Mɨkyananakɨa 24

Pɔlɔ ɛmaɔ apɛɨ Felikisi ngama ɔ ihoi

1Ambise ɔ makwaa ɓɔkʉ, Ananɨa kumukumu ngɨa ata mʉja ɔ꞉ɓɔya anɔ Kaisalia, ɨhɔ nɔ mikpekpe yɔ ɓatataɓasie nɔ juji mʉngana ino ɓɔ Tɛlɛtʉlɔ. Ɓɛ꞉ka apɛɨ ɔ ngama Felikisi anapɨa Pɔlɔ nɔ mʉkɔmbʉ. 2Ɓɔ꞉misoko Pɔlɔ, kʉdɔ, Tɛlɛtʉlɔ ɔ꞉pʉnga nayɔ achɔngɨa ɓɔ: «Ʉwɛ Felikisi ngama ata muɗo nɔgbɛ, tanɔ majɨɔ kingono akʉʉ asɔɔ. Yaka ɨja yɔ ɨfananja ngɨyɛ ya꞉natana, dɔ ʉwɛ, wakyɛndakiso ɨkʉmbʉ iɗo nɔgbɛ. 3Kʉdɔ, ngama Felikisi, isu, tanɔ ɨgyagya nɔgbɛ akʉʉ yaka ngɨyɛnɛnɨ iɓomu. 4Yakamɛngana, nɔkʉndɔmʉ nɔwɛ asɨkɨa angbinga mʉta, atɨnɨa ɓaka mʉtɨma wɔ majɨɔ, nesu anʉka bɛlɛ. 5Tɛ꞉na pɛ ɓɔ mombi ngɨa a ɓɨɓɨ nɔgbɛ, ɨyɔ akɛ, akɔchwɛiso gbongbo ati ɔ Ɓayuda ngʉɓa ɓɔ dɔdɔ muɓomu, nɔ a kʉ, ɓangapɛɨ ɔ ɨtandɛ ngɨyɔ Ɓanajalɛtɨ. 6Nɔ, a꞉kanio pɛ kʉ nɔ yapakiso ɨkáá yɔ Asɔɓɨɨ, dɔ, yatiɓio tii ɓata tu. Kʉdɔ isu, ta꞉mʉfa pɛ. [Ta꞉ɓio pɛ akʉnda akio mʉkɔmbʉ ngʉwangɔ akpatanakɨa ta nɔ mapanʉ ngʉkeso. 7Yakamɛngana, Lusia ngama ɔ ɓasʉda ɔchwɛanɨa pɔngɔ nɔ ɓʉkaɓʉkaɨ nɔgbɛ, nayɔ aɓwanakiso alɨkɔndɔ leso. 8Kʉdɔ ɨyɔ Lusia, ɛ꞉njo ɓombi ɓɔ mʉkɔmbʉ ngʉɓangɔ ʉpanʉ ɓɔ ɓɨka apɛɨ asɔɔ.] Ʉwɛ makwɔngɔ, wɔmuɓokueni, wɛ꞊mbɨa iɗo ɓɔ yaka iɓomu ngɨyɛ ta-ɔɔ nayɔ achɔngɨa, ya ingono.» 9Ɓayuda ɓɔ꞉bayanɨa akʉʉ ɔ yaka ngɨyɛnɛnɨ, nɔ, ɓɛ꞉maiso ga ya ta ɓanɨ.

Pɔlɔ ɔtosio yaka apɛɨ ɔ Felikisi

10Ngama ɔ꞉mʉpana nɔ ɨkɔndɔ ɓɔ ɨsamʉa, kʉdɔ, Pɔlɔ ɔ꞉tosio ɓɔ: «Nanʉngaka yaka yɔ mʉkɔmbʉ ngʉwɔsɛmɨ apɛɨ asɔɔ sɔkɔmʉ nɔ ɓajatuoko, dɔ, amati ɔ mago maja ta ʉwɛ akɛ, wakyɔkio suo mʉkɔmbʉ amati ɔ ɨfananja ngɨyeso. 11Kʉndʉ ʉwɛ, makwɔngɔ wakwanana kpengbiso, yangɔchanamʉ makwaa tɛkɛɓɛ nɔ ɓepini, aka nɛ꞉ka pɛ-ɔɔ anɔ Yelusalɛma abibiso Asɔɓɨɨ. 12Pɔ gʉtʉ aɨda pɔ mɛngana, mombi a꞉nagbʉkamʉ aɗuɗuono nɔ mombi, pɔ akɔyanakiso ambaja ɔ ɓombi mɨtʉ: pɔ amati ɔ ɨkáá yɔ Asɔɓɨɨ, ga pɔ aɨkáá yɔ nɨta yɔ Ɓayuda, gʉtʉ pɔ aʉmʉwa nga wɔmɔ amati ɔ gʉlʉ. 13Ɓombi ngʉɓa, ɓangɔmʉ adaa ngɨa ɓanapana-ɔɔ ɓɔ yaka ngɨyɛ ɓanɛmɨ anapɨa nayɔ nɔ mʉkɔmbʉ, ya ingono. 14Yakamɛngana, ɨkyɛmʉ ngɨyɛ nanɨmbɨa apɛɨ asɔɔ, ya ɓɔ ɨmɨ, nakɔkyananakɨa Asɔɓɨɨ ngɨyɔ ɓaba, nɔ ɨngbaa ngɨyɛ ɨtakɨtakɨ, ɨyɛ ɨɓɔ, ɓanɨna ɓɔ ya ɓɨɓɨ. Ɨnadɔ ɨmɨ, na kʉ abaya yaka iɓomu ngɨyɛ, ya꞉tɛndanakɨa amati ɔ mabii kɔ Musa nɔ ʉka kɔ magbɛ. 15Ɨmɨ, nakɔnapɨa itungwio akɔ Asɔɓɨɨ, ngbanga kʉndʉ ɨɓɔ, ɓɔ, ɓombi ɓa꞊jʉkana sina akɔ ingwo jʉkananɨ, yiɓio ʉɓa ɓɔta iɗo, kʉndʉ ʉɓa ɓɔta ɓɨɓɨ. 16Kʉdɔ, nakyɔkɨa angu masi ta maɓomu, akɔɓio mʉtɨma ta ɓɔ dɨɨ, apɛɨ ɔ Asɔɓɨɨ kʉndʉ apɛɨ ɔ ɓombi.

