Mɨkyananakɨa 22

1«Inu ɓaba, nɔ inu ɓanduku Ɓayuda, ʉkeni yaka ngɨyɛ nanenu akɔtosio akʉʉ ɔ mʉkɔmbʉ ngʉwɔsɛmɨ, ʉkanɨ» 2Angbinga ngɨa ɓɔ꞉ka-ɔɔ Pɔlɔ naɓɔ ayakɨa nɔ Ibelenia, ɓɔ꞉gbaa tɨa nɔgbɛ, kʉdɔ ɔ꞉ɓusigio ɓɔ: 3«Ɨmɨ na Muyuda, nɔ, na꞉nɔtanɨa anɔ Talɨsɔ amati ɔ ihoi yɔ Kilikia. Yakamɛngana, ɓa꞉nahuo ta anɔ Yelusalɛma aka, nɔ, Gamalɨɛlɛ a꞉napanɨa akpataka mapanʉ ngʉkɔ ɓaba tinetine. Na꞉ɓio nɔ kɛkɛɛ akɔ Asɔɓɨɨ kʉndʉ inu ɓaɓomu ɓʉɓʉnʉ.#22:3 pɔ ɓɔ, Gamalɨɛlɛ a꞉ɓio mupananakɨa wɔta ʉja wɔ mapanʉ ngʉkɔ Musa 4Na꞉kyananaka ɓombi gʉɓa ɓa꞉ɓio akɔkpata Ɨngbaa yɔ Makwɔɓɨɨ, nɔ, nɔ꞉maa ɓɔmɔ ta maa. Na꞉ɓinjo ʉpanʉ ɓɔ ɓɨsanga ɓague nɔ ɓoi, nɔ naɓɔ, agiso akɔ boloko. 5Ɓadɛmʉ ɓɔsɛmɨ ta kumukumu ngɨa ata mʉja, nɔ basa ɔ ɓatataɓasie. Ɨɓɔ, ɓa꞉nenjo mabalʉa ngʉkɔ ɓanduku Ɓayuda anɔ Damasɛkɛ. Kʉdɔ, na꞉sa agʉlʉ ngɨananɨ akɔfeyo ɓanduku amati ɔ báya, nɔ, anɨka naɓɔ anɔ Yelusalɛma, nɔ naɓɔ, akyananaka.

Pɔlɔ ɔngakɔ yaka akʉʉ ɔ báya ngɨangɔ

6Ya꞉ɓio ɨpá amusoti, ɨmɨ tɨta anɔ ɨngbaa, tɨa kʉ tinene nɔ Damasɛkɛ, nɔ꞉tɔjʉkanɨa ta magou kɔ ɨpá ɓɔ ngelengele anɨngwa akʉʉ ɔ ɓisi kɔ꞉nakungueni. 7Kʉdɔ, nɔ꞉kwa ɛsɨ, nɔ꞉ka iso nɛmɨ asigio ɓɔ: ‹Saulo, Saulo, wanɛmɨ akyananaka ɓanɨ dɔtanɨ?› 8Kʉdɔ ɨmɨ, nɔ꞉tɔɓokuo tɨa ɓɔ: ‹Ʉwɛ Makwɔɓɨɨ wa anɨ?› Iso ngɨyɛnɛnɨ yɔ꞉tosio ɓɔ: ‹Ɨmɨ na Yeso, Mʉnajalɛtɨ ɨya akɛ, wanayɔ akyananaka.› 9Ɓombi ngʉɓa ta꞉ɓio naɓɔ ɓɛ꞉na magou ɨnanɨ, yakamɛngana, sɔkɔmʉ ɓɔ꞉ka iso yɔ mombi ngɨa a꞉ɓio nɛmɨ ayakɨa. 10Kʉdɔ, ga ɨmɨ ɓata ɓɔ: ‹Ha Makwɔɓɨɨ-ɛɛ, yanɨtanɨa nɨkɨa tanɨ?› Makwɔɓɨɨ ɔ꞉tosio ɓɔ: ‹Ʉngwa pɨ ɨkʉʉ, wɔsa anɔ Damasɛkɛ, inani, ɓa꞊nɔngakɨa yaka iɓomu ɨyɛ Asɔɓɨɨ a꞉tambanaka jɛnɛ ɓɔ kɨa.› 11Tɨa ndʉ magou kɔta ngelengele ngʉkɔnanɨ, ka꞉nakuto mesu, kʉdɔ, ɓombi ngʉɓa ta꞉ɓio naɓɔ ɓa꞉naɓoiso anɔ Damasɛkɛ, ɓɔnapotokeni tɨa ɨkɔndɔ.

