ЯтӀонэрэ Самуел 9
9
Ябгъонэрэ шъхьэр
Даутрэ Мэфибощэтрэ
1Ащ ыуж Даут къыӀуагъ: «Ионэтан ихьатыркӀэ Саул ибынхэм ащыщ горэм гукӀэгъу фэсымышӀыгъэу къэнагъа?» 2ЦыбэкӀэ еджэхэу Саул иӀумэт горэ щыӀагъэти, ащ къеджэхи Даут дэжь къащагъ. Даут ащ еупчӀыгъ: «Ора Цыбэр?» Адрэм къыриӀожьыгъ: «Сэры, сыуиӀумэт». 3Арти пачъыхьэм ащ риӀуагъ: «Саул ибынхэм ащыщ горэ псэуа? Тхьэм ихьатыркӀэ гукӀэгъу фэсшӀыщтыгъэ». Цыбэ пачъыхьэм къыриӀожьыгъ: «ЫлъэкъуитӀукӀэ лъащэу Ионэтан икӀалэ псэу». 4Пачъыхьэр ащ еупчӀыгъ: «Тыда ар зыдэщыӀэр?» Цыбэ пачъыхьэм къыриӀожьыгъ: «Ӏамиел ыкъо къалэу Лэудэбар дэс Махыр иунэ ис». 5Арти пачъыхьэу Даут Ӏамиел ыкъо Лэудэбар дэс Махыр лъигъакӀохи къаригъэщагъ. 6Саул ыкъо Ионэтан икӀалэу Мэфибощэт Даут дэжь къакӀуи, ыпашъхьэ зыщыридзыхи, чӀыгум нэс шъхьащэ къыфишӀыгъ. Даут ащ риӀуагъ: «Мэфибощэт!» Адрэм къыриӀожьыгъ: «Мары, сыуиӀумэт». 7Арти Даут ащ риӀуагъ: «Умыщын, уятэу Ионэтан ихьатыркӀэ гукӀэгъу къыпфэсшӀыщт, уятэжъэу Саул ичӀыгухэр къыостыжьынхэшъ, сиӀанэ упэсэу сигъомылэ пшхыщт». 8Адрэм шъхьащэ къыфишӀи къыриӀуагъ: «Сэщ фэдэ хьэ лӀагъэм уеплъынэу уиӀумэт сыда зыхэтыр?»
9Арти пачъыхьэр Саул иӀумэтэу Цыбэ къеджи, ащ риӀуагъ: «Саул иунагъо ыӀэ илъыгъэ мылъкур зэкӀэ уизиусхьан ыкъом ыкъожьым есэтыжьы, 10ащ ичӀыгухэр ори, уикӀалэхэми, уипщылӀхэми фэжъулэжьых, уизиусхьан ыкъом ыкъожьым ышхын иӀэным пае лэжьыгъэр къэшъухьыжь; узиусхьан ыкъом ыкъожьэу Мэфибощэт сэ сиӀанэ ренэу пэсыщт». Цыбэ кӀэлэ пшӀыкӀутфрэ пщылӀэу нэбгырэ тӀокӀырэ иӀагъ. 11Цыбэ пачъыхьэм риӀуагъ: «Сизиусхьан иӀумэт къыриӀорэр зэкӀэ уиӀумэт ыгъэцэкӀэщт». Пачъыхьэм ыкъохэм афэдэу Мэфибощэт ащ иӀанэ пэсыгъ. 12МихэкӀэ еджэхэу Мэфибощэт шъэожъые иӀагъ. Цыбэ иунагъо исхэр зэкӀэ Мэфибощэт иунэӀутыгъэх. 13Джаущтэу Мэфибощэт Ерыусэлэм дэсыгъ, сыда пӀомэ пачъыхьэм иунэ ренэу щышхэщтыгъ. Ар ылъэкъуитӀукӀи лъэщагъэ.
Currently Selected:
ЯтӀонэрэ Самуел 9: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
