Mɨkyananakɨa 25

Pɔlɔ apɛɨ ɔ Fɛsɛtɔ

1Ndʉ, Fɛsɛtɔ a꞉ɓɔya aihoi ngɨangɔ, ambise ɔ makwaa kaatʉ, kʉdɔ, ɔ꞉ngwɨa tɨa kyɛnda ananɨ anɔ Kaisalia anɨsa anɔ Yelusalɛma. 2Ɓangama ɓɔ ɓakumukumu, nɔ ɓombi ɓɔta ɓɛmbɨanɨɛ ati ɔ Ɓayuda, ɓɛ꞉ka anapɨa Pɔlɔ nɔ mʉkɔmbʉ apɛɨ angɔ. Kʉdɔ, ɓɔ꞉ndɨanɨa 3ngama Fɛsɛtɔ ɓɔ ɨɓʉsɨa ɓaka-sɨ Pɔlɔ atɔa ta anɔ Yelusalɛma. Ambenigɔɓɔpe, ɨɓɔ ɓɔ꞉mʉpɛndɨɔ ga ɓamʉwa anɔ ɨngbaa. 4Yakamɛngana, Fɛsɛtɔ ɔ꞉tosio ɓɔ Pɔlɔ aboloko anɔ Kaisalia, nɔ ɨyɔ makwɔngɔ, a suo anɨsa kʉ inani ambise ɔ makwaa bele. 5Kʉdɔ, Fɛsɛtɔ ɔmatɨa ɓɔ: «Sɨeni gɔ pɛngɛ nganangana ɔ ɓangama ngʉɓeno anɨsa ɨhɔ nɛmɨ anɔ Kaisalia, iɗo ambɔ, ɓɨnapɨa Pɔlɔ nɔ mʉkɔmbʉ tɨa inani, yɔɓieni ɓɔ a꞉kɨa pɔngɔ yaka yɛta ɓɨɓɨ.» 6Pɛɨ ngɨa Fɛsɛtɔ a꞉tɔa-ɔɔ anɔ Kaisalia, a꞉kɨa ɓata-sɨ ɨhɔ naɓɔ ananɨ makwaa ndʉ ɓɛgɨna pɔ tɛkɛɓɛ. Kʉdɔ, nekuɓa yɔngɔ ɔ꞉wɔlɔ akɔ ɨda yɔ kio mʉkɔmbʉ, nɔ, ɛ꞉njo ʉpanʉ ɓɔ ɓɨka nɔ Pɔlɔ. 7Ngbinga ngɨa ɛ꞉ka-ɔɔ, Ɓayuda ngʉɓa ɓa꞉ngwa anɔ Yelusalɛma ɓɔ꞉mukunguo, nɔ, ɓɔ꞉mʉchɔngɨa akʉʉ ɔ yaka ɨja, ɨyɛ ɓangɔkwanana apana ɓɔ ya ingono. 8Pɔlɔ ɔ꞉pʉnga tosio yaka asugo ɓɔ: «Na꞉kɨamʉ yaka yɛta ɓɨɓɨ pɔ mɛngana, nɔ, na꞉ɓundomʉ mapanʉ ngʉkɔ Ɓayuda, na꞉sɛakamʉ ɨkáá yɔ Asɔɓɨɨ, gʉtʉ pɔ akɨa yaka yɛta ɓɨɓɨ akʉʉ ɔ ngama ata mʉja ngɨyɔ Ɓalɔma.»