12Inani, ya꞉ɓio nɔ mombi mʉngana ino ɓɔ Ananɨa, ɨya, a꞉ɓio mombi ata ngbingbii kʉ nɔ kɛkɛɛ, akpatanakɨa nɔ mapanʉ kɔ Musa. Ɨsaʉ ngɨangɔ ya꞉ɓio iɗo akɔ Ɓayuda ɓaɓomu ngʉɓɔ Damasɛkɛ. 13Mombi ngɨananɨ, ɛ꞉ka nɛmɨ akɔgbʉka, ɛ꞉maa anambamba asɛmɨ, nɔ, ɔ꞉nasigio ɓɔ: ‹Saulo, nduku asɛmɨ, Pʉnga ɓata anɨna!› Ta angbinga ngɨananɨ mesu kɔnagananɨa, nɔ, nɔ꞉pʉnga nayɔ anɨna. 14Kʉdɔ, Ananɨa ɔ꞉nasigio ɓɔ: ‹Asɔɓɨɨ ngɨa ɔ ɓaba, a꞉nachwa jɛnɛ ʉwɛ ta apɛɨ ɓɔ dɔ ɨmbɨa ɓʉkʉnda ngʉɓangɔ, nɔ dɔ, ɨna Baya yɛta ngbingbii ngɨangɔ, wɔka ta iso ngiangɔ ingainga. 15Dɔ ʉwɛ, wa꞊ɓio dɛmʉ ngɨangɔ aɓɨakɨa ɓombi ɓaɓomu, yaka ngɨyɛ wɛ꞉na pɛ, nɔ ɨyɛ, wɔ꞉ka pɛ. 16Nɔ tɨa ɨtakɨtakɨ ngɨyɛ, waɓɛtɨa tɨa ɨmanɨ? Ʉngwa ɨkʉʉ, ɓɨnaɓatisa, nɔ, wɔgyaɓanakɨa, nɔ ɓʉɓɨɓɨ ngʉɓɔsɔɔ, ɨngbaa akɔ nɨchwa ino ngɨangɔ.›

Makwɔɓɨɨ esoko Pɔlɔ anɨsa ati ɔ ɓombi ngʉɓa ɓangɔmʉ Ɓayuda

17Tɨa ndʉ na꞉tɔa anɔ Yelusalɛma, angbinga ngɨa na꞉ɓio-ɔɔ anɨta aɨkáá yɔ Asɔɓɨɨ, nɔ꞉kwa ɨkyɛmʉ mɛngana ndʉ lɨwɔtɔ. 18Nɛ꞉na Makwɔɓɨɨ, nɔ, ɔ꞉nasigio ɓɔ: ‹Ʉngwa gagaa anɔ Yelusalɛma aka, dɔ, ɓombi ɓa꞊ngɔbaya yaka ngɨyɛ wasugo akʉʉ ɔ asɛmɨ.› 19Kʉdɔ ɨmɨ, nɔkwakɨa tɨa ɓɔ: ‹Makwɔɓɨɨ, ɨɓɔ ɓanɨmbɨa iɗo ɓɔ ɨmɨ akɛ, na꞉ɓisa alɨkáá lɔ nɨta ngɨlɔ Ɓayuda akɔfeyo ɓombi ngʉɓa ɓanabaya ʉwe, naɓɔ anungiso aboloko, nɔ naɓo, aɓɛndiso pimbo. 20Nɔ ɓata akɔ angbinga ngɨa ɓa꞉wa-ɔɔ Itieni, dɔ, a꞉ɓio dɛmʉ wɔ Ɨsaʉ yɛta Iɗo ngɨyɛsɔɔ, ɨmɨ, na꞉ɓio kʉ ananɨ, nɔ, nɔmʉɓɛndɨa kʉɔ matindi ɓɔ ɔwo iɗo. Nɔ kʉ ɨmɨ akɛ, na꞉poto lɨpʉkʉ ngɨlɔ ɓombi ngʉɓa ɓamʉwa.› 21Kʉdɔ ɨyɔ Makwɔɓɨɨ ɔ꞉nasigio ɓɔ: ‹Sa, na꞊natʉma suo ɗu, amababa kɔ ɓombi ngakɔmɔ.›»

