Mɨkyananakɨa 27

Ɓɔchaniso Pɔlɔ anɔ Lɔma

1Ndʉ ngbinga ngɨa ɓa꞉kwaisio-ɔɔ ɓɔ tanɨsa tɨta anɔ Italia, amati ɔ amasʉa wɔ mipo ɔ꞉ndana, kʉdɔ, ɓe꞉njo atɨ Pɔlɔ ɨhɔ nɔ mikpekpe yɔ ɓombi ɓɔ boloko ngaɓɔmɔ, alɨkɔndɔ lɔ Yulio. Ɨyɔ, a꞉ɓio ngama ɔ ɓasʉda, amati ɔ ambaja ɔ ɓasʉda ngɨa ɓa꞉ɓimisoko ɓɔ Ambaja ɔ Ngama ata mʉja ɔ Lɔma. 2Kʉdɔ, ta꞉ɗeto masʉa wɔ mipo ngʉwa wa꞉ngwa anɔ Adalamatɨ, anɨsa mesu aliso lɔ ɓalisini ngʉɓɔ ihoi yɔ Ajia. Alɨsɨtalakɨ mombi ɔ Makedonia anɨngwa agʉlʉ ngɨyɔ Tɛsalɔnɨka, a꞉kyɛndaka tɨa kʉ ɨhɔ nesu. 3Nekuɓa yɔngɔ, tɔ꞉fɔma anɔ Sɨdɔna. Yulio ngɨa a꞉ɓio nɔ mʉtɨma wɔ majɨɔ nɔ Pɔlɔ, ɔ꞉mʉsɨa anɨsa anɨnana nɔ ɓawai ɓangɔ, dɔ, ɓɨmʉkyananakɨa kʉɔ kyɛnda. 4Ambise ngɨa ta꞉ngwa-ɔɔ ananɨ, tɔ꞉pʉnga kpata tɨta mutii wɔ uji ngʉwɔ Kipulo, dɔ, mahuo ka꞉ɓio ahuo apɛɨ eso ɓʉmʉ nɔgbɛ. 5Tɔ꞉tapʉa nesini ngɨa ata mʉja tinene nɔ Kilikia, nɔ Pamufilia, kʉdɔ tɔ꞉ɓɔya anɔ Mila ɨkʉmbʉ mɛngana yɔ Lɨkɨa. 6Inani, ngama ɔ ɓasʉda ngɨananɨ ɔ꞉tɔgbʉka masʉa wɔ mipo ngʉwa wa꞉ngwa anɔ Alɛkɛjandɨlɨa, anɨsa anɔ Italia, kʉdɔ, ɔ꞉tɨɗetiso amati ɔngɔ.

7Amati ɔ makwaa maja tɔ꞉tapʉa ta ɨgyɛtɛ, nɔ ɓukpukukpuku nɔgbɛ akɔɓɔya agʉlʉ ɔ Kɨnɨdɔ. Mahuo ka꞉tɨsɨamʉ ɓata anɨsa ɗu nɔ ʉgbaa ngʉwɔnanɨ, kʉdɔ, tɔ꞉chana tɨa nɔ mʉdʉʉ wɔ uji ngʉwɔ Kɛlɛtɛ, nɔ ʉgbaa wɔ kpomu ɔ Salamɔnɨ. 8Ambise ɔ ɓukpukukpuku ɓanɨ amutii wɔ lisini ngɨananɨ, tɔ꞉tɔɓɔya tɨa aʉmʉwa mʉngana ino ɓɔ Isó yɛta Iɗo, tinetine nɔ gʉlʉ ɔ Lasɨa.

