ЯтӀонэрэ Самуел 10
10
ЯпшӀэнэрэ шъхьэр
Ӏамонхэмрэ арамхэмрэ зэратекӀуагъэхэр
1Ащ ыуж охътэ тӀэкӀу тешӀагъэу Ӏамонмэ япачъыхьэ лӀи, ащ ыкъо Хъаныун пачъыхьагъум техьагъ. 2Арти «Ятэ къысфишӀагъэм пае Нэхъащ ыкъо Хъаныун гукӀэгъу фэсшӀын» ыӀуи, Даут Хъаныун ятэ зэрэщымыӀэжьым пае фэтхьаусхэнхэу лӀыкӀохэр ыгъэкӀуагъэх. Ау Даут илӀыкӀохэр Ӏамон хэгъэгум къызэкӀохэм, 3Ӏамон лӀышъхьэхэм язиусхьанэу Хъаныун раӀуагъ: «Уятэ лъытэныгъэу къыфишӀырэм пае тхьаусхакӀохэр Даут уадэжь къыгъэкӀуагъэхэу къыпшӀошӀа? Къалэм иӀоф зытет шъыпкъэр зэрагъэшӀэнышъ, етӀанэ зэхакъутэным паеп шъуӀуа Даут илӀыкӀохэр уадэжь къызкӀигъэкӀуагъэхэр?» 4Арти Хъаныун Даут илӀыкӀохэр аригъэубытхи, нэбгырэ пэпчъ ыжакӀэ икӀэлъэныкъо тыраригъэупсыкӀи, абгымэ анэсэу ящыгъын ӀэпакӀэхэр къыпаригъэупкӀхи къытӀупщыжьыгъэх. 5А къэбарыр Даут къызылъагъэӀэсыжьым, анапэ лъэшэу къытырахыгъэти, ахэм апигъэгъокӀхи, пачъыхьэм араригъэӀуагъ: «ШъужакӀэхэр къэкӀыжьыфэхэ Ерихъэу шъукъыдэси, етӀанэ шъукъэкӀожь».
6Ащ ыуж Даут зэрэфэмылъэгъухэрэр Ӏамонхэм нафэ къызафэхъум, къызгуащэнхэшъ, зыдагъэзэонхэм пае, Бэтрэхъобрэ Цэубэрэ ащыщ арамхэм лъэсэу дзэкӀолӀ нэбгырэ мин тӀокӀ, МэӀах ипачъыхьэ ицӀыфхэу нэбгырэ мин, Тэу щыщэу нэбгырэ мин пшӀыкӀутӀу къахащынхэшъ къаугъоинхэу цӀыфхэр аӀофтагъэх. 7А къэбарыр Даут зызэхехым израил дзэ хэшыпыкӀыгъэ пстэури игъусэу Иоаб заом ыгъэкӀуагъ. 8Ӏамонхэри къежьэхи ежьмэ якъалэ икъэлапчъэ дэжь къэуцугъэх, Цэубэрэ Рэхъобрэ къарыкӀыгъэ арамхэр, Тэурэ МэӀахрэ къарыкӀыгъэ лӀыхэр шъхьафэу шъофым къыщыуцугъэх.
9Пыидзэхэр ыпэкӀи ыужкӀи къызэрэпэуцугъэхэр Иоаб къызелъэгъум, Израилым идзэкӀолӀмэ анахь лӀыбланэхэр къахищхи арамхэм апигъэуцугъэх. 10Адрэ къэнагъэхэр Ӏамонмэ язэонхэм пае ыгъэуцунхэу ышэу Абищай афигъэзагъ. 11Иоаб ащ риӀуагъ: «Арамхэр сэщ нахь лъэшхэ зыхъукӀэ, укъыздеӀэщт; Ӏамонхэр ощ нахь лъэшхэ зыхъукӀэ, сыкъэкӀонышъ сыкъыбдеӀэщт. 12Зыгъэлъэш, тилъэпкърэ Тхьэм къытитыгъэ къалэхэмрэ апае зытэгъэгъэпыт. Зиусхьаным зэрэшӀоигъоу зэкӀэ ышӀэн ылъэкӀыщт». 13Ащ ыуж Иоаб къыгъэзэжьи, игъусэ дзэкӀолӀхэм къахэхьажьи арамхэм заор задеублэм, адрэмэ кӀатхъужьыгъ. 14Арамхэм ашъхьэ зэрэӀуахыжьыгъэр Ӏамонхэм къызалъэгъум, Абищай кӀэрыхъушъутыжьхи къалэм агъэзэжьыгъ. Арти Иоаб Ӏамонхэр къыбгынэхи Ерыусэлэм кӀуагъэ.
15Израил цӀыфхэр къызэратекӀуагъэхэр къызагурэӀом, арамхэр къэзэрэугъоижьыгъэх. 16Арти ХъэдадӀэзэр Пэрат псыхъом зэпырыдзыгъэу щыпсэурэ арамхэм алъигъакӀохи, ХъэдадӀэзэр идзэпащэу Щэубах ягъусэу, ахэр цӀыфпсэупӀэу Хъэлам къекӀолӀагъэх. 17Къэбарыр Даут зынагъэсым, зэкӀэ дзэкӀолӀхэр ащ къыугъойхи, Иордан къызэпырыкӀи, Хъэлам кӀуагъэ. Арамхэр Даут къыпэуцухи, къезэуагъэх. 18Арти израил цӀыфхэм защаухъумэзэ, арамхэр ечъэжьэжьыгъэх. Арамхэм якухэу зэоным фытегъэпсыхьагъэхэм афэдэу шъиблрэ шыу мин тӀокӀитӀурэ Даут зэхикъути, ядзэпащэу Щэубахи ыуӀагъэти, а чӀыпӀэм ар щылӀагъ. 19Израил цӀыфхэр къызэратекӀуагъэхэр ХъэдадӀэзэр зипэщэгъэ пачъыхьэмэ зэкӀэми къызагурэӀом, ахэр израил цӀыфхэм къяшӀухи, Ӏэрылъхьэ закъыфашӀыгъ. Ӏамонхэм ащ нахьыбэрэ адеӀэнхэкӀэ арамхэр щынэщтыгъэх.
Currently Selected:
ЯтӀонэрэ Самуел 10: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
