Mɨkyananakɨa 21

Pɔlɔ ɔsɔ anɔ Yelusalɛma

1Ɨyɛ ndʉ ta꞉sɨana naɓɔ ɓanɨ, tɔ꞉tɔɗeto masʉa wɔ mipo, nɔ tɔ꞉sa anɔ Kosi, sɔkɔmʉ nɔ nɨmaaka anɔ ɨngbaa. Nekuɓa yɔngɔ, tɔ꞉ɓɔya anɔ Lɔdɔ, anɨngwa ananɨ, tɔ꞉sa anɔ Patala. 2Ananɨ ta꞉gbʉka masʉa wɔ mipo mʉngana wɔ꞉ɓieni atapʉa anisa anɔ Foiniki, kʉdɔ, tɔ꞉ɗeto nɔ tɔ꞉sa. 3Ɨyɛ ndʉ ta꞉pʉnga anɨna akɔ uji ngʉwɔ Kipulo, tɔ꞉hɛngʉa tɨa nɔ ʉgbaa nɔ mʉdʉʉ. Kʉdɔ, tɔ꞉yomo ɨngbaa nɔ ihoi yɔ Silia, tɔ꞉ɓɔya anɔ Tilo akɔ ida ngɨyɛ yɛ꞉tanɨa-ɔɔ masʉa anudiso lɨkyɛmʉ. 4Ta꞉kɨa ananɨ pɔsʉ mʉngana ɨhɔ nɔ Ɓakpata ngʉɓa ta꞉ɓʉgbʉka ananɨ. Ɨngbaa akɔ Mʉtɨma wɔta Tu, ɓombi ngʉɓɔnanɨ ɓɔ꞉sigio Pɔlɔ ɓɔ atɨsamʉ anɔ Yelusalɛma. 5Tɨa ndʉ pɔsʉ ngɨananɨ a꞉sio, tɔ꞉ngwɨa isu kyɛnda, tɨta nɨngwɨa. Ɓakpata ngʉɓɔnanɨ nɔ ɓoi, nɔ ɓana, ɨɓɔ ɓaɓomu, ɓɔ꞉tɨnapɨa aɓɔya aɓei ɔ gʉlʉ. Tɔ꞉gbʉkʉmɨa nɔ mau ananɨ amutii wɔ lisini, tɛ꞉ta Asɔɓɨɨ. 6Ambise ɔ njono lɨkɔndɔ, tɔ꞉ɗɛtɔ isu amati ɔ masʉa wɔ mipo, nɔ ɨɓɔ, ɓɔ꞉tɔwa tia kʉ andei.

7Ta꞉ngwa ananɨ anɔ Tilo anɨsa tɨa anɔ Tolemai. Kyɛnda ngɨyeso nɔ masʉa wɔ mipo ya꞉tɔdungbo tɨa ananɨ. Kʉdɔ, tɛ꞉nana nɔ ɓombi ngʉɓa ɓa꞉baya Yeso, nɔ, tɔ꞉kwaa naɓɔ ananɨ ɓisi mʉngana. 8Nekuɓa yɔngɔ, tɔ꞉ngwɨa kyɛnda, nɔ, tɔ꞉ɓɔya anɔ Kaisalia. Inani, tɔ꞉kumonio atɨ Filipo ɨya a mʉpananakɨa wɔ Ɨsaʉ yɛta iɗo, tɔ꞉kwaa tɨta ananɨ andɔngɔ. Ɨyɔ, a꞉ɓio kʉ mʉngana ɔ ɓadiakɛlɛ mɛɗɨanɛka ngʉɓa ɓa꞉ɓʉchwa anɔ Yelusalɛma. 9Gue ngɨananɨ, a꞉ɓio nɔ ɓana ɓeɓoi ɓɔgɨna ɓaʉnabi ɓɔngɔ, ʉɓa, ɓa꞉tɨkwekweyo ɨgbɛ anʉngaka yaka anɨngwa atɨ Asɔɓɨɨ. 10Ta꞉kɨa ananɨ makwaa maja. Angbinga ngɨa ta꞉ɓio-ɔɔ ananɨ, ɨgbɛ mɛngana ino ɓɔ Agabɔ, a꞉ngwa anɔ Yudɛa, anɨka ananɨ. 11E꞉joo ati eso, ɔ꞉sɨka muki wɔ ɨɓʉnɨ ngʉwɔ Pɔlɔ, nɔ, ɔ꞉sangana nawɔ mɨtɨndɨ nɔ lɨkɔndɔ. Kʉdɔ, ɔ꞉sugo ɓɔ: «Ineni yaka ngɨyɛ Mʉtɨma wɔta Tu wasugo. Ɓayuda ɓa꞊sanga suo makwɔ ɔ muki ngʉwa anɔ Yelusalɛma ta ndʉ aka nɔsangana-ɔɔ aka, nɔ, ɓa꞊mʉgaba alɨkɔndɔ lɔ ɓombi ngʉɓa ɓangɔmʉ Ɓayuda.»