9Fɛsɛtɔ a꞉ɓio akʉnda dudiso Ɓayuda mʉtɨma, ga ɨyɔ nɔ Pɔlɔ ɓɔ: «Ha gue, akʉʉ ɔ yaka ngɨyɛsɔɔ ayɛ, wa ndɨ akʉnda ɓɔ ɓɨsa akio mʉkɔmbʉ ngʉwɔsɔɔ, apɛɨ asɛmɨ, ta anɔ Yelusalɛma?» 10Pɔlɔ ɔ꞉tosio ɓɔ: «Naɓɛmaɛ apɛɨ ɔ mʉkɔmbʉ ngʉwɔ ngama ata mʉja ngɨyɔ Ɓalɔma, nɔ, nakʉnda ɓɔ ɓa꞊kio mʉkɔmbʉ ngʉwɔsɛmɨ ta aɨda ngɨyɛnɛnɨ. Na꞉kɨamʉ Ɓayuda yaka yɛta ɓɨɓɨ pɔ mɛngana, kʉndʉ ʉwɛ, wanɨmbɨa iɗo. 11Yɔɓieni ɓɔ na꞉dʉaniso pɔngɔ yaka, ga pɔ ɓɔ na꞉kɨa yaka yɛta ɓɨɓɨ ngɨyɛ, yɔsisekio nɔ ingwo, nɔyaamʉ aniwo. Yakamɛngana, yɔɓieni ɓɔ ɓanɛmɨ achɔngɨa ta ɓʉtʉʉ, mombi pɔ mʉngana angɔkwananamʉ nɛmɨ agaba alɨkɔndɔ ngɨleɓo. Nɛtɔ ɓɔ ɓɨchaniso mʉkɔmbʉ ngʉwɔsɛmɨ atɨ ngama ata mʉja ngɨyɔ Ɓalɔma.» 12Ambise ngɨa Fɛsɛtɔ ayakanaka-ɔɔ nɔ ubua ngʉwangɔ, kʉdɔ, ɔ꞉tɔsio ɓɔ: «Ndʉ wɛtɔ ɓɔ ɓɨchaniso mʉkɔmbʉ ngʉwɔsɔɔ atɨ ngama ngɨa ata mʉja, wabi tɨa kʉ inani.»

Fɛsɛtɔ enjo Agɨlɨpa ɨsaʉ yɔ Pɔlɔ

13Ambise ɔ mikpekpe yɔ makwaa, ngama Agɨlɨpa nɔ Bɛlɛnɨkɛ ɓɛ꞉ka anɔ Kaisalia aninjo Fɛsɛtɔ lɨkɔndɔ. 14Ndʉ ɓa꞉kwaa ananɨ makwaa maja, Fɛsɛtɔ ɔ꞉ngakɨa ngama yaka ngɨyɔ Pɔlɔ asugo ɓɔ: «Felikisi a꞉sɨa mombi mʉngana aka aɨkáá yɔ boloko. 15Ngbinga ngɨa na꞉sa-ɔɔ anɔ Yelusalɛma, ɓakumukumu, nɔ ɓatataɓasie ngʉɓa ɓɔ Ɓayuda ɓɛ꞉ka nɔ mombi ngɨa apɛɨ asɛmɨ ga nikio mʉkɔmbʉ ngʉangɔ. 16Yakamɛngana, ɨmɨ, na꞉ɓutosio ɓɔ akɔ gbali ngɨyeso ɔ Ɓalɔma, ɓangɔsɨamʉ anɨfa mombi aboloko, pɛɨ ngɨa ɨyɔ mombi ngɨananɨ, ɨmaa-ɔɔ apɛɨ ɔ mʉkɔmbʉ ɨhɔ nɔ ɓombi ɓɔ mʉkɔmbʉ ngʉɓangɔ. 17Ndʉ ɓɛ꞉ka pɛ aka, sɔkɔmʉ nɨchaniso ngbinga, yakamɛngana, ta nekuɓa yɔngɔ na꞉wolo aɨda yɔ mʉkɔmbʉ ta gagaa, nɔ, nenjo ʉpanʉ ɓɔ ɓɨka nɔ mombi ngɨananɨ. 18Ɓombi ɓɔ mʉkɔmbʉ ngʉɓangɔ ɓɛ꞉ka anɨmaa, yakamɛngana, ati ɔ mʉkɔmbʉ uɓomu ngʉwa ɓa꞉napɨa akʉʉ angɔ, sɔkɔmʉ ɨmɨ, nɨna yaka yɛta ɓɨɓɨ pɔ mɛngana, ndʉ aka na꞉ɓio atunguo. 19Ɓa꞉ɓio aɗuɗuono ta akʉʉ ɔ ɨtandɛ ngiyeɓo, nɔ akʉʉ ɔ mombi mʉngana ngɨa a꞉wo jɛnɛ ino ɓɔ Yeso. Yakamɛngana, Pɔlɔ ɔ꞉ɓakana ga mombi ngɨananɨ a ta ʉwɔ. 20Ɨmɨ ananɨ, sɔkɔti nɨ꞉pɛmiso ɓɔ nakio ɨkananja yɔ yaka ngɨyɛnɛnɨ tanɨ. Kʉdɔ, na꞉musigio ɨyɔ Pɔlɔ ɓɔ ɓɨsa akio mʉkɔmbʉ ngʉwɔnanɨ ta anɔ Yelusalɛma. 21Yakamɛngana, ɨyɔ Pɔlɔ, ɛ꞉ta ga iɓio ta aboloko akɔɓɛtɨa aka ngama ngɨa ata mʉja ɔ Ɓalɔma Ogisitɛ akanga sina-ɔɔ yaka ngɨangɔ. Kʉdɔ, ne꞉njo ʉpanʉ ɓɔ ɓimuɓeyoko aɓɔya aka, na꞊mʉtʉma sinani-ɔɔ atɨ ngama ngɨananɨ.» 22Ngama Agɨlɨpa ɔ꞉sigio Fɛsɛtɔ ɓɔ: «Ɨmɨ makwɔngɔ, na-sɨ akʉnda kʉ nʉka mombi ngɨananɨ.» Kʉdɔ, ɔ꞉mutosio ɓɔ: «Wa꞊mʉka suo nekuɓa.»