9Makwaa ka꞉ɓio ɓɔ kɔchaneni tɨa maja, nɔ ɨyɛ, ta꞉ɓio tɨa anɨsa nɔ masʉa wɔ mipo, tɛ꞉na ingwo tɨta tinene, dɔ, ngbinga ɔ taa idyo a꞉ɓio tɨa ɓɔ ɔ꞉chaneni chananɨ.#27:9 pɔ ɓɔ, ɓisi ɓɔ nɨpaakɨa ɓʉɓɨɓɨ nɔ angbinga ngɨa mahuo kɔta ɓʉmʉ kachana-ɔɔ anesini nɔ kyɛnda nɔ masʉa yɛka tɨa ɓʉkaɨ Kʉdɔ Pɔlɔ ɔɓusigio ɓɔ: 10«Ɛɛ, inu ɓague! Yanɛmɨ anɨnɨa ndʉ kyɛnda ngɨyɛ, ya꞊nɨsa nesu ɓɨɓɨ. Nɔ, tɛyekieni kɔmʉ, masʉa wɔ mipo, ɨhɔ nɔ ɓayaka ngʉɓa ɓa amati, ɓa꞊yanaka kʉ yanakanɨ.» 11Yaka ngɨyɛnɛnɨ Pɔlɔ a꞉sugo, sɔkɔmʉ ngama ɔ ɓasʉda ɨbaya, yakamɛngana, ɔ꞉ka ta ɨyɛmakwɔ ɔ masʉa, ɨhɔ nɔ mombi ngɨa a꞉tɨʉkyɛndakiso ɓa꞉sugo. 12Ɨnadɔ, isó ngɨyɛnɛnɨ, Ya꞉ɓiomʉ iɗo achaniso ngbinga ɔ sɛsʉ ananɨ. Kʉdɔ, ɓʉjanana ɓɔ ɓombi ngʉɓa ɓa꞉ɓio amati ɔ masʉa ɓa꞉kwaisio anɨgwa ananɨ. Ɓa꞉ɓio akʉnda aɓɔya gɔ pɛngɛ anɔ Foiniki ɨya a꞉ɓio isó yɔ lisini mɛngana yɔ uji ngʉwɔ Kɛlɛtɛ, ɨya, a꞉tɨkanga mesu nɔ ʉgbaa wɔ mʉdʉʉ, nɔ ʉwɔ ɨkʉʉ.

Mahuo kɔta ɓɨɓɨ kɔhuo alisini

13Ɨyɛ mwana ɔ mahuo bele a꞉pʉnga huo anɨngwa amʉdʉʉ, kʉdɔ, ɓɛ꞉na iɗo akɨa yaka ngɨyɛ ɓa꞉ɓio ɓɔ ɓɔkwaisieni. Ɓɔ꞉nguso ikopi ngɨyɛ ɓɛ꞉maiso nayɔ masʉa,#27:13 pɔ ɓɔ ʉndɔmʉ ikopi ngɨyɛ ɓaijiso alisini akɔnimaiso masua wɔ mipo nɔ, ɓɔ꞉pʉnga anɨsɨnganaka tɨta nɔ mutii wɔ lisini ngɨyɔ Kɛlɛtɛ. 14Yakamɛngana, ta gagaa ngɨananɨ, mahuo mʉngana kɔ angu nɔgbɛ, ʉka, ɓakisoko ɓɔ mahuo wɔ ɨkʉʉ, nɔ aki ɨpá yachwʉchwaka-ɛɛ, ʉka, ka꞉ngwa nɔ ʉgbaa mesu auji. 15Masʉa wɔ mipo wɔ꞉hingo sɔkɔmʉ adaa ngɨa wachɨngbɨa-ɔɔ mahuo, kʉdɔ, tɔ꞉sɨana anɨsa tɨa kʉ nɨsa. 16Tɔ꞉chana nɔ mʉdʉʉ wɔ mwana ɔ uji mʉngana ino ɓɔ Kauda, ʉwa, wa꞉nangyo mahuo ngʉkɔnanɨ bele. Ta꞉kɨa tɨa angu, aɓwanakiso mwana ɔ ɨngbɔɔ ata bele ngɨa wɔ isingo. 17Mbise ngɨa ɓombi ɓɔ tɛa ɓa꞉maya-ɔɔ mwana ɔ ɨngbɔɔ ngɨananɨ amati ɔ masʉa ɓanɨ, ɓɔ꞉sangaka masʉa nɔ miki ngɨyɛ yɔ isingo. Ɓɔ꞉pʉnga nɨkwa ʉɓá, ga dɔ, ɓatɨsamʉ ɓaka tɨa adʉana angʉpa ɔ sasaɨ amutii wɔ Sɨlɨtɨ#27:17 pɔ ɓɔ, ino yɔ ɨkʉmbʉ mɛngana amati ɔ ɨkʉʉ yɔ Aflika. Kʉdɔ, ɓɔ꞉giso igbiti yɔ mʉkɔkʉ alisini, nɔ, ɓɔ꞉sɨana mahuo naɓɔ atutuo. 18Ndʉ mahuo ka꞉tiyongo tɨa nɔ angu nɔgbɛ, kʉdɔ, nekuɓa yɔngɔ ɓɔ꞉pʉnga giso ɓayaka ngʉɓa ɓa꞉ɓio amati ɔ masʉa alisini. 19Tɨa aɓisi ɓɔ kaatʉ ɓɔngɔ, tɨta ɨɓɔ, nɔ lɨkɔndɔ ngɨleɓo, ɓɔ꞉giso tɨa kʉ nɔ lɨkyɛmʉ lɔ tɛa lɔ masʉa. 20Amati ɔ makwaa maja sɔkɔmʉ ɨpá anɨnɨa, pɔ ndata, nɔ, mahuo kɛ꞉ka tɨta nɨka. Itungwio ngɨyɛɓɔ tahɛya ɓata kʉɔ, ya꞉ɓio tii pɔ bele.

