Mɨkyananakɨa 5
5
Mʉjɛɛ ngʉwɔ Ananɨa nɔ Safɨla
1Yakamɛngana, ya꞉ɓio nɔ gue mʉngana, ino ɓɔ Ananɨa nɔ moi angɔ Safɨla. Ɨɓɔ, ɓa꞉kɔnɔ akɔgabiso ʉmʉwa ngʉweɓo. 2Ɔ꞉naya ɓagyɛgyɛ ngaɓɔmɔ, akɔ ɨyɔ mambɨnyɔngɔ, nɔ ɔ꞉sa aninjo ʉɓa ɓa꞉tukoo apɛɨ ɔ ɓatitima. Moi angɔ ɛ꞉mbɨa yaka yɔngɔ kʉ ɨmbɨanɨ. 3Kʉdɔ, Pɛtɛlɔ ɔ꞉musigio ɓɔ: «Ananɨa, akʉʉ ɔ yaka yɔ ɨmanɨ ɨyɛ wɔ꞉sɨa-ɔɔ Sɨtanɨ akumonio amʉtɨma ngʉwɔsɔɔ? Wɔ꞉pɛtakɔ Mʉtɨma wɔta Tu pɛtakanɨ, nɔ ɓagyɛgyɛ ngaɓɔmɔ, ʉɓa wa꞉gabiso pɛ naɓɔ kʉbaa, wɔɓʉnayɔ ɓata kʉ naya. 4Kʉbaa ngɨa wa꞉mugabiso pɛ, a꞉ɓiomʉ pɛ asɔɔ-ndɨ? Nɔ mbise ngɨa wa꞉mugabiso pɛ-ɔɔ, ɓagyɛgyɛ ɓɔngɔ ɓa꞉kɔɓiomʉ pɛ ɓɔsɔɔ-ndɨ? Tɨa akʉʉ ɔ yaka yɔ ɨmanɨ ɨyɛ wɔ꞉kwaisio-ɔɔ akɨa ɨkananja yɔ yaka ngɨyɛnɛnɨ? Wɔ꞉pɛtakɔmʉ ɓombi, yakamɛngana, wɔpɛtakɔ ta Asɔɓɨɨ.»
5Ananɨa anʉkɔ yaka ngɨyɛnɛnɨ, ɔ꞉kwa nɔ ingwo gbɛgbɛ ta ananɨ. Ɓombi ɓaɓomu ngʉɓa ɓɔ꞉ka yaka ngɨyɛnɛnɨ, ɓɔ꞉kwa ʉɓá nɔgbɛ. 6Tɨa kʉ ananɨ, ɓana ɓɔ ɓandambʉ ɓɛ꞉ka, nɔ ɓɔ꞉pokoɓoko mʉnda wangɔ nɔ lɨpʉkʉ, ɓɔ꞉mʉtʉmba, nɔ ɓɔ꞉sa nayɔ akɔhʉna.
7Tinetine ndʉ ɓasaa ɓaatʉ ambise ngɨananɨ, moi ɔ Ananɨa e꞉joo ɨyɔ tɨa kʉ ananɨ, sɔkɔmʉ nɔ nɨmbɨa yaka ngɨa ya꞉kɨanɨa pɔ mɛngana. 8Pɛtɛlɔ ɔ꞉muɓokuo ɓɔ: «Anʉngɨa-sɨ, ɨgabʉ ngɨyɛ ná꞉gabiso pɛ nayɔ ʉmʉwa ngʉweno ndɨ ta ɨyayɛ?» Ɔ꞉mutosio ɓɔ: «Ii, ɨyɔ ta ɨyɛnɛnɨ.» 9Kʉdɔ, Pɛtɛlɔ ɔ꞉musigio ɓɔ: «Akʉʉ ɔ yaka yɛmanɨ ɨyɛ ná꞉kɔnɔ pɛ-ɔɔ ɨhɔ akɔkanio Mʉtɨma wɔ Makwɔɓɨɨ? Ʉka, ɓombi ngʉɓa ɓɔ꞉hʉnɔ aɓaʉ ɓa tɨa anɔ umongu, nɔ, ɓɔmanɔ nɔwɛ tɨa kʉ atʉmbaka.»
