Mɨkyananakɨa 23

1Pɔlɔ ɔ꞉kanga ubua wɔ ɨkʉʉ nɔ ajwa ata ɓʉmʉ, nɔ, ɔ꞉sugo ɓɔ: «Inu ɓanduku, aɓɔya ɓʉɓʉnʉ, nakyananakɨa Asɔɓɨɨ mʉtɨma ta ɓɔ dɨɨ.» 2Ananɨa ngɨa a꞉ɓio kumukumu ata mʉja, ɔ꞉titio ɓombi ngʉɓa ɓa꞉ɓio tinene nɔ Pɔlɔ ɓɔ ɓɨmʉɓɛnda amonu. 3Kʉdɔ, Pɔlɔ ɔ꞉musigio ɓɔ: «Ta Asɔɓɨɨ akɛ a꞊naɓɛnda suo, ɨkyɛmʉ yɔ fili ngɨa! Wɔwolo ananɨ akio mʉkɔmbʉ ngʉwɔsɛmɨ akpatanakɨa nɔ ʉpanʉ, yakamɛngana, kʉ ʉwɛ ɓata, wɔɓundo ʉpanʉ atitio ɓɔ ɓɨnaɓɛnda!» 4Ɓombi ngʉɓa ɓa꞉ɓio tinene nayɔ ɓɔ꞉musigio ɓɔ: «Wɔsɛakɔ kumukumu ata mʉja ɔ Asɔɓɨɨ?» 5Pɔlɔ ɔ꞉tosio ɓɔ: «Inu ɓanduku, nɛ꞉mbɨɔmʉ ɓɔ a kumukumu ata mʉja ɔ Asɔɓɨɨ. Dɔ ya꞉tɛndanakɨa a mabii ɓɔ: ‹Wa꞊tɨyakɨamʉ ngama ɔ ɨfananja ngɨyɛsɔɔ yaka yɛta ɓɨɓɨ.›»#popoko Chw 22:27

6Pɔlɔ anɨna ɓɔ amati ɔ ubua wɔ ɨkʉʉ, ya꞉ɓio nɔ Ɓasadukayɔ ɨhɔ nɔ Ɓafalisayɔ, kʉdɔ, a꞉tʉɓɨa ɓɔ: «Inu ɓanduku, na Mʉfalisayɔ, mwana ɔ Ɓafalisayɔ. Nɛmaɔ apɛɨ ɔ mʉkɔmbʉ, dɔ ɨmɨ, na꞉napɨa itungwio ɓɔ ɓombi ngʉɓa ɓa꞉sio ɓajʉkana sina akɔ ingwo jʉkananɨ.» 7Ɨyɛ a꞉pipo asugo yaka ngɨyɛnɛnɨ, mangoi kɔ꞉chwɛa ati ɔ Ɓafalisayɔ nɔ Ɓasadukayɔ. Ubua wɔ꞉nagbonyonoko. 8Ɨɓɔ Ɓasadukayɔ, ɓasugo ga jʉkana akɔ ingwo, ɓamalaika, nɔ mɨtɨma yɔ madu, yaka ngɨyɛnɛnɨ iɓomu yangɔmʉ. Ɨnadɔ, Ɓafalisayɔ ɓabaya ɨɓɔ bayanɨ. 9Kʉdɔ, ɨpʉmbʉ yɛta ɨja yɔ꞉chwɛa, nɔ mikpekpe yɔ ɓapananakɨa ɓɔ mapanʉ ngʉɓa ɓa꞉ɓio amati ɨtandɛ yɔ Ɓafalisayɔ, ɓɔ꞉ngwa ɨkʉʉ, nɔ, ɓɛ꞉maiso nɔ angu asugo ɓɔ: «Tɛnɔmʉ isu yaka yɛta ɓɨɓɨ pɔ mɛngana amati ɔ mombi ngɨa. Adiga malaika ga pɔ mʉtɨma wɔ idu mɛngana ɓɔ wɔ꞉mʉngɨɔ yaka.» 10Ndʉ mangoi kɛ꞉sɨnganaka tɨa nɔgbɛ, ngama ɔ ɓasʉda ɛ꞉na ʉɓá ɓɔ ɓatɨmʉchɛnjamʉ Pɔlɔ, kʉdɔ, ɔ꞉tʉma ɓasʉda ngʉɓangɔ anɨsa nayɔ aɓwanakiso ati ɔ ambaja, nɔ, nɨka nayɔ amati ɔ aga ɔ ɓasʉda. 11Naɓutu ngɨananɨ, Makwɔɓɨɨ ɛ꞉jeyo Pɔlɔ, ga ɨyɔ ɓɔ: «Sɨka mʉtɨma wɔ iguegue! Dɔ, ngbanga kʉndʉ wɔ꞉ɓɨakɨɔ pɛngɛ Ɨsau ngɨyɛsɛmɨ anɔ Yelusalɛma, yɔkwananɔ aɓɨakɨa anɔ Lɔma kʉɓanɨ.»