21Amati ɔ makwaa maja, anɨ dɔ ɓata adya ɨkyɛmʉ ati ɔ ɓombi ngʉɓa ɓa꞉ɓio amati ɔ masʉa. Kʉdɔ, Pɔlɔ ɛ꞉maa ati eɓo, ga ɨyɔ naɓɔ ɓɔ: «Ɛɛ inu ɓague, Nɔ꞉keni pɔngɔ yaka ngɨyɛ na꞉sugo, ambɔ ta꞉ngwamʉ pɛ anɔ Kɛlɛtɛ. Nɔ ambɔ, ta꞉kumoniomʉ amati ɔ ɓʉkaɓʉkaɨ, nɔ, ɓayaka akɔyangaa ɓapɛ ɓɔ. 22Yakamɛngana, ɨtakɨtakɨ ngɨyɛ, nɔnɨtɔ tɨa asɨka mʉtɨma wɔ iguegue, dɔ mombi pɔ mʉngana angɔmʉ aniwo ati eno aka, ta masʉa wɔ mipo nangana wa꞊yanaka. 23Ɓʉɓʉnʉ naɓutu, Asɔɓɨɨ ngɨa ɨmɨ na lɨkyɛmʉ langɔ, nɔ ɨya, nanayɔ akyananakɨa ɔ꞉natʉmɨɔ malaika ngʉwangɔ. 24Nɔ, ɔ꞉nasigio ɓɔ: ‹Watɨnamʉ ʉɓá Pɔlɔ, yɔkwananɔ ʉwɛ, anijoo-sɨ ta apɛɨ ɔ ngama ata mʉja ngɨyɔ Ɓalɔma. Kʉɓanɨ, Asɔɓɨɨ a꞊pɛmakɨa uɓei wɔ ɓombi ɓaɓomu ngʉɓa nakɔtapʉa naɓɔ ta pɛmakɨanɨ. Ɨyɛnɛnɨ, ya akʉʉ ɔ ɨjɨɔ ngɨangɔ, akʉʉ asɔɔ.› 25Inu ɓague, ɓieni nɔ mʉtɨma wɔ iguegue, dɔ, nanɔ báya akɔ Asɔɓɨɨ ɓɔ ya꞊kyananakɨa ngbanga ta ndʉ aka ɓɔ꞉nasigio pɛngɛ-ɔɔ. 26Yakamɛngana, mahuo kɔtigiso pɛpɛ-sɨ amutii wɔ uji mʉngana ɓɔ, ta gisoni.»

