Mɨkyananakɨa 26
26
Pɔlɔ ɔtosio yaka apɛɨ ɔ Agɨlɨpa
1Agɨlɨpa ɔ꞉sigio Pɔlɔ ɓɔ: «Tɔ꞉nasɨɔ tɨa ʉwɛ, anʉngaka yaka ngɨyɛsɔɔ.» Kʉdɔ Pɔlɔ ɔ꞉yomo ɨkɔndɔ nɔ ɔ꞉pʉnga atɔsio ɓɔ: 2«Ʉwɛ ngama Agɨlɨpa, ɓʉɓʉnʉ ɨmɨ, nanɔ ɨgyagya apɛɨ asɔɔ anʉngaka yaka ngɨyɛ Ɓayuda, ɓa-ɔɔ nɛmɨ achɔngɨa. 3Dɔ ʉwɛ, wanɨmbɨa ɓagbali, nɔ ɗuɗuono iɓomu ngɨyɛ Ɓayuda iɗo nɔgbɛ. Tɨa kʉɓanɨ, nɔnɛtɔ ɓɔ anʉka ɓaka-sɨ ta ɓɔ pisi.
4Ɓayuda ɓaɓomu ɓanɨmbɨa uɓei ngʉwɔsɛmɨ anɨngwa ta nɔ ɨɓwana. Dɔ ɨmɨ, na꞉ɓio ngbinga ngɨananɨ anɔ Yelusalɛma ati ɔ ɨfananja ngɨyɛsɛmɨ. 5Ɓanɛmbɨa iɗo anɨngwa kʉ ɨjɛnɛ, yɔɓieni ɓɔ ɓakʉnda nʉnga ingono. Ɓanɨmbɨa ɓɔ na꞉ɓio mʉngana amati ɨtandɛ yɛta ɓʉkaɓʉkaɨ ngɨyeso yɔ Ɓafalisayɔ. 6Ɨnadɔ, tɨa ɨtakɨtakɨ ngɨyɛ, ɓanɛmɨ achɔngɨa, dɔ, na꞉napɨana mʉtɨma akʉʉ ɔ yaka ngɨyɛ Asɔɓɨɨ a꞉panaka ɓakuku, ɓɔ ya꞊kyananakɨa sina, kyananakɨanɨ. 7Lɨfananja tɛkɛɓɛ nɔ ɓepini ngɨleso lakyananakɨa Asɔɓɨɨ nɔ kɛkɛɛ, naɓutu nɔ musoti, dɔ ɓanɔ itungwio anɨna yaka ngɨyɛ Asɔɓɨɨ a꞉panaka jɛnɛ, tɨa akyananakɨa. Ɛɛ ngama, ya akʉʉ ɔ itungwio ngɨyɛnɛnɨ, ɨyɛ Ɓayuda, ɓɔnapɨo-ɔɔ nɔ mʉkɔmbʉ. 8Inu Ɓayuda, nákyɔsɨka-sɨ ndʉ yaka yɛta ɓʉmʉ nɔgbɛ, Asɔbɨɨ ajʉkaniso ɓombi ngʉɓa ɓa꞉sio akɔ ingwo, dɔtanɨ? 9Ɨmɨ ingainga, na꞉ɓio jɛnɛ akʉnda yanakiso yaka ngɨyɔ Yeso ngɨyɔ Najalɛtɨ ta yanakiso, nɔ lɨngbaa ta lɨɓomu. 10Yaka ngɨyɛ na꞉kɨa anɔ Yelusalɛma, iyɔ, ɨyɛnɛnɨ. Ɓangama ɓɔ ɓakumukumu ɓa꞉nenjo ʉpanʉ, kʉdɔ na꞉fa ɓombi ɓaja ngʉɓa ɓa꞉baya Yeso aboloko, nɔ, nɔ꞉ɓʉɓɛndɨa kʉɔ matindi, angbinga ngɨa ɓa꞉ɓio-ɔɔ akio mʉkɔmbʉ ngʉweɓo, nɔ naɓɔ amaa. 11Na꞉ɓisa nɔ machaa naɓɔ akyananaka amati ɔ lɨkáá lɔ nɨta ngɨlɔ Ɓayuda. Nɔ꞉ɓʉkyananaka ɓʉmʉ ɓʉmʉ ɓɔ dɔ ɓɨtata báya. Akʉʉ ɔ mʉtɨma wɔ ʉnganga ngʉwɔsɛmɨ, na꞉ɓisa naɓɔ akyananaka aɓɔya tɨa kʉ akɔ ɓagʉlʉ ngaɓɔmɔ.»
