buoko masɔɔ, ɓakwanana kʉɔ nayɔ aninjo ʉkangɔ.»
42Kʉdɔ, Yeso a꞉ɓutosio ɓata ɓɔ: «Amati ɔ Mabii kɔta Tu, ná꞉ngɔpopoko ndɨ sina ɓɔ:
‹Ikopi ngɨyɛ ɓabʉbʉma ɓɔ lɨkáá ɓa꞉ɨgiso anɔ ambamba,
tɨa ɨyɔ, yɛ꞉ka ikopi yɔ dada nɔgbɛ amuɓumba wɔ ɨkáá.
Ta Makwɔɓɨɨ akɛ, a꞉kɨa ɨkananja yɔ yaka ngɨyɛnɛnɨ.
Akɔ isu, ɨyɛnɛnɨ ya yaka yɛta ɨmbangɛ.›#popoko Mmb 118:22-23
43Nanenu asigio ta aɓʉmba ɓɔ: Ɓa꞊nɨhɨnɨa sina inu Ɓʉngama ngʉɓa Asɔɓɨɨ, nɔ, ɓɔ꞊ɓinjo tɨa lɨfananja ngɨlɛ la꞊kwanana akumo Asɔɓɨɨ. [ 44Mombi muɓomu ngɨa akwɨa ikopi ngɨyɛnɛnɨ, a꞊ɓunjoko ta ɓunjoko. Nɔ, mombi ngɨa ya꞊mʉkwɨa akʉʉ, ya꞊mutio ta ɓɔ sɛkɛ, sɛkɛ.]»
45Ɨyɛ ɓakumukumu, ɨhɔ nɔ Ɓafalisayɔ, ɓɔ꞉ka yaka ngɨyɛnɛnɨ Yeso a꞉sugo, ɓɛ꞉mbɨa ta gagaa ɓɔ enjo lisisenio ngɨlɛnɛnɨ ta akʉʉ eɓo. 46Kʉdɔ, ɓɔ꞉pʉnga tɨta ahata ɨngbaa ngɨyɛ ɓamʉfa-ɔɔ nayɔ. Yakamɛngana, ɓa꞉ɓio akumo tɨa ambaja ɔ ɓombi, dɔ, ɓombi ɓa꞉ɓio asɨka Yeso ndʉ ɨgbɛ ya Asɔɓɨɨ.
Currently Selected:
Matayɔ 21: buuN
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc.