10Ta gagaa ngɨananɨ, Safɨla ɔ꞉kwa amɨtɨndɨ yɔ Pɛtɛlɔ ga kpruu, nɔ ɔ꞉wo gbɛgbɛ ta ananɨ. Ɓana ɓɔ ɓandambʉ ɓɔ꞉kumonio nɔ ɓɔ꞉mʉgbʉka tɨta mʉnda. Ɓɔ꞉mʉtʉmba nɔ ɓɔ꞉sa nayɔ ahʉna tɨa kʉ anɔ ambamba ɔ swaɨ. 11Ɓombi ɓaɓomu ngʉɓa ɓa꞉baya, nɔ ɓombi ɓaɓomu ngʉɓa ɓɔ꞉ka yaka ngɨyɛnɛnɨ, ɓɔ꞉kwa ʉɓá nɔgbɛ.
Yaka yɛta ɨmbangɛ nɔ ɓakɔkɔ
12Ɓatitima ɓa꞉ɓio akɨa yaka yɛta ɨmbangɛ nɔ ɓakɔkɔ ɓaja ati ɔ ɓombi. Ɓombi ngʉɓa ɓa꞉baya Yeso, ɓa꞉ɓio ɓaɓomu ɨhɔ amati ɔ basa ngɨyɔ Sɔlɔmɔnɔ. 13Mombi pɔ mʉngana nga kɔmɔ ɔ꞉kaniomʉ anɨka ɨhɔ naɓɔ, gʉtʉ ndʉ, ɓa꞉ɓio anɨchwa Ɨsaʉ yɛta ɨɗo akʉʉ eɓo. 14Ambaja ata mʉja ɔ ɓague, nɔ ɓoi, ɛ꞉sɨnganaka abaya Makwɔɓɨɨ nɔ kumonio akɔ ndiba ngɨyeɓo. 15Kʉdɔ, ɓɔ꞉pʉnga anɨka nɔ ɓombi ɓɔ ɓakaɓu, nɔ ɓɔ꞉ɓʉkwaakiso amɨgyɛndɔ akʉʉ ɔ ɓakalagba nɔ lɨbʉbʉ, ambɔ ngbinga ngɨa Pɛtɛlɔ aɓio-ɔɔ achana, muyendu ngʉwangɔ wɨchana gɔ pɔ akʉʉ nganangana ati eɓo. 16Ambaja ata mʉja ɔ ɓombi, a꞉tʉpanakɨa anɨngwa aɓagʉlʉ ngʉɓa ɓa anɔ ambamba ɔ Yelusalɛma, nɔ, ɓɛ꞉ka nɔ ɓombi ɓɔ ɓakaɓu, nɔ ʉɓa mɨtɨma yɔ madu ya꞉ɓʉjɛnganakiso, nɔ ɓɔ꞉ɓuheiso ta ɓaɓomu.
Ɓɔfɔ ɓata Ɓatitima
17Ambise ngɨananɨ, kumukumu ngɨa ata mʉja, ɨhɔ nɔ ambaja ngɨangɔ, ʉɓa ɓa꞉ɓio amati ɔ ɨtandɛ yɔ Ɓasadukayɔ, ɓɔ꞉kwɨa ɓatitima imi tɨa nɔgbɛ, nɔ, ɓɔ꞉pʉnga naɓɔ asagɨa. 18Kʉdɔ, ɓa꞉ɓʉfa nɔ ɓɔ꞉ɓugiso aɨkáá yɔ boloko ngɨyɛ yɛta ɨja. 19Yakamɛngana, naɓutu ngɨananɨ, malaika wɔ Makwɔɓɨɨ ɔ꞉gana mamongu kɔ ɨkáá yɔ boloko, nɔ, ɔ꞉ɓuchweiso ɓatitima aɓei nɔ ɔ꞉ɓusigio ɓɔ: 20«Seni aɨkáá yɔ Asɔɓɨɨ, nɔ, nɔ́ɓɨakɨa ɓombi ɨsaʉ yɔ uɓei ngʉwɔ ɨtakɨtakɨ.» 21Ɓɔ꞉kyananakɨa ʉpanʉ ngʉwɔnanɨ, nɔ, nekuɓa yɛta dɨ ɓɔ꞉kumonio amati ɔ ɨkáá yɔ Asɔɓɨɨ, nɔ, ɓɔ꞉pʉnga panɨa ɓombi.