Pɔlɔ ɔɓɨnyanɔ ɓɔ a Mʉlɔma

22Ambaja ɔ ɓombi a꞉ɓio-sɨ ta anitekio Pɔlɔ aɓɔya ta aka asugo-ɔɔ yaka akʉʉ ɔ mababa kɔ ɓombi, kʉdɔ, ɓa꞉pʉnga nachokoo ɓɔ: «Munguseni! Muweni! Ɔkwananamʉ aɓio ɛsɨ ɔ ɨpá aka.» 23Ɓɛ꞉sɨnganaka ta nɔ nachokoo nɔ buso lɨpʉkʉ lɔ sɛsʉ ngɨleɓo ɛkʉʉ, nɔ panja iɓungu ɛkʉʉ apananiso ʉnganga.#22:23 pɔ ɓɔ, mʉkyananakɨa ngʉwɔnanɨ wakɔpananiso ʉnganga 24Ngama ɔ ɓasʉda e꞉njo ʉpanʉ ɓɔ ɓɨmaya Pɔlɔ amati ɔ aga ɔ ɓasʉda, nɔ, ɓɨmʉɓɛnda pimbo iɗo ambɔ ɨɓʉɓɨa ɨsɨ yɔ yaka ngɨyɛ ɓombi ɓa-ɔɔ nayɔ ayayo ɓanɨ. 25Yakamɛngana, ati ngɨa ɓa꞉mʉsanga-ɔɔ tɨa nayɔ aɓɛnda pimbo, Pɔlɔ ɔ꞉muɓokuo ngama ɔ ɓasʉda mʉngana ngɨa a꞉ɓio ɓɛmaɛ ananɨ ɓɔ: «Ya ndɨ iɗo inu aɓɛnda mwana ɔ ɨkʉmbʉ, Mʉlɔma wɔngɔ pimbo pɛɨ ngɨa ɓangɔkiomʉ-ɔɔ mʉkɔmbʉ ngʉangɔ?» 26Ndʉ sʉda ngɨananɨ ɔ꞉ka yaka ngɨyɛnɛnɨ, ɔ꞉sa anʉngakɨa ngama ngɨyeɓo ata mʉja ɔ ɓasʉda ɓɔ: «Wa-sɨ akʉnda kɨa tanɨ? Mombi ngɨa a ta mwana ɔ ɨkʉmbʉ Mʉlɔma aka!» 27Kʉdɔ, ngama ɔ ɓasʉda ɔ꞉mɨsɨnganɨa Pɔlɔ, nɔ, ɔ꞉muɓokuo ɓɔ: «Ha gue, anaɓɨa-sɨ, ʉwɛ wa ndɨ mwana ɔ ɨkʉmbʉ Mʉlɔma?» Pɔlɔ ɔ꞉mutosio ɓɔ: «Iii, na mwana ɔ ɨkʉmbʉ Mʉlɔma.» 28Ngama ɔ ɓasʉda ɔ꞉musigio ɓɔ: «Ɨmɨ ne꞉njo ɓagyɛgyɛ ɓaja anatana mwana ɔ ɨkʉmbʉ Mʉlɔma.» Kʉdɔ, ga Pɔlɔ nayɔ ɓɔ: «Yakamɛngana, ɨmɨ na mwana ɔ ɨkʉmbʉ Mʉlɔma ɨngbaa akɔnɔtanɨa.» 29Ta gagaa ngɨananɨ, ɓombi ngʉɓa ɓa꞉ɓio ahata nayɔ aɓɛnda, ɓɔ꞉nanjana. Nɔ gʉtʉ ta ngama ɔ ɓasʉda ngɨananɨ ɔ꞉kwa ɨyɔ tɨa kʉ ʉɓá, angbinga ngɨa ɛmbɨa-ɔɔ ɓɔ Pɔlɔ a mwana ɔ ɨkʉmbʉ Mʉlɔma, dɔ, a꞉ɓio ɓɔ ɔtitieni ɓɔ ɓɨmʉsanga nɔ ɓaselegeni.

Pɔlɔ ɛmayɔ mʉkɔmbʉ apɛɨ ɔ Ɓayuda

30Tɨa nekuɓa yɔngɔ, ngama ɔ ɓasʉda a꞉ɓio akʉnda anɨmbɨa ɓɔ Ɓayuda ɓɔnapɨɔ-sɨ Pɔlɔ nɔ mʉkɔmbʉ dɔtanɨ. Ɔtitio ɓɔ ɓimuɓooko ɓaselegeni, nɔ, esoko ɓangama ɓɔ ɓakumukumu, nɔ ɓombi ɓɔ ubua ngʉwɔ ɨkʉʉ, awolio ubua. Kʉdɔ, ɛ꞉ka nɔ Pɔlɔ, nɔ, ɔ꞉mimaiso ananɨ ati ɔ ɓombi ɓɔ ubua.

Currently Selected:

Mɨkyananakɨa 22: buuN

Highlight

Compare

Copy