17Ambise ɔ mago maja, nɛ꞉ka pɔngɔ ɓata anɔ Yelusalɛma, aninjo ɨfananja ngɨyɛsɛmɨ mikpekpe yɔ ɓagyɛgyɛ akɔ ɓajanga, nɔ tɨa kʉ nɔ apɛpɛ akɔ Asɔɓɨɨ. 18Ɨyɛnɛnɨ, ya yaka ngɨyɛ ɓa꞉nagbʉka pɔngɔ, ɨmɨ, akɨa amati ɔ ɨkáá yɔ Asɔɓɨɨ. Na꞉ɓio ɓɔ nɔpipeni-sɨ mʉgyaɓa kʉ ɨtakɨtakɨ. Ambaja ɔ ɓombi a꞉ɓiomʉ ananɨ, gʉtʉ pɔ ɨpʉmbʉ ya꞉ɓiomʉ kʉɓanɨ. 19Yakamɛngana, mikpekpe yɔ Ɓayuda ngʉɓa ɓa꞉ngwa aihoi yɔ Ajia, ɓa꞉ɓio kʉ ananɨ. Yɔɓieni pɛngɛ ɓɔ ɓanɔ yaka akʉʉ asɛmɨ, ambɔ ɨɓɔ akɛ, ɓɛkɔ nɛmɨ achɔngɨa apɛɨ asɔɔ. 20Gʉtʉ wɔsɨeni pɛngɛ-sɨ ɓombi ngʉɓa anɨchwa yaka yɛta ɓɨɓɨ nga yeno tanɨ ɨyɛ ɓa꞉nɛna nayɔ angbinga ngɨa na꞉ɓio-ɔɔ anʉngaka yaka apɛɨ ɔ ubua ngʉwɔ Ɨkʉʉ. 21Yɔɓieni kɔmʉ ta yaka ngɨyɛ na꞉sugo nɔ iso yɛta ɓʉmʉ apɛɨ iɓo ɓɔ: ‹Nɛmaɔ apɛɨ ɔ mʉkɔmbʉ, dɔ, na꞉baya ɓɔ ɓombi ngʉɓa ɓa꞉sio ɓa꞊jʉkana sina akɔ ingwo jʉkananɨ.›»

22Felikisi a꞉ɓɨmbɨa yaka akʉʉ ɔ Ɨngbaa yɔ Makwɔɓɨɨ iɗo nɔgbɛ, kʉdɔ ɛ꞉sɨnganiso ɓata-sɨ mɨsɨ yɔ ngbanga ngɨananɨ kʉ nɔpɛɨ. Nɔ, ɔ꞉tɔsigio ɓombi ɓɔ mʉkɔmbʉ ɓɔ: «Na꞊kio suo ngbanga ngɨyeno tɨta ngbinga ngɨa Lʉsɨa ngama ɔ ɓasʉda, ɛ꞊ka-ɔɔ.» 23Ɛ꞉njo ngama ɔ ɓasʉda ʉpanʉ ɓɔ ɨmaya Pɔlɔ aboloko, yakamɛngana, ɨ꞉mʉsɨa kʉɔ nɔ angbinga ajonokio nɔ ɓawai ɓangɔ, ambɔ ɓiɓio kʉ anɨka nayɔ akangaka, nɔ nayɔ aninjekenekio.

Pɔlɔ apɛɨ ɔ Felikisi

24Ambise ɔ mukpekpe yɔ makwaa, Felikisi ɛ꞉ka nɔ moi angɔ Dulusia ngɨa a꞉ɓio muto Ɓayuda. E꞉njo ʉpanʉ ɓɔ ɓɨka nɔ Pɔlɔ, dɔ, ʉka mapanʉ ngʉkangɔ, akʉʉ ɔ báya Yeso Klisito. 25Ndʉ Pɔlɔ a꞉pʉnga tɨa ngaka yaka akʉʉ ɔ ɓungbingbii, nɔ, nagaaka taa yɔ ndʉtʉ, nɔ, mʉkɔmbʉ ngʉwa wa suo anɨka, Felikisi ɔ꞉kwa ʉɓá ga ɨyɔ nayɔ ɓɔ: «Ɨtakɨtakɨ ngɨyɛ, sa-sɨ sanɨ! Ndʉ nɛ꞊nɨania ɓata suo nɔ angbinga, nɔ꞊nesoko dɔ tɨa.» 26Ngama ngɨananɨ a꞉ɓisokoko Pɔlɔ gagaa gagaa ayakanaka nayɔ, dɔ, a꞉ɓio ayongo ɓɔ Pɔlɔ aminjo ɓagyɛgyɛ. 27Ambise ɔ mago kapɨnɨ, Pɔlɔkɨɔ Fɛsɛtɔ ɔ꞉dya ɓʉngama ambise ɔ Felikisi. Ɨyɔ Felikisi, a꞉sɨa Pɔlɔ ta aboloko, ta ayaka yɔ kʉndaniso nɔ Ɓayuda.

Currently Selected:

Mɨkyananakɨa 24: buuN

Highlight

Compare

Copy