Pɔlɔ ɛmaɔ apɛɨ ɔ Agɨlɨpa nɔ Bɛlɛnɨkɛ

23Nekuɓa yɔngɔ, Agɨlɨpa nɔ Bɛlɛnɨkɛ ɓɛ꞉ka nɔ ʉbɨba ʉja, nɔ, ɓɔ꞉kumonio amati ɔ basa wɔ kio mʉkɔmbʉ, ɨhɔ nɔ ɓangama ɓɔ ɓasʉda, nɔ ɓombi ɓɔta ɓakpɔkpɔ ngʉɓɔ gʉlʉ ngɨananɨ. Fɛsɛtɔ e꞉njo ʉpanʉ ɓɔ ɓɨka nɔ Pɔlɔ. 24Ambise ngɨananɨ, Fɛsɛtɔ ɔ꞉sugo ɓɔ: «Ngama Agɨlɨpa, nɔ inu ɓaɓomu ngʉɓa na ɨhɔ nesu aka, ineni mombi ngɨa. Ambaja ata mʉja ɔ Ɓayuda ɓɛ꞉ka pɛ nayɔ achɔngɨa apɛɨ asɛmɨ, aki anɔ Yelusalɛma, nɔ aka kʉtaa, ɨɓɔ asugo nɔ iso yɛta ɓʉmʉ ga ɔsisekiomʉ aɓio akɔ uɓei. 25Ɨmɨ ingainga, sɔkɔmʉ nɨna ɨkyɛmʉ pɔ mɛngana, ɨyɛ yɔsisekio nɔ ingwo. Yakamɛngana, tɨa ɨyɔ makwɔngɔ, ɛ꞉ta anɨsa apɛɨ ɔ Ogisitɛ. Kʉdɔ, nɔ꞉kwaisio ɨmɨ nayɔ, atʉma tɨa kʉ inani. 26Ɨnadɔ, nangɔmʉ nɔ yaka mɛngana, ngɨyɛ nakɔsugo, akʉʉ angɔ atɛndakɨa ngama ngɨa ata mʉja. Kʉdɔ ɨmɨ, nɔmuchwɛiso-sɨ tɨa apɛɨ eno aka, nɔgbɛ apɛɨ asɔɔ ngama Agɨlɨpa, iɗo ambɔ niɓio kʉ nɔ ɨkyɛmʉ ngɨyɛ na꞊tɛndakɨa, ambise ngɨa inu, námuɓokwokiso-ɔɔ. 27Akɔ ɨmɨ, ya ɓujangi jangi atʉma mombi ɔ boloko anɔ Lɔma mʉkɔmbʉ ngʉwangɔ wangɛmbɨanɨenimʉ iɗo.»

Currently Selected:

Mɨkyananakɨa 25: buuN

Highlight

Compare

Copy