Ɓayuda ɓɔsingekio Pɔlɔ idimi

12Ndʉ ɓisi ɓɔ꞉ya, mukpekpe yɔ Ɓayuda ɓɔ꞉singekio idimi. Ɓɔ꞉simio ɓujangi ngʉɓɛɓɔ ɓɔ, ɓangɔdyamʉ ɨkyɛmʉ pɔ nɨmwa aɓɔya ta aka ɓa꞉wa-ɔɔ Pɔlɔ. 13Ɓombi ngʉɓa ɓa꞉singikio idimi ngɨyɛnɛnɨ, ɓa꞉ɓio achana ɓatɛkɛɓɛ ɓɔgɨna. 14Kʉdɔ, ɓɔ꞉sa apɛɨ ɔ ɓangama ɓɔ ɓakumukumu, nɔ ɓatataɓasie, ga ɨɓɔ ɓɔ: «Tɔ꞉simio ɓujangi ngʉɓeso ɓɔ ta꞉ngɔmayamʉ ɨkyɛmʉ amonu, aɓɔya ta aka ta꞉wa-ɔɔ Pɔlɔ. 15Kʉɓanɨ, inu ʉkaneni nɔ ubuwa wɔ ɨkʉʉ uɓomu, nɔ, sigieni ngama ɔ ɓasʉda ɓɔ ɨnitosio Pɔlɔ. Nɔ, nɔsɨka ɓakai ɓɔ nakʉnda kpɛma yaka ngɨangɔ tinetine. Angbinga ngɨananɨ, isu, ta꞊ɓio aɓɛtɨa nayɔ apipo tɨta pipo, apɛɨ ngɨa aɓɔya-ɔɔ.»

16Yakamɛngana, mwana ɔ manye ɔ Pɔlɔ ata moi ɔ꞉ka idimi ngɨyɛnɛnɨ ta ʉkanɨ. Kʉdɔ, ɔ꞉sa aɨkáá yɔ boloko, nɔ, ɔ꞉kumonio aɓɨa Pɔlɔ yaka ngɨyɛnɛnɨ. 17Kʉdɔ, Pɔlɔ e꞉soko ngama ɔ ɓasʉda mʉngana, ɔ꞉musigio ɓɔ: «Sa nɔ mwana ɔ ɓandambʉ ngɨa apɛɨ ɔ ngama ɔ ɓasʉda, dɔ, anɔ yaka nayɔ asigio.» 18Ngama ɔ ɓasʉda ɔ꞉sa nayɔ apɛɨ ɔ ngama ɔ ɓasʉda ngɨa akʉʉ angɔ ta ɓanɨ, ga ɨyɔ ɓɔ: «Pɔlɔ, mombi ɔ boloko, ɔ꞉natʉmɔ ga nɨka nɔ mwana ɔ ɓandambʉ ngɨa iyani, dɔ, anɔ yaka nɔwɛ asigio.» 19Ngama ɔ ɓasʉda ngɨananɨ, ɔ꞉ɓoto mʉndambʉ ngɨananɨ ɨkɔndɔ, nɔ, ɓɔ꞉kɛla nayɔ anɔ ambamba. Kʉdɔ, ɔ꞉muɓokuo ɓɔ: «Yaka nga yeno tanɨ ɨyɛ wa nayɔ nɛmɨ anʉngɨa?» 20Ɔ꞉mutosio ɓɔ: «Ɓayuda ɓɔ꞉kanɔ pɛngɛ nɔwɛ anɨta ɓɔ suo nekuɓa, tʉma Pɔlɔ apɛɨ ɔ ubuwa wɔta ʉja, ta nɔ mʉjɛɛ ɓanɨ, ga dɔ ubuwa wakʉnda kanga yaka ngɨangɔ, tinetine. 21Watʉkɔmʉ yaka ngɨyɛnɛnɨ! Dɔ, ɓombi ɓatɛkɛɓɛ ɓɔgɨna ati eɓo, ɓɔ꞉mʉsɔmɨɔ sɔmɨa. Ɓombi ngʉɓɔnanɨ, ɓɔ꞉simio ɓujangi ngʉɓeɓo ɓɔ, ɓangɔdya nɔ ɓangɔmwa ɨkyɛmʉ pɛɨ ngɨa ɓamʉwa-ɔɔ Pɔlɔ. Ɨtakɨtakɨ ngɨyɛ ɓaɓɔndanɛ, nɔ, ɓaɓɛtɨa ta ɓɔ wasugo tanɨ.» 22Ga ngama ɔ ɓasʉda nɔ mʉndambʉ ɓɔ: «Watʉngɨamʉ mombi pɔ mʉngana, yaka ngɨyɛnɛnɨ wɔ꞉naɓɨɔ.» Kʉdɔ, ɔ꞉mʉsɨa anɨsa.