27Ya꞉ɓio tɨa naɓutu ɔ tɛkɛɓɛ nɔ ɓɔgɨna anɨngwa aka mahuo ka꞉pʉnga jɛnɛ-ɔɔ nesu ayenganakiso amati ɔ lisini ata mʉja ngɨyɔ Meditelania. Ati ɔ gʉndʉ ɓombi ɓɔ tɛa ɓɔ masʉa wɔ mipo, ɓɛ꞉na ndʉ ɓa꞉ɓio tɨa tinene anijoo amutii wɔ ɨtaka. 28Kʉdɔ, ɓa꞉sanga uko mʉngana nɔ muki, ɓɔ꞉ugiso alisini. Ɨyɛ ndʉ ɓa꞉sɨa muki ajio, ɓɛna ɓɔ ɓuɗuɗu ɓɔ lisini ɓa tɨa mɛtɛlɛ ɓatɛkɛɓɛ ɓaatʉ nɔ mɛɗɨanɛka. Ɓɔ꞉sa mwana ɔngɔ nɔ pɛɨ, ɓa꞉sia ɓata muki ajio, ɓɛ꞉na ɓɔ ɓuɗuɗu ɓa tɨa ɓatɛkɛɓɛ ɓapɨnɨ nɔ ɓɛgɨna. 29Ɓa꞉kɨa ɓanɨ dɔ ɓa꞉ɓio akumo ɓɔ masʉa wɔ mɨpo watɨdʉanamʉ ɓaka nɔ makopi kɔta makpɔkpɔ. Kʉdɔ, ɓɔ꞉giso ligbiti lɔ makɔ lɛta lɨkpɔkpɔ ɓɔgɨna ambise ɔ masʉa, akanio nawɔ anɨmaiso. Ɓɔ꞉pʉnga ɓɛtɨa ɓɔ ɓisi ɓʉya gɔ gagaa. 30Ananɨ, ɓombi ɓɔ tɛa ɓɔ masʉa ɓɔ꞉pʉnga ahata nujo, nɔ hɛyaka, kʉdɔ, ɓɔ꞉diso mwana ɔ ɨngbɔɔ ngɨa ata bele alisini. Ta nɔ ɓakaɨ ga ɓakʉnda giso ligbiti lɔ makɔ ngalɛmɔ apɛɨ ɔ masʉa. 31Yakamɛngana, Pɔlɔ ɔ꞉sigio ngama ɔ ɓasʉda ɔ Ɓalɔma, nɔ, ɓasʉda ngʉɓɔmɔ ɓɔ: «Ɓague ngʉɓa ɓɔɓienimʉ ta iyani amati ɔ masʉa nángɔkwananamʉ, ahɛa.» 32Kʉdɔ, ɓasʉda ɓɔ꞉kio miki ngɨyɛ ɓa꞉sanga nayɔ mwana ɔ ɨngbɔɔ ngɨyɛnɛnɨ akɔ masʉa, nɔ, ɓɔ꞉ɨsɨa ahingo.

33Tɨa tinene ɓisi ahata nʉya, Pɔlɔ ɔ꞉ɓʉndɨanɨa ɨɓɔ ɓaɓomu ɓɔ: «Inu ɓague, dyakakeni ɓaka-sɨ tɨa dyakakanɨ, dɔ ɓʉɓʉnʉ makwaa ka tɨa tɛkɛɓɛ nɔ ɓɔgɨna, aka ná꞉pʉnga pɔngɔ-ɔɔ ɓɛtɨa, sɔkɔmʉ anɨdya ɨkyɛmʉ. 34Dyakakeni gɔ-sɨ inu tɨa kʉ dyakakanɨ, dɔ, natiwenimʉ. Mombi mʉngana ati eno, angɔyanakiso pɔ undii mʉngana wɔ mʉtʉ ngʉwangɔ.» 35Ambise ɔ nʉnga yaka ngɨyɛnɛnɨ, Pɔlɔ a꞉sɨka mʉkatɨ, nɔ, ɔ꞉tosio Asɔɓɨɨ ʉbɨba apɛɨ eɓo ɓaɓomu, ɔ꞉uɓundo, nɔ, ɔ꞉pʉnga dyakaka. 36Ɓombi ɓaɓomu ɓɔ꞉sɨka mʉtɨma wɔ iguegue, nɔ, ɓɔdyakaka tɨa kʉ dyakakanɨ. 37Isu ɓaɓomu amati ɔ masʉa, taɓio ɓombi lɨmɨa ɗepini nɔ ɓatɛkɛɓɛ mɛɗɛanɛka nɔ mɛɗɨa. 38Ngbinga ngɨa mombi nɔ mombi a꞉mwɔta-ɔɔ, ɓɔ꞉giso nganɔ alisini anikiso masʉa ɓɔ fokofoko.