12Ɨyɛ ndʉ tɔ꞉ka yaka ngɨyɛnɛnɨ, isu ɨhɔ nɔ ɓanduku ɓɔ gʉlʉ ɔ Kaisalia, tɔ꞉mukikilikio Pɔlɔ ɓɔ atɨsamʉ ɓaka anɔ Yelusalɛma. 13Yakamɛngana, ga Pɔlɔ nesu ɓɔ: «Nákɔndɨa, nɔ, ahata nɛmɨ anikwiso ambamba a mʉtɨma ɓanɨ dɔtanɨ? Yɔɓieni nɨfanɨa kʉndʉ ingwo ngɨyɛsɛmɨ anɔ Yelusalɛma, akʉʉ ɔ ino yɔ Makwɔɓɨɨ Yeso, ɨmɨ na ta mʉndanɛ.» 14Ndʉ ayaa anʉka yaka ngayeso, kʉdɔ, ta꞉pipio isu asugo tɨa ɓɔ: «Ndʉ ya gɔ tii ɓanɨ, ɓʉkʉnda ɓɔ Makwɔɓɨɨ ɓɨkɨanɨa!»

15Ambise ɔ makwaa bele ngʉka ta꞉kwaa anɔ Kaisalia, tɔ꞉tambanakɨa kyɛnda nɔ tɔ꞉sa anɔ Yelusalɛma. 16Mukpekpe yɔ ɓakpata ngʉɓa ɓa꞉ngwa anɔ Kaisalia, ɓɔ꞉sa nesu anapɨa inani, ɓɔ꞉tiɓoiso atɨ Manasɔnɨ akɔ ɨda ngɨyɛ ta꞉ɓio-ɔɔ anɨsa akwala. Ɨyɔ, a꞉ɓio mombi ɔ Kipulo nɔ mʉkpata wɔ ɨjɛnɛ.

Pɔlɔ ɔsɔ anɔ Yelusalɛma anujonokio nɔ Yakɔɓɔ

17Ɨyɛ ta꞉ɓɔya anɔ Yelusalɛma, ɓombi ngʉɓa ɓa꞉baya Yeso ɓɔ꞉tɨtɛtɨa nɔ ɨgyagya. 18Nekuɓa yɔngɔ, isu ɨhɔ nɔ atɨ Pɔlɔ tɔ꞉sa atɨ Yakɔɓɔ aki ɓatataɓasie ɓaɓomu ngʉɓɔ kanisa ɓa꞉ɓio-ɛɛ ɓamɔmanɨɛ. 19Pɔlɔ ɔ꞉ɓinjekio lɨkɔndɔ, ɔ꞉ɓʉngakɨa yaka iɓomu tinetine, ɨyɛ, Asɔɓɨɨ a꞉kɨa ɨngbaa akɔ tɛa ngɨangɔ yɔ Pɔlɔ akʉʉ ɔ ɓombi ngʉɓa ɓa꞉baya Yeso ɓɔɓienimʉ Ɓayuda. 20Ɨyɛ ɓɔ꞉ka yaka ngɨyɛnɛnɨ, ɓɔ꞉bibiso Asɔɓɨɨ. Kʉdɔ, ɓɔ꞉musigio ɓɔ: «Ayoo, ɨna-sɨ aki Ɓayuda ɓaja nɔgbɛ ɓa꞉baya pɛ-ɛɛ Yeso, nɔ, ɓakɔkpata mapanʉ ngʉkɔ Musa nɔ kɛkɛɛ. 21Ɨnadɔ, ɓa꞉ɓʉɓɨa pɛ ɓɔ wapanɨa Ɓayuda ngʉɓa ati ɔ mababa kɔ ɓombi ngaɓɔmɔ ɓɔ ɓɨsɨa akyananakɨa mapanʉ ngʉkɔ Musa. Nɔ ga, ɓɨsɨa akio ɓana ɓeɓo magʉnɨ, nɔ, ɓɨsɨa akpataka ɓata gbali ɔ Ɓayuda. 22Ta꞊kɨa aka tɨa tanɨ? Dɔ, ɓɔ꞊ka ta ʉkanɨ ɓɔ wɛkɔ. 23Kʉ ananɨ, kɨa ta ndʉ tanɔwɛ anʉngɨa. Ta aka nɔ ɓombi ɓɔgɨna ʉɓa, ɓenjo agɔmɛ akɔ Asɔɓɨɨ. 24Sa ɨhɔ naɓɔ, nɔ, wɔkumonio ɨhɔ naɓo amʉgyaɓa amati ɔ ɨkáá yɔ Asɔɓɨɨ. Nɔ wenjo, ɓayaka ngʉɓa ɓanɨtanɨa, ɓɔ dɔ ɓɨsa ahoiso ndii. Kʉdɔ ɓombi ɓaɓomu ɓakwanana anɨmbɨa ɓɔ yaka ngɨyɛ ɓa꞉ɓio pɛ anʉnga akʉʉ asɔɔ, yangɔmʉ ingono. Nɔ ɓɛ꞊na ɓɔ gʉtʉ ta ʉwɛ ingainga, wa-sɨ ta akyananakɨa mapanʉ ngʉkɔ Musa. 25Tɨa akɔ ɓombi nga ɓɔmɔ ʉ꞉ɓa, ɓa꞉baya Yeso ɓɔɓienimʉ Ɓayuda, ta꞉ɓʉngakɨa pɛ amati ɔ ʉbalʉa yaka ngɨyɛ tɛ꞉maiso pɔngɔ. Ya꞉ɓio ɓɔ ɓatɨdyamʉ anjɨɓɔ ngɨa ɓaminjo ndʉ apɛpɛ akɔ ɓamʉngʉ ɓɔ majɛjɛ, pɔ nɨdya menike, pɔ nama ngɨa ɓamʉwa ɓɔmʉkienimʉ ɨmɨyɔ, nɔ, ɓatɨkɨamʉ muso.»