Ɓɔchaniso Pɔlɔ tɨa atɨ Felikisi

23Ambise ngɨananɨ, ngama ɔ ɓasʉda e꞉soko ɓangama ɓɔ ɓasʉda ɓapɨnɨ ngʉɓa ɓa ɛsɨ angɔ, nɔ, ɔ꞉ɓusigio ɓɔ: «Sɨkeni ɓasʉda lɨmɨa ɗepini, nɔ ɓɔmɔ ɓatɛkɛɓɛ mɛɗɨanɛka ʉɓa ɓɔ ɗite, akʉʉ ɔ ɓafalasɨ nɔ ɓata ɓombi lɨmɨa ɗepini, ʉɓa, kʉ ɓɔ ɗite nɔ machagbu. Inu ɓaɓomu tambanakɨeni anɨsa anɔ Kaisalia, nɔ saa ɔ ɓeetu ngɨa ɔ ɨpasɨ. 24Tambanakeni kʉɔ mikpekpe yɔ ɓafalasɨ akɔ Pɔlɔ, nɔ muɓoiseni ta nɔ majɨɔ apɛɨ Felikisi ngama ngɨa ɔ ihoi.» 25Kʉdɔ, ngama ɔ ɓasʉda a꞉tɛndakɨa ʉbalʉa akɔsugo ɓɔ:

26«Ɨmɨ Kɔlɔdɨa Lʉsɨa akɛ, nɔnatɛndakɨɔ ʉbalʉa ngʉa akɔ ʉwɛ Felikisi ngama ɔ ihoi, nɔ, nɔ꞉naɓokuo. 27Ɓayuda ɓa꞉fa pɛ mombi ngɨa, nɔ, ɓa꞉ɓio pɛ tɨa tinene nayɔ anɨwa. Ndʉ nɔ꞉ka pɔngɔ ɓɔ a mwana ɔ ɨkʉmbʉ ɔ Ɓalɔma, kʉdɔ, nɔ꞉sa nɔ ɓasʉda ngʉɓɔsɛmɨ nayɔ aɓwanakiso. 28Na꞉mʉtʉma apɛɨ ɔ ubua ngʉweɓo wɔ ɨkʉʉ, dɔ, na꞉ɓio akʉnda anɨmbɨa ɓɔ, ɓanayɔ achɔngɨa, dɔtanɨ. 29Na꞉tɔndɔnga ɓɔ ɓanayɔ achɔngɨa ta akʉʉ ɔ yaka ngɨyɛ yakanga mapanʉ ngukeɓo ingainga. Yakamɛngana, ɓangɔmʉ adaa ngɨa ɓanapana-ɔɔ ɓʉɓɨɓɨ mʉngana ʉɓa, ɓɔkwananɔ nɔ ingwo pɔ boloko. 30Mbise ngɨananɨ, ɓɔ꞉tɔnaɓɨa ga Ɓayuda ɓɔ꞉kanɔ nayɔ anɨwa. Kʉdɔ, nɔ꞉kwaisio tɨa nayɔ atʉma inani apɛɨ asɔɔ, iɗo ambɔ ɓombi ɓɔ mʉkɔmbʉ ngʉɓangɔ ɓɨsa nayɔ achɔngɨa tɨa kʉ inani apɛɨ asɔɔ.»

31Ɓasʉda ɓa꞉sɨka Pɔlɔ, nɔ, ɓɔ꞉sa nayɔ anɔ Atipalisi ta naɓutu ngɨananɨ ngbanga ta nɔ ʉpanʉ ngʉwa ɓa꞉ɓinjo. 32Nekuɓa yɔngɔ, ɓasʉda ngʉɓɔ mɨtɨndɨ ɓɔ꞉tɔwa amati ɔ aga ɔ ɓasʉda, nɔ, ɓɔ꞉sɨa tɨta ʉɓa ɓɔ ɓafalasɨ, anɨsa ɨhɔ nɔ atɨ Pɔlɔ. 33Ndʉ ɓa꞉ɓɔya anɔ Kaisalia, ɓasʉda ngʉɓɔnanɨ ɓe꞉njo ʉbalʉa atɨ ngama ngɨa ɔ ihoi, nɔ, ɓɔ꞉pana tɨa kʉ nɔ Pɔlɔ. 34Ngama ɔ꞉popoko ʉbalʉa, nɔ, ɔ꞉ɓokuo Pɔlɔ ɓɔ ɔ꞉ngwɔ aihoi ngɨa gbanɨ. Ndʉ ɔ꞉ka ɓɔ Pɔlɔ a mombi ɔ ihoi yɔ Kilikia, 35ga ɨyɔ ɓɔ: «Nɔ꞊ka suo yaka ngɨyɛsɔɔ iɓomu ta ambɔ ɓombi ɓɔ mʉkɔmbʉ ngʉɓɔsɔɔ ɓɛ꞊kɔ.» E꞉njo ʉpanʉ ɓɔ, ɓiɓeyoko Pɔlɔ atɨ ngama Hɛlɔdɛ ambɛnɨ.

Currently Selected:

Mɨkyananakɨa 23: buuN

Highlight

Compare

Copy