Pɔlɔ ɔngakɔ yaka akʉʉ ɔ necho mʉtɨma
12«Akʉʉ yaka ngɨyɛnɛnɨ, ɓangama ɓɔ ɓakumukumu ɓa꞉nenjo ʉpanʉ nɔ tɛa anɨsa anɔ Damasɛkɛ. 13Ɛɛ ngama! Ya꞉ɓio ɨpá nɔ musoti ɨmɨ tɨta anɔ ɨngbaa, kʉdɔ, nɛ꞉na ʉwanga akɔjɛa ɓɔ ngelengele anɨngwa akʉʉ ɔ ɓisi, wɔnakungueni ɨhɔ nɔ ɓombi ngʉɓa ta꞉kyɛnda naɓɔ. 14Isu ɓaɓomu tɔ꞉kwa ɛsɨ, nɔ꞉ka iso mɛngana nɔ Ibelenia nɛmɨ asigio ɓɔ: ‹Saulo, Saulo wanɛmɨ akyananaka akɔ ɨmanɨ? Ya ɓʉtʉʉ ʉwɛ, akɨa mʉtʉ wɔta ɓumu ngbanga ndʉ ngɔmbɛ ngɨa angɔkumomʉ mʉɗanga ngʉwɔ makwangɔ.› 15Kʉdɔ, nɔ꞉ɓokuo ɓɔ: ‹Makwɔɓɨɨ-ɛɛ, ʉwɛ, wa-sɨ anɨ?› Makwɔɓɨɨ ɔ꞉natosio ɓɔ: ‹Ɨmɨ, na Yeso ɨyakɛ, wanayɔ akyananaka.› 16Yakamɛngana, ɔ꞉ngwa-pɨ ɨkʉʉ, nɔ, wɛmaa. Dɔ, na꞉nachwɛanɨa pɔngɔ dɔ nakʉnda ɓɔ ɓio baya asɛmɨ. Wabi aɓɨakɨa ɓangɛ yaka ngɨyɛ wɔ꞉nɛnɔ-ɔɔ ɓʉɓʉnʉ, nɔ ɨyɛmɔ, na꞊napana suo mbise. 17Na꞊naɓwanakiso alɨkɔndɔ lɔ Ɓayuda ɓwanakisoo, nɔ, alɨkɔndɔ lɔ ɓombi ngʉɓa ɓangɔmʉ Ɓayuda, ʉɓa, aki na꞊natʉma suo-ɛɛ. 18Nanɔwɛ atʉma anɨsa naɓɔ agana mesu, nɔ naɓɔ, achwɛiso anɨngwa amati ɔ umomo, nɔ, akumonio aɓisi ɓɔta ɓʉyɛ, naɓɔ achwɛiso anɨngwa aɓʉngama ngʉɓɔ Sɨtanɨ, nɔ, akumonio aɓʉngama ngʉɓɔ Asɔɓɨɨ. Dɔ, ɓɔnabayeni ɨmɨ, ɓaɓɨpaakɨa ɓʉɓɨɓɨ ngʉɓeɓo ɨpaakɨanɨ, nɔ ɓɛnɨanɨa nɔ ɨda ati ɔ ɓombi ngʉɓa Asɔɓɨɨ a꞉ɓʉchwa.»
Pɔlɔ ɔngakɔ yaka akʉʉ ɔ tɛa ngɨangɔ
19«Ya ɓanɨ ngama Agɨlɨpa, nangɔkwanana jɛnɛmʉ akɨa mʉtʉ wɔta ɓʉmʉ akʉʉ ɔ yaka ngɨyɛ nɛ꞉na anɨngwa akʉʉ ɔ ɓisi. 20Na꞉pʉnga-sɨ aɓɨakɨa Ɨsaʉ yɔ nacho mʉtɨma nɔ baya Asɔɓɨɨ, ta akɔ ɓombi ngʉɓa ɓɔ Damasɛkɛ, nɔ ʉɓa, ɓɔ Yelusalɛma. Mbise ngɨananɨ, yɛka tɨa ʉɓa, ɓɔ Yudɛa muɓomu, apipio tɨa nɔ ɓombi ngʉɓa ɓangɔmʉ Ɓayuda. Na꞉ɓʉngakɨa ɓɔ yɔkwananɔ ɓɔ ɓinecho mʉtɨma, nɔ, ɓɨsɨa ɓʉɓɨɓɨ, nɔ, ɓɨpananiso nɔ mʉkyananakɨa ɓɔ ɓa꞉necho mʉtɨma nechoo. 21Ya akʉʉ ɔ yaka ngɨyɛnɛnɨ ɨyɛ, Ɓayuda ɓa꞉nafa-ɔɔ ɨmɨ, amati ɔ ɨkáá yɔ Asɔɓɨɨ, nɔ, ɓɔ꞉hata nɛmɨ anɨwa. 22Yakamɛngana, Asɔɓɨɨ a꞉napɛmakɨa pɛmakɨanɨ, aɓɔya kʉndʉ ɓʉɓʉnʉ. Dɔ ɨmɨ na-sɨ kʉɔ, akɔ uɓei, aɓɨakɨa Ɨsaʉ ngɨyɔ Yeso akɔ ɓombi ɓaɓomu ngʉɓa ɓɔta ɓakpɔkpɔ, nɔ ʉɓa, ɓɔta bele bele. Nangɔmʉ anʉngaka yaka ngayɛmɔ di, nɔ yaka ngɨyɛ magbɛ, nɔ Musa ɓa꞉ngaka jɛnɛ pɛɨ ɓɔ, ya꞊kyananakɨa sina. 23Yasugo ɓɔ Masia a꞊dya ɓʉkaɓʉkaɨ, nɔ a꞊ɓio mombi ɔ pɛɨ akɔjʉkana akɔ ingwo. Nɔ aɓɨakɨa ʉwanga ngʉwɔ ɓʉhɛa akɔ ɨfananja ngɨyeso, nɔ tɨa kʉ akɔ ɓombi ngʉɓa, ɓangɔmʉ Ɓayuda.»