26Kʉdɔ, nekuɓa yɔngɔ, Pɔlɔ ɔ꞉sɨka ɓombi ɓɔgɨna ngʉɓɔnanɨ, nɔ, ɓɔ꞉sa ɨhɔ naɓo amʉgyaɓa. Mbise ɔ꞉kumonio amati ɔ aga ɔ ɨkáá yɔ Asɔɓɨɨ, animbiiso angbinga ngɨa mʉgyaɓa wasio-ɔɔ, nɔ ɨya, ɓenjo-ɔɔ apɛpɛ akʉʉ ɔ mombi nangana nangana ati ɔ eɓo.

Ɓɔfɔ Pɔlɔ amati ɔ ɨkáá yɔ Asɔɓɨɨ

27Ndɨ makwaa mɛɗɨanɛka ngʉkɔnanɨ ka꞉ɓio tɨa tinene asio, Ɓayuda ngʉɓa ɓɔ ihoi yɔ Ajia ɓɔ꞉mɨna Pɔlɔ amati ɔ ɨkáá yɔ Asɔɓɨɨ. Ɓɔ꞉pʉnga pɔpɨa ambaja ɔ ɓombi muɓomu yaka akʉʉ ɔ Pɔlɔ. Kʉdɔ ɓɔ꞉mʉfa, 28nɔ, ɓɔ꞉pʉnga nachokoo akɔsugo ɓɔ: «Inu Ɓaɨsalaɛlɛ, atɨkɨeni isingo! Mombi ngɨakɛ akɔpanɨa ɓombi ɓaɓomu nɔ akɔ ɓamʉa kʉ ɓaɓomu, mapanʉ ngʉka kayangiso Ɓaɨsalaɛlɛ, nɔ mapanʉ ngʉkɔ Musa, nɔ ɨkáá yɔ Asɔɓɨɨ ngɨyɛ. Nɔ ɓata ɨtakɨtakɨ ngɨyɛ, ɔ꞉kumoniso tɨa kʉ nɔ ɓombi ngʉɓa ɓangɔmʉ Ɓayuda amati ɔ ɨkáá yɔ Asɔɓɨɨ, akɔyanakiso ʉmʉwa wɔta tu ngʉa.» 29Ɓa꞉sugo ɓanɨ, dɔ, ɓɛ꞉na Tolofimo ngɨa a꞉ngwa anɔ Ɛfɛsɔ ɨɓɔ nɔ Pɔlɔ amati ɔ gʉlʉ, nɔ ɓa꞉ɓio ayongo ɓɔ Pɔlɔ ɔ꞉mʉmayɔ amati ɔ ɨkáá yɔ Asɔɓɨɨ.

