Mɨkyananakɨa 6
6
Ɓɔchwɔ ɓombi mɛɗɨanɛka akɔ salɨa ɓatitima
1Amati ɔ makwaa ngʉkɔnanɨ, ɓakpata ɓa꞉ɓio akɔnɨka tɨa ɓaja. Ɓayuda ngʉɓa ɓayaka Igiliki#6:1 pɔ ɓɔ, ɓa꞉nɔtanɨa akɔ lɨkʉmbʉ ngalɛmɔ ɓɔ꞉pʉnga yakanakɨa ʉɓa ɓa꞉nɔtanɨa amati ɔ ɨkʉmbʉ, akɔsugo ga, ɓangɔmʉ ɓata aninjo ɓawoko nga ɓeɓo idyo akɔ mʉpaká ngʉwɔ masi maɓomu. 2Kʉdɔ, ɓatitima tɛkɛɓɛ nɔ ɓapɨnɨ, ɓɔ꞉mɔma ambaja ɔ ɓakpata nɔ ɓɔ꞉sugo ɓɔ: «Yangɔmʉ iɗo isu akɔsɨa panɨa ʉpanʉ wɔ Asɔɓɨɨ, akʉʉ ɔ yaka yɔnʉpaka madyo. 3Kʉɓanɨ inu ɓanduku, chweni ɓombi mɛɗɨanɛka ati eno, ʉɓa ɓaɓio nɔ mʉkyananakɨa wɔta uɗo, nɔ, ɓɔhueni nɔ Mʉtɨma wɔta Tu, nɔ nɨmbɨmbɨanaka. Ɓombi ngʉɓɔnanɨ, ta꞊ɓinjo ɨɓɔ tɛa ngɨyɛnɛnɨ, 4iɗo ambɔ tɨ꞊sɨa ngbɨnga ngɨyeso muɓomu tɨta akɔ nɨta, nɔ, panɨa ʉpanʉ wɔ Asɔɓɨɨ.»
5Yaka ngɨyɛnɛnɨ yɛ꞉kataa ambaja ɔ ɓombi ɓaɓomu. Kʉdɔ, ɓɔ꞉chwa Itieni mombi ngɨa a muhue nɔ Mʉtɨma wɔta Tu nɔ báya, nɔ Filipo, nɔ Pɔlɔkɔlɛ, nɔ Nɨkanɔlɔ, nɔ Tɨmɔnɨ, nɔ Palamɛna nɔ Nikola, mombi ɔ ɨkʉmbʉ yɔ Atiokia, ɨya a꞉ɓio ɓɔ ɔkumonieni akɔ ɨtandɛ ngɨyɔ Ɓayuda. 6Kʉdɔ ɓa꞉ɓɨmaiso apɛɨ ɔ ɓatitima, nɔ, ɓatitima ɓɔ꞉ɓɨtɨa Asɔɓɨɨ, nɔ, napɨa lɨkɔndɔ akʉʉ eɓo.
7Ɨsaʉ yɔ Asɔɓɨɨ ya꞉ɓio anɨsɨnganaka tɨta nɔpɛɨ. Mboi yɔ ɓakpata yɔ꞉ɓio anɨsɨnganaka tɨa kʉ nɔ ɨkʉʉ anɔ Yelusalɛma, nɔ, ɓakumukumu ɓaja ɓɔ꞉baya Yeso.
Ɓɔfɔ Itieni
8Asɔɓɨɨ a꞉kiokio Itieni ɨngbaa nayɔ aninjo angu mʉja#6:8 pɔ ɓɔ, angu ngɨyɔ Mʉtɨma wɔta Tu, kʉdɔ, ɔ꞉kɨa yaka yɛta ɨmbangɛ, nɔ ɓakɔkɔ ɓaja ati ɔ ɨfananja yɔ ɓombi. 9Yakamɛngana, ɓague ngaɓɔmɔ ɓɔ꞉mʉnapɨa nɔ ɨbaba. Ya꞉ɓio ɓombi ɓɔ ɨkáá yɔ nɨta, ʉɓa ɓɔ ndiba ngɨa ɓaɓɨmisoko ɓɔ «ɓombi ngʉɓa ɓa꞉chwɛa aɓubaya,» ɨɓɔ ɓa꞉ɓio Ɓayuda ngʉɓɔ Kɨlɛnɛ nɔ Alɛkɨjandɨlɨa nɔ ɓɔmɔ ɓata Ɓayuda ɓɔ Kilikia nɔ Ajia. Kʉdɔ, ɓɔ꞉pʉnga aduduono nɔ atɨ Itieni. 10Yakamɛngana, ɓa꞉nagaaka kɔmʉ Itieni, dɔ, a꞉ɓio ayaka nɔ nɨmbɨmbɨanaka ngɨyɛ Mʉtɨma wɔta Tu wa꞉minjo. 11Kʉdɔ, ɓe꞉njo ɓombi ɓagyɛgyɛ dɔ ɓisugo ɓɔ: «Tɔmʉgbʉkɔ mombi ngɨa anʉngaka yaka yɛta ɓɨɓɨ akʉʉ ɔ Musa nɔ akʉʉ ɔ Asɔɓɨɨ.» 12Ɓɔ꞉pɔpɨa ɓombi, ɨhɔ nɔ ɓatataɓasie, nɔ ɓapananakɨa ɓɔ mapanʉ ɓɔ ɓɨsɨkanaka. Kʉdɔ, ɓɛ꞉ka anɨfa Itieni nɔ ɓɔ꞉sa nayɔ apɛɨ ɔ ubua ngʉwɔ ɨkʉʉ. 13Ɓɛ꞉ka nɔ ɓadɛmʉ ɓɔ mʉjɛɛ asugo ɓɔ: «Mombi ngɨa akyɔsugo suo ta yaka yɛta ɓɨɓɨ akʉʉ Ɨkáá yɔ Asɔɓɨɨ, nɔ akʉʉ ɔ mapanʉ kɔ Musa, masi maɓomu. 14Ta꞉mʉka pɛ asugo ga Yeso ngɨa Mʉnajalɛtɨ, a꞊panja suo ɨkáá yɛta ɨja ngɨa ɔ Asɔɓɨɨ, nɔ, ɔ꞊nataniso gbali ngɨyɔ mapanʉ ngʉka ta꞉sɨka, anɨngwa alɨkɔndɔ lɔ Musa.»
15Ɓombi ɓaɓomu ngʉɓa ɓa꞉ɓio amati ɔ ubua, ɓɔ꞉kanga Itieni ɓɔ ngba ngba ngba, nɔ, ɓɛ꞉na mesu ngʉkangɔ kɔnataneni tɨa ndʉ malaika.
Currently Selected:
Mɨkyananakɨa 6: buuN
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