Kumukumu ngɨa ata mʉja, ɨhɔ nɔ ambaja ngɨangɔ ɓe꞉sokio ubua ngʉwɔ ɨkʉʉ, ɨhɔ nɔ ɓatataɓasie ɓaɓomu ngʉɓɔ Ɓaɨsalaɛlɛ. Kʉdɔ, ɓɔ꞉tʉma ɓombi anɨsa asɨka ɓatitima aboloko. 22Yakamɛngana, ndʉ ɓakʉndatʉma ɓa꞉ɓɔya inani, sɔkɔmʉ ɓɔ꞉gbʉka mombi aɨkáá yɔ boloko. Ɓɔ꞉tɔwa aninjo masaʉ, ga ɨɓɔ ɓɔ: 23«Tɔ꞉gbʉkɔ ɨkáá yɔ boloko ɨdɨkpɛ nɔ ɓapɛmakɨa, ta akɔ lɨda lɔ tɛa ngɨleɓo, apɛɨ ɔ mamongu. Yakamɛngana, isu akɔgana ɓɔ, sɔkɔmʉ tɔ꞉gbʉka mombi pɔ mʉngana amati.»
24Ngbinga ngɨa ɓangama ɓɔ ɓapɛmakɨa ɓɔ ɨkáá yɔ Asɔɓɨɨ, nɔ ɓangama ɓɔ ɓakumukumu ɓɔ꞉ka-ɔɔ yaka ngɨyɛnɛnɨ, ɓɔ꞉mbambanio nɔgbɛ akʉʉ ɔ ɓatitima. Nɔ, ɓɔ꞉pʉnga ɓokwonoko ɓɔ yaka yɔngɔ yapipio tanɨ. 25Mbise bele, mombi mʉngana ɛ꞉ka naɓɔ asigio ɓɔ: «Ɓombi ngʉɓa ná꞉ɓʉfa pɛ, ɓakɔpanɨa ɓombi amati ɔ ɨkáá yɔ Asɔɓɨɨ.»
26Kʉdɔ, ngama ɔ ɓapɛmakɨa a꞉sa ɨhɔ nɔ ɓombi ngʉɓɔnanɨ akɔsɨka ɓatitima. Yakamɛngana, sɔkɔmʉ ɓɔɓʉkɨa nɔ ɓʉkaɓʉkaɨ, dɔ, ɓa꞉ɓio akumo ɓɔ ɓombi ɓa꞉tiɓugisomʉ nɔ makopi. 27Ndʉ ɓɛ꞉ka naɓɔ, ɓɔ꞉ɓɨmaiso apɛɨ ɔ ubua ngʉwɔ ɨkʉʉ. Kʉdɔ, kumukumu ngɨa ata mʉja ɔ꞉pʉnga naɓɔ aɓokwokiso. 28Ɔ꞉ɓusigio ɓɔ: «Ta꞉kɔnɨgbɛma ndɨ pɛ-sɨ nɔ angu ɓɔ sieni akɔpanɨa akɔ ino yɔ mombi ngɨakɛ? Yakamɛngana, inu, nɔ́꞉nanjaniso mapanʉ ngʉkeno anɔ Yelusalɛma tɨta nanjaniso! Nɔ, ná ɓata akʉnda nesu kʉ akɔpakiso mʉkɔmbʉ wɔ menike kɔ mombi ngɨananɨ!»
29Pɛtɛlɔ, ɨhɔ nɔ ɓatitima ɓɔ꞉ɓutosio ɓɔ: «Yɔkwananamʉ isu akumo ɓombi, tɔsia Asɔɓɨɨ! 30Yeso ngɨa ná꞉mʉwa ɨngbaa nayɔ akɔɓakaka akʉʉ ɔ mʉsalaba, Asɔɓɨɨ ngɨa ɔ ɓakuku a꞉mʉjʉkaniso pɔngɔ akɔ ingwo jʉkanisoni. 31Asɔɓɨɨ a꞉muɗetiso akɔ ɨkɔndɔ yɔ guɔngɔ ngɨangɔ, nɔ ɔ꞉mimaiso akɔɓio ngama nɔ muheiso aganɨa Ɓaɨsalaɛlɛ ɨngbaa yɔ nicho mʉtɨma, nɔ nɨpaakɨa ɓʉɓɨɓɨ. 32Isu akɛ, ta ɓadɛmʉ ɓɔ yaka ngɨyɛnɛnɨ, nɔ Mʉtɨma wɔta Tu ngʉwa Asɔɓɨɨ e꞉njo akɔ ɓombi ngʉɓa ɓamukumo, wakɔchwɛa ɓʉdɛmʉ ɓɔngɔ.»