Masʉa wɔjiokio amipo

39Ndʉ ɓisi ɓɔ꞉ya, ɓombi ɓɔ tɛa ɓɔ masʉa, ɓɛ꞉mbɨamʉ mutii wɔ ɨtaka. Yakamɛngana, ɓɛ꞉na ta indu yɔ lisini mɛngana ngɨyɛ, ya꞉ɓio nɔ sasaɨɨ amuti wɔngɔ. Dɔ, ya꞉ɓio anɨtanɨa ɓɔ ɓeneni ɓafɔmiso masʉa inani. 40Ɓɔ꞉tɨna miki ngɨyɛ ɓajiiso nayɔ ikopi yɔ makɔ, nɔ, ɓɔ꞉lɨsɨa amati ɔ mipo. Ɓɔ꞉ɓooko kʉ nɔ miki yɔ ɓakafɨ ngʉɓa ɓa꞉ɓio ayomoko masʉa.#27:40 pɔ ɓɔ, ɓakɔsɔ ngʉɓa ɓakipuyo naɓɔ ɨngbɔɔ Kʉdɔ, ɓɔ꞉ɗetiso ʉgbaa wɔ ɨpʉkʉ wɔta ʉja, apɛɨ ɔ masʉa, dɔ, mahuo kuututuo, nɔ, ɓɔpʉnga nɨsa nɔ ʉgbaa wɔ indu yɔ lisini ngɨyɛnɛnɨ. 41Yakamɛngana, ɓɔ꞉tɔɓɔya akɔ ɨda ngɨyɛ masʉa wa꞉fana-ɔɔ, akɔ mʉkʉpa wɔ sasaɨ mʉngana ati ɔ mipo. Mʉtʉ wɔ masʉa wɔ mipo wa꞉kumonio amati ɔ sasaɨ, sɔkɔmʉ aka wadʉana-ɔɔ. Ananɨ, ipipi yɔngɔ yɔ꞉panjaa tɨta panjaa nɔ angu ngɨa, ɨsana ya꞉ɓio atutuo nayɔ mipo. 42Ɓasʉda ɓa꞉ɓio ahata maa ɓombi ɓɔ boloko, dɔ, pɔ mʉngana a꞉tɨkwamʉ mipo, nɔ, ɔ꞉hɛyaka. 43Yakamɛngana, ngama ɔ ɓasʉda a꞉ɓio akʉnda heiso Pɔlɔ. Kʉdɔ, ɔ꞉ɓʉgbɛma ɓɔ ɓatɨkɨamʉ yaka ndʉ ɨyɛnɛnɨ. E꞉njo ɓombi ngʉɓa ɓɛyɔ aɗuu ʉpanʉ ɓɔ, ɓɨpʉnga nɨkwa mipo, nɔ, achwɛa aɨdʉnda. 44Ɓombi ngʉɓɔmɔ, ɓa꞉ɓʉkpata tɨa ɨngbaa afana akɔ magbaa kɔ maɓaʉ, pɔ amagbaa kɔ masʉa wɔ mipo. Kʉdɔ ɨɓɔ ɓaɓomu, ɓa꞉ɓɔya aɨdʉnda ta iɗo.

Currently Selected:

Mɨkyananakɨa 27: buuN

Highlight

Compare

Copy