30Gʉlʉ muɓomu ɛ꞉maana ga njataa, nɔ, ɓombi akɔchwɛa mabɔbɔ kʉ maɓomu, ɓɔ꞉mʉfa Pɔlɔ, nɔ ɓɔ꞉muɗuɗuo aɓei ɔ ɨkáá yɔ Asɔɓɨɨ, kʉdɔ, ɓa꞉kuto mamongu kɔngɔ. 31Ngbinga ngɨa ɓa꞉ɓio ahata nayɔ anɨwa, ɨsaʉ yɔ꞉tɔɓɔɨya ngama ɔ ambaja ɔ ɓasʉda akɔsugo ga yaka yɔyanakɔ anɔ Yelusalɛma muɓomu tɨa yanakanɨ. 32Gagaa ngɨananɨ, ɔ꞉sɨka ɓangama ɓɔ ɓasʉda ngʉɓa ɓa꞉ɓio ɛsɨ angɔ, ɨhɔ nɔ ɓasʉda, ɓɔ꞉sa bangʉ aki ambaja ɔ ɓombi a꞉ɓio-ɛɛ. Ɨyɛ ndʉ ɓɛ꞉na ngama ɔ ɓasʉda, ɨhɔ nɔ ɓasʉda, ɓɔ꞉sɨa-sɨ ɓɛnda Pɔlɔ ta sɨa. 33Kʉdɔ, ngama ɔ ɓasʉda ɛ꞉sɨngana tɨnene nɔ Pɔlɔ, ɔ꞉mʉfa, nɔ, ɔ꞉titio ɓɔ ɓɨmʉnga nɔ ɓaselegeni ɓapɨnɨ. Kʉdɔ, ɔ꞉ɓuɓokuo ɓɔ Pɔlɔ a-sɨ anɨ nɔ ɔkiɔ ɨmani. 34Yakamɛngana, amati ɔ ambaja ɔ ɓombi, ɓɔ꞉pʉnga tʉɓakɨa yaka ta gbaɨ. Ndʉ gbongbo a꞉ɓio tɨa mʉja, ngama ɔ ɓasʉda ɛ꞉mbɨamʉ ɓata ɓɔ yaka ngɨyɛnɛnɨ yɔkɨanɨɔ dɔtanɨ. Kʉdɔ, ɔ꞉titio ɓɔ ɓɨsa nɔ Pɔlɔ amati ɔ aga wɔ gʉlʉ ɔ ɓasʉda. 35Ɨyɛ Pɔlɔ a꞉ɓɔya inani nɔ tɨa aka ɓandaka-ɔɔ ɓɔ ga ga ga akumonio aɨkáá, ɓasʉda ɓɔ꞉mʉtʉmba tɨta tʉmba, dɔ, ambaja ɔ ɓombi a꞉ɓio ɔsɨkanakɨeni tɨa nɔgbɛ. 36Ambaja tɨta ambise angɔ, nɔ, tʉɓɨa ɓɔ: «Muweni ta nɨwa!»

Pɔlɔ akɔyaka apɛɨ ɔ ambaja ɔ Ɓayuda

37Ndʉ ɓa꞉ɓio tɨa nayɔ amaya aɨda ngɨyɛ aki ɓasʉda ɓa꞉ɓio-ɛɛ, Pɔlɔ ɔ꞉mɨta ngama ɔ ɓasʉda ngɨananɨ akɔsugo ɓɔ: «Yangɔ ndɨ pɔ adaa ngɨa nasugo gʉtʉ-sɨ kʉɔ yaka?» Ga ngama ɔ ɓasʉda nayɔ ɓɔ: «Wakyɛyo ndɨ Igiliki iyoni?» 38«Ambɨ ndɨ ʉwɛ akɛ, wa Mumisili ngɨa a꞉chwɛiso pɔngɔ gbongbo, nɔ, mɔma ɓombi ɓɔ ɗite ɛlɛfʉ ɓɔgɨna aɨsa?» 39Pɔlɔ ɔ꞉mutosio ɓɔ: «Ɨmɨ na Muyuda, na꞉nɔtanɨa anɔ Talɨsɔ, gʉlʉ ɔ ʉbɨba amati ihoi yɔ Kilikia. Nɔnɛtɔ ɓaka ɓɔ anasɨa ɓaka-sɨ nɨyakanaka nɔ ambaja ɔ ɓombi.» 40Ndʉ ngama ɔ ɓasʉda ngɨananɨ amutitio tɨa ɓɔ ɨyaka, Pɔlɔ ɛ꞉maa akʉʉ ɔ ʉmʉwa ngʉa ɓandaka-ɔɔ ɓɔ ga ga ga akumonio aida ngɨyɛ aki ɓasʉda ɓa꞉ɓio-ɛɛ, ɔ꞉ɓʉgbɛma nɔ ɨkɔndɔ, ɓɔ ɓɨgbaa ɓɔ woo. Ɨyɛ ndʉ ɓagbaa, kʉdɔ, ɔ꞉ɓʉngakɨa yaka nɔ Ibelenia ɓɔ:

Currently Selected:

Mɨkyananakɨa 21: buuN

Highlight

Compare

Copy