33Ngbinga ngɨa ɓombi ɓɔ ubua ɓɔ꞉ka-ɔɔ yaka ngɨɛnɛnɨ, yɔ꞉ɓʉjʉka ɓʉkaɨ nɔgbɛ, nɔ, ɓɔ꞉hata akɔnɨwa ɓatitima ta nɨwa. 34Yakamɛngana, ya꞉ɓio nɔ Mʉfalisayɔ mʉngana ananɨ ati eɓo ino ɓɔ Gamalɨɛlɛ. A꞉ɓio mʉpananakɨa wɔ mapanʉ, nɔ, ɓombi ɓaɓomu ɓa꞉ɓimukumo. Ɛ꞉maa ananɨ ati ɔ ubuwa, nɔ, ɛ꞉ta ɓɔ ɓichweiso-sɨ ɓatitima aɓei akɔ angbinga bele. 35Kʉdɔ, ɔ꞉sigio ɓombi ɓɔ ubua ɓɔ: «Inu Ɓaɨsalaɛlɛ, kanganakieni ta iɗo akʉʉ ɔ yaka ngɨyɛ náhata akɨa ɓombi ngʉɓa. 36Yangɔchanamʉ makwaa maja aka mombi mʉngana a꞉chwɛanɨa pɔngɔ-ɔɔ, ino ɓɔ Tɛʉda. A꞉sɨkana ndʉ mombi ata mʉja, nɔ ɓombi tinetine ndʉ lɨmɨa ɓɔgɨna ɓɔ꞉mʉkpata. Yakamɛngana, ɨyɛ ndʉ ɓa꞉mʉwa, ɓakpata ngʉɓangɔ ɓɔ꞉panjaa nɔ ɨtandɛ ngɨangɔ yɔ꞉sio tɨa kʉ sioni. 37Ambise angɔ, Yuda Mʉgalilaya ɔ꞉chwɛanɨa ngbinga ngɨa ɓa꞉ɓio-ɔɔ apoo ɓombi. Ɨyɔ, a꞉mɔmaka ambaja ɔ ɓombi ambise angɔ kʉɓanɨ. Ɓɔ꞉mʉwa ɨyɔ kʉ wanɨ, nɔ, ɓakpata ngʉɓangɔ ɓaɓomu ɓɔ꞉nanjana kʉ nanjana. 38Ɨtakɨtakɨ ngɨyɛ, nanenu asigio ɓɔ, nátɨkpatenimʉ ɓata yaka ngɨyɛ ɓombi ngʉɓa, nɔ, ɓʉsieni anisa. Yɔɓieni ɓɔ itungwiyo, ga pɔ yaka ngɨyeɓo yɔchweyeni nɔ ɓombi, ya꞊sio ta sioni. 39Yakamɛngana, tɛa ngɨyɛ ɓakɨa yɔngwaneni nɔ Asɔɓɨɨ, nángɔkwananamʉ nayɔ apanja. Kanganɨeni iɗo, nátɨwamʉ dɔ agbanga nɔ Asɔɓɨɨ-e!»
Ɓombi ɓɔ ubuwa ɓɔ꞉baya yaka ngɨyɛ Gamalɨɛlɨ asugo. 40Ɓe꞉soko ɓata ɓatitima nɔ ɓɔɓuɓendiso pimbo. Ɓɔ꞉ɓinjo ʉpanʉ ga ɓatʉnga tii ɓata ɨkyɛmʉ, akɔ ino yɔ Yeso, mbise ɔngɔ, ɓɔ꞉ɓʉsɨa. 41Ɓatitima ɓa꞉ngwa ananɨ aɨda yɔ ubua nɔ ɨgyagya ɨja, dɔ, Asɔɓɨɨ ɛ꞉na iɗo ɓɔ, ɓɔ꞉kwananɔ anɨdya ɓʉkaɓʉkaɨ, nɔ, yapaka akɔ ino yɔ Yeso. 42Masi maɓomu, ɓa꞉ɓio akɔpanɨa sɔkɔmʉ nɔ bɔmbana, amati ɔ ɨkáá yɔ Asɔɓɨɨ, nɔ lɨkáá ngɨleɓo kʉtaa, nɔ ɓɨakɨa Ɨsaʉ yɛta Iɗo, ɓɔ Yeso a Masia.
Currently Selected:
Mɨkyananakɨa 5: buuN
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