Pɔlɔ ahata ɓɔ Agɨlɨpa ɨnacho mʉtɨma
24Ndʉ Pɔlɔ a꞉ɓio ayaka tɨa ɓanɨ, Fɛsɛtɔ, ɔ꞉mʉnatɨa ɓɔ: «Wanɔ ɓamu, ʉwɛ Pɔlɔ ngɨa! Balʉa ata mʉja ngɨa wa꞉miyo a꞉nakwiso ɓamu!» 25Pɔlɔ ɔ꞉tɔsio ɓɔ: «Nangɔmʉ nɔ ɓamu, ngama Fɛsɛtɔ. Yaka ngɨyɛ nanʉngaka, ya ingono, nɔ ya nɔ ɨsɛ yɔngɔ. 26Ngama Agɨlɨpa, nanʉngaka yaka ngɨyɛ apɛɨ asɔɔ aka, nɔ lɨngbaa lɔngɔ, dɔ ʉwɛ ngama, wanɨmbɨa iɗo. Nanɨmbɨa iɗo ɓɔ wa꞉ɨpaamʉ pɔ mɛngana, dɔ, ya꞉kyananakɨamʉ aɓaɗi. 27Ngama Agɨlɨpa, wakyɔbaya ndɨ kʉɔ yaka ngɨyɛ magbɛ kɔ Asɔɓɨɨ ka꞉ngaka jɛnɛ? Nanɨmbɨa iɗo ɓɔ wakyɔbaya bayanɨ.» 28Kʉdɔ, Agɨlɨpa ɔ꞉sigio Pɔlɔ ɓɔ: «Wa ndɨ atungʉo ga wanataniso ɨmɨ, aɓio muklisito ta akɔ angbinga bele ɓɔ?» 29Pɔlɔ ɔ꞉tosio ɓɔ: «Yiɓio anɨta angbinga bele kʉndʉ mʉja, ɨmɨ, nanɨta Asɔɓɨɨ ɓɔ ʉwɛ, nɔ inu ɓombi ngʉɓɔmɔ ɓaɓomu, ʉɓa, nánɛmɨ anʉka ɓʉɓʉnʉ, anatana ngbanga kʉndʉ ɨmɨ na aka, asɨa ta ɓaselengeni ngʉɓa nanaɓɔ aɓɛ.»
30Kʉdɔ, ngama Agɨlɨpa, nɔ ngama ɔ ihoi, nɔ Bɛlɛnɨkɛ, nɔ ɓombi ɓaɓomu ngʉɓa ɓa꞉ɓio ɨhɔ naɓɔ, ɓɛ꞉maa. 31Ɨyɛ ndʉ ɓa꞉ngwa, ɓɔ꞉pʉnga yakanaka ati eɓo akɔsugo ɓɔ: «Mombi ngɨa ɔ꞉kɨɔmʉ ɨkyɛmʉ pɔ mɛnga ɨyɛ, yɔsisekio nɔ ingwo ga pɔ nɨfanɨa.» 32Agɨlɨpa ɔ꞉sigio Fɛsɛtɔ ɓɔ: «Mombi ngɨa etenimʉ pɛngɛ anɨsa apɛɨ ɔ ngama ngɨa ata mʉja, ambɔ tɔmuɓoo aboloko ɓooni.»
Currently Selected:
Mɨkyananakɨa 26: